សហគ្រាសធុនតូច-មធ្យមខេត្តព្រះសីហនុរកមធ្យោបាយធ្វើអោយអាជីវកម្មបានជោគជ័យ
2016.12.16
គណៈកម្មការមូលបត្រកម្ពុជា សហការជាមួយសម្ព័ន្ធសមាគមសហគ្រាសធុនតូច និងមធ្យមខេត្តព្រះសីហនុ រួមគ្នាអនុវត្តទិសដៅរួម ដែលជាមធ្យោបាយធ្វើអោយអាជីកម្មបានជោគជ័យ និងមានកំណើនប្រកបដោយស្ថិរភា។ ម្ចាស់សហគា្រសធុនតូច និងមធ្យមក៏មានឱកាសលើកឡើងពីការលំបាកដែលពួកគេកំពុងជួបប្រទះ។
គណៈកម្មការមូលបត្រកម្ពុជា និងម្ចាស់សហគ្រាសធុនតូច និងមធ្យម រំពឹងថា បញ្ហាដែលពួកគេជួបប្រទះមួយចំនួនអាចនឹងដោះស្រាយបាននៅក្រោយទទួលបានបទពិសោធន៍ពីសិក្ខាសាលា "ដំណើរឆ្ពោះទៅរកកំណើនអាជីវកម្មប្រកបដោយស្ថិរភាព" ដែលមានវិស័យឯកជនជិត ១០០សហគ្រាស និងក្រុមហ៊ុនចូលរួម។
សិក្ខាសាលានេះរៀបចំដោយគណៈកម្មការមូលបត្រកម្ពុជា សហការជាមួយសម្ព័ន្ធសមាគមសហគ្រាសធុនតូច និងមធ្យម សាខាខេត្តព្រះសីហនុ នៅថ្ងៃសុក្រ ទី១៦ ខែធ្នូ និងមានគោលបំណងជំរុញឲ្យការធ្វើអាជីវកម្មមានការរីកចម្រើន ហើយអាចប្រកួតប្រជែងផលិតផល ទាំងទីផ្សារក្នុងស្រុក និងក្រៅស្រុកប្រកបដោយគុណភាពនៅថ្ងៃអនាគត។
អគ្គនាយករងនៃគណៈកម្មការមូលបត្រកម្ពុជា លោក សុខ ដារ៉ា បានថ្លែងថា សិក្ខាសាលានេះជាការចែករំលែកនូវបទពិសោធន៍សម្រាប់កសាងសមត្ថភាពធ្វើអាជីវកម្មធុនតូច និងមធ្យមនៅកម្ពុជា ក្នុងការរៀបចំអភិបាលកិច្ចសាជីវកម្ម និងរបាយការណ៍ហិរញ្ញវត្ថុដែលមានបទដ្ឋានស្របតាមក្រុមហ៊ុនចុះបញ្ជីត្រឹមត្រូវ ដើម្បីធានាដល់កំណើននៃការធ្វើអាជីវកម្មប្រកបដោយចិរភាព និងមានសមត្ថភាពប្រកួតប្រជែងទីផ្សារក្នុងស្រុក ក្នុងតំបន់ និងអន្តរជាតិ។
លោក សុខ ដារ៉ា ស្នើដល់ម្ចាស់ធ្វើអាជីវកម្មសហគ្រាសធុនតូច និងមធ្យម នាខេត្តព្រះសីហនុ បើមានចម្ងល់ដែលក្រុមហ៊ុន ឬសហគ្រាសរបស់ខ្លួនកំពុងជួបប្រទះ ឬមានបញ្ហាប្រឈមទាំងការងារបច្ចេកទេស ហិរញ្ញវត្ថុ និងបញ្ហាផ្លូវច្បាប់ជាដើម ដាក់ជូនគណៈកម្មការមូលបត្រកម្ពុជា ជួយប្រឹក្សាយោបល់៖ «សិក្ខាសាលានេះជាកិច្ចចាប់ផ្ដើមនៃការអនុវត្តអនុស្សរណៈយោគយល់គ្នា ដែលគណៈកម្មការមូលបត្រកម្ពុជា បានចុះជាមួយសម្ព័ន្ធសមាគមសហគ្រាសធុនតូច និងមធ្យមនាខេត្តព្រះសីហនុ កាលពីថ្ងៃទី២៩ ខែកញ្ញា ឆ្នាំ២០១៦។ សិក្ខាសាលានេះ រៀបចំឡើងដើម្បីចែករំលែកនូវបទពិសោធន៍ ចំណេះដឹងពាក់ព័ន្ធទាក់ទងការរៀបចំក្រុមហ៊ុនឲ្យរឹងមាំ ឲ្យមានដំណើរការល្អឲ្យមានរចនាសម្ព័ន្ធឲ្យមានអភិបាលកិច្ចសាជីវកម្ម ទាំងផ្នែកគ្រប់គ្រង ទាំងផ្នែកហិរញ្ញវត្ថុ អាចឲ្យក្រុមហ៊ុនបានត្រៀមខ្លួន និងបង្កើនសមត្ថភាពរបស់ក្រុមហ៊ុន ក្នុងការស្វែងរកហិរញ្ញប្បទាន ក៏ដូចជាចូលរួមវិនិយោគក្នុងទីផ្សារមូលបត្រកម្ពុជា»។
ប្រធានសម្ព័ន្ធសមាគមសហគ្រាសធុនតូច និងមធ្យមសាខាខេត្តព្រះសីហនុ លោកឧកញ៉ា វណ្ណ សុខហេង រំពឹងថា ឆ្លងកាត់សិក្ខាសាលាចែករំលែកបទពិសោធន៍ ដោយគណៈកម្មការមូលបត្រកម្ពុជា ឬក្រុមហ៊ុនទីផ្សារមូលបត្រកម្ពុជា នៅពេលនេះ នឹងផ្តល់ចំណេះដឹងដល់ម្ចាស់សហគ្រាសធុនតូច និងមធ្យមមួយចំនួន អាចយកទៅដោះស្រាយបញ្ហាប្រឈម ដែលពួកគេកំពុងជួបប្រទះ ឬការរាំងស្ទះនៃការធ្វើអាជីវកម្មនៅតាមសហគ្រាសនីមួយៗ។
លោក វណ្ណ សុខហេង បង្ហាញផលវិបាក ៧ចំណុច ដែលម្ចាស់សហគ្រាសធុនតូច និងមធ្យម ខេត្តព្រះសីហនុ កំពុងជួបប្រទះរួមមាន ការប្រកួតប្រជែងទីផ្សារគ្មានតម្លាភាព ការផលិត ឬផ្គត់ផ្គង់លើសតម្រូវការទីផ្សារ ខ្វះខាតបច្ចេកទេសចង្វាក់ផលិតកម្ម ខ្វះទំនុកចិត្តក្នុងការធ្វើអាជីវកម្មជាលក្ខណៈចង្កោម ចង្វាក់ផលិតកម្មខ្នាតតូចជាលក្ខណៈគ្រួសារគ្មានស្តង់ដារ មិនអាចផ្តល់ទំនុកចិត្តដល់អ្នកប្រើប្រាស់។ អ្នកប្រើប្រាស់ភាគច្រើនមានទំនុកចិត្ត ឬនិយមប្រើប្រាស់ផលិតផលបរទេស និងហិរញ្ញប្បទានសំបូរបែប ប៉ុន្តែខ្វះជំនាញធ្វើផែនការអាជីវកម្មឲ្យបានត្រឹមត្រូវ។
ត្រង់ចំណុចនេះ ប្រធានសម្ព័ន្ធសមាគមសហគ្រាសធុនតូច និងមធ្យមខេត្តព្រះសីហនុ លោកឧកញ៉ា វណ្ណ សុខហេង បានត្អូញត្អែរថា ចំពោះសេដ្ឋកិច្ចទីផ្សារសេរីបច្ចុប្បន្ននេះ គឺក្រុមហ៊ុនធំបានផ្ដួលក្រុមហ៊ុនតូចៗ។ ដូច្នេះធ្វើឲ្យម្ចាស់អាជីវកម្មខ្នាតតូច បានជួបផលវិបាកក្នុងការប្រកបអាជីវកម្ម ហើយនៅទីបញ្ចប់ការធ្វើអាជីវកម្មរបស់ពួកគេ បានត្រឹមរកប្រាក់ចំណូលតាមរយៈទទួលតែកម្រៃជើងសារប៉ុណ្ណោះ៖ «នេះជាការភ្ញាក់ផ្អើលរបស់សម្ព័ន្ធសមាគមសហគ្រាសធុនតូច និងមធ្យម ព្រោះដំបូងឡើងហៅថា មូលបត្រកម្ពុជា ឬទីផ្សារមូលបត្រ គឺសំដៅទៅលើស្ថាប័នធំៗ មានដូចជាកំពង់ផែ តំបន់សេដ្ឋកិច្ចពិសេស ឬក្រុមហ៊ុនដែលធំៗ ប៉ុន្តែនៅពេលយើងបានចូលរួមជាមួយសិក្ខាសាលារបស់គណៈកម្មការមូលបត្រកម្ពុជា ត្រូវស្ថាប័ននេះ បានជួយពង្រឹងដល់សហគ្រាសធុនតូច និងមធ្យម ខេត្តព្រះសីហនុ ដើម្បីវិវត្តន៍ខ្លួនចូលទៅក្នុងភាគហ៊ុន។ ដូច្នេះអ្វីដែលខ្ញុំបានគិត និងបានព្រាង គឺពួកខ្ញុំបានគិតថា នឹងចូលទៅក្នុងធ្វើជារបៀបភាគហ៊ុនប្រហែលជាដប់ឆ្នាំហើយ»។
ទោះយ៉ាងណា អ្នកជំនាញគណៈកម្មការមូលបត្រកម្ពុជា និងសម្ព័ន្ធសមាគមសហគ្រាសធុនតូច ឬមធ្យមសាខាខេត្តព្រះសីហនុ រំពឹងថា តាមរយៈការពិភាក្សាជាក្រុមនៅក្នុងសិក្ខាសាលាស្តីអំពី "ដំណើរឆ្ពោះទៅរកកំណើនអាជីវកម្មប្រកបដោយស្ថិរភាព" នឹងជំរុញឲ្យម្ចាស់ធ្វើអាជីវកម្មសហគ្រាសធុនតូច និងមធ្យមទាំងអស់ រួមសហការគ្នាធ្វើអាជីវកម្មតាមបែបចង្កោម ដោយរួមគ្នាផលិត រួមគ្នានាំចេញ រួមគ្នាប្រើប្រាស់ និងចូលរួមនៅក្នុងទីផ្សារមូលបត្រកម្ពុជា ជាមួយគ្នា នៅឆ្នាំ២០១៧ ខាងមុខ៕