ចំនួនភ្ញៀវចូលទស្សនាតំបន់អង្គរ ក្នុងអំឡុងពេល ៣ខែ ដើមឆ្នាំ២០២១ បានធ្លាក់ចុះស្ទើរតែ ១០០% បើធៀបទៅនឹងអំឡុងពេលដូចគ្នាកាលពីឆ្នាំមុន ដោយសារវិបត្តិជំងឺកូវីដ១៩។
គ្រឹះស្ថានអង្គរឱ្យដឹងថា ការលក់សំបុត្រឱ្យភ្ញៀវទេសចរបរទេស ចាប់ពីខែមករា ដល់ខែមីនា គឺមានសរុប ៤.៤៨២នាក់ដែលគិតជាប្រាក់ មានចំនួន ១៨៥.០៧៩នាក់ដែលបរិមាណនេះ ធ្លាក់ចុះជិត ៩៩% (៩៨,៩៧) បើធៀបរយៈពេល ៣ខែដូចគ្នាកាលពីឆ្នាំ២០២០។
ចាប់ពីមានការរីករាលដាលសកលនៃជំងឺកូវីដ១៩ មក វិស័យទេសចរណ៍រងផលប៉ះពាល់ខ្លាំង ក្នុងនោះអាជីវកម្មរាប់ពាន់កន្លែង ត្រូវបានបិទទ្វារទាំងស្រុង។ បន្ថែមពីនេះ ការរាលដាលជំងឺកូវីដ១៩ នៃសហគមន៍ ២០ កុម្ភៈ បណ្តាលឱ្យរងផលប៉ះពាល់ធ្ងន់ធ្ងរខ្លាំងថែមទៀត ដោយសាររដ្ឋាភិបាលប្រកាសបិទរមណីយដ្ឋានទាំងអស់ទូទាំងប្រទេស។
របាយការណ៍ក្រសួងទេសចរណ៍ឱ្យដឹងថា ចាប់ពីខែមករា ដល់ខែតុលា ឆ្នាំ២០២០ កម្ពុជាទទួលបានភ្ញៀវទេសចរបរទេសសរុប ១.២៦៧.៨៩០នាក់ដែលលាក់ចុះជាង ៧៦% បើធៀបនឹងរយៈពេល ១០ខែដូចគ្នា កាលពីឆ្នាំ២០១៩ ដែលមានភ្ញៀវទេសចរបរទេសសរុប ៥.២៩៦.០៨៨នាក់។
ទោះជាយ៉ាងនេះក៏ដោយ ក្រសួងទេសចរណ៍សង្ឃឹមថា ចំនួនភ្ញៀវទេសចរបរទេស ជាពិសេសភ្ញៀវទេសចរចិន កាន់តែច្រើននឹងមកទស្សនាកម្ពុជាឡើងវិញ ដោយសារទំនាក់ទំនងជិតស្និទ្ធរវាងកម្ពុជានិងចិន និងក្រោយដែលកម្ពុជា បានចាក់វ៉ាក់សាំងបង្ការជំងឺកូវីដ១៩ ដល់ប្រជាពលរដ្ឋជាទ្រង់ទ្រាយធំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។