ពលរដ្ឋ​ទទូច​ដល់​រដ្ឋាភិបាល​ជួយ​ដោះស្រាយ​បញ្ហា​បំណុល​ដែល​កំពុង​គំរាមកំហែង​ដល់​ជីវភាព​ពួកគាត់

ដោយ ខែ សុណង
2021-07-11
Share
ពលរដ្ឋ​ទទូច​ដល់​រដ្ឋាភិបាល​ជួយ​ដោះស្រាយ​បញ្ហា​បំណុល​ដែល​កំពុង​គំរាមកំហែង​ដល់​ជីវភាព​ពួកគាត់ ទិដ្ឋភាព​មកយកសំណាក​ម្ដុំ​ផ្សារ​ទួលពង្រ ខណ្ឌ​សែនសុខ រាជធានីភ្នំពេញ កាល​ពី​ថ្ងៃទី២២ ខែ​មេសា ឆ្នាំ​២០២១។
Photo Provided

ប្រជាពលរដ្ឋ​ដែល​ជំពាក់​បំណុល​គ្រឹះស្ថាន​មីក្រូហិរញ្ញវត្ថុ ធនាគារ និង​បុគ្គល​ឯកជន ទទូច​ដល់​រដ្ឋាភិបាល​ជួយ​ដោះស្រាយ​បញ្ហា​បំណុល​ដែល​កំពុង​គំរាមកំហែង​ដល់​ជីវភាព​ប្រជា ពលរដ្ឋ ស្របពេល​ពួកគាត់​កំពុង​បាត់បង់​ការងារ និង​ប្រាក់ចំណូល​ស្ទើរ​ទាំងស្រុង​ដោយសារ​វិបត្តិ​ជំងឺ​កូវីដ-១៩​។ មន្ត្រី​សង្គម​ស៊ីវិល​មើល​ឃើញ​ថា ពលរដ្ឋ​នឹង​ប្រឈម​ភាព​អត់ឃ្លាន ពលកម្ម​កុមារ ចំណាកស្រុក ការ​លក់​ដី​ដោយ​បង្ខំ និង​ការរំលោភ​សិទ្ធិមនុស្ស ដោយសារតែ​វិបត្តិ​បំណុល​នេះ។ ប្រជាពលរដ្ឋ​ត្អូញត្អែរ​ពី​ទុក្ខ​លំបាក​ផ្នែក​ជីវភាព អំឡុង​ពេល​ជំងឺ​កូវីដ១៩ ពីព្រោះ​ពួកគាត់​ត្រូវ​រក​ប្រាក់​ដោះស្រាយ​ជីវភាព​ផង និង​សង​ម្ចាស់​បំណុល​ផង​។ ពួកគាត់​បារម្ភ​ពី​ការ​រឹបអូស​ទ្រព្យសម្បត្តិ និង​ដីធ្លី ជា​ពិសេស​ភាព​តានតឹង​នៅក្នុង​គ្រួសារ​ដោយសារ​បញ្ហា​បំណុល។

ប្រជា​ពលរដ្ឋ​រស់នៅ​ខេត្ត​កណ្តាល លោកស្រី លាស់ សុខនា រៀបរាប់​ថា លោកស្រី​បាន​ខ្ចី​ប្រាក់​ពី​មីក្រូហិរញ្ញវត្ថុ​ខ្នាត​តូច​តាម​ភូមិ ចំនួន​៤​លាន​រៀល ឬ​១​ពាន់​ដុល្លារ ដោយ​ត្រូវ​បង់​ត្រឡប់​ជាង​៨០​ដុល្លារ​ក្នុង​មួយ​ខែ ដោយ​យក​មក​ព្យាបាល​ជំងឺ​បេះដូង។ លោកស្រី​កំពុង​បារម្ភ​រឿង​គ្មាន​លទ្ធភាព​បង់​សងបំណុល​ទៅ​មីក្រូហិរញ្ញវត្ថុ​វិញ ព្រោះ​រោងចក្រ​ដែល​លោកស្រី​ធ្វើការ​ត្រូវ​បាន​ផ្អាក​មួយ​រយៈ អំឡុង​ពេល​ជំងឺ​កូវីដ​១៩ ខណៈ​គ្រួសារ​លោកស្រី​កំពុង​រស់នៅ​ទាំង​ត្រដាបត្រដួស​។ លោកស្រី​ប្រាប់​ថា ពេល​ខ្លះ​មន្ត្រី​ឥណទាន​បាន​ប្រើ​ពាក្យ​សម្ដី​មិន​សមរម្យ ដែល​លោកស្រី​ត្រូវ​បង្ខំចិត្ត​ខ្ចីប្រាក់​ឯកជន ដែល​មាន​ការប្រាក់​ខ្ពស់​ដើម្បី​បង្វិល​សង​គ្រឹះស្ថាន មីក្រូហិរញ្ញវត្ថុ​វិញ​។ ស្ត្រី​រូប​នេះ អំពាវនាវ​ឲ្យ​រដ្ឋាភិបាល រួម​ទាំង​គ្រឹះស្ថាន​មីក្រូហិរញ្ញវត្ថុ​អនុគ្រោះ​ដល់​ប្រជាពលរដ្ឋ​ដោយ​ផ្អាក​បង់ប្រាក់​សង​រយៈពេល​សមរម្យ​ណាមួយ៖ «ពេល​ហ្នឹង​ខ្ញុំ​ទាល់ច្រក​អត់​មាន​អី​ដោះស្រាយ​នឹង​គេ​មានតែ​យក​លុយ​រដ្ឋ ដល់ពេល​ឥឡូវ​អត់​មាន​កន្លែង​នៅ យាយ​ឱ្យ​នៅ​យាយ​ហ្នឹង​អត់​ជាប់​បងប្អូន​ទេ ខ្ញុំ​ពិបាក​ខ្លាំង​ជួន​ណា​ខ្វះខាត​ម្ហូប​អីចឹង​ខ្ញុំ​បបរ​ហូប​អី​ក៏​មាន​ជួនណា​ខ្លះ​ចឹង​ទៅ​ឆក់​លុយ​ឯកជន​យក​ទៅ​បង់​ឱ្យ​គេ​ខ្លះទៅ​ខ្ញុំ​ខ្វះខាត​ខ្លាំង​ណាស់»

ស្រដៀង​គ្នា​នេះ​ដែរ ប្រជា​ពលរដ្ឋ​រស់នៅ​ស្រុក​បន្ទាយស្រី ខេត្ត​សៀមរាប លោកស្រី ទ្រា មុំ ថ្លែង​ថា មន្ត្រី​គ្រឹះស្ថាន​មីក្រូហិរញ្ញវត្ថុ បាន​ណែនាំ​លោកស្រី​ឱ្យ​ខ្ចីប្រាក់​ឯកជន​ជាង​១​ពាន់​៣​ដុល្លារ (.៣៥០) ដើម្បី​បង់​ផ្តាច់​កម្ចី​ពី​ស្ថាប័ន​របស់​គេ​។ លោកស្រី​បញ្ជាក់​ថា ប្រាក់កម្ចី​ឯកជន​នេះ​បាន​រុញច្រាន​គ្រួសារ​លោកស្រី ឱ្យ​រង​ទុក្ខ​លំបាក​ដោយ​ផុងខ្លួន​កាន់តែ​ជ្រៅ ទៅ​នឹង​បំណុល​ដែល​មាន​អត្រា​ការប្រាក់​ខ្ពស់​។ លោកស្រី​ស្នើ​រដ្ឋាភិបាល​ជួយ​សម្របសម្រួល ឬ​ពន្យារ​ការ​បង់​ការប្រាក់​មួយ​រយៈ​សិន ដោយសារ​ស្ថានភាព​ប្រជាពលរដ្ឋ​កំពុង​ជួប​បញ្ហា​លំបាក៖ «ប្លង់ដី​នោះ​ខ្ញុំ​គិតថា​បើសិន​ពីរ​នាក់​ម៉ែ​ខ្ញុំ​ទៅ បើ​សិនណា​ថ្ងៃ​ហ្នឹង​គេ​ហៅ​ពីរ​នាក់​ម៉ែ​ផ្ដិត​មេដៃ​ទាំង​ម៉ែ​និង​ខ្ញុំ ប្រសិនបើ​ខ្ញុំ​បាន​ផ្តិត​ដឹង​អស់​ដី​យូរ​ណាស់​ហើយ​តែ​ខ្ញុំ​អត់​ផ្ដិត រក​អី​ស្លឹក​នេះ​ស្លឹក​នោះ​មាន​ល្ហុង​មាន​ស្លឹង​ផ្ទី​អី​ខ្ញុំ​កាត់​លក់​បាន​មួយ​ពាន់ ពីរ​ពាន់​រៀល​ទៅ​គ្រាន់​បាន​ទិញ​អង្ករ​ហូប»

វិទ្យុ​អាស៊ីសេរី​មិន​អាច​ទាក់ទង​អ្នកនាំពាក្យ​ក្រសួង​សេដ្ឋកិច្ច និង​ហិរញ្ញវត្ថុ លោក មាស សុខសេន​សាន អគ្គនាយក​បច្ចេកទេស​ធនាគារជាតិ អ្នកស្រី ជា សិរី និង​អ្នកនាំពាក្យ​សមាគម​មីក្រូហិរញ្ញវត្ថុ លោក កាំង តុងងី ដើម្បី​បកស្រាយ​រឿង​នេះ​បាន​ទេ​នៅ​ថ្ងៃទី​១០ កក្កដា ដោយ​ទូរស័ព្ទ​ចូល ពុំ​មាន​អ្នក​ទទួល។

ប៉ុន្តែ​ប្រធាន​សមាគម​ធនាគារ​នៅ​កម្ពុជា និង​ជា​ម្ចាស់​ធនាគារ​អេស៊ីលីដា លោក អ៊ិន ចាន់នី ធ្លាប់​ប្រាប់​វិទ្យុ​អាស៊ីសេរី​ថា ធនាគារ និង​គ្រឹះស្ថាន​មីក្រូហិរញ្ញវត្ថុ​មាន​គោលការណ៍​របស់​ខ្លួន​ក្នុង​ការ​ជួយ​គាំទ្រ​ដល់​អតិថិជន និង​បាន​អនុវត្ត​តាមច្បាប់​។ លោក​ថ្លែង​ថា ការ​ផ្តល់​ឱ្យ​ប្រជាពលរដ្ឋ​បាន​ប្រើប្រាស់​ហិរញ្ញវត្ថុ​កន្លង​មក​នោះ គឺជា​ផ្នែក​មួយ​នៃ​ការគោរព​សិទ្ធិមនុស្ស​ទៅ​វិញ​ទេ។

ក្រុម​អង្គការ​សិទ្ធិមនុស្ស មើល​ឃើញ​ថា ធនាគារ និង​គ្រឹះស្ថាន​មីក្រូហិរញ្ញវត្ថុ​ជា​ច្រើន​នៅ​កម្ពុជា នៅតែ​បន្ត​ទទួល​បាន​ប្រាក់​ចំណេញ ក្នុង​អំឡុង​ពេល​នៃ​ការ​រាតត្បាត​ជំងឺ​កូវីដ​-១៩ ខណៈ​ដែល​អ្នក​ខ្ចីប្រាក់​រាប់​សែន​នាក់ បាន​បាត់បង់​ប្រាក់ចំណូល ហើយ​ប្រជាពលរដ្ឋ​កំពុង​ជួប​ការ​លំបាក​ក្នុង​ការ​បន្តជីវិត​រស់​នៅ។

នាយរង​ទទួលបន្ទុក​ផ្នែក​ឃ្លាំមើល​សិទ្ធិមនុស្ស​នៃ​អង្គការ​លីកាដូ លោក អំ សំអាត មាន​ប្រសាសន៍​ថា វិបត្តិ​បំណុល​នេះ កំពុង​រុញ​ច្រាន​ពលរដ្ឋ​ជា​ច្រើន ឱ្យ​ប្រឈម​បាត់បង់​ដីធ្លី ទ្រព្យសម្បត្តិ និង​ខ្ចីបុល​ពី​ឯកជន​ដែល​មាន​ការប្រាក់​ខ្ពស់​ដើម្បី​សងបំណុល ជាដើម​។ លោក​យល់​ថា និន្នាការ​កើនឡើង​នៃ​បំណុល​នេះ អាច​នឹង​បណ្តាល​ឱ្យ​មាន​ការរំលោភ​បំពាន​សិទ្ធិមនុស្ស​ជាច្រើន​ករណី រួមមាន​ការ​បង្ខំ​ឱ្យ​លក់​ដី ការ​កេងប្រវ័ញ្ច​កម្លាំង​ពលកម្ម​កុមារ និង​ការ​ធ្វើ​ចំណាកស្រុក​ដើម្បី​ដោះបំណុល​ជាដើម៖ «មីក្រូហិរញ្ញវត្ថុ​កម្ចី​ឥណទាន​នេះ​អ្នក​វិនិយោគ​ដែល​វិនិយោគ​ជាមួយ​ដូចជា​ធនាគារ​នៅ​សហគមន៍​អឺរ៉ុប សហរដ្ឋអាមេរិក​ដែល​ធ្វើការ​វិនិយោគ​ឱ្យ​មីក្រូហិរញ្ញវត្ថុ ឬ​ធនាគារ​នេះ​ដើម្បី​លើកកម្ពស់​ជីវភាព​របស់​ប្រជាពលរដ្ឋ តែ​កម្ចី​ហ្នឹង​ក្លាយ​ជា​បំណុល​វ័ណ្ឌក ប្រជា​ពលរដ្ឋ​លក់​ដី​លក់​ធ្លី លក់​ទ្រព្យសម្បត្តិ​ដើម្បី​សង​អាហ្នឹង​វា​ខុស​អំពី​គោលបំណង​ហើយ ត្រូវតែ​មាន​ការសម្រួល​ណាមួយ​សម្រាប់​អ្នក​ខ្ចី»

ចាប់តាំងពី​ឆ្នាំ​២០១៩ មក​អង្គការ​លីកាដូ (Licadho) និង​អង្គការសិទ្ធិមនុស្ស​ដៃគូ​មួយចំនួន បាន​ចេញ​ផ្សាយ​ជា​សាធារណៈ​នូវ​របាយការណ៍​ចំនួន ៣​លើក​រួច​មក​ហើយ​ដើម្បី​បង្ហាញ​ពី​ការរំលោភ​សិទ្ធិមនុស្ស​ក្នុង​វិស័យ​មីក្រូហិរញ្ញវត្ថុ និង​អំពាវនាវ​ឲ្យ​រដ្ឋាភិបាល ចាត់វិធានការ​ដោះស្រាយ​ទុក្ខ​លំបាក​របស់​ប្រជាពលរដ្ឋ​។ ទោះជា​យ៉ាងណា រដ្ឋាភិបាល លោក ហ៊ុន សែន និង​ស្ថាប័ន​ផ្តល់​ប្រាក់កម្ចី មិន​ទាន់​មាន​ដំណោះស្រាយ​ជា​ដុំកំភួន​ណាមួយ​ដើម្បី​ជួយ​ពលរដ្ឋ​ដល់​អ្នក​ជំពាក់​បំណុល​ដែល​កំពុង​ស្រែក​ដង្ហោយ​សុំ​ការ​ជួយ​សង្គ្រោះ​ទាំងនោះ​នៅឡើយ​ទេ​។ អង្គការ​សង្គម​ស៊ីវិល​បញ្ជាក់​ថា​ប្រជាពលរដ្ឋ​កម្ពុជា​ដែល​ជា​អ្នក​ខ្ចីប្រាក់ គួរ​មាន​សិទ្ធិ​ទទួល​បាន​ការ​អនុគ្រោះ បើ​ពុំ​នោះ​ទេ បញ្ហា​បំណុល​នេះ នឹង​នាំ​ឲ្យ​ប្រជាពលរដ្ឋ​ជាច្រើន បន្ត​ប្រឈម​នឹង​ភាព​អត់ឃ្លាន ពលកម្ម​កុមារ ចំណាកស្រុក ការ​លក់​ដី​ដោយ​បង្ខំ និង​ការរំលោភ​សិទ្ធិមនុស្ស​ជាច្រើន​ទៀត៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល