ពលរដ្ឋខ្មែរមួយចំនួនប្រកបរបរសុំទាននៅប្រទេសថៃដោយសារជីវភាពក្រីក្រ
2024.09.24
ស្ត្រីក្នុងរូបនេះ កំពុងអង្គុយសុំទានគេ ក្នុងផ្សារមួយ នៅប្រទេសថៃ ថតកាលពីថ្ងៃទី១៩ ខែកញ្ញា ឆ្នាំ២០២៤។
រូប៖ ពីពលរដ្ឋ
ពលករខ្មែរមួយចំនួនបង្ខំចិត្តប្រថុយជីវិតឆ្លងដែនទៅសុំទាននៅប្រទេសថៃ ដើម្បីរកប្រាក់ដោះស្រាយជីវភាពគ្រួសារ ដោយសារជីវភាពក្រីក្រ ហើយគ្មានការងារធ្វើនៅក្នុងស្រុក។ បច្ចុប្បន្ន របរនេះ ពួកគាត់រកប្រាក់ចំណូលបានតិចតួច ហើយប្រឈមនឹងអាជ្ញាធរថៃចាប់ដាក់គុកនិងបញ្ជូនត្រឡប់ទៅកម្ពុជាវិញ។
ពលករខ្មែរមួយចំនួនលើកឡើងស្រដៀងគ្នាថា ពួកគាត់មិនចង់ប្រកបរបរសុំទាននោះទេ ប៉ុន្តែដោយសារគ្មានជម្រើស ព្រោះគ្មានប្រាក់ដោះស្រាយជីវភាព។
អង្គុយសុំទាននៅក្នុងផ្សារមួយនៅទីក្រុងប៉ាតាយ៉ា (Pattaya) ប្រទេសថៃ លោកស្រី ធី រៀបរាប់ថា លោកស្រីមិនចង់ប្រកបរបរនេះទេ តែដោយសារជីវភាពក្រីក្រ ហើយអត់ការងារធ្វើនៅកម្ពុជា ក៏សម្រេចចិត្តប្រថុយជីវិតធ្វើដំណើរឆ្លងដែនតាមរយៈមេខ្យល់ក្នុងតម្លៃ ៤ពាន់ (៤.០០០) ឬស្មើប្រមាណ ១២០ដុល្លារ ដោយខុសច្បាប់មកសុំទាននៅប្រទេសថៃ។ ស្ត្រីវ័យ ៦៨ឆ្នាំរូបនេះបន្ថែមថា របរនេះលោកស្រីត្រូវកាត់កេរ្តិ៍កាត់ខ្មាស ហើយប្រឈមនឹងអាជ្ញាធរថៃចាប់ដាក់ពន្ធនាគាររាល់ថ្ងៃ។ កាលពីពេលកន្លងទៅ អាជ្ញាធរថៃធ្លាប់ចាប់លោកស្រីដាក់ពន្ធនាគាររយៈពេល ១៥ថ្ងៃ និងបានបញ្ជូនត្រឡប់ទៅកម្ពុជាវិញម្ដងរួចមកហើយ។ ប៉ុន្តែ លោកស្រីបានឆ្លងដែនមកប្រកបរបរមួយនេះជាថ្មីទៀត កាលពីប្រមាណ ៣ខែកន្លងទៅ។
លោកស្រី មានស្រុកកំណើតនៅខេត្តពោធិ៍សាត់ ហើយសព្វថ្ងៃលោកស្រីជួលបន្ទប់តម្លៃ ៣ពាន់បាត ឬស្មើប្រមាណ ៩០ដុល្លារ ស្នាក់នៅជាមួយពលករខ្មែរម្នាក់ទៀត នៅជាយក្រុងប៉ាតាយ៉ា។ សព្វថ្ងៃ លោកស្រីចំណាយពេលអង្គុយសុំទានប្រមាណ ៥ម៉ោង បានប្រាក់ពី ១០០ ទៅ ៣០០បាត ឬប្រហែលពី ៣ ទៅ ៩ដុល្លារ ក្នុងមួយថ្ងៃប៉ុណ្ណោះ។
លោកស្រី ធី៖ «នេះបើអត់មានកន្លែងអង្គុយផង ទៅខាងណោះគេដេញ ទៅខាងនេះគេដេញ ហើយគេប្ដឹងប៉ូលិសឱ្យចាប់។ ហ្នឹងហើយ គេចាប់ហើយមកទៀត។ ឥឡូវ បើទៅស្រុកខ្មែរ បើខ្ញុំចាស់ហើយធ្វើអីកើត។ វាចេះតែធ្វើកើតហើយ មើលចៅមើលអីឱ្យគេ។ តែយើងទៅធ្វើអី បើខ្ញុំចំណាស់នេះហើយ»។
ប្រហាក់ប្រហែលគ្នានេះដែរ ពលករខ្មែរមានស្រុកកំណើតនៅខេត្តពោធិ៍សាត់ម្នាក់ទៀត លោកស្រី វឿន ថ្លែងថា លោកស្រីមកសុំទានតាមរយៈមេខ្យល់នាំឆ្លងដែនចូលប្រទេសថៃ តម្លៃ ៤ពាន់ ឬស្មើប្រមាណ ១២០ដុល្លារដោយខុសច្បាប់។ លោកស្រីបញ្ជាក់ថា មូលហេតុដែលមកសុំទាននៅក្រៅប្រទេសបែបនេះ ដោយសារអត់ការងារធ្វើនៅឯប្រទេសកំណើត។ ស្ត្រីវ័យ ៦២ឆ្នាំរូបនេះ ទើបតែចូលមកប្រទេសថៃប្រហែល ១ខែមកនេះ ដោយរកប្រាក់ចំណូលពីការសុំទានបានប្រមាណពី ១០០ ទៅជាង ២០០បាត ឬស្មើប្រហែលពី ៣ ទៅ ៦ដុល្លារក្នុងមួយថ្ងៃ។
លោកស្រី វឿន៖ «ខ្ញុំសួរគេទៅគេវាមករកបាន មួយថ្ងៃបួនប្រាំរយ។ យើងចាស់ហើយ មិនដឹងធ្វើការអី។ កូនមិនឱ្យមកទេ តែយើងតែមក ព្រោះយើងនៅជាមួយកូន ហូបជាមួយកូន វាមិនដែលស្រួលទេ។ បើនិយាយពីពិបាក វាពិបាកហើយ តែយើងមិនដឹងធ្វើម៉េច ចេះតែរកៗ ទៅ។ មួយថ្ងៃបាន ២០០អីហ្នឹង។ ចុះបើជ្រុលថាមក មិនដឹងធ្វើម៉េច។ ជ្រុលតែមកហើយ មិនដឹងទៅណា មកណី ចាស់ចំណាស់នេះ មានអ្នកណាជួយយើង។ រឿងគេចាប់ ខ្លាចចេះតែខ្លាចហើយ បើគេចាប់ទៅខ្មែរទៅ»។
លោកស្រីឱ្យដឹងថា នៅតំបន់ពួកគាត់ស្នាក់នៅមានពលរដ្ឋខ្មែរប្រកបរបរសុំទានចំនួន ៤នាក់ ជួលបន្ទប់ស្នាក់នៅដាច់ដោយឡែកពីគ្នា។ ពួកគាត់ចេញពីបន្ទប់ទៅសុំទាន នៅម៉ោង ៣រសៀល រហូតដល់ម៉ោង ៨យប់ ទើបត្រឡប់មកបន្ទប់វិញ។
ពុំមានតែអ្នកមនុស្សចាស់នោះទេ ដែលមកប្រកបរបរសុំទាននៅប្រទេសថៃនោះ ស្ត្រីវ័យពេញកម្លាំងក៏ប្រកបរបរមួយនេះដែរ។ អ្នកសុំទានខ្លះ បានយកកូនអាយុក្រោម ៥ឆ្នាំ ទៅសុំទានដើរជាមួយតាមផ្លូវ ដែលមានមនុស្សធ្វើដំណើរច្រើន។
ពលរដ្ឋម្នាក់មានស្រុកកំណើតនៅខេត្តបន្ទាយមានជ័យ ថ្លែងសុំមិនបញ្ចេញឈ្មោះថា លោកស្រីបានយកកូន២នាក់ ដោយម្នាក់អាយុជិត ១ខួប និងម្នាក់ទៀត អាយុជាង ៣ឆ្នាំ ដើរសុំទានតាមផ្លូវនៅទីក្រុងបាងកក (Bangkok) ប្រទេសថៃ។ ស្ត្រីវ័យ ៣០ឆ្នាំរូបនេះ ប្រកបរបរសុំទានប្រមាណ ៦ខែហើយ ដោយសារនៅប្រទេសថៃអត់ការងារធ្វើ ស្របពេលដែលប្ដីលោកស្រីមានជំងឺប្រចាំកាយមិនអាចធ្វើការងារធ្ងន់បាន ក៏សម្រេចចិត្តនាំកូនទាំង ២នាក់ដើរសុំទានរកប្រាក់ដោះស្រាយជីវភាពប្រចាំថ្ងៃ។ លោកស្រីថា មួយរយៈនេះ លោកស្រីរកបានប្រាក់តិចតួច ពោលគឺបានប្រមាណពី ១០០ ទៅ ១៥០បាត ឬស្មើនឹងប្រមាណពី ៣ ទៅ ៥ដុល្លារក្នុងមួយថ្ងៃ។ លោកស្រីថា ថ្ងៃខ្លះ ជនជាតិថៃដាក់ទានជាទឹកដោះគោ នំ និងអាហារមួយចំនួន ដើម្បីហូបចុកប្រចាំថ្ងៃ។
«សូម្បីតែលោក (សង្ឃ) ឃើញយើងអត់ លោកនិមន្តបិណ្ឌបាត្រ គាត់ចិត្តបុណ្យ ក៏គាត់ឱ្យយើងដែរ នំកូន ឱ្យទឹកដោះគោ។ ខ្ញុំស្ពាយកូនជាប់នឹងទ្រូងរហូត អាអូនក៏ដឹកដៃវា អាអាយុបីឆ្នាំ។ ពេលមើលមុខខ្ញុំស្រុកទឹកភ្នែក ធ្វើម៉េចបើយើងវាអត់មានតែទ្រាំ តស៊ូលំបាក លំបាកខ្លួនឯងមិនសូវអីទេ តែស្រណោះកូន កូនតូចគ្នាអត់ដឹងអី។ខ្ញុំខ្មាសអៀនខ្មាសគេ តែមិនដឹងធ្វើម៉េចយើងត្រូវតែតស៊ូទ្រាំដើម្បីឱ្យបានកូនធំ»។
ប៉ុន្តែយ៉ាងណាក្ដី ក្រុមពលករទាំងនេះព្រួយបារម្ភខ្លាចអាជ្ញាធរថៃចាប់ពួកគាត់ដាក់គុក និងបញ្ជូនត្រឡប់ទៅកម្ពុជាវិញ ដែលប៉ះពាល់ដល់ជីវភាពរស់នៅរបស់ពួកគាត់។
ក្ដីបារម្ភនេះ ធ្វើឡើងបន្ទាប់ពីមួយរយៈនេះ ពួកគាត់ឃើញអាជ្ញាធរថៃបានចុះចាប់អ្នកសុំទានជាបន្តបន្ទាប់។កាលពីថ្ងៃទី៤ ខែសីហា អាជ្ញាធរថៃនៅខេត្តប៉ាថុមថានី (Pathum Thani) ជាប់ទីក្រុងបាងកកបានចាប់បុរសអ្នកសុំទានម្នាក់ ដែលអាជ្ញាធរថៃអះអាងថា ជាជនជាតិខ្មែរ ក្នុងអាការៈខ្វាក់ខ្វិនដើរមិនរួច និងមានផ្ទៃមុខដូចត្រូវទឹកអាស៊ីដ។ ក្រោយការសួរនាំ អាជ្ញាធរថៃថា បុរសនោះបានសុំទាននៅប្រទេសថៃ ជាច្រើនឆ្នាំមកហើយ ដោយធ្វើពុតជាពិការ ដើម្បីសុំទាន ដោយក្នុងមួយថ្ងៃគាត់អាចរកប្រាក់បានជាង ៥ពាន់បាត ឬប្រហែល ១៥០ដុល្លារ។ អាជ្ញាធរថៃបានបញ្ជូនបុរសសុំទានរូបនេះ ត្រឡប់មកកម្ពុជា វិញ និងដាក់ឈ្មោះចូលទៅក្នុងបញ្ជីខ្មៅ ហាមចូលប្រទេសថៃ។
ដោយឡែក កាលពីថ្ងៃទី៣០ ខែសីហា អាជ្ញាធរថៃបានចាប់ស្ត្រីខ្មែរ ៣នាក់ ដែលមានអាយុចន្លោះពី ១៩ ដល់ ៤៣ឆ្នាំ ក្នុងទីក្រុងបាងកក (Bangkok) បន្ទាប់ពីអាជ្ញាធររកឃើញពួកគេបានធ្វើដំណើរចូលទឹកដីថៃ ដោយខុសច្បាប់ និងបានបន្លំខ្លួនសុំទាននៅតាមដងផ្លូវ នៅពេលថ្ងៃ ហើយពេលយប់ ពួកគេបានស្លៀកពាក់ឡូយឆាយ ដើរចាយលុយហ៊ឺហា។ អាជ្ញាធរថៃ ថា ពួកគេម្នាក់ៗ អាចសុំទានបាន ក្នុងមួយថ្ងៃ ប្រមាណ ៣ពាន់បាត ឬស្មើជិត ១០០ដុល្លារ។ អាជ្ញាធរថៃ បានចោទប្រកាន់ពួកគេ ពីបទឆ្លងដែនខុសច្បាប់ និងបង្កើតរូបភាពមិនសមរម្យដល់អ្នកទេសចរ ដែលមកទស្សនាប្រទេសថៃ។
វិទ្យុអាស៊ីសេរីមិនអាចទាក់ទងមន្ត្រីស្ថានទូតខ្មែរប្រចាំនៅប្រទេសថៃ និងអ្នកនាំពាក្យក្រសួងការងារនិងបណ្ដុះបណ្ដាលវិជ្ជាជីវៈ លោក កត្តា អន ដើម្បីសាកសួរអំពីបញ្ហានេះបានទេនៅថ្ងៃទី១៩ខែកញ្ញា ដោយទូរស័ព្ទតែគ្មានអ្នកទទួល។
ជុំវិញរឿងនេះមន្ត្រីផ្នែកការពារសិទ្ធិពលករចំណាកស្រុក នៃអង្គការសង់ត្រាល់ (CENTRAL) ប្រចាំនៅប្រទេសថៃ លោក លឹង សុផុន មានប្រសាសន៍ថា ការសុំទាននៅប្រទេសថៃជាអំពើខុសច្បាប់ ហើយប្រឈមនឹងអាជ្ញាធរថៃចាប់ដាក់គុក។ លោកស្នើដល់រដ្ឋាភិបាលកម្ពុជាថា គួរដោះស្រាយបញ្ហានេះឱ្យបានឆាប់ ដោយបង្កើតការងារនៅក្នុងស្រុកឱ្យបានច្រើន និងស្វែងរកទីផ្សារលក់កសិផលជូនកសិករក្នុងតម្លៃសមរម្យ។ លោកថា ប្រសិនបើរដ្ឋាភិបាលមិនដោះស្រាយបញ្ហានេះទេនោះ នឹងធ្វើឱ្យពលរដ្ឋមួយចំនួន បន្តប្រកបរបរមួយនេះទៀត ដែលធ្វើឱ្យកេរ្តិ៍របស់កម្ពុជាកាន់តែអាក្រក់នៅលើឆាកអន្តរជាតិ។
«សំណូមពរឱ្យស្ថាប័នពាក់ព័ន្ធហ្នឹង ជួយសម្រាលទុក្ខផង ដើម្បីពួកគាត់ហ្នឹងរស់នៅក្នុងប្រទេសកំណើតមិនចាំបាច់ចាញ់បោកមេខ្យល់ ហើយប្រសិនបើគាត់ចាញ់បោកមេខ្យល់គេ សូមឱ្យស្ថាប័ន ជាពិសេស ស្ថាប័នរដ្ឋសហការ ដើម្បីជួយពួកគាត់ហ្នឹង ឱ្យមានសិទ្ធិក្នុងការរស់នៅជាប្រជាពលរដ្ឋ ដែលមានភាពថ្លៃថ្នូរ»។
របាយការណ៍ក្រសួងអភិវឌ្ឍន៍សង្គម និងស្ថិរភាពមនុស្សរបស់ថៃឱ្យដឹងថា រយៈពេល ១០ឆ្នាំចុងក្រោយនេះ មានបរទេសជិត ២ពាន់ ៥០០នាក់ (២.៤៧៣) ប្រកបរបរសុំទាន នៅប្រទេសថៃ ក្នុងនោះ ជនជាតិខ្មែរ និងភូមា ឬមីយ៉ាន់ម៉ា (Myanmar) ច្រើនជាងគេ។ របាយការណ៍ឱ្យដឹងទៀតថា អ្នកសុំទានទាំងនោះភាគច្រើន ជាមនុស្សវ័យកណ្ដាល ដែលពេញកម្លាំងធ្វើការ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សេដ្ឋកិច្ច
