មន្ត្រីគ្រឹះស្ថានអង្គរឱ្យដឹងថា រយៈពេល៩ខែឆ្នាំ២០២៤ ភ្ញៀវទេសចរបរទេសដែលទៅកំសាន្តនៅខេត្តសៀមរាប បានកើនឡើងចំនួន៣០ភាគរយនិងទទួលបានប្រាក់ចំណូលចំនួន៣២លាន ៥សែនដុល្លារ។
បើទោះបីជាយ៉ាងណាមន្ត្រីគ្រឹះស្ថានអង្គរបញ្ជាក់ថា ចំនួនទេសចររយៈពេល៩ខែនេះ គឺនៅធ្លាក់ចុះជាង ៤០%នៅឡើយ បើប្រៀបធៀបទៅនឹងពេលមុនជំងឺកូវីដ-១៩។
អ្នករកកម្រៃពីសេវាកម្មទេសចរណ៍ស្នើឱ្យរដ្ឋាភិបាល និងក្រសួងទេសចរណ៍កែទម្រង់គោលនយោបាយទីផ្សារទេសចរណ៍មួយចំនួន ដើម្បីជំរុញកំណើនភ្ញៀវទេសចរចិន និងបរទេសឱ្យមកទស្សនាកម្ពុជាបានច្រើនឡើងវិញ។
ប្រធានសមាគមមគ្គុទ្ទេសក៍ទេសចរណ៍ខេត្តសៀមរាប លោក ខៀវ ធី បានប្រាប់វិទ្យុអាស៊ីសេរី កាលពីថ្ងៃទី៣ ខែតុលា ថា បច្ចុប្បន្នជីវភាពរបស់មគ្គុទ្ទេសក៍ទេសចរណ៍មិនប្រសើរទេ ចាប់តាំងតែពីចំនួនភ្ញៀវទេសចរបរទេសធ្លាក់ចុះ ដោយសារវិបត្តិជម្ងឺកូវីដ-១៩រហូតមក។
លោក ខៀវ ធី ចង់ឱ្យរដ្ឋាភិបាលលើកលែងទិដ្ឋាការ (Visa) ទៅលើអ្នកទេសចរចិន ឱ្យដូចប្រទេសមួយចំនួននៅអាស៊ាន ព្រមទាំងបន្ធូរបន្ថយប្រាក់បង់ពន្ធថ្លៃព្រលានយន្តហោះ និងមានអាកាសចរណ៍ជាតិដោយខ្លួនឯង ដើម្បីដឹកជញ្ជូនអ្នកដំណើរពីបរទេសហោះហើរត្រង់មកកម្ពុជា។
លោក ខៀវ ធី៖ «យើងបានប្រជុំច្រើនលើកជាមួយខាងរដ្ឋាភិបាល។ ក្នុងពេលប្រជុំគឺយើងបានលើកឱ្យយកគំរូតាមប្រទេសជិតខាង មានវៀតណាម(Vietnam)និងថៃ(Thailand)គឺគេបានទម្លាក់ថ្លៃទិដ្ឋាការជាច្រើន ដើម្បីកៀរគរឱ្យភ្ញៀវទេសចរចិនចូលមក។ ក៏ប៉ុន្តែការសម្រេចចិត្តនៅមិនទាន់បានជាផ្លូវការពីថ្នាក់ដឹកនាំរដ្ឋាភិបាលនៅឡើយ។ ខ្ញុំគិតថា ថ្នាក់ដឹកនាំរដ្ឋាភិបាលកំពុងតែពិភាក្សាគ្នាជុំវិញការថាតើត្រូវទម្លាក់ថ្លៃទិដ្ឋាការទេសចរនៅក្នុងកម្រិតណានោះ?»។
ចំណែកមគ្គុទ្ទេសក៍ទេសចរណ៍ភាសាចិន លោក យីង ហ្វាត ក៏យល់ឃើញប្រហាក់ប្រហែលគ្នាថា បច្ចុប្បន្ននេះស្ថានភាពភ្ញៀវទេសចរចិន និងបរទេសដែលមកលេងតំបន់អង្គរ នៅមិនទាន់ប្រសើរឡើងវិញទេ គឺឃើញតែសណ្ឋាគារនិងភោជនីយដ្ឋានជាច្រើននៅបិទទ្វារនៅឡើយ។
លោកថា មគ្គុទ្ទេសក៍ទេសចរណ៍ ភាគច្រើនដូចជារូបលោកជាដើម ក៏កំពុងមានបញ្ហាជីវភាពដោយសារតែរកកម្រៃពីសេវាកម្មទេសចរណ៍មិនសូវបាន។
លោក យីង ហ្វាត៖ «ខ្ញុំយល់ថាបើរដ្ឋាភិបាលអត់យកថ្លៃទិដ្ឋាការ(Visa)ពីទេសចរចិន ប្រហែលជាអាចភ្ញៀវទេសចរចិនសម្រុកមកលេងកម្ពុជាច្រើន។ តាមដែលខ្ញុំដឹងថា នៅប្រទេសថៃ(Thailand) គេមិនយកថ្លៃទិដ្ឋាការពីចិនទេ ហើយនៅប្រទេសម៉ាឡេស៊ី(Malaysia)និងសិង្ហបុរី(Singapore)ក៏គេមិនយកថ្លៃទិដ្ឋាការពីភ្ញៀវទេសចរចិនដែរ។ គេធ្វើគឺដើម្បីទាក់ទាញភ្ញៀវទេសចរចិន ឱ្យទៅលេងនៅប្រទេសគេបានច្រើន។ ជនជាតិចិនទៅដល់ទីណាក៏ស៊ីចាយលុយផឹកនៅទីនោះ ដូច្នេះបានធ្វើឱ្យប្រជាពលរដ្ឋទទួលបានចំណូលច្រើន»។
ការលើកឡើងរបស់មគ្គុទ្ទេសក៍ទេសចរណ៍នេះធ្វើឡើងបន្ទាប់ពីរដ្ឋមន្ត្រីក្រសួងទេសចរណ៍ថ្មី លោក ហួត ហាក់ កំពុងតែប្រឹងប្រែងទាក់ទាញអ្នកទេសចរចិន ឱ្យចូលមកកំសាន្តនៅកម្ពុជាបានកាន់តែច្រើន។
លោក ហួត ហាក់ រដ្ឋមន្ត្រីក្រសួងទេសចរណ៍ កាលពីថ្ងៃទី២៩ ខែកញ្ញា បានដឹកនាំគណៈប្រតិភូ សិល្បករ-សិល្បការីនិងប្រតិបត្តិករទេសចរណ៍ ជាច្រើនទៅចូលរួមពិព័រណ៍ទេសចរណ៍អាស៊ាន-ចិនលើកទី១០ នៅទីក្រុងគួយលីន (Guilin)តំបន់ស្វយ័តក្វាងស៊ី (Guangxi) នៃសាធារណរដ្ឋប្រជាមានិតចិន។ ក្នុងការចួលរួមតាំងពិព័រណ៍ទេសចរណ៍នោះ លោក ហួត ហាក់ បានជួបពិភាក្សាជាមួយស្ថាប័នរដ្ឋនិងវិស័យឯកជនរបស់ចិនជាច្រើន ដោយផ្ដោតសំខាន់ទៅលើការជំរុញផ្សព្វផ្សាយទេសចរណ៍ ដើម្បីកៀរគរអ្នកទេសចរចិនឱ្យមកទស្សនាកម្ពុជា។
វិទ្យុអាស៊ីសេរីមិនទាន់អាចសុំការអធិប្បាយ ពីអ្នកនាំពាក្យក្រសួងទេសចរណ៍ លោក តុប សុភ័គ ដើម្បីឆ្លើយតបនឹងសំណើរបស់មគ្គុទ្ទេសក៍ទេសចរណ៍ បាននៅឡើយនៅថ្ងៃទី៥ ខែតុលា។
ទោះបីជាយ៉ាងណា អគ្គនាយកគ្រឹះស្ថានអង្គរ លោក លី សែ ឱ្យដឹងថា រយៈពេល៩ខែឆ្នាំ២០២៤ មានភ្ញៀវទេសចរបរទេស មកទស្សនាអង្គរចំនួនជិត ៧០ម៉ឺននាក់ហើយ រដ្ឋាភិបាល រកចំណូលបានពីការលក់សំបុត្រចូលទស្សនាតំបន់អង្គរចំនួន៣២លាន ៥សែនដុល្លារ។
លោក លី សែ ឱ្យដឹងថា ក្នុងរយៈពេល៩ខែឆ្នាំនេះ តួលេខភ្ញៀវទេសចរបរទេសដែលមកទស្សនាអង្គរ នាំមុខគេ គឺសហរដ្ឋអាមេរិក មានចំនួន៧ម៉ឺននាក់ ឯលំដាប់លេខពីរគឺចិន ចំនួន ៥ម៉ឺន៥ពាន់នាក់ ហើយបន្ទាប់មកគឺភ្ញៀវចក្រភពអង់គ្លេសនិងបារាំង។
លោក លី សែ អះអាងថា ថ្វីត្បិតតែតួលេខភ្ញៀវទេសចរក្នុងរយៈពេល៩ខែឆ្នាំ២០២៤ មានការកើនឡើង៣០ភាគរយ បើប្រៀបធៀបនិងឆ្នាំមុន ក៏ប៉ុន្តែប្រសិនបើប្រៀបធៀបជាមួយនិងពេលជំងឺកូវីដ-១៩មិនទាន់រាតត្បាតវិញ គឺនៅធ្លាក់ចុះជាង៤០ភាគរយទៀត។
កាលពីឆ្នាំ២០១៩ នៅមុនពេលដែលជំងឺកូវីដ-១៩ មិនទាន់រាតត្បាត កម្ពុជាធ្លាប់ទទួលបានភ្ញៀវទេសចរបរទេសចំនួនជិត ៧ (៦,៦១) លាននាក់។ ក្នុងចំណោមភ្ញៀវទេសចរអន្តរជាតិជិត ៧លាននាក់នោះ ភ្ញៀវចិនបានឈរក្នុងលំដាប់លេខរៀងទី១ គឺ ចំនួន ជាង២លាន ៣សែននាក់។
លោក លី សែ បញ្ជាក់ថា បច្ចុប្បន្នទាំងរដ្ឋាភិបាលនិងក្រសួងទេសចរណ៍កំពុងប្រឹងប្រែងទាក់ទាញអ្នកទេសចរចិន និងបរទេសឱ្យវិលត្រឡប់មកទស្សនាកម្ពុជាបានច្រើនឡើងវិញ។
លោក លី សែ៖ «រដ្ឋាភិបាលក៏បានគិតគូរទៅដល់ថ្លៃទិដ្ឋាការចំពោះទេសចរចិនដែរ ក៏ប៉ុន្តែថ្លៃទិដ្ឋាការគឺគ្រាន់តែជាផ្នែកមួយទេ មិនមែនមានន័យថាដោយសារតែតម្លៃទិដ្ឋាការ៣០ដុល្លារនេះ ជារបាំងធ្វើឱ្យភ្ញៀវទេសចរមិនមកកម្ពុជាទេ ខ្ញុំមិនជឿទេលើចំណុចហ្នឹង។ ដូច្នេះដើម្បីទាក់ទាញភ្ញៀវទេសចរទាំងចិន និងបរទេស គឺរដ្ឋាភិបាលមានយន្តការផ្សេងៗជាច្រើនដោយផ្សព្វផ្សាយឱ្យមានការទាក់ទាញខ្លាំង ព្រមទាំងបង្កើតព្រឹត្តិការណ៍ទាក់ទាញទេសចរជាច្រើនទៀត។ ជុំវិញបញ្ហាតម្លៃសេវាបង់ទៅលើព្រលានយន្តហោះ ក៏រដ្ឋាភិបាលកំពុងគិតគូរដែរ»។
កាលពីថ្ងៃទី២០ ខែកញ្ញា រដ្ឋាភិបាលកម្ពុជាបានសម្រេចផ្លាស់ប្ដូរតំណែងលោក សុខ សូកេន ពីរដ្ឋមន្ត្រីក្រសួងទេសចរណ៍ ឱ្យទៅកាន់តំណែងជារដ្ឋមន្ត្រីក្រសួងអធិការកិច្ច ហើយបានតែងតាំងលោក ហួត ហាក់ ដែលជារដ្ឋមន្ត្រីក្រសួងអធិការកិច្ច ឱ្យមកកាន់តំណែងជារដ្ឋមន្ត្រីក្រសួងទេសចរណ៍ជំនួសវិញ ខណៈដែលវិស័យទេសចរណ៍កម្ពុជាកំពុងធ្លាក់ចុះខ្លាំង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។