ក្រសួងសេដ្ឋកិច្ច និងហិរញ្ញវត្ថុ កម្មវិធីអភិវឌ្ឍន៍សហប្រជាជាតិ (UNDP) និងរដ្ឋាភិបាលអូស្ត្រាលី ចេញសេចក្តីប្រកាសពត៌មានរួម កាលពីថ្ងៃទី៣០ ខែកញ្ញា បញ្ជាក់ថា វិធានការគាំពារសង្គម និងវិធានការស្តារសេដ្ឋកិច្ចដទៃទៀតរបស់រដ្ឋាភិបាល គឺជាវិធានការមានប្រសិទ្ធភាព ដើម្បីទប់ទល់នឹងបញ្ហាប្រឈមធំៗជាច្រើន ក្នុងអំឡុងពេលរាតត្បាតសកលនៃជំងឺកូវីដ១៩។
ការវាយតម្លៃផលប៉ះពាល់សេដ្ឋកិច្ចនេះ គឺប្រើប្រាស់ទិន្នន័យសេដ្ឋកិច្ចជាក់ស្តែង ផ្អែកលើកំណើនសេដ្ឋកិច្ច ភាពក្រីក្រ ការនាំចេញសម្លៀកបំពាក់ វិស័យសំណង់ សណ្ឋាគារ ភោជនីយដ្ឋាន និងសារគមនាគមន៍ ជាដើម។
ទោះបីជាយ៉ាងណា មន្ត្រីសង្គមស៊ីវិលផ្នែកសេដ្ឋកិច្ចក្រៅប្រព័ន្ធ លើកឡើងថា ប្រជាពលរដ្ឋក្រីក្រជាច្រើន ជួបការលំបាកកាន់តែខ្លាំងឡើង ផ្នែកជីវភាពរស់នៅ ទាំងប្រាក់ចំណូល និងការចំណាយប្រចាំថ្ងៃ។
ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធ ( IDEA) លោក វន់ ពៅ ប្រាប់វិទ្យុអាស៊ីសេរី ថា ការវាយតម្លៃពីផលប៉ះពាល់សេដ្ឋកិច្ចនិងសង្គមនេះ មិនបានឆ្លុះបញ្ចាំងការពិត ពីស្ថានភាពរស់នៅជាក់ស្តែង របស់ពលរដ្ឋនោះឡើយ៖ «នៅក្នុងស្ថានភាពកវីដនេះ បើយើងមើលឃើញថា កាត់បន្ថយក្រីក្រ ខ្ញុំគិតថា អ្នកវាយតម្លៃហាក់ដូចជាមិនបានមើលពីស្ថានភាពពិត នៃការរស់នៅរបស់ពលរដ្ឋ។ ពលរដ្ឋជំពាក់ធនាគារ បើនិយាយពីអ្នកធ្វើការក្រៅប្រព័ន្ធសមាជិកសមាគម ប្រមាណ៧០ % ក្រៅពីហ្នឹង អ្នកអត់មានលុយបង់ថ្ងៃទឹកថ្លៃភ្លើង អ្នកបាត់បង់មុខរបរ អត់បានបង្ហាញស្ថានភាពពិតទេ។ ទាក់ទងនឹងជំនួយសង្គមអ្នកក្រៅប្រព័ន្ធទទួលបានតិចតួចទេ»។
ទោះបីជា ក្រសួងសេដ្ឋកិច្ច កម្មវិធីអភិវឌ្ឍន៍សហប្រជាជាតិ (UNDP) និងរដ្ឋាភិបាលអូស្ត្រាលី បញ្ជាក់ថា វិធានការគាំពារសង្គម និងការស្តារសេដ្ឋកិច្ចដទៃទៀតរបស់រដ្ឋាភិបាល មានប្រសិទ្ធភាពក៏ដោយ ក៏តំណាងកម្មវិធីអភិវឌ្ឍន៍សហប្រជាជាតិ (UNDP)ប្រចាំកម្ពុជា អ្នកស្រី អាលីហ្សា ចាកឃឺរ (Alissar Chaker) បញ្ជាក់ថា ការស្ដារសេដ្ឋកិច្ចឡើងវិញ និងការអនុវត្តប្រព័ន្ធគាំពារសង្គមគួរពង្រឹង និងពង្រីកបន្ថែមទៀត ជាលក្ខណៈប្រព័ន្ធ ដើម្បីជំរុញការស្ដារសង្គមសេដ្ឋកិច្ចឡើងវិញប្រកបដោយនិរន្តរភាព៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។