ការធ្លាក់ចុះភ្ញៀវទេសចរទៅទស្សនាតំបន់អង្គរយ៉ាងគំហុក នៅរយៈពេល៦ កន្លងទៅនេះ ធ្វើឱ្យពលរដ្ឋខេត្តសៀមរាបខ្លះ បង្ខំចិត្តចាកចោលមាតុភូមិកំណើតទៅធ្វើការនៅក្រៅប្រទេស ដើម្បីរកប្រាក់ដោះបំណុល។
ពលរដ្ឋចាត់ទុកវិបត្តិសេដ្ឋកិច្ច និងបញ្ហាបំណុល នៅតែតាមលងបន្លាច ធ្វើឱ្យពួកគាត់មិនសូវចាប់អារម្មណ៍ ចូលរួមពិធីបុណ្យភ្ជុំបិណ្ឌចួបជុំក្រុមគ្រួសារ ដូចឆ្នាំមុនៗទេ។
ជារៀងរាល់ឆ្នាំឱ្យតែកៀកពិធីបុណ្យភ្ជុំបិណ្ឌ ពលរដ្ឋរស់នៅខេត្តសៀមរាបតែងចួបជុំបងប្អូន ធ្វើបុណ្យទានយ៉ាងសប្បាយរីករាយ ក៏ប៉ុន្តែពិធីបុណ្យប្រពៃណីជាតិឆ្នាំនេះ អ្នកភូមិមួយចំនួនបែរជាមានកង្វល់រឿងបញ្ហាបំណុល ហើយបង្ខំចិត្ត ចាកចោលស្រុកកំណើត ទៅធ្វើការនៅក្រៅប្រទេសយ៉ាងប្រថុយប្រថាន។
បើគេធ្វើដំណើរទៅតំបន់ជនបទ នៅរដូវបុណ្យកាន់បិណ្ឌឆ្នាំនេះ ក្នុងស្រុកប្រាសាទបាគង ស្រុកសូទ្រនិគម ស្រុកបន្ទាយស្រី និងស្រុកស្វាយលើ ខេត្តសៀមរាប ពុំសូវមានមនុស្សច្រើនកកកុញដូចឆ្នាំមុនៗឡើយ។ ក៏ប៉ុន្តែបែរជាឃើញផ្ទះអ្នកភូមិខ្លះ ដាក់ស្លាកលក់ដី និងលក់ផ្ទះច្រូងច្រាង ហើយដីស្រែចម្ការ របស់អ្នកភូមិខ្លះទៀត ក៏ដាក់ស្លាកលក់ជាបន្ទាន់ដែរ។
បើទោះបីជា អ្នកភូមិបង្ខំចិត្ត ដាក់ស្លាកលក់ទ្រព្យសម្បត្តិកេរឪពុកម្ដាយក្នុងតម្លៃថោកក្រោមទីផ្សារក្តី ក៏ពុំសូវមានអ្នកចាប់អារម្មណ៍សួរនាំរកទិញនោះដែរ។
ពលរដ្ឋរស់នៅស្រុកសូទ្រនិគម លោក គឹម សៃ ប្រាប់វិទ្យុអាស៊ីសេរី នៅថ្ងៃទី១១ តុលាថា ស្ទើរគ្រប់តំបន់ ពលរដ្ឋធ្វើចំណាកស្រុកស្ងាត់ភូមិ ដោយសារតែការប្រកបមុខរបរ ការងារ ក្នុងស្រុកបានបរាជ័យ។
លោកថា ស្ទើរតែគ្រប់ភូមិ ក្នុងស្រុកស្វាយលើ ដែលធ្លាប់មានមនុស្សអ៊ូអរ បែរជាស្ងាត់ឈឹង សូម្បីតែក្នុងពិធីបុណ្យកាន់បិណ្ឌក្តី។
លោក គឹម សៃ៖ «ភូមិណានោះរត់សឹងទៅទាំងអស់ គ្នាខ្វះខាត។ នឹកឃើញសេដ្ឋកិច្ចពីមុនធូរធារ គាត់រកបាន តែឥលូវសេដ្ឋកិច្ចធ្លាក់ចុះខ្លាំង ខ្លះគាត់ទៅទាំងគ្រួសារបណ្តោយ ខ្លះទាល់រកលុយបង់អង្គការ(ស្ថាប័នផ្តល់ប្រាក់កម្ចី)អត់បាន។ មុនធ្លាប់រកបាន ដល់សេដ្ឋកិច្ចធ្លាក់ គាត់ដោះស្រាយនៅប្រទេសគេសិន»។
បើក្រឡេកមើល ទិដ្ឋភាពពលរដ្ឋរស់នៅក្រុងសៀមរាបឯណោះវិញ ក៏ពុំសូវខុសគ្នាពីតំបន់ជនបទប៉ុន្មានដែរ។ ផ្សារទំនើប សណ្ឋាគារ និងកន្លែងផ្តល់សេវាកម្មទេសចរជាច្រើនទៀត បិទទ្វារជាបន្តបន្ទាប់ បណ្តាលឱ្យពលរដ្ឋជាច្រើនពាន់នាក់បាត់បង់ការងារ។
ស្ទើរតែគ្រប់ដងផ្លូវ ក្នុងក្រុងសៀមរាប មានលំនៅឋាន ដីធ្លី រថយន្ត ផ្ទះសម្បែងជាច្រើន បានបិទស្លាកលក់ ជាបន្ទាន់។
រីឯក្រុមហ៊ុនទទួលទ្រព្យបញ្ចាំង រួមមាន ប្លង់ផ្ទះ កាតគ្រីរថយន្ត ម៉ូតូ និងកង់ជាដើម ក៏មានអ្នកទៅដាក់ទ្រព្យសម្បត្តិបញ្ចាំច្រើនដែរ ដើម្បីយកប្រាក់ដោះបំណុលមួយគ្រា។
ប្រតិបត្តិករវិស័យទេសចរណ៍ លោក អាង ឆាល សង្កេតឃើញថា ពិធីបុណ្យភ្ជុំបិណ្ឌឆ្នាំនេះ ពលរដ្ឋភាគច្រើន ចាយវាយក្បិតក្បៀត ដោយសារពួកគាត់ពុំសូវមានថវិកាច្រើនដូចឆ្នាំមុនៗ។
លោកថា បច្ចុប្បន្នប្រាក់ចំណូលរបស់ពលរដ្ឋកំពុងធ្លាក់ចុះខ្លាំង ធ្វើឱ្យពួកគាត់ចួបការលំបាកច្រើន ហើយសូម្បីតែវត្តអារាម ក៏ពុំសូវមានពុទ្ធបរិស័ទច្រើនដែរ។
លោក អាង ឆាល៖ «អត់សូវមានមនុស្សទេ វត្តស្ងាត់ នៅតាមផ្លូវក៏អត់សូវមានមនុស្សច្រើនកុះករ អត់សូវមានទេ។ តាមអូណែលធ្លាប់មានមនុស្ស សួរ កក់បន្ទប់ពេញៗ ឥលូវអត់មានទេ»។
ពលរដ្ឋរស់នៅស្រុកស្វាយលើ ខេត្តសៀមរាប លោក សោម វុទ្ធី ឱ្យដឹងថា លោកកំពុងពិចារណា ទៅធ្វើការនៅប្រទេសថៃដែរ ដោយសារមុខរបរ ដែលមានប្រភពចំណូលពីវិស័យទេសចរនៅតែយ៉ាប់យឺន។
លោកយល់ថា ប្រសិនបើរដ្ឋាភិបាលចង់កាត់បន្ថយពលរដ្ឋធ្វើចំណាកស្រុក គួរតែកាត់បន្ថយទំនិញនាំចូលពីក្រៅប្រទេស ដោយបង្កើនការផលិតក្នុងស្រុក និងលើកកម្ពស់តម្លៃកសិផលក្នុងស្រុកឱ្យមានប្រសិទ្ធភាព។
លោក សោម វុទ្ធី៖ «កាលណាសេដ្ឋកិច្ចមិនដើរហើយ ការនាំចូលច្រើនជាងការនាំចេញ។ ស្រូវធ្វើបានច្រើន ចុះថោក អាស្រ័យលើឈ្មួញ ឋិតលើមាត់។ គេចង់ក្រឡាស់យ៉ាងម៉េចក៏បាន»។
ឆ្លើយតបរឿងនេះ អ្នកនាំពាក្យក្រសួងទេសចរណ៍ លោក តុប សុភ័គ មានប្រសាសន៍ថា បច្ចុប្បន្នភ្ញៀវទេសចរខេត្តសៀមរាប កំពុងឋិតក្នុងដំណាក់ការងើបឡើងវិញ ដោយមិនទាន់មានភ្ញៀវទេសចរច្រើននៅឡើយទេ ដោយក្នុងមួយថ្ងៃ មានភ្ញៀវចន្លោះពី ១ពាន់ ទៅ ១ពាន់ ៥រយនាក់ ប៉ុណ្ណោះ។
លោកបញ្ជាក់ថា ភ្ញៀវទេសចរនៅតិចតួចនៅឡើយ បើធៀបនឹងភ្ញៀវទេសចរមកទស្សនាតំបន់អង្គរកាលពីឆ្នាំ ២០១៩ មុនពេលផ្ទុះជំងឺកូវីដ-១៩ មានចន្លោះពី ៨ ពាន់ (៨.០០០) ទៅ ៩ ពាន់នាក់ (៩.០០០)។
លោកបន្ថែមថា ចាប់ពីខែតុលាទៅ អាចនឹងមានភ្ញៀវទេសចរណ៍កើនឡើង ក្នុងពេលដែលមានព្រលានយន្តហោះអន្តរជាតិខេត្តសៀមរាបថ្មី បើកដំណើរការ។
លោក តុប សុភ័គ៖ «ក្រសួងទេសចរណ៍មិនបាននៅស្ងៀមទេ ខំប្រឹងប្រែងណាស់ ជាពិសេសឯកឧត្តមរដ្ឋមន្ត្រី សុខ សូកេន លោកប្រឹងប្រែងណាស់ ធ្វើការទាក់ទង សម្របសម្រួលជាមួយក្រសួងស្ថាប័នពាក់ព័ន្ធទាំងអស់ ក្នុងការស្តារវិស័យទេសចរណ៍ទូទាំងប្រទេស ក៏ដូចជាខេត្តសៀមរាប»។
ទោះយ៉ាងណា មន្ត្រីសង្គមស៊ីវិល បន្តទទូចឱ្យរដ្ឋាភិបាល ស្ដារប្រជាធិបតេយ្យឡើងវិញ ដើម្បីបើកផ្លូវឱ្យអ្នកវិនិយោគ និងភ្ញៀវទេសចរមកពីប្រទេសលោកសេរី មកកម្ពុជាកាន់តែច្រើន ដើម្បីលើកស្ទួយសេដ្ឋកិច្ចជាតិ កាត់បន្ថយពលរដ្ឋចំណាកស្រុក។
ជុំវិញរឿងនេះ ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង បារម្ភថា ការថយចុះភ្ញៀវទេសចរ នឹងប៉ះពាល់ធ្ងន់ធ្ងរដល់ប្រព័ន្ធសេដ្ឋកិច្ចកម្ពុជា ជាពិសេសពលរដ្ឋរស់នៅខេត្តសៀមរាប។ លោកគិតថា រដ្ឋាភិបាលគួរមានវិធានការ អន្តរាគមន៍ឱ្យកន្លែងផ្តល់សេវាកម្មទេសចរណ៍ទាំងអស់ គ្រប់គ្រងតម្លៃសមរម្យ ទាំងសេវាស្នាក់នៅ ម្ហូបអាហារ និងសន្តិសុខសុវត្ថិភាព ជាដើម។
លោក យង់ គិមអេង៖ «គេមកគេចាយវាយថោក គេនឹងសម្រុកមកច្រើន ហើយយើងអាចគិតពីលទ្ធភាពទាំងអស់ហ្នឹង ដើម្បីទាក់ទាញភ្ញៀវទេសចរមកកម្ពុជាឡើងវិញ»។
កាលពីចុងខែកញ្ញា លោកនាយករដ្ឋមន្ត្រី ហ៊ុន ម៉ាណែត បានថ្លែងថា កម្ពុជាបានកត់ត្រាភ្ញៀវទេសចរអន្តរជាតិចំនួន ៣ លាន ៥ សែននាក់ក្នុងរយៈពេល ៨ខែដំបូង នៃឆ្នាំ២០២៣ កើនឡើងជាង ២៥០ភាគរយ (២៥០,៨ ) បើធៀបនឹងឆ្នាំមុន។
ក៏ប៉ុន្តែក្រសួងទេសចរណ៍អះអាងថា ចំនួនភ្ញៀវទេសចរថយចុះច្រើន បើធៀបនៅឆ្នាំ ២០១៩ មុនពេលមិនទាន់ផ្ទុះជំងឺកូវីដ១៩ ដែលកាលនោះ មានភ្ញៀវទេសចរទស្សនាតំបន់អង្គរជិត ១ ម៉ឺននាក់ ក្នុងមួយថ្ងៃៗ បើធៀបនឹងបច្ចុប្បន្នមានតែជាង ១ ពាន់នាក់ប៉ុណ្ណោះ៕
កំ ណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។