កម្ពុជាអះអាងថារកប្រាក់ចំណូលបានពីចំណូលពន្ធគ្រប់ប្រភេទ សរុបប្រមាណ ៦ពាន់លានដុល្លារក្នុងឆ្នាំ២០២០ និង ២០២១ ប៉ុន្តែត្រូវចំណាយរហូតដល់ជាង ៨ពាន់លានដុល្លារប្រចាំឆ្នាំ២០២១។ តាមតួលេខនេះ កម្ពុជារកបាន ៧០ ប៉ុន្តែត្រូវចាយ ១០០។ ក្នុងឆ្នាំ២០២១ និងឆ្នាំ២០២២ កម្ពុជាត្រូវខ្ចីលុយបន្ថែម ជាង ២ពាន់លានដុល្លារក្នុងមួយឆ្នាំ បន្ថែមទៀត ដើម្បីបំពេញសេចក្តីត្រូវការនៃការចំណាយសរុបប្រចាំឆ្នាំ។
ឥឡូវបំណុលដែលកម្ពុជាជំពាក់បរទេស បានកើនឡើងដល់ជាង ៩ពាន់លានដុល្លារ ក្នុងឆ្នាំ២០២១ និងបន្តកើនឡើងរហូតដល់ជាង ១ម៉ឺនលានដុល្លារ នៅក្នុងឆ្នាំ២០២២។ បំណុលស្ទើរតែពាក់កណ្តាល គឺកម្ពុជាជំពាក់ម្ចាស់បំណុលចិន។ គ្រាន់តែថ្លៃការប្រាក់ក្នុងមួយឆ្នាំៗ ពីបំណុលទាំងនេះ គឺមាន ២៧,៧លានដុល្លារ។
តាមព្រឹត្តិបត្រស្ថិតិបំណុលសាធារណៈកម្ពុជា ឆ្នាំ២០២០ ដែលចេញផ្សាយកាលពីខែ មីនា ឆ្នាំ២០២១ របស់ក្រសួងសេដ្ឋកិច្ច ក្នុងរយៈពេល ២៧ឆ្នាំ គិតពីឆ្នាំ១៩៩៣ ដល់ចុងឆ្នាំ២០២០ គ្រាន់តែថ្លៃការប្រាក់ និងកម្រៃផ្សេងៗ ដែលកម្ពុជាបានបង់សងទៅម្ចាស់បំណុលបរទេសវិញ មានសុរប ៧៤៩,៤២លានដុល្លារហើយ។
ក្នុងឆ្នាំ២០២០ កន្លងទៅ កម្ពុជាបានលៃលកសងបំណុលនេះ បាន ៣៦០,៣០លានដុល្លារប៉ុន្តែក្នុងនោះគ្រាន់តែការប្រាក់ មានចំនួន ៩៣,៣៧លានដុល្លារ។
ទោះជាយ៉ាងនេះក្ដីមន្ត្រីរដ្ឋាភិបាល អះអាងដដែលៗ ថា បំណុលនេះនៅទាប ដែលមិនគួរឲ្យព្រួយបារម្ភ ហើយកម្ពុជានៅអាចជំពាក់បរទេសបានបន្ថែមទៀត។ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លោក ផាន់ ផល្លា ថ្លែងក្នុងសន្និសីទព័ត៌មានកាលពីថ្ងៃទី១៤ ខែធ្នូ អះអាងថា បើធៀបបំណុលកម្ពុជាជាមួយប្រទេសផ្សេងទៀត កម្ពុជាមិនទាន់ដល់វ័ណ្ឌកនោះទេ។ លោកអះអាងថា កម្ពុជាមិនមានបញ្ហាអ្វី ពាក់ព័ន្ធជាមួយនឹងលទ្ធភាពសងនោះទេ។
ផ្ទុយពីការអះអាងនេះ កម្ពុជាមានលទ្ធភាពសងបំណុលនេះ បានជាមធ្យមត្រឹមតែ ៧៨លានដុល្លារក្នុងមួយឆ្នាំ ដែលក្នុងនោះជិត ២៨លានដុល្លារ ជាការប្រាក់ ពោលគឺសងដើមបានតែ ៥០លានដុល្លារមួយឆ្នាំប៉ុណ្ណោះ។ តាមតួលេខនេះ ទោះបីសេដ្ឋកិច្ចកម្ពុជាល្អប្រសើរ ដូចមុនមានវិបត្តិជំងឺកូវីដ-១៩ ក៏កម្ពុជាត្រូវការរាប់សិបឆ្នាំទៅមុខទៀត ដើម្បីសងបំណុលនេះឲ្យអស់។ នេះនៅមិនទាន់គិតរឿងកម្ពុជាបន្តខ្ចីបុលថែមជារៀងរាល់ឆ្នាំនោះទេ។
បើទោះបីជាកម្រិតខ្ចីបុលរបស់កម្ពុជា ត្រូវស្ថាប័នហិរញ្ញវត្ថុអន្តរជាតិធំៗ វាយតម្លៃថា នៅមិនទាន់ឈានដល់កម្រិតប្រកាសហានិភ័យនៅឡើយក៏ដោយ ក៏ក្រុមអ្នកជំនាញ បង្ហាញពីក្តីបារម្ភថា បំណុលទាំងនេះភាគច្រើនប្រមូលផ្តុំ តែទៅលើតែម្ចាស់បំណុលចិនតែមួយ។ ពួកគេពន្យល់ថា ការណ៍នេះអាចធ្វើឱ្យកម្ពុជាបាត់បង់អធិបតេយ្យទៅឱ្យប្រទេសចិន ក្នុងករណីកម្ពុជាមិនអាចរើខ្លួនសងបំណុលរួចពីម្ចាស់បំណុលនេះ។
ក្រៅពីនេះ បើទោះបីជាកម្ពុជាអះអាងថា ខ្លួនមានលទ្ធភាពសងបំណុលបរទេសក៏ដោយ ក៏នៅរៀងរាល់ពេលដែលលោក ហ៊ុន សែន ជួបជាមួយមន្ត្រីជាន់ខ្ពស់បរទេស ជាពិសេស មន្ត្រីជាន់ខ្ពស់អាមេរិកាំង និងរុស្ស៊ី (Russia) លោក ហ៊ុន សែន តែងតែស្នើសុំប្រទេសទាំងនោះឱ្យលុបចោលបំណុលអតីតកាលទាំងអស់ ព្រមទាំងមិនភ្លេចស្នើសុំជំនួយពីបរទេសទាំងនោះឥតឈប់ឈរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។