ប្រជាពលរដ្ឋមួយចំនួនប្រឈមនឹងជីវភាពក្រីក្រដោយសារជំពាក់បំណុលធនាគារ និងគ្មានការងារធ្វើសមរម្យ ។ ការត្អូញត្អែររបស់ពលរដ្ឋនេះគឺបន្ទាប់ពីរដ្ឋមន្ត្រីក្រសួងសេដ្ឋកិច្ចលើកឡើង កាលពីថ្ងៃទី០១ មីនា ស្ដីពីព្រឹត្តិបត្រស្ថិតិបំណុលបរទេសប្រចាំត្រីមាសទី៤ ឆ្នាំ ២០២២ របាយការណ៍បង្ហាញថាបើទោះបីជាសេដ្ឋកិច្ចកម្ពុជាទទួលរងផលប៉ះពាល់ពី ការរីករាលដាលនៃវិបត្តិជំងឺកូវីដ-១៩ និងពីកត្តាខាងក្រៅផ្សេងទៀតក្ដី ក៏ស្ថានភាពបំណុលកម្ពុជានៅតែមានចិរភាព និងហានិភ័យកម្រិតទាប។
ប្រជាពលរដ្ឋមួយចំនួនព្រួយបារម្ភចំពោះបញ្ហាជីវភាពកាន់តែយ៉ាប់យ៉ឺនពីមួយថ្ងៃទៅមួយថ្ងៃ និងខ្លាចកូនៗមិនអាចបន្តការសិក្សាបានដល់ជាប់ថ្នាក់បាក់ឌុប។ ពួកគេស្នើឱ្យរដ្ឋាភិបាលយកចិត្តទុកដាក់លើស្ថានភាពក្រីក្ររបស់ប្រជាពលរដ្ឋដើម្បីឱ្យពួកគាត់អាចមានលទ្ធភាពប្រកបរបរចិញ្ចឹមជីវិតបានសមរម្យ។
ពលការិនីធ្វើការផ្នែកអនាម័យតាមផ្ទះនៅទីក្រុងបាងកក មានស្រុកកំណើតនៅខេត្តបាត់ដំបង លោកស្រី សាត សឿប ប្រាប់វិទ្យុអាស៊ីសេរីនៅថ្ងៃទី១៤ មីនា ថា មូលហេតុដែលគ្រួសារលោកស្រីមកប្រទេសថៃនេះដោយសារជីវភាពខ្វះខាត ហើយធ្វើស្រែចម្ការបានផលហើយលក់មិនបានប្រាក់ដោះស្រាយជីវភាព ហើយលោកស្រីមិនអាចទប់ទល់នឹងថ្លៃចំណាយកូនរៀន និងបង់ធនាគារបាន ដូច្នេះលោកស្រី សម្រេចចិត្តមកធ្វើការនៅប្រទេសថៃនេះសង្ឃឹមថាអាចមានលុយកាក់ខ្លះទុកផ្គត់ផ្គង់ជីវភាពគ្រួសារ។
លោកស្រី សាត សឿប៖ «ហានិភ័យគឺពលរដ្ឋខ្មែរបាត់បង់ការងារអ៊ីចឹងទោះបីគាត់មិនចង់ចំណាកស្រុកគឺគាត់ត្រូវតែចំណាកស្រុកពេលណាដែរបំណុលកើនឡើងចេះតែច្រើនទៅៗជាពិសេសបំណុលដែលប្រជាពលរដ្ឋជំពាក់នៅធនាគារអ្នកខ្លះលក់ដីលក់ស្រែលក់ចម្ការដើម្បីតែសងបំណុលធនាគារទីបំផុតពួកគាត់នឹងបាត់បង់ដីធ្លី ពួកគាត់នឹងត្រូវបង្ខំចិត្តចំណាកស្រុកអ្នកដែលគាត់ចំណាកស្រុករួចហើយតើគាត់នឹងចូលស្រុកបានដោយរបៀបណាបើសិនជាប្រទេសយើងអត់មានការងារធ្វើ»។
ស្រដៀងគ្នានេះដែរ អាជីវករលក់ដូរនៅរាជធានីភ្នំពេញ លោកស្រី លាន សោភា ថ្លែងថា សព្វថ្ងៃនេះលោកស្រីលក់ដូរមិនសូវដាច់នោះទេ រីឯទំនិញក៏ឡើងថ្លៃពិបាករកប្រាក់ណាស់ ហើយលោកស្រីត្រូវបង់ថ្លៃផ្ទះជួល និងថ្លៃទឹកភ្លើងថែមទៀត។ លោកស្រីបន្តថា ក្នុងមួយថ្ងៃលោកស្រីអាចរកចំណូលបានចន្លោះពី ២ម៉ឺនរៀល ដល់៣ម៉ឺនរៀល (២០.០០០-៣០.០០០) ប៉ុន្តែថវិកានេះមិនគ្រប់ទិញម្ហូបអាហារ និងសងបំណុលធនាគារឡើយ
លោកស្រី លាន សោភា៖ «យើងរកអត់បានអ៊ីចឹងបង់ថ្លៃសាលាកូនរៀនដឹងបានចប់ ឬមិនចប់ផងចង់ឱ្យកូនមានអនាគតកុំកូនដូចខ្ញុំអ៊ីចឹងហាដល់ពេលឥឡូវព្រួយបារម្ភខ្លាំងជាងគេគឺកូនរៀនហ្មងនិយាយចំពោះខ្ញុំវិញខ្ញុំចង់ឱ្យរដ្ឋចុះជួយមើលខុសត្រូវអ្នកដែលទីទាល់ក្រដូចពួកខ្ញុំអីជួលផ្ទះគេអ៊ីចឹងហាគាត់ជួយជាថវិកាខ្លះអីមកសម្រាប់បង្កើតមុខរបរថែមតិចទៀតព្រោះឥឡូវកំពុងខ្វះខាតខ្លាំងព្រោះអាចឱ្យកូនឈប់រៀន»។
ប្រតិកម្មនេះធ្វើឡើងក្រោយពេលរដ្ឋមន្ត្រីក្រសួងសេដ្ឋកិច្ច លោក អូន ព័ន្ធមុន្នីរ័ត្ន លើកឡើងថា កាលពីថ្ងៃទី០១ មីនា ស្ដីពីព្រឹត្តិបត្រស្ថិតិបំណុលបរទេសប្រចាំត្រីមាសទី៤ ឆ្នាំ ២០២២ របាយការណ៍បង្ហាញថាបើទោះបីជាសេដ្ឋកិច្ចកម្ពុជាទទួលរងផលប៉ះពាល់ពីការរីករាលដាលនៃវិបត្តិជំងឺកូវីដ-១៩ និងពីកត្តាខាងក្រៅផ្សេងទៀតក្ដី ក៏ស្ថានភាពបំណុលកម្ពុជានៅតែមានចិរភាព និងហានិភ័យកម្រិតទាប ។ របាយការណ៍ដដែលនេះបញ្ជាក់ថា ត្រឹមដំណាច់ឆ្នាំ២០២២ កម្ពុជាមានបំណុលសរុបចំនួនជិត១ម៉ឺនលានដុល្លារ (៩.៩៩ លានដុល្លារ) ក្នុងនោះ ជាង៩៩ភាពរយ (៩៩.៨២%) ឬប្រមាណ ជាង៩ពាន់លានដុល្លារ (៩.៩៧ លានដុល្លារ) ជាបំណុលបរទេស រីឯ ជាង១៧ លានដុល្លារ (១៧.០០០.០០០) ទៀតជាបំណុលក្នុងប្រទេស។
ជុំវិញរឿងនេះប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍន៍ និងសន្តិភាព លោក យង់ គិមអេង យល់ឃើញបើកម្ពុជាមានលទ្ធភាពក្នុងការសងបំណុលបរទេសនោះមិនអីទេ ប៉ុន្តែបើកម្ពុជាគ្មានលទ្ធភាពសងវិញនោះអ្នកដែលរងគ្រោះជាងគេគឺពលរដ្ឋ ។ លោកបន្តថា ដើម្បីឱ្យកាត់បន្ថយពលរដ្ឋចំណាកស្រុក និងអាចដោះស្រាយបំណុលបានរដ្ឋគួរតែរកទីផ្សារលក់កសិផលក្នុងតម្លៃសមរម្យជូនដល់ពលរដ្ឋ និងបង្កបរិយាកាសឱ្យមានការនាំចេញទៅក្រៅប្រទេសឱ្យកាន់តែច្រើន។
លោក យង់ គិមអេង៖ «ធ្វើយ៉ាងកុំឱ្យមានអំពើពុករលួយអីជាដើមហ្នឹងបើយើងមិនអាចបើកចំហទីផ្សារទាំងនោះឱ្យទូលំទូលាយសម្រាប់យើងប្រហែលជាលទ្ធភាពរបស់យើងអាចនឹងមានការពិបាកការប្រមែប្រមូលប្រជាពលរដ្ឋទៅលើរបស់របរផ្សេងៗកាន់តែច្រើនអាចធ្វើឱ្យប៉ះពាល់ដល់ជីវភាពរបស់គាត់ដែរប្រសិនជាកៀរគរថវិកាជាតិនឹងមានកម្រិតខុសគ្នាខ្លាំងអាចធ្វើឱ្យមានបញ្ហា»។
រដ្ឋាភិបាលតែងអួតអាងពីមោទនភាពថាក្នុងរយៈពេលជាង ២ទសវត្សមកនេះ ខ្លួនបានកាត់បន្ថយអត្រាភាពក្រីក្រពីជិត ៤៨ភាពរយ ក្នុងឆ្នាំ២០០៧មកនៅត្រឹម ជិត១៤ ភាគរយ (១៣.៥) កាលពីឆ្នាំ២០១៤ ហើយមានមហិច្ឆតាចង់ក្លាយខ្លួនពីប្រទេសអភិវឌ្ឍន៍តិចតួច មកជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសមានចំណូលខ្ពស់នៅឆ្នាំ២០៥០ ។ ទោះជាយ៉ាងណាពលរដ្ឋខ្មែររាប់លាននាក់ធ្វើចំណាកស្រុកទៅក្រៅប្រទេស ដោយសារក្រីក្រ និងអត់ការងារធ្វើនៅក្នុងស្រុក។ របាយការណ៍ក្រសួងការងារបង្ហាញថា ពលករធ្វើការនៅប្រទេសថៃ មានប្រមាណ ១លាន២សែននាក់ ប៉ុន្តែ របាយការណ៍របស់អង្គការសង់ត្រាល់ បានឱ្យដឹងថា មានពលករខ្មែរធ្វើការងារស្របច្បាប់ និងខុសច្បាប់ មានជិត២លាននាក់ ធ្វើការនៅប្រទេសថៃ។ ពលករចំណាកស្រុកខុសច្បាប់មួយចំនួនត្រូវអាជ្ញាធរបរទេសចាប់បញ្ជូនមកកម្ពុជាវិញស្ទើររាល់ថ្ងៃ កំពុងធ្វើឱ្យរដ្ឋាភិបាលរងភាពអាម៉ាស់នៅលើឆាកអន្តរជាតិ។ បន្ថែមពីនេះទៀត របាយការណ៍អង្គការលីកាដូចេញផ្សាយកាលពីឆ្នាំ២០២០បង្ហាញថា ពលរដ្ឋកម្ពុជាជាង ៣លាន ៦សែនគ្រួសារ (៣.៦00.000) កំពុងជំពាក់បំណុលមីក្រូហិរញ្ញវត្ថុវ័ណ្ឌកក្នុងម្នាក់ៗមិនតិចជាង៤ពាន់ដុល្លារ (៤.២៨០ ) ។ ខណៈរដ្ឋវិញគិតត្រឹមដំណាច់ឆ្នាំ២០២២ជំពាក់បំណុលបរទេសសរុបប្រមាណជិត ១ម៉ឺនលានដុល្លារ (៩.៩៩លានដុល្លារ) ។ ក្នុងនោះបំណុលស្ទើរតែជិតពាក់កណ្ដាលជាបំណុលដែលរដ្ឋជំពាក់ចិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។