ប្រជាពលរដ្ឋធ្វើការងារក្នុងវិស័យទេសចរនៅខេត្តសៀមរាប រិះគន់ មន្ត្រីក្រសួងទេសចរថា ខំប្រឹងបង្ហាញតែលទ្ធផលការងារដែលខុសពីការពិត ដោយពុំបានយកចិត្តដាក់ជួយដល់អ្នកប្រករបរក្នុងវិស័យនេះឡើយ។ អ្នកនាំភ្ញៀវទេសចរទាំងនោះ អះអាងថា បច្ចុប្បន្នចំនួនអ្នកទេសចរនៅតំបន់ប្រាសាទអង្គរវត្តកំពុងថយចុះខ្លាំង ស្របពេលដែលសណ្ឋាគារមួយចំនួនក៏បានបិទទ្វារបណ្ដើរៗ ហើយ។
អ្នកនាំភៀវទេសចរ នៅខេត្តសៀមរាប លោក អាង ឆាល ថ្លែងនៅថ្ងៃទី២មីនាថា អ្នកប្រកបរបរក្នុងវិស័យទេសចរណ៍នៅក្នុងខេត្តនេះ មួយចំនួនចាប់ផ្ដើមអត់ការងារធ្វើបណ្ដើរៗ ហើយ និងខ្លះទៀត បាត់បង់ប្រាក់ចំណូលប្រមាណ ៥០ភាគរយ ដោយសារគ្មានភ្ញៀវទេសចរមកលេងកម្សាន្តនៅតំបន់ប្រាសាទអង្គរវត្ត។ លោកបញ្ជាក់ថា ប៉ះពាល់ខ្លាំងចាប់ពីខែដើមខែកុម្ភៈមក ហើយពុំមានអាជ្ញាធរណាចុះមកជួយដល់ពួកគាត់នៅឡើយទេ ជាពិសេសកម្មករបម្រើការងារ ក្នុងភោជនីយដ្ឋាន សណ្ឋាគារ ផ្ទះសំណាក់ និងអ្នកនាំភ្ញៀវទេសចរជួបការលំបាកជាងគេ៖ «អីចឹងបានថានៅខេត្តសៀមរាបវាអត់ទាន់មានការអនុវត្តជាក់ស្ដែងណាមួយកើតទេ។ ក្នុងកាលៈទេសៈបែបនេះ បើសិនគ្រាន់តែនិយាយឱ្យល្អមើល ដើម្បីទាក់ទាញការចាប់អារម្មណ៍អីចឹងជារឿងគ្មានប្រយោជន៍ព្រោះ ប្រជាពលរដ្ឋមានហ្វេសប៊ុក មានព័ត៌មាននៅហ្នឹងដៃ វាជារឿងមួយវាគួរឱ្យអាម៉ាស់មែនទែន ។ពីព្រោះប្រជាជនដែលមានបញ្ហានៅតែជួបដដែល ព្រោះការនិយាយបែបហ្នឹងជារឿងមួយឥតប្រយោជន៍ព្រោះប្រជាពលរដ្ឋនៅតែជួបការលំបាកដដែលហ្នឹង » ។
ចំណែកអ្នកនាំភ្ញៀវទេសចរនៅតំបន់អង្គរវត្តម្នាក់ទៀត លោក ជា តុង់ហាន់ ថ្លែងថា សព្វថ្ងៃនេះមានទេសចរ អន្តរជាតិប្រមាណពី ២៥ ទៅ ៣០ភាគរយប៉ុណ្ណោះ ដែលចូលទៅកម្សាន្តនៅតំបន់ប្រាសាទបុរាណខ្មែរក្នុងខេត្តសៀមរាប។ លោកបញ្ជាក់ទៀតថា ចំនួនអ្នកទេសចរថយចុះនេះ បានប៉ះពាល់យ៉ាងខ្លាំងដល់ការរកប្រាក់ចំណូលរបស់លោក៖ «បាទអត់សូវមានចំណូលទេ ចំណូលតិចតួចណាស់សម្រាប់អ្នកនាំភ្ញៀវឬអ្នករត់ម៉ូតូកង់បី អ្នកទេសចរអីនោះ សណ្ឋាគារខ្លះធ្លាប់ទទួលភ្ញៀវ ៤០០ទៅ ៥០០នាក់ ឥឡូវមានភ្ញៀវតែ ១០០នាក់ទេ ហើយសណ្ឋាគារខ្លះគាត់មានបុគ្គលិក៥០នាក់អីចឹងទៅ វាពិបាកមែនទែនក្នុងការរក្សាបុគ្គលិក ហើយអាចហ្នឹងមានការរំសាយបុគ្គលិកចេញពីសណ្ឋាគារខ្លះទៀត បើសិនជាវិស័យទេសចរនៅតែធ្លាក់ដដែលនោះ » ។
អ្នកប្រកបរបរក្នុងវិស័យទេសចរទាំងនេះ បានរិះគន់របាយការណ៍របស់មន្ត្រីនៃក្រសួងទេសចរថា ខំប្រឹងអួតអាង តែអំពើល្អរបស់ខ្លួន ដែលខុសពីការពិត ពីព្រោះភ្ញៀវទេសចរកំពុងធ្លាក់ចុះខ្លាំង ហើយក្រសួងក៏ពុំទាន់មានវិធានការណាមួយជួយដល់ពួកគាត់ ដែលប្រឈមនឹងបាត់បង់ការងារនៅឡើយទេ។
ប្រតិកម្មរបស់អ្នកនាំភ្ញៀវទេសចរនេះ បន្ទាប់ពីក្រសួងទេសចរ បានបង្ហាញរបាយការណ៍ជាថ្មីទៀតថា ចំនួនអ្នកទេសចរនៅកម្ពុជា បានថយចុះប្រមាណ ១៥ភាគរយ អំឡុងពេលពិភពលោកកំពុងរាលដានជំងឺកូវិដ១៩ នោះ (Corvid-19)។
រដ្ឋលេខាធិការក្រសួងទេសចរ លោក ទិត្យ ចន្ថា ថ្លែងនៅក្នុងពិធីសន្និសីទសារព័ត៌មាន ស្ដីពី «វឌ្ឍនភាព និងទិសដៅបន្តការងារបន្តរបស់ក្រសួងទេសចរណ៍» នៅទីស្ដីការគណៈរដ្ឋមន្ត្រីនៅព្រឹកថ្ងៃទី២ មីនាថា បើទោះបីជាជំងឺឆ្លងផ្លូវដង្ហើមនេះ កំពុងរាតត្បាតនៅលើពិភពលោកក្ដី ក៏អ្នកទេសចរនៅតែមកទស្សនាកម្ពុជាដដែល គឺគ្រាន់តែថយចុះអ្នកទេសចរប្រមាណ ១៥ភាគរយប៉ុណ្ណោះ បើប្រៀបធៀបរយៈពេលដូចគ្នាកាលពីឆ្នាំ២០១៩។ លោកបញ្ជាក់ទៀតថា រហូតមកទល់ពេលនេះ ទើបតែមានសណ្ឋាគារចំនួន៧កន្លែងទេ ដែលបានបិទទ្វារនៅក្នុងខេត្តសៀមរាប ហើយក្រសួងក៏មានវិធានការ និងបានអនុវត្តបណ្ដើរៗ ហើយដែរ ដើម្បីជួយសម្រាលដល់អ្នកដែលរងផលប៉ះពាល់ក្នុងវិស័យទេសចរណ៍ ដើម្បីជួយឱ្យពួកគាត់អាចបន្តអាជីពរបស់ខ្លួនទៅមុខទៀតបាន៖ «ក្នុងករណីថាមានការបិទឬផ្អាក ឬការកាត់បន្ថយពេលវេលាធ្វើការអីជាដើម អីចឹងរដ្ឋាភិបាលមានវិធានការ ដើម្បីជួយក្នុងសម្រាលការលំបាក ដូចជាការឱ្យទៅសិក្សា បន្ថែម មានការឧបត្ថម្ភធនធានថវិកាខ្លះសម្រាប់សម្រួលដល់ការបន្តការរស់នៅទោះបីថាមិនមានប្រាក់ខែ ។ក្នុងនោះផ្នែកឯកជន រដ្ឋាភិបាលក៏បានជួយមួយផ្នែក ហើយសំខាន់មែនទែន គឺបង្វែរពួកគាត់ឱ្យទៅសិក្សារៀនសូត្របន្ថែមទៀត » ។
លោកបន្ថែមថា នៅឆ្នាំ២០១៩ មានអ្នកទេសចរបរទេស ប្រមាណ ៦លាន ៦សែននាក់ (៦.៦០០.០០០) មកទស្សនានៅកម្ពុជា។ មន្ត្រីដដែល ប៉ាន់ប្រមាណថា ចំនួនទេសចរមកកម្ពុជាអាចនឹងថយចុះប្រមាណ ១០រយភាគ នៅក្នុងឆ្នាំ២០២០ នេះ។
របាយការណ៍គ្រឹះស្ថានអង្គរឱ្យដឹងថា នៅខែមករាដើមឆ្នាំ២០២០ នេះ ចំនួនភ្ញៀវទេសចរអន្តរជាតិ ទិញសំបុត្រចូលតំបន់អង្គរ ចំនួនជាង ២៣ម៉ឺននាក់ (២៣៤.៩៣៧នាក់) គឺថយចុះជាង ២៦% បើធៀបកាលពីខែមករាឆ្នាំ២០១៩ នោះ។
ទោះជាយ៉ាងណា ប្រធានសហព័ន្ធ សហជីព កម្មករនិយោជិត វិស័យទេសចរសេវាកម្ម កម្ពុជា លោក ម៉ម រិទ្ធី កត់សំគាល់ ថា ចំនួនអ្នកទេសចរនៅតំបន់អង្គ ថយចុះចន្លោះពី៦០ទៅ៧០ភាគរយ អំឡុងពេលផ្ទុះមេរោគកូវីដ-១៩ (Corvid-19) ហើយចំនួននេះ ប៉ះពាល់ខ្លាំងដល់អ្នកដែលប្រកបរបរក្នុងវិស័យទេសចរ ជាពិសេស កម្មករធ្វើការ តាមសណ្ឋាគារ និង ផ្ទះសំណាក់ ចាប់ផ្ដើមបាត់បង់ការងារបណ្ដើរៗ ហើយ ដោយសារអាជីវកម្មទាំងនោះ បិទទ្វារ និងខ្លះទៀត កាត់បន្ថយបុគ្គលិកធ្វើការ៖ «ខ្ញុំគិតថា ក្រសួងគួរតែបង្ហាញយុទ្ធសាស្ត្រនិងវិធីសាស្ត្រ ឱ្យបានច្បាស់លាស់ ហើយធ្វើឱ្យឃើញភាពជាក់ស្ដែង បើចង់ឱ្យគេជឿវាទាល់តែយើងធ្វើឱ្យមានភាពជាក់ស្ដែង បង្ហាញណាមួយមកថាយើងបានធ្វើនៅកន្លែងនេះ ហើយជួយបានកម្មករហ្នឹងប៉ុន្មាននាក់ ហើយគាត់ទទួលបានអីនៅពេលអំឡុងធ្វើហ្នឹង ហើយបើយើង អត់មានឃើញកម្មករណាទទួលបានអីផង ហើយអត់មានឃើញសកម្មភាពជួយអីឱ្យគេជឿម៉េចបាន គ្រាន់តែការនិយាយហ្នឹង គ្រាន់តែជាយុទ្ធសាស្ត្រហ្នឹងការធ្វើវាអត់មាន » ។
លោកបន្ថែមថា រហូតមកពេលនេះមិនទាន់ឃើញក្រសួងទេសចរចុះទៅជួយដល់ក្រុមកម្មករទាំងនោះនៅឡើយទេ ស្របពេលដែលពួកគាត់កំពុងតែព្រួយបារម្ភគ្មានប្រាក់បង់ធនាគារ ដែលបានខ្ចីប្រាប់គេប្រកបក្នុងវិស័យមួយនេះ។ លោកថា ដើម្បីស្រាយបញ្ហានេះ រដ្ឋាភិបាលគួរតែផ្សព្វផ្សាយតំបន់ទេសចរណ៍របស់កម្ពុជា ទៅប្រទេសដែលពុំមានផ្ទុះជំងឺកូវីដ-១៩ ដើម្បីឱ្យបរទេសមកទស្សនាកម្ពុជាឱ្យបានច្រើនឡើងវិញ និងត្រូវដោះស្រាយវិបត្តិនយោបាយក្នុងស្រុកឱ្យបានឆាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។