ប្រជាកសិករមួយចំនួននៅខេត្តបាត់ដំបងជំរុញឱ្យក្រសួងកសិកម្ម និងអាជ្ញាធរយកចិត្តទុកដាក់ដោះស្រាយបញ្ហាទំនប់ទឹកអាងកំពីងពួយ និងសាងសង់ប្រព័ន្ធធារាសាស្ត្រឱ្យបានគ្រប់គ្រាន់ ដើម្បីឱ្យពួកគាត់អាចធ្វើស្រែចម្ការផ្គត់ផ្គង់ជីវភាព។ មន្ត្រីសង្គមស៊ីវិលយល់ឃើញថា ក្រសួងពាក់ព័ន្ធគួរតែចុះមកត្រួតពិនិត្យអំពីស្ថានភាពរបស់កសិករ ដើម្បីបង្ហាញពីការទំនួលខុសត្រូវ និងការអនុវត្តការងារឱ្យមានប្រសិទ្ធភាព។
កសិករនៅមួយចំនួននៅខេត្តបាត់ដំបង ខកចិត្តដែលក្រសួងកសិកម្មគ្មានដំណោះស្រាយចំពោះការខ្វះខាតទឹកធ្វើស្រែចម្ការសម្រាប់រដូវវស្សា និងបណ្ដែតបណ្ដោយឱ្យស្រូវដំឡូងរបស់ប្រជាកសិករជាច្រើនហិកតារស្វិតងាប់។
កសិករនៅឃុំតាគ្រាម ស្រុកបាណន់ លោក អឿន វុទ្ធី ប្រាប់វិទ្យុអាស៊ីសេរី នៅថ្ងៃទី១២ ឧសភា ថានៅរដូវវស្សានេះ ស្រូវរបស់លោកបានស្កកងាប់ជាបន្តបន្ទាប់ដោយសារតែទំនប់អាងទឹកកំពីងពួយមិនព្រមបើកបង្ហូរទឹកឱ្យពលរដ្ឋធ្វើស្រែចម្ការ។ លោកបន្តថា នៅរដូវប្រាំងគ្មានទឹកគ្រប់គ្រាន់សម្រាប់ស្រោចស្រពដំណាំ ប៉ុន្តែនៅខែវស្សាវិញទឹកលិចស្រូវស្ទើររាល់ឆ្នាំ ធ្វើឱ្យលោកខាតបង់ប្រាក់ និងជំពាក់ធនាគារ។
លោក អឿន វុទ្ធី៖ «សូមឱ្យក្រសួងធនធានទឹកក្ដី ក្រសួងកសិកម្មក្តី សូមឱ្យជួយពង្រឹងធ្វើម៉េចឱ្យបានទឹកធ្វើនៅរដូវខែប្រជាជនធ្វើស្រូវផ្សងព្រេងបង្វាស់មេឃ បើអាចនឹងជួយបើកទឹកបានសម្រាប់ឃុំតាគ្រាម ខ្ញុំជឿជាក់ថា ខាងធារាសាស្ត្រអាចនឹងបើកបាន មិនមែនទឹកហ្នឹងបើកមិនបានទេ ទឹកហ្នឹងបើកបានត្រឹមពីវគ្គអី»។
ប្រជាកសិកររស់នៅក្នុងឃុំតាគ្រាម ស្រុកបាណន់ ខេត្តបាត់ដំបង មានផ្ទៃបង្កបង្កើនផលប្រមាណ៥រយហិកតារ និងរួមទាំងភូមិដទៃទៀត ជុំវិញអាងទឹកកំពីងពួយសរុបជាង ៨ពាន់ហិកតារ ដំណាំស្រូវកំពុងប្រឈមនឹងស្វិតងាប់ដីប្រេះក្រហែង ដោយសារគ្មានទឹកសម្រាប់ស្រោចស្រព។
ស្រដៀងគ្នានេះដែរកសិករម្នាក់ទៀតនៅស្រុកកំរៀង លោក ជុន ព្រឹក ថ្លែងថា លោកដាំដុះដំណាំសព្វថ្ងៃពឹងលើទឹកភ្លៀង និងជីកអណ្ដូងទឹក ដើម្បីស្រោចស្រពដំណាំនោះទេ។ លោកបន្តថា ឆ្នាំនេះលោកខាតបង់ច្រើនដោយសារតែដើមដំឡូងមីជិត ៤ហិកតារស្លោកងាប់ដោយសារក្ដៅខ្លាំង និងគ្មានប្រព័ន្ធធារាសាស្ត្រគ្រប់គ្រាន់។ លោកបន្ថែមថា លោកស្នើឱ្យអាជ្ញាធរសាងសង់ទំនប់ទឹក និងប្រឡាយដើម្បីសម្រួលដល់កសិករ ប៉ុន្តែមកទល់ពេលនេះកសិករនៅតែគ្មានទឹកប្រើប្រាស់ដដែល។
លោក ជុន ព្រឹក៖ «ចង់ឱ្យរដ្ឋាភិបាល ឬក៏ក្រសួងពាក់ព័ន្ធក្រសួងកសិកម្មហ្នឹងចុះទៅជួយប្រជាពលរដ្ឋធ្វើដំណាំបែបណាបែបណាល្អសូមឱ្យមានប្រព័ន្ធធារាសាស្ត្រជួយតាមភូមិឃុំក៏ល្អម្យ៉ាងដែរ»។
ប្រតិកម្មរបស់ប្រជាកសិករបែបនេះគឺបន្ទាប់ពីអ្នកនាំពាក្យក្រសួងកសិកម្ម កញ្ញា អ៊ឹម រចនា បានបង្ហោះសារនៅលើបណ្ដាញសង្គមកាលពីថ្ងៃទី១០ ឧសភា ពាក់ព័ន្ធនឹងបញ្ហាកសិករត្អូញត្អែរអំពីបញ្ហាកង្វះទឹកប្រើប្រាស់សម្រាប់ធ្វើស្រែចម្ការថា ក្រសួងកសិកម្មបានគិតគូរ និងត្រៀមលក្ខណៈរួចជាស្រេច ដើម្បីដោះស្រាយបញ្ហានេះ។ កញ្ញាបញ្ជាក់ថា នៅរដូវវស្សាឆ្នាំនេះអាចមានកូនរដូវប្រាំងដែលបណ្ដាលប៉ះពាល់ដំណាំរបស់កសិករដូចជា ការដាំដុះស្រូវវស្សា ដំណាំហូបផ្លែ គ្មានទឹកគ្រប់គ្រាន់ ដូច្នេះកសិករមិនគួរតែប្រញាប់ដាំនោះទេ និងអាចប៉ះពាល់ដល់ការចិញ្ចឹមសត្វយកសាច់ និងចិញ្ចឹមត្រីលក់ជាដើម។ បើទោះបីជាកសិករអះអាងថា ពួកគេមិនបានទទួលដំណឹង និងពុំមានក្រសួងចុះមកណែនាំនោះទេ។
ជុំវិញរឿងនេះមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង លោក យិន ម៉េងលី មានប្រសាសន៍ថាអាជ្ញាធរគួរតែចុះមកត្រួតពិនិត្យនៅទីតាំងផ្ទាល់ និងរកដំណោះស្រាយឱ្យប្រជាកសិករនៅពេលជួបទុក្ខលំបាក ដើម្បីបង្ហាញពីការយកចិត្តទុកចំពោះពលរដ្ឋ។ លោកបន្តថា រដ្ឋាភិបាលត្រូវត្រៀមវិធានការសម្រាប់ដំណោះស្រាយរយៈពេលវែង ដោយត្រូវរៀបចំគោលនយោបាយទឹក ឬប្រព័ន្ធធារាសាស្ត្រគ្រប់តំបន់ដែលប្រជាកសិករធ្វើកសិកម្ម។
លោក យិន ម៉េងលី៖ «ខ្ញុំគិតថាពាក់ព័ន្ធមន្ទីរជំនាញគឺមន្ទីរធនធានទឹក និងអាជ្ញាធរខេត្ត លោកត្រូវតែធ្វើអន្តរាគមន៍ជាបន្ទាន់ ដើម្បីសង្គ្រោះនូវកសិផលប្រជាពលរដ្ឋយើងពីព្រោះកាលណាមិនជួយសង្គ្រោះដល់ប្រជាពលរដ្ឋយើងទេ ពេលដែលប្រជាពលរដ្ឋយើងខូចខាតប្រជាពលរដ្ឋយើងប្រឈមខ្លាំងណាស់ ទី១ យើងឃើញថា ប្រជាពលរដ្ឋយើងច្រើនណាស់ដែលជំពាក់លុយធនាគារ ដើម្បីយកមកធ្វើស្រែ ដើម្បីដល់ពេលប្រមូលផលស្រូវដើម្បីលក់បានផលចំណេញចិញ្ចឹមជីវិត ហើយមួយចំនួនទៀតយកទៅដោះនៅធនាគារ»។
កន្លងមកប្រជាកសិកររិះគន់ក្រសួងកសិកម្មថា អសមត្ថភាពក្នុងការដោះស្រាយបញ្ហាជូនពលរដ្ឋ មិនត្រឹមខែប្រាំងគ្មានទឹកធ្វើស្រែ និងខែវស្សាលិចស្រូវប៉ុណ្ណោះទេ ប៉ុន្តែនៅពេលកសិករប្រមូលកសិផលដើម្បីយកទៅលក់បែរជាគ្មានទីផ្សារ ហើយក្រសួងកសិកម្មក៏មិនយកចិត្តទុកដាក់រកទីផ្សារឱ្យកសិករឡើយ។
ទោះជាយ៉ាងណាប្រជាពលរដ្ឋ និងសង្គមស៊ីវិលយល់ឃើញថា រដ្ឋាភិបាលគួរជួយសម្រួល និងធ្វើផែនការឱ្យច្បាស់លាស់ជាមុន ដើម្បីដោះស្រាយបញ្ហាប្រឈមនានាពីគ្រោះរាំងស្ងួត មិនមែន មានបញ្ហាទើបចុះស្រង់ស្ថិតិឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។