កសិករ​ដាំពោត​ក្រហម​មួយ​ចំនួន​បារម្ភ​ពី​បញ្ហា​ទីផ្សារ ក្រោយ​ថៃ​អនុម័ត​ច្បាប់​រឹត​បន្តឹង​ការ​នាំ​ចូល

ដោយ ហ៊ុំ ចំរើន
2024.03.23
កសិករ​ដាំពោត​ក្រហម​មួយ​ចំនួន​បារម្ភ​ពី​បញ្ហា​ទីផ្សារ ក្រោយ​ថៃ​អនុម័ត​ច្បាប់​រឹត​បន្តឹង​ការ​នាំ​ចូល ដំណាំពោតរបស់កសិករ​កញ្ញា រៀម ណាម៉ុន នៅឃុំស្ទឹងកាច់ ស្រុកសាលាក្រៅ ខេត្ត​បៃលិន។
រូប​កញ្ញា រៀម ណាម៉ុន ផ្ដល់ឱ្យ

ប្រជាកសិករ​ដាំពោត​ក្រហម មួយចំនួន បារម្ភ​ថា ការ​អនុម័ត​ច្បាប់​រឹត​បន្តឹង​ការ​នាំ​ចូល​របស់​រដ្ឋាភិបាល​ថៃ នឹង​ប៉ះពាល់​ដល់ទី​ផ្សារ​ដំណាំ​របស់​កសិករ​ខ្មែរ។ ការ​បារម្ភ​នេះ បន្ទាប់​ពី​រដ្ឋាភិបាល​ថៃ​អនុម័ត​ច្បាប់​ហាម​ការ​នាំចូល​ដំណាំ​ពោត​ពី​ប្រទេស​ជិតខាង​ដែល​ដុត​ដំណាំ​កសិកម្ម។

កសិករ​ដាំពោត​ក្រហម​មួយចំនួន នៅ​តាម​បណ្ដា​ខេត្ត​ជាប់​ព្រំដែន​ថៃ លើក​ឡើង​ថា ការ​អនុម័ត​ច្បាប់ រឹត​បន្តឹង​ការ​នាំ​ចូល​ពោត​របស់​អាជ្ញាធរ​ថៃ ហាក់​បង្កប់​នូវ​ការ​ប្រកួតប្រជែង ក្នុង​ការ​នាំចេញ និង​នាំចូល​ផលិតផល​កសិកម្ម ដែល​មិន​ស្មើភាព​គ្នា។

កសិករ​ដាំពោត នៅ​ស្រុក​សាលា​ក្រៅ ខេត្ត​ប៉ៃលិន កញ្ញា រៀម ណាម៉ុន ប្រាប់​វិទ្យុ​អាស៊ីសេរី នៅ​ថ្ងៃទី​២២ ខែមីនា ថា ប្រសិនបើ​រដ្ឋាភិបាល​ថៃ​អនុវត្ត​ច្បាប់​នេះ នោះ​កសិករ​កម្ពុជា​នឹង​បាត់បង់​ទីផ្សារ​មួយ​ដ៏​ធំ ហើយ​វា​នឹង​គំរាមកំហែង​ដល់​ជីវភាព និង​បង្កើន​បំណុល​របស់​ពួកគាត់​។ កញ្ញា​បន្ត​ថា បច្ចុប្បន្ន​កសិករ​នៅ​តាម​ព្រំដែន គឺ​ពឹង​ផ្អែកលើ​ការ​នាំ​កសិផល​ចេញ​ទៅ​ប្រទេស​ថៃ ដែល​ទទួល​បាន​តម្លៃ​ថ្លៃ​ជាង​លក់​ទៅ​ឱ្យ​ប្រទេស​វៀតណាម និង​កាត់​បន្ថយ​ការ​ចំណាយ​លើ​ថ្លៃ​ដឹក​ជញ្ជូន។

កញ្ញា រៀម ណាម៉ុន៖ «ធម្មតា​យើង​អ្នក​ដាំ បើ​មាន​ទីផ្សារ​ប្រកួតប្រជែង​អាហ្នឹង​វា​បាន​តម្លៃ​រាង​ល្អ​គ្រាន់បើ​។ តែបើ​ទីផ្សារ​ខាង​ថៃ​គេ​អត់​ទិញ គេ​ទិញ​តែមួយ​ចំហៀង (វៀតណាម​) យើង​ដឹង​តែ​ចប់​ហើយ»

ការ​ព្រួយ​បារម្ភ​របស់​កសិករ​នេះ បន្ទាប់ពី​កាសែត​បាងកក​ប៉ុស្តិ៍ (Bangkok Post) បាន​ចុះផ្សាយ​អំពី​ការ​អនុម័ត​ច្បាប់​ថ្មី របស់​គណៈរដ្ឋមន្ត្រី​ថៃ កាលពី​ថ្ងៃទី​១៩ ខែមីនា ដោយ​ហាមឃាត់​ការ​នាំ​ចូល​ពោត​ពី​ប្រទេស​ណា ដែល​កសិករ​ដុត​ផ្ទៃដី​កសិកម្ម​ក្រោយពេល​ប្រមូល​ផល​រួច ដោយ​ភាគី​ថៃ​អះអាង​ថា ការ​ដុត​ដំណាំ​កសិកម្ម​នេះ បាន​ធ្វើ​ឱ្យ​ប៉ះពាល់​គុណភាព​ខ្យល់ នាំ​ឱ្យ​មាន​ការ​បំពុល​កម្រិត​ខ្ពស់។ កាសែត​បាងកក​ប៉ុស្តិ៍ បាន​ស្រង់​សម្ដី​អ្នកនាំពាក្យ​រដ្ឋាភិបាល​ថៃ លោក ឆ័យ វច្ឆរង្គ (Chai Wacharonke) ថា ច្បាប់​ថ្មី​នេះ គឺ​មាន​គោលដៅ​ឈាន​ទៅ​កាត់បន្ថយ​ការ​បំពុល​ខ្យល់​នៅក្នុង​ប្រទេស​ថៃ ដែល​បង្កឡើង​ដោយ​ការ​ដុត​ដំណាំ​កសិកម្ម របស់​ប្រទេស​ក្បែរ​ខាង​។ ក៏ប៉ុន្តែ ភាគី​ថៃ ពុំបាន​បញ្ជាក់​ថា ជា​ប្រទេស​ណាមួយ​នោះ​ឡើយ។

ទោះជា​យ៉ាងណា ម្ចាស់​សៃឡូ (កន្លែង​ទិញ​កសិផល​) ទិញ​ពោត នៅ​ក្រុងប៉ៃលិន លោកស្រី យាន អេង ប្រាប់​ថា ភាគី​ថៃ​ឈប់​នាំចូល​ពោតក្រហម​ពី​កម្ពុជា មិនមែន​តែ​ឥឡូវនេះ​ទេ ពោល​តាំង​តែមួយ​ឆ្នាំមុន​ម្ល៉េះ ដែល​ធ្វើ​ឱ្យ​តម្លៃ​ពោត​ធ្លាក់​ថ្លៃ ហើយ​កសិករ​ភាគច្រើន​នៅ​តាម​បណ្ដា​ខេត្ត​ជាប់​ព្រំដែន​ថៃ ងាក​មក​ដាំដំឡូង​មី​ជំនួស​វិញ។ លោកស្រី​បន្ត​ថា ចំពោះ​ការ​ឈប់​នាំចូល​ពោត​ពី​កម្ពុជា នេះ ភាគី​ថៃ​មិន​បាន​ប្រាប់​ពី​មូលហេតុ​ឡើយ ដោយ​បច្ចុប្បន្ន​ទីផ្សារ​ពោតក្រហម​ខ្មែរ​ពឹង​ផ្អែកលើ​ការ​នាំ​ចេញ​ទៅ​ប្រទេស​វៀតណាម និង​ផ្គត់ផ្គង់​ឱ្យ​ក្រុមហ៊ុន​ផលិត​ចំណី​សត្វ​ក្នុងស្រុក​ឈ្មោះ ភីស៊ី (PC) ដែល​មាន​តម្រូវការ​តិចតួច​ប៉ុណ្ណោះ។

លោកស្រី យាន អេង៖ «មាន​នរណា​ដាំពោត​ទៀត ឆ្នាំ​នេះនោះ? ដាំដំឡូង ដំឡូង​ចិន​គេ​មាន​រោងចក្រ​។ កុំ​តែ​បាន​ក្រុមហ៊ុន​ភីស៊ី​ទិញ កុំ​អី​អត់​អំបិល​ប្រឡាក់។ អត់​មាន​ចេញ​ទៅណា​រួច​ទេ ថៃ​អត់​ទិញ​យើង​សូម្បី​តែមួយ​គ្រាប់​ទេ​។ គិត​ទៅ​ពោត​ស្នូល បានតែ​៤៨​បាត ទៅ​៥០​បាត​ហ្នឹង​(​ក្នុង​១០​គីឡូក្រាម​)​។ រាល់ថ្ងៃ​នេះ ៥៣​បាត គិត​ជា​លុយ​ខ្មែរ ប្រហែល​៦​រយ​ជាង»

កាលពី​ខែកក្កដា ឆ្នាំ​២០២២ ភាគី​ថៃ​ធ្លាប់​ចេញ​លក្ខខណ្ឌ​ការ​នាំ​ចូល​ពោត​ពី​កម្ពុជា​ម្ដង​រួច​មក​ហើយ ដោយ​តម្រូវ​ឱ្យ​ម្ចាស់​អាជីវកម្ម​ទាំងអស់​ត្រូវ​មាន​លិខិត​អនុញ្ញាត​នាំចូល ពី​នាយកដ្ឋាន​កសិកម្ម​ថៃ​ជាមុន និង​ត្រូវតែ​ធានា​ថា គ្រាប់​ពោត​គឺ​ស្អាត​ល្អ និង​គ្មាន​សមាសភាព​ចង្រៃ គ្មាន​រោគសញ្ញា និង​ភ្នាក់ងារ​ចម្លង ការ​វេច​ខ្ចប់​គ្រាប់ពោត​ត្រូវតែ​ស្អាត និង​ជា​ការ​វេច​ខ្ចប់​ថ្មី ហើយ​គ្រាប់ពោត​ត្រូវ​កម្ចាត់ សមាសភាព​ចង្រៃ​ដោយ​ឧស្ម័ន​ម៉េថលី ប្រូម៉ាយ (Methly Bromide) មុន​នាំចេញ។

វិទ្យុ​អាស៊ីសេរី មិនអាច​ទាក់ទង អ្នកនាំពាក្យ​ក្រសួង​កសិកម្ម កញ្ញា អ៊ឹម រចនា និង​អ្នកនាំពាក្យ​ក្រសួង​ពាណិជ្ជកម្ម លោក ប៉ែន សុវិជាតិ ដើម្បី​សុំ​ការ​បកស្រាយ​ជុំវិញ​បញ្ហា​នេះ​បាន​ទេ នៅ​ថ្ងៃទី​២២ ខែ​មីនា។

ទាក់ទិន​រឿង​នេះ ប្រធាន​សមាគម​មិត្ត​កសិករ លោក សុង ភារី យល់​ឃើញ​ថា ការ​អនុម័ត​ច្បាប់ ដើម្បី​រឹត​បន្តឹង​ការ​នាំចូល​ដំណាំ​ពោត​ពី​ប្រទេសជិតខាង​របស់​ភាគី​ថៃ ដោយ​សំអាង​លើ​ការ​បំពុល​ខ្យល់ ដែល​បណ្ដាលមកពី​ការ​ដុត​ស្រែចម្ការ ពី​ប្រទេសជិតខាង ហាក់​មិន​សម​ហេតុ​សម​ផល​ឡើយ។ លោក​កត់សម្គាល់​ឃើញថា ជា​ញឹកញាប់​ភាគី​ថៃ តែងតែ​បិទ​ការ​នាំចូល​កសិផល​មួយ​ចំនួន​ពី​កម្ពុជា នៅពេល​កសិករ​ថៃ ប្រមូល​ផល​បាន​លើស​ពី​តម្រូវការ​ទីផ្សារ។

លោក សុង ភារី៖ «ដូចជា​អត់​មាន​អ្វី​ប៉ះពាល់​ធំដុំ​ផង​។ យើង​អាច​ថា គេ​មាន​ទីផ្សារ​ថ្មី ដែល​មាន​តម្លៃ​ធូរ​ជាង​យើង ឬក៏​គេ​អាច​ផ្គត់ផ្គង់​នៅ​ស្រុក​គេ​បាន​គ្រប់គ្រាន់​។ អ៊ីចឹង​គេ​ចេះតែ​បង្កើត​លេស​ឱ្យ​យើង»

បច្ចុប្បន្ន ពោតក្រហម​មានតម្លៃ ៦៥០​រៀល​ក្នុង​មួយ​គីឡូក្រាម សម្រាប់​ពោត​មាន​ស្នូល​។ ចំណែក​ពោត​ដែល​ប្រលេះ​គ្រាប់​ហើយ មានតម្លៃ​ចន្លោះ​ពី ១​ពាន់​២​រយ​រៀល ទៅ​១​ពាន់​៣​រយ​រៀល​។ ប៉ុន្តែ កសិករ​នៅ​ខេត្ត​ជាប់​ព្រំដែន​ថៃ អះអាង​ថា ក្រោយ​ពេល​ថៃ ឈប់​ចុះ​ប្រមូល​ទិញ​ពោត​មក ពួកគាត់​ត្រូវ​ដឹក​ទៅ​លក់​នៅ​ក្រុមហ៊ុន ភីស៊ី និង​នៅ​ភ្នំពេញ ដោយ​ចំណាយ​ថ្លៃ​ដឹក​ពី ៦​ម៉ឺន​រៀល ទៅ​៧​ម៉ឺន​រៀល ក្នុង​មួយ​តោន បន្ថែម​ទៀត ដែល​ធ្វើ​ឱ្យ​ការ​ចំណាយ​ថ្លៃដើម​កាន់តែ​ច្រើន ខណៈ​តម្លៃ​ពោត ហាក់​នៅ​នឹងថ្កល់ ហើយ​ពេលខ្លះ​ធ្លាក់​ចុះ​ថោក។

កសិករ​ស្នើ​ឱ្យ​រដ្ឋាភិបាល​កម្ពុជា សម្របសម្រួល​ជាមួយ​ភាគី​ថៃ ដើម្បី​នាំចេញ​ពោត​ឡើងវិញ​។ ជាមួយគ្នា​នេះ ពួកគាត់​ស្នើ​ឱ្យ​បង្កើត​រោងចក្រ​កែច្នៃ​ចំណី​សត្វ​នៅក្នុង​ស្រុក​បន្ថែម​ទៀត ដើម្បី​ជួយ​សម្រាល​កសិករ​កុំឱ្យ​ពឹងផ្អែក​ទៅលើ​ការនាំចេញ ដែល​នាំ​ឱ្យ​ជួប​បញ្ហា​ប្រឈម គ្រប់​ពេល​ដែល​គេ​ចង់​បិទ​ការ​នាំ​ចូល​ដូច​ពេល​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។