ប្រធានសហភាពការងារកម្ពុជា លោក អាត់ ធន់ ថារដ្ឋាភិបាល បានផាត់ពួកគាត់ចោល ដែលធ្វើឲ្យតំណាងសហជីព មិនមានឱកាសចូលរួមពិភាក្សា និងផ្តល់យោបល់ ជុំវិញយុទ្ធសាស្ត្រអភិវឌ្ឍន៍វិស័យកាត់ដេរសម្រាប់ឆ្នាំ ២០២២-២០២៧។
ប្រធានសហភាពការងារកម្ពុជាលោក អាត់ ធន់ ថាកាលពីដំបូងៗ រដ្ឋាភិបាលអនុញ្ញាតឲ្យខាងសហជីព ចូលរួមពិភាក្សារឿងនេះបានខ្លះដែរ។ ប៉ុន្តែ ក្រោយៗមក ពោលគឺក្នុងរយៈពេលពីរឆ្នាំចុងក្រោយនេះ ជាពិសេសក្នុងសម័យកូវីដ-១៩ ពួកលោកត្រូវគេផាត់ចោល។
លោកបន្តថា យុទ្ធសាស្ត្រអភិវឌ្ឍន៍វិស័យកាត់ដេរនេះ មានសារៈសំខាន់ក្នុងការចូលរួមចំណែកកម្ពស់និរន្តរភាពក្នុងវិស័យឧស្សាហកម្មកាត់ដេរ។ លោកបន្ថែមថា កន្លងមកអង្គការអន្តរជាតិខាងការងារ (ILO) បានស្រាវជ្រាវមួយក្នុងឆ្នាំ២០១៧ ដោយរកឃើញថា បើកម្ពុជាមិនកែទម្រង់វិស័យកាត់ដេរបច្ចុប្បន្ននេះទេ នោះនឹងមានផលវិបាកកើតឡើងសម្រាប់កម្មករ។ លោក អាត់ ធន់ បន្ថែម ថាផលវិបាកធំបំផុតសម្រាប់កម្មករនោះ គឺក្នុងរយៈពេល ១០ ឆ្នាំខាងមុខនេះ កម្ពុជានឹងបាត់បង់ការងារ និងឱកាសវិនិយោគរហូតដល់ ៧០%។
ទោះជាលោកសោកស្ដាយដែលតំណាងសហជីព ត្រូវរដ្ឋាភិបាលផាត់ចោលយ៉ាងនេះក្ដី ក៏លោក អាត់ ធន់ សាទរចំពោះការដាក់ចេញនូវយុទ្ធសាស្រ្តនេះដែរ ព្រោះលោកសង្កេតឃើញ ថាខ្លឹមសារនៃយុទ្ធសាស្រ្តនេះ មានចំណុចវិជ្ជមានច្រើន៖ « ក្របខណ្ឌគោលនយោបាយហ្នឹង គេធ្វើការកែទម្រង់ដើម្បីលុបបំបាត់ការិយាល័យធិបតេយ្យ ឲ្យមានការកាត់បន្ថយនូវភាពស្មុគស្មាញនៃការនាំចេញនាំចូល ឬក៏ការចុះបញ្ជី និងលើកទឹកចិត្តវិនិយោគឲ្យមកវិនិយោគ និងកាត់បន្ថយថ្លៃដើមផលិតអគ្គីសនី ទឹកភ្លើងជាដើម»។
ប្រតិកម្មរបស់តំណាងសហជីពឯករាជ្យរូបនេះ ធ្វើឡើងក្រោយក្រសួងសេដ្ឋកិច្ច និងហិរញ្ញវត្ថុ កាលពីថ្ងៃទី២១ ខែមីនា ប្រកាសដាក់ឱ្យអនុវត្តជាផ្លូវការនូវ «យុទ្ធសាស្ត្រអភិវឌ្ឍន៍វិស័យកាត់ដេរ ផលិតស្បែកជើង និងកាបូបកម្ពុជា ២០២២-២០២៧»។
ក្រសួងសេដ្ឋកិច្ច និងហិរញ្ញវត្ថុ អះអាងទៀតថា យុទ្ធសាស្រ្តអភិវឌ្ឍន៍វិស័យកាត់ដេរនេះ មានគោលបំណងធ្វើឲ្យវិស័យកាត់ដេរ ទៅជាឧស្សាហកម្ម មានភាពប្រកួតប្រជែងខ្ពស់។
ក្រសួងចាត់ទុកវិស័យនេះ ជាវិស័យអាទិភាពមួយ ក្នុងការរួមចំណែកយ៉ាងខ្លាំងក្លាដល់ការអភិវឌ្ឍសង្គម-សេដ្ឋកិច្ចកម្ពុជា។ ក្រសួងបន្ថែមថា វិស័យកាត់ដេរបន្តឈរនៅលំដាប់ទីមួយ នៃការនាំចេញសរុបរបស់កម្ពុជា ហើយការនាំចេញនេះ គឺដោយសារកម្ពុជាបានទទួលប្រព័ន្ធអនុគ្រោះពន្ធទូទៅ។ ក្រសួងបន្ថែមថា វិស័យកាត់ដេរ បានចូលរួមទ្រទ្រង់ជីវភាពរបស់នៅរបស់ប្រជាពលរដ្ឋខ្មែរ យ៉ាងហោចណាស់ពី ២,៥ លាន ទៅ ៣លាននាក់ ដែលកំពុងអាស្រ័យផលដោយផ្ទាល់ និងដោយប្រយោល។
ទោះជាយ៉ាងនេះក្តី ក្រសួងមិនបានបញ្ជាក់អំពីយន្តការដំឡើងប្រាក់ឈ្នួលរបស់កម្មករ ដែលខាងសហជីពត្អូញត្អែថា នៅកម្រិតតិចតួចស្តួចស្តើង មិនសមស្របទៅនឹងតម្រូវការនៃជីវភាពប្រចាំថ្ងៃរបស់កម្មករនោះឡើយ។ ជាងនេះទៅទៀត បញ្ហាសិទ្ធិការងារ និងសិទ្ធិសេរីភាពរបស់សហជីពឯករាជ្យ ក៏មិនមានរៀបរាប់នៅក្នុងយុទ្ធសាស្ត្រអភិវឌ្ឍន៍វិស័យកាត់ដេរនេះនោះដែរ។
វិទ្យុអាស៊ីសេរី មិនទាន់អាចសុំការបំភ្លឺពីអ្នកនាំពាក្យក្រសួងសេដ្ឋកិច្ច ជុំវិញការមិនហៅតំណាងសហជីពឯករាជ្យឲ្យចូលរួមក្នុងកិច្ចពិក្សាអំពីយុទ្ធសាស្ត្រអភិវឌ្ឍន៍វិស័យកាត់ដេរនេះ និងបញ្ហាប្រាក់ឈ្នួល និងសិទ្ធិការងារ បាននៅឡើយទេ។
កន្លងមកប្រទេសកម្ពុជា រងទណ្ឌកម្មពីសហភាពអឺរ៉ុប ដែលដកប្រព័ន្ធអនុគ្រោះពន្ធ EBA ២០% ដែលត្រូវបានអនុវត្តចាប់តាំងពីខែសីហា ឆ្នាំ២០២០ ក្រោយគណៈកម្មការអឺរ៉ុបរកឃើញការរំលោភសិទ្ធិមនុស្ស សិទ្ធិការងារ និងការបំផ្លាញប្រជាធិបតេយ្យនៅកម្ពុជា។ ជាងនេះទៅទៀត សហរដ្ឋអាមេរិក ដែលបានថ្កោលទោស និងដាក់ទណ្ឌកម្មមន្រ្តីរដ្ឋាភិបាលលោក ហ៊ុន សែន ជាបន្តបន្ទាប់ នៅតែមិនទាន់បញ្ជាក់ជំហររបស់ខ្លួននៅឡើយ ជុំវិញថា តើអាមេរិកនឹងបន្តផ្តល់ប្រពន្ធអនុគ្រោះពន្ធ GSP ដល់កម្ពុជា ឬយ៉ាងណា ក្រោយដាច់ពីរឆ្នាំមកហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។