កសិករមួយចំនួនថា ដំណាំស្រូវរបស់ពួកគាត់ប្រឈមនឹងការខាតបង់ ខណៈរោងម៉ាស៊ីនផ្អាកទិញស្រូវក្នុងពិធីបុណ្យភ្ជុំបិណ្ឌ
2024.10.02
ទិដ្ឋភាពពលរដ្ឋដឹកស្រូវយកទៅលក់នៅក្នុងភូមិ នាខេត្តបន្ទាយមានជ័យ កាលពីថ្ងៃទី៧ កញ្ញា ២០២៤។
រូប៖ ហ្វេសប៊ុក Channa
កសិករមួយចំនួនថា ដំណាំស្រូវរបស់ពួកគាត់ប្រឈមនឹងការខាតបង់ ខណៈរោងម៉ាស៊ីនផ្អាកឈប់ទិញស្រូវក្នុងពិធីបុណ្យភ្ជុំបិណ្ឌ។ ការលើកឡើងនេះ ធ្វើឡើងបន្ទាប់ពីមន្ត្រីក្រសួងកសិកម្ម អំពាវនាវដល់ពលរដ្ឋឲ្យផ្អាកការប្រមូលផលស្រូវ ក្នុងពិធីបុណ្យភ្ជុំបិណ្ឌ។
កសិករនៅភូមិដួងមារ ឃុំអូរតាគី ស្រុកថ្មគោល លោក ភាន កុសល់ ប្រាប់វិទ្យុអាស៊ីសេរីនៅថ្ងៃទី១ ខែតុលា ថា នៅថ្ងៃនេះ គឺពុំមានគ្រឿងយន្តច្រូតស្រូវ ចូលច្រូតកាត់នៅតំបន់របស់លោកឡើយ ។ លោក បារម្ភថា ខណៈរោងម៉ាស៊ីនផ្អាកទិញស្រូវក្នុងឱកាសពិធីបុណ្យភ្ជុំបិណ្ឌ តែបែរជាមានភ្លៀងធ្លាក់ ឬទឹកបឹងទន្លេសាប នៅតែបន្តឡើងនោះ កសិករមួយចំនួន នឹងប្រឈមការខាតបង់ជាមិនខានឡើយ។
លោក ភាន កុសល៖ «បើយើងនិយាយម៉ាស៊ីនកាលពីម្សិលមិញមាន២គ្រឿង ប៉ុន្តែថ្ងៃនេះ អត់មានទេ គេឡើងមកអស់ហើយ។ អ៊ីចឹងបើសិនជា២ថ្ងៃនេះ ទឹកឡើងលឿន ឬទឹកបង្ខំឡើងអីចឹង វាអាចនឹងប្រឈមលេចដែរ ។ រឿងហ្នឹង (ទឹកជន់) ដាច់បាយហ្នឹងឯង ប៉ះចំកាលណាយើងដណ្ដើមម៉ាស៊ីនគ្នាច្រូតទៀត ហើយអ្នកខ្លះទៀតបង្ខំច្រូតទៅដោយទាំងខ្ចីច្រើន ហើយដោយខ្ចីច្រើនអ៊ីចឹងទៅដល់ពេលយកមកលក់ឲ្យឈ្មួញ គឺឈ្មួញគេបង្អាប់តម្លៃយើងព្រោះនៅខៀវច្រើន ស្រូវវាអត់ទាន់ទុំល្អ»។
ស្រដៀងគ្នានេះ កសិករនៅភូមិព្រែកត្រប់ ស្រុកឯកភ្នំ ខេត្តបាត់ដំបង លោក ណាត់ អឿន ថ្លែងថា ដំណាំស្រូវ របស់កសិករក្នុងតំបន់បឹងទន្លេសាប បានខូចខាតច្រើនកាលពីដើមរដូវវស្សា។ លោក ឲ្យដឹងថា កសិករត្រូវបង្ខំចិត្តប្រមូលផលបណ្ដើរៗបណ្ដេញតាមស្ថានភាពទឹក ទោះលក់បានតម្លៃទាបក្ដី ។
លោក ណាត់ អឿន៖ «បើទឹកនៅតែបន្តឡើង គឺដាច់ខាតត្រូវតែប៉ះពាល់ហើយ ព្រោះតំបន់របស់ពួកខ្ញុំនេះ ជាតំបន់វាលទំនាប ពីព្រោះម្នាក់ៗ ភ័យណាស់ក្រែងលោទឹកមកទៀត គឺលេចច្រូតអត់កើតទេ ព្រោះវាឆ្ងាយពីភូមិ»។
ការលើកឡើងនេះ ធ្វើឡើងបន្ទាប់ពីប្រធាននាយកដ្ឋានដំណាំស្រូវ នៃអគ្គនាយកដ្ឋានកសិកម្ម ក្រសួងកសិកម្ម លោក គង់ គា នៅថ្ងៃទី១ ខែតុលា បានស្នើដល់កសិករក្នុងខេត្តបាត់ដំបង ឲ្យផ្អាកច្រូតកាត់រយៈពេល ៣ថ្ងៃសិន ចាប់ពីថ្ងៃទី១ដល់ថ្ងៃទី៣ ខែតុលា ដោយសាររោងម៉ាស៊ីនធំៗក្នុងខេត្តនេះ កំពុងចាល់ស្រូវក្នុងឃ្លាំង ស្របពេលកម្មករឈប់សម្រាកបុណ្យភ្ជុំបិណ្ឌ។
ប្រធាននាយកដ្ឋានដំណាំស្រូវ លោក គង់ គា ឲ្យដឹងតាមរយៈវីដេអូរយៈពេលជាង៣នាទី នៅលើបណ្ដាញសង្គមហ្វេសប៊ុក (Facebook) ថា ស្របពេលរោងម៉ាស៊ីនធំៗបិទទ្វារ ហើយឈ្មួញទិញស្រូវមិនប្រមូលទិញ នោះឈ្មួញកណ្ដាលមួយចំនួននឹងឆ្លៀតឱកាសបន្ថោកតម្លៃស្រូវ។ លោក ឲ្យដឹងទៀតថា ក្រោយបញ្ចប់ពិធីបុណ្យភ្ជុំបិណ្ឌ ក្រសួងកសិកម្ម នឹងចរចាជាមួយភាគីរោងម៉ាស៊ីន ដើម្បីកំណត់តម្លៃស្រូវឲ្យបានសមរម្យ និងមានកន្លែងប្រមូលទិញជាក់លាក់។
លោក គង់ គា៖ «បន្ទាប់ពីការងារនេះ គឺក្រសួងកសិកម្ម សហការជាមួយរោងម៉ាស៊ីន ដើម្បីកំណត់ទីតាំងប្រមូលផ្ដុំដើរទិញ ហើយខាងរោងម៉ាស៊ីននឹងដាក់តម្លៃ ដើម្បីជៀសវាងកុំឲ្យឈ្មួញកណ្ដាល ឬបងប្អូនស្រែកថា ចេះតែបន្ទាបតម្លៃរបស់ប្រជាកសិករយើង អីចឹងយើងយកតម្លៃពីរោងម៉ាស៊ីនឲ្យហើយ នៅពេលទៅដល់នោះយើងលៃលកតែអ្នកដឹក និងអ្នកដទៃទៀត»។
ចំណែកអ្នកនាំពាក្យក្រសួងកសិកម្ម លោក ឃឹម ហ្វីណង់ កាលពីថ្ងៃទី៣០ ខែកញ្ញា បានបង្ហោះនៅលើបណ្ដាញហ្វេសប៊ុកថា តម្លៃស្រូវឆ្នាំនេះ ធ្លាក់ចុះធៀបនឹងឆ្នាំ២០២៣ ។ លោកឲ្យដឹងថា ស្រូវមានគុណភាពទាបមួយចំនួន នៅខេត្តបាត់ដំបង និងបន្ទាយមានជ័យ ដែលមានលាយខ្ចី និងកម្រិតសំណើមខ្ពស់ បណ្ដាលឲ្យស្រូវទាំងនេះ មានតម្លៃទាបជាងស្ដង់ដារប្រមាណ២០ភាគរយ។ លោកអះអាងថា បញ្ហាទាំងនេះ អាចបណ្ដាលមកពីការព្រួយបារម្ភបញ្ហាទឹកជំនន់ និងការសម្រុកប្រមូលផលឲ្យបានលឿនមុនពេលបុណ្យភ្ជុំបិណ្ឌ ព្រោះរោងម៉ាស៊ីនផ្អាកឈប់ទិញរហូតដល់ចប់បុណ្យភ្ជុំបិណ្ឌ។ លោកក៏អំពាវនាវឲ្យកសិករផ្អាកប្រមូលផលស្រូវរហូតដល់ចប់ពិធីបុណ្យភ្ជុំបិណ្ឌដែរ។
អ្នកគ្រប់គ្រងការិយាល័យអង្គការសិទ្ធិមនុស្ស លីកាដូ (LICADHO) ប្រចាំខេត្តបាត់ដំបង និងបន្ទាយមានជ័យ លោក អ៊ិន គង់ជិត មានប្រសាសន៍ថា កសិករនៅតំបន់បឹងទន្លេសាប តែងរងទឹកជំនន់ ដែលហូរមកពីទន្លេមេគង្គ ទោះជារោងម៉ាស៊ីនបិទទ្វារ ហើយតម្លៃស្រូវចុះថោកយ៉ាងណា ក៏ពលរដ្ឋមួយចំនួននៅតំបន់នេះ ត្រូវបង្ខំចិតប្រមូលផលដែរ ជៀសវាងទឹកជំនន់បំផ្លាញដំណាំទាំងស្រុង។
លោក អ៊ិន គង់ជិត៖ «ការទិញជាកត្តាកំណត់រវាងអ្នកទិញ និងអ្នកលក់។ អីចឹងវាពិបាកត្រង់ដែលពួកគាត់ត្រូវតែប្រឈមខូចខាតទាំងស្រុង អ្វីដែលពួកគាត់គិតហ្នឹងគឺថា តើពួកគាត់ត្រូវបាត់បង់ផលស្រូវទាំងស្រុង ឬក៏ត្រូវខាតខ្លះ? ហើយពួកគាត់ នៅកន្លែងខ្លះដែលភ្លៀងហ្នឹង គាត់ត្រូវប្រឹងប្រែងប្រមូលហើយទាំងស្រូវសើមអ្វីហ្នឹង»។
តាមសេចក្ដីប្រកាសរបស់មន្ទីរពាណិជ្ជកម្មខេត្តបាត់ដំបង អំពីតម្លៃស្រូវនៅតាមតំបន់ បង្ហាញថា កាលពីថ្ងៃទី១០ ខែកញ្ញា ស្រូវស្រងែនៅទីវាល មានតម្លៃ ១.២២៧រៀល ក្នុងមួយគីឡូក្រាម។ លុះដល់ថ្ងៃទី២៣ ខែកញ្ញា តម្លៃស្រូវស្រងែ ដែលឈ្មួញកណ្ដាលប្រមូលទិញនៅទីវាល ធ្លាក់មកនៅ ១.០២២ ទៅ ១.០៧០រៀលក្នុងមួយគីឡូក្រាម ចំពោះស្រូវមានគុណភាពល្អ និងតម្លៃ ៩៧២ ទៅ ១.០២២រៀល ចំពោះស្រូវដែលមានគុណភាពមិនសូវល្អ។ រហូតដល់ថ្ងៃទី១ ខែតុលា មន្ត្រីក្រសួងកសិកម្ម អំពាវនាវឲ្យកសិករផ្អាកប្រមូលផល ៣ថ្ងៃសិន ដោយសារតែរោងម៉ាស៊ីនមួយបិទទ្វារផ្អាកប្រមូលទិញស្រូវ។
ទោះយ៉ាងណា មន្ត្រីអង្គការសង្គមស៊ីវិលស្នើដល់រដ្ឋាភិបាល ឲ្យបញ្ចេញកញ្ចប់ថវិកាមួយចំនួន សម្រាប់ប្រមូលទិញស្រូវពីកសិករខណៈរោងម៉ាស៊ីនធំៗមួយចំនួន បិទទ្វារដើម្បីបញ្ចៀសផលប៉ះពាល់ពលរដ្ឋបណ្ដាលមកពីគ្រោះធម្មជាតិ ជាពិសេសនៅតំបន់បឹងទន្លេសាប។ ចំណែកកសិករ ស្នើដល់រដ្ឋាភិបាល ឲ្យជួយស្វែងរកទីផ្សារកសិផល និងកំណត់តម្លៃស្រូវឲ្យបានស្ថិតស្ថេរ ព្រមទាំងផ្សព្វផ្សាយជាសាធារណៈនូវឈ្មោះ និងមធ្យោបាយទំនាក់ទំនងក្រុមហ៊ុនប្រមូលទិញស្រូវ ដើម្បីឲ្យកសិករអាចទាក់ទងអ្នកប្រមូលទិញបានដោយផ្ទាល់ និងជៀសវាងឈ្មួញកណ្ដាលក្រឡុកតម្លៃ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សមត្ថកិច្ចចាប់ខ្លួនជំនួយការផ្ទាល់របស់លោក ហ៊ុន សែន គឺលោក ដួង តារា ស្ងាត់ៗ
- ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ
- ក្រុមឆបោកតាមអនឡាញនៅខេត្តជាប់ព្រំដែនថៃ និងវៀតណាម «រីករាលដាលខ្លាំង»
- APHR ជំរុញឱ្យកម្ពុជាដោះលែងពលករខ្មែរ នួន តឿន និងអ្នកកាសែត លោក ម៉ិច ដារ៉ា
- អ្នកឃ្លាំមើលសង្គមបារម្ភថា ក្រុម Hacker កូរ៉េខាងជើងចូលលួចយកទិន្នន័យក្នុងស្ថាប័ននៅកម្ពុជាប៉ះពាល់ដល់សន្តិសុខជាតិ
អត្ថបទពេញនិយម
សេដ្ឋកិច្ច
