ដំណើរការរថភ្លើងកម្ពុជា-ថៃ នៅតែស្ថិតក្នុងភាពមិនច្បាស់លាស់ បន្ទាប់ពីមេដឹកនាំប្រទេសទាំង២ បានជិះរថភ្លើងរួមគ្នាឆ្លងកាត់ព្រំដែន
2019.04.25
ដំណើរការផ្លូវរថភ្លើងឆ្លងកាត់ព្រំដែនកម្ពុជា-ថៃស្ថិតនៅក្នុងភាពមិនច្បាស់លាស់នៅឡើយទេ បើទោះបីជាថ្មីៗ នេះ មេដឹកនាំប្រទេសទាំង២បានជិះរថភ្លើងរួមគ្នាឆ្លងកាត់ព្រំដែនតាមច្រកទ្វារអន្តរជាតិប៉ោយប៉ែតជាការប្រកាសពីដំណើរផ្លូវរថភ្លើងនេះរួចហើយក្ដី ក៏មិនទាន់អាចបើកដំណើរបានដែរ។
មន្ត្រីក្រសួងសាធារណការនិងដឹកជញ្ជូនឱ្យដឹងថា ការយឺតយ៉ាវនេះដោយសារនៅមានបញ្ហាជាច្រើនទៀតនៅច្រកព្រំដែនប្រទេសទាំង២មិនទាន់បានដោះស្រាយរួចរាល់នៅឡើយ ប៉ុន្តែរថភ្លើងពីប៉ោយប៉ែតទៅភ្នំពេញនិងបើកដំណើរការនៅដើមខែឧសភាខាងមុខ។
មន្ត្រីសង្គមស៊ីវិលនៅខេត្តបន្ទាយមានជ័យ លើកឡើងថា ប្រជាពលរដ្ឋភាគច្រើននឹងមិនហ៊ានធ្វើដំណើររថភ្លើងនេះទេ ដោយសារមានល្បឿនយឺត និងព្រួយបារម្ភអំពីសុវត្ថិភាពតាមដងផ្លូវ។
ប្រធាននាយកដ្ឋានផ្លូវដែកកម្ពុជា លោក អ៊ុក អួក មានប្រសាសន៍ប្រាប់អាស៊ីសេរីថា តាមកិច្ចព្រមព្រៀងបានឯកភាពរវាងកម្ពុជា-ថៃកាលពីថ្ងៃទី២២មេសា គឺអាចបើកដំណើររថភ្លើងឆ្លងកាត់ព្រំដែនប្រទេសទាំង២បាន ក៏ប៉ុន្តែនៅខ្វះការឯកភាពជាមួយស្ថាប័នពាក់ព័ន្ធផ្សេងទៀត នៅច្រកទ្វារព្រំដែន ហើយប្រទេសទាំង២មិនទាន់ដោះស្រាយជាមួយស្ថាប័នទាំងនេះនៅឡើយ។ទោះជាយ៉ាងណាលោកថា ខាងកម្ពុជាកំពុងតែរៀបចំនីតិវិធីលើបញ្ហានេះដើម្បីឈានទៅរកដំណើររថភ្លើង នៅពេលខាងមុខ៖ «ដូចខ្ញុំបានលើកឡើងខាងដើម លុះត្រាបានចូលរួមពីស្ថាប័នផ្សេងៗទើបអាចឆ្លងកាត់ព្រំដែនបាន មិនមែនមានន័យថាព្រំដែនយើងអាចឆ្លងកាត់ភ្លាមៗបានទេ លុះត្រាតែចូលរួមពីស្ថាប័នផ្សេងៗដូចជាគយ ប៉ូលិសការពារព្រំដែន និងមន្ត្រីអន្តោប្រវេសន្ត ដែលជាមន្ត្រីត្រួតពិនិត្យរបស់របរផ្សេងៗទំនិញអីឆ្លងកាត់ព្រំដែន។បើចំពោះក្នុងស្រុកគឺយើងអាចរត់ភ្លាមៗបានអត់មានបញ្ហាទេនៅពេលយើងរៀនបច្ចេកទេសចប់សិន»។
លោកបន្តថាក្បាលរថភ្លើងមួយគ្រឿង និងទូរដឹកអ្នកដំណើរចំនួន ៤ទូរ ដែលរាជរដ្ឋាភិបាលថៃបានប្រគល់ឱ្យកម្ពុជាកាលពីថ្ងៃទី២២មេសានោះ មិនទាន់ប្រើការបាននៅឡើយទេ ដោយរង់ចាំមន្ត្រីជំនាញរបស់ថៃមកជួយបង្រៀនផ្នែកបច្ចេកទេសដល់មន្ត្រីផ្នែករថភ្លើងរបស់កម្ពុជាសិនទើបអាចយកទៅប្រើការបាន ព្រោះសព្វថ្ងៃកម្ពុជាមិនមានអ្នកជំនាញបើករថភ្លើងមួយនេះបានទេ។ទោះជាយ៉ាងណាលោកថា ចាប់ពីថ្ងៃដើមខែឧសភាខាងមុខទៅ ក្រុមហ៊ុន រ៉ូយ៉ាល់ រេលវេ (Royal RailWay) របស់លោក ឧកញ៉ាគិត ម៉េង និងបើកដំណើររថភ្លើងដឹកអ្នកដំណើរមួយជើងក្នុងមួយសប្ដាហ៍ពីភ្នំពេញទៅប៉ោយប៉ែត ខេត្តបន្ទាយមានជ័យ ដែលរត់ក្នុងល្បឿនពី ៣០ ទៅ ៣៥គីឡូម៉ែត្រក្នុងមួយម៉ោង។ ប៉ុន្តែលោកមិនបានបញ្ជាក់អំពីតម្លៃសំបុត្រអ្នកដំណើរម្នាក់ប៉ុន្មាននោះទេ៖ «ដូចខ្ញុំនិយាយខាងដើមអីចឹងខាងរដ្ឋយើងអត់មានកំណត់តម្លៃទេ ដោយសារតែផែនការបណ្ដុះបណ្ដាលអត់ទាន់ចប់ ហើយនៅពេលបណ្ដុះបណ្ដាលចប់យើងនឹងរៀបចំផែនអាជីវកម្មហើយសុំការអនុញ្ញាតពីក្រសួងក៏ដូចជាក្រសួងសេដ្ឋកិច្ចនិងហិរញ្ញវត្ថុ ដើម្បីកំណត់តម្លៃសំបុត្រ។ផ្លូវដែកយើងរត់តែអ្នកដំណើរសិនទេ ចំពោះទំនិញយើងអត់ទាន់និយាយទេ ដោយសារតែវាមានបែបបទច្រើនដែលត្រូវរត់ដឹកទំនិញ ហើយឥឡូវយើងអត់ទាន់មានក្បាលម៉ាស៊ីននិងទូររថភ្លើងនៅឡើយទេសម្រាប់រដ្ឋ ដោយសារតែយើងបានប្រគល់នាទីនេះទៅឱ្យក្រុមហ៊ុនទៅហើយ»។
មន្ត្រីសម្របសម្រួលសមាគមការពារសិទ្ធិមនុស្ស អាដហុក (Adhoc) ខេត្តបន្ទាយមានជ័យលោក ស៊ុំ ច័ន្ទគា លើកឡើងថា ការបើកដំណើរផ្លូវរថភ្លើងឡើងវិញនេះគ្រាន់តែ ជាការធ្វើឱ្យល្អមើល ក៏ប៉ុន្តែហាក់មិនសូវផ្ដល់ប្រយោជន៍ដល់ប្រជាពលរដ្ឋទូទៅនោះទេ ព្រោះពលរដ្ឋភាគច្រើនមិនហ៊ានជិះរថភ្លើងនេះទេ ដោយសារផ្លូវដែករបស់កម្ពុជាមិនមានស្តង់ដារ និងគ្មានរនាំងការពារសុវត្ថិភាពតាមផ្លូវឆ្លងកាត់ ដែលបង្កគ្រោះថ្នាក់ដល់អ្នកធ្វើដំណើរឆ្លងកាត់ផ្លូវដែកញឹកញាប់៖ «បើសិនជារថភ្លើងនឹងដាក់ទៅលឿនហើយមានចរាចរគ្រប់គ្រាន់និងមានតម្លៃថោកគឺពលរដ្ឋអាចប្រើប្រាស់សេវារថភ្លើងនេះហើយ ប៉ុន្តែបើល្បឿន៣០គីឡូម៉ែត្រក្នុងមួយម៉ោងគឺគ្មានអ្នកណាគេចង់ជិះទេ ព្រោះវាយឺតពេក គេសុខចិត្តប្រើម៉ូតូប្រើអីលឿនជាង លើកលែងតែអ្នកដឹកទំនិញធំៗគេប្រើ ប៉ុន្តែសម្រាប់ពលករនៅថៃគេមិនប្រើទេ ព្រោះទម្រាំទៅដល់ភ្នំពេញត្រូវចំណាយពេលដល់ទៅជិត២០ម៉ោងឯណោះ»។
លោកបន្តថា ប្រសិនបើក្រសួងមិនមានការកែលម្អផ្លូវដែកឱ្យបានប្រសើរទេ គឺនៅពេលបើកដំណើររថភ្លើងឆ្លងប្រទេសថ្ងៃខាងមុន អាចនឹងកើតមានគ្រោះថ្នាក់ចរាចរតាមផ្លូវរថភ្លើងកាន់តែច្រើនជាមិនខាន។
ប្រជាពលរដ្ឋនៅក្រុងប៉ោយប៉ែត លោក សេង អឿន ថ្លែងថា រូបលោកក៏ដូចជាប្រជាពលរដ្ឋនៅព្រំដែនខេត្តបន្ទាយមានជ័យ ត្រេកអរនៅពេលឃើញរដ្ឋាភិបាលកម្ពុជា-ថៃ បានបើកដំណើររថភ្លើងឆ្លងកាត់ព្រំដែនប្រទេសទាំង២ឡើងវិញ។ ក៏ប៉ុន្តែលោកអះអាងថា មិនហ៊ានធ្វើដំណើរតាមរថភ្លើងរបស់ខ្មែរទេ ព្រោះខ្លាចគ្រោះថ្នាក់តាមផ្លូវបណ្ដាលឱ្យបាត់បង់ជីវិត ព្រោះរថភ្លើងមិនទាន់បានដំណើរជាផ្លូវការផងជួបគ្រោះថ្នាក់ជាច្រើនករណីមកហើយនៅក្រុងប៉ោយប៉ែត៖ «សម័យនេះតាមការពិតត្រូវឱ្យជឿនលឿនជាងសម័យបូរាណ ប៉ុន្តែដល់មើលទៅការអភិវឌ្ឍន៍ដូចនៅយឺតខ្លាំង ហើយប្រជាពលរដ្ឋចាំមើលការអភិវឌ្ឍន៍ជាពិសេសពលករនៅថៃ ដោយពលករខ្លះក៏សើចសមត្ថកិច្ចខ្មែរដែលមិនចេះរៀបចំចរាចរផ្លូវឆ្លងកាត់រថភ្លើង ព្រោះពួកគាត់ឃើញរថភ្លើងមកដល់រនាំងបិទផ្លូវធ្លាក់ចំក្បាលសមត្ថកិច្ចនៅរង្វង់មូលច្រកប៉ោយប៉ែតពេលសាករថភ្លើងកាលពីថ្ងៃទី២១មេសា»។
កាលពីថ្ងៃទី២២ មេសា លោក ហ៊ុន សែន មេដឹកនាំរបបក្រុងភ្នំពេញ និងលោក ប្រាយុទ្ធ ចាន់អូចា (Prayut Chan O-cha) នាយករដ្ឋមន្ត្រីថៃ បានជិះរថភ្លើងរួមគ្នាឆ្លងកាត់ព្រំដែនប្រទេសទាំង២ តាមច្រកទ្វារអន្តរជាតិប៉ោយប៉ែត។ ខាងរាជរដ្ឋាភិបាលថៃបានប្រគល់ក្បាលរថភ្លើងប្រភេទDMU (Diesel Multi Unit) មួយគ្រឿង និងទូរដឹកអ្នកដំណើរចំនួន ៤ទូរ ជាជំនួយឥតសំណងដល់កម្ពុជា។
ផ្លូវរថភ្លើងពីចំណុចព្រំដែននៃស្រុកអារញ្ញប្រាថេត (Aranyaprathet) និងស្រុកអូរជ្រៅ ក្រុងប៉ោយប៉ែត គឺជាចំណុចតភ្ជាប់ផ្លូវរថភ្លើងភាគខាងជើងរបស់កម្ពុជា ឆ្ពោះទៅភ្នំពេញ ប្រវែង ៣៨៦គីឡូម៉ែត្រ ដែលត្រូវបានរាជរដ្ឋាភិបាលកម្ពុជាស្ដារឡើងវិញរួចរាល់ និងដាក់ឱ្យដំណើរការឡើងវិញ កាលពីចុងឆ្នាំ២០១៨។
អនុរដ្ឋលេខាធិការក្រសួងសាធារណៈការនិងដឹកជញ្ជូនលោក គង់ វិមាន មានប្រសាសន៍ប្រាប់អាស៊ីសេរីថា រថភ្លើងថៃផ្ដល់ជូនកម្ពុជា សម្រាប់ដឹកអ្នកដំណើរពីប៉ោយប៉ែត ទៅក្រុងបាត់ដំបង ដែលនឹងបើកដំណើរការក្នុងពេលឆាប់ គឺក្រោយពីបានសិក្សាផ្នែកបច្ចេកទេសរួចរាល់។ លោកបន្តថា ចំពោះដំណើរការផ្លូវរថភ្លើងឆ្លងដែនរវាងប្រទេសទាំង២ មិនទាន់កំណត់នឹងបើកដំណើរផ្លូវការនៅឆ្នាំណាច្បាស់លាស់នៅឡើយទេ៖ «រឿងនេះ វាពាក់ព័ន្ធក្រុមការងារបច្ចេកទេសរបស់ថៃ ហើយយើងអត់ហ៊ានលូកដៃលើការងារនេះសូមអធ្យាស្រ័យ។ បាទ! ខ្ញុំអត់បានទទួលព័ត៌មានរឿងហ្នឹងទេ។ ពេលណាមានព័ត៌មាននឹងអាចមានការផ្សព្វផ្សាយតាមរយៈប្រព័ន្ធព័ត៌មានតាមគេហទំព័ររបស់ក្រសួងសាធារណៈការនិងដឹកជញ្ជូន»។
កន្លងមករដ្ឋមន្ត្រីក្រសួងសាធារណការ និងដឹកជញ្ជូនលោក ស៊ុន ចាន់ថុល ចាត់ទុកការតភ្ជាប់ផ្លូវដែកកម្ពុជា និងថៃនេះថា ជាការរួមចំណែកអភិវឌ្ឍសេដ្ឋកិច្ចជាតិនៃប្រទេសទាំងពីរ អាស៊ាន និងមហាអនុតំបន់មេគង្គ។
រដ្ឋមន្ត្រីក្រសួងសាធារណការនិងដឹកជញ្ជូន កម្ពុជា និង ថៃ កាលពីថ្ងៃទី៦ ខែកក្កដា ឆ្នាំ២០១៨ បានឯកភាពលើកិច្ចព្រមព្រៀងរួមគ្នាអំពីការដឹកជញ្ជូនទំនិញតាមផ្លូវរថភ្លើងរវាងប្រទេសទាំងពីរ ប៉ុន្តែមិនបញ្ជាក់ពីមុខទំនិញដែលបានឯកភាពគ្នាមានអ្វីខ្លះនោះទេ។ កាលណោះ រដ្ឋមន្ត្រីក្រសួងមួយនេះបានអះអាងថា ភាគីថៃនឹងបន្តនីតិវិធីផ្ទៃក្នុងរបស់ខ្លួនឲ្យបានលឿន ដើម្បីជំរុញឲ្យភាគីទាំងពីរ អាចកំណត់កាលបរិច្ឆេទការចុះហត្ថលេខាលើកិច្ចព្រមព្រៀងនេះ ក្នុងពេលឆាប់ៗ។
កម្ពុជា-ថៃ បានអាក់ខានដំណើរផ្លូវរថភ្លើងតាំងបីឆ្នាំ១៩៧៣ មក ដោយសារសង្គ្រាមដែលបណ្ដាលឱ្យផ្លូវរថភ្លើងពីក្រុងសិរីសោភ័ណទៅប៉ោយប៉ែតជាប់ព្រំដែនថៃប្រវែង ៤៨គីឡូម៉ែត្រដាច់ខូចខាត។
ផ្លូវរថភ្លើងពីរាជធានីភ្នំពេញទៅក្រុងប៉ោយប៉ែត ខេត្តបន្ទាយមានជ័យ មានប្រវែង ៣៨៦គីឡូម៉ែត្រ ចំណាយអស់ថវិកាសាងសង់ជាង ៩៦លានដុល្លារអាមេរិក (៩៦.៦០០.០០០)។ លោក ស៊ុន ចាន់ថុល ធ្លាប់អះអាងថា គម្រោងអភិវឌ្ឍន៍នេះ គឺថវិការបស់ធនាគារអភិវឌ្ឍន៍អាស៊ី ហៅកាត់ថា អេ.ឌី.ប៊ី (ADB) ប្រមាណ ១៣លានដុល្លារ និងថវិកាបដិភាគរបស់របបក្រុងភ្នំពេញជាង ៨៣លានដុល្លារ (៨៣.០០០.០០០) អាមេរិក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។