មន្ត្រីសហជីព និងកម្មកររោងចក្រស្នើសុំឱ្យរដ្ឋាភិបាលមានវិធានការច្បាស់លាស់ក្នុងការជួយសម្រួលថ្លៃបន្ទប់ជួល និងថ្លៃទឹកថ្លៃភ្លើងក្នុងតំបន់បិទខ្ទប់។ ការស្នើសុំនេះ គឺបន្ទាប់ពីប្រមុខរដ្ឋាភិបាល អំពាវនាវជាថ្មីទៀតដល់ម្ចាស់ផ្ទះជួល ផ្អាកយកថ្លៃបន្ទប់ជួល ជាបណ្ដោះអាសន្នព្រមទាំងស្នើសុំឱ្យអគ្គិសនីកម្ពុជា និងរដ្ឋាករទឹកកម្ពុជា ពិនិត្យលទ្ធភាពអនុគ្រោះថ្លៃទឹកថ្លៃភ្លើងដល់កម្មករក្នុងតំបន់បិទខ្ទប់ផង។
មន្ត្រីសហជីព និងកម្មកររោងចក្រមួយចំនួនលើកឡើងថា សារអំពាវនាវរបស់លោកនាយករដ្ឋមន្ត្រី ហ៊ុន សែន ដល់ម្ចាស់ផ្ទះជួល អគ្គិសនីកម្ពុជា និងរដ្ឋាករទឹកកម្ពុជា មិនអាចមានប្រសិទ្ធភាពឡើយ ប្រសិនបើគ្មានវិធានការច្បាស់លាស់ទេនោះ។
ប្រធានសហភាពការងារកម្ពុជា លោក អាត់ ធន់ ថ្លែងថា រដ្ឋាភិបាលគួរតែតម្រូវឱ្យអគ្គិសនីកម្ពុជា និងរដ្ឋាករទឹកកម្ពុជា ផ្អាកយកថ្លៃទឹកនិងថ្លៃភ្លើងជាបណ្ដោះអាសន្នពីកម្មកររោងចក្រក្នុងតំបន់បិទខ្ទប់ ព្រោះអគ្គិសនីកម្ពុជា និងរដ្ឋាករទឹកកម្ពុជា ជាប្រភេទក្រុមហ៊ុនស្វយ័តក្រោមការគ្រប់គ្រងរបស់រដ្ឋ។ ចំពោះ ការស្នើសុំផ្អាក ឬបញ្ចុះតម្លៃបន្ទប់ជួលវិញ លោកយល់ថា ទំនងជាម្ចាស់ផ្ទះជួលភាគច្រើនមិនឯកភាពឡើយ ព្រោះពួកគេសុទ្ធតែជាអ្នករកស៊ីឯកជន និងជំពាក់បំណុលធនាគារជាដើម។ មេដឹកនាំសហជីពរូបនេះ យល់ថា ជាជម្រើសល្អ គឺរដ្ឋាភិបាល គួរតែមានកញ្ចប់ថវិកា ជួយសង្គ្រោះដល់កម្មករដែលបាត់បង់ការងារនិងរស់នៅក្នុងតំបន់បិទខ្ទប់ ឬតំបន់ក្រហម ដូចនៅបណ្តាប្រទេសផ្សេងៗ៖ «នៅពេលស្នើថា អត់ឱ្យដកយកថ្លៃក្នុងអំឡុងពេលនេះ ខ្ញុំគិតថា វាអាចដែរ ប៉ុន្តែមិនច្រើនទេ ព្រោះម្ចាស់ផ្ទះជួលមួយចំនួនដែលយើងដឹង គឺគាត់ទិញសម្ភារៈអីថ្លៃ ហើយគាត់ជំពាក់ធនាគារដែរ។ អ្វីដែលយើងស្តាប់គាត់និយាយ។ ប៉ុន្តែរឿងមួយដែលសត្យានុម័តគឺមិនងាយទេ អ្នកដែលធ្វើមនុស្សធម៌ហ្នឹង គឺមិនងាយទេដូចថៅកែរោងចក្រចឹង គាត់ចំណេញច្រើនក៏ដោយ អំឡុងពេលបិទខ្ទប់ (Lockdown) នេះ ខាងក្រសួងខាងនិយោជកថា គាត់អត់បានអីទេ ដូច្នេះ ទម្រាំម្ចាស់ផ្ទះទៀត គាត់ពិបាកណាស់»។
កម្មការិនីរោងចក្រមួយរូបរស់នៅបន្ទប់ជួលស្ថិតក្នុងតំបន់ក្រហម នៅសង្កាត់ស្ទឹងមានជ័យ២ លោកស្រី ហ៊ាង សាំងម៉េង រៀបរាប់ថា សារអំពាវនាវរបស់លោកនាយករដ្ឋមន្ត្រី ហ៊ុន សែន គ្រាន់តែធ្វើឱ្យល្អមើលប៉ុណ្ណោះ មិនអាចជួយដោះស្រាយទុក្ខលំបាករបស់កម្មករបានឡើយ។ កម្មការិនីដែលមានកូនខ្ចីរូបនេះ ត្អូញត្អែរថា លោកស្រី និងកម្មករផ្សេងទៀត នៅតែបង់ថ្លៃបន្ទប់ជួល និងថ្លៃទឹកថ្លៃភ្លើងក្នុងតម្លៃពេញៗជារៀងរាល់ខែដដែល ដោយគ្មានការលើកលែងឡើយ ទោះបីជាពួកគាត់ជាប់ធ្វើចត្តាឡីស័ក និងបាត់បង់ការងារក៏ដោយ៖ «និយាយរួមទៅ ខ្ញុំគិតថា វាមិនអាចទេ ព្រោះម្ចាស់ផ្ទះគាត់ពិបាកដែរ គាត់បង់គេរាល់ខែ គាត់មានកូនត្រូវចិញ្ចឹមត្រូវអីដែរ ដូច្នេះមិនអាចទេ។ តាមខ្ញុំគិតថា បើតាមតែគាត់ ( លោក ហ៊ុន សែន ) ថា ថ្លៃនេះផ្អាក ថ្លៃនោះផ្អាក គឺគ្មានប្រសិទ្ធភាពទេ បើសិនជាមានប្រសិទ្ធភាព គាត់គួរតែឧបត្ថម្ភជាប្រាក់ ឬក៏ជាស្បៀង អាហារគឺវាល្អជាង ព្រោះយើងបានលុយបានរបស់មកដល់ដៃយើង ស្រណុកយើងចាត់ចែងផ្ទាល់ហ្មង។ បើតាមតែគាត់ថាអ៊ីចឹងមិនងាយទេ ២០ម្ចាស់ផ្ទៃអី គឺមានតែម្នាក់ទេ ដែលគេអនុគ្រោះក្រៅពីនោះ គឺកម្រណាស់ណាស់»។
មេសហជីព និងកម្មករលើកឡើងបែបនេះ ក្រោយពេលលោកនាយករដ្ឋមន្ត្រី ហ៊ុន សែន បង្ហោះសារជាសំឡេង ជិត ៣០នាទី នៅព្រឹកថ្ងៃទី៨ ខែឧសភា ដោយទទូចជាថ្មីទៀត សុំឱ្យម្ចាស់ផ្ទះជួល បញ្ចុះតម្លៃ ឬផ្អាកយកតម្លៃបន្ទប់ជួលពីកម្មករ-កម្មការិនីនៅតំបន់បិទខ្ទប់។ ទន្ទឹមគ្នានេះ លោក ហ៊ុន សែន ក៏បានស្នើសុំឱ្យអគ្គិសនីកម្ពុជា និងរដ្ឋាករទឹកស្វយ័តក្រុងភ្នំពេញ ពិចារណាពិនិត្យលទ្ធភាពជួយសម្រួលថ្លៃថាមពលអគ្គិសនី និងទឹកសម្រាប់កម្មករ-កម្មការិនីនៅក្នុងតំបន់បិទខ្ទប់ផងដែ៖ «ខ្ញុំអង្វរកម្ចាស់ផ្ទះ និងបន្ទប់ជួលទាំងឡាយ សូមផ្អាកជាបណ្ដោះអាសន្ននូវការយកប្រាក់ឈ្នួលពីកម្មករ កម្មការិនី ក្នុងពេលកម្មករ កម្មការិនី មិនទាន់បានបើកប្រាក់ឈ្នួលពីថៅកែនៅឡើយ។ ហើយបើសិនម្ចាស់ផ្ទះឈ្នួលទាំងឡាយ អាចនឹងធ្វើទៅបានរួមគ្នាធ្វើ ដើម្បីជួយដល់កម្មករ កម្មការិនីរបស់យើង»។
សារអំពាវនាវរបស់លោក ហ៊ុន សែន រឿងថ្លៃទឹកនិងថ្លៃភ្លើងនៅពេលនេះ គឺផ្ទុយពីការ ប្រកាសសន្យារបស់លោកកន្លងមក។ កាលពីថ្ងៃទី១០ ខែមេសា លោក ហ៊ុន សែន បានសន្យាថា រដ្ឋ នឹងជួយចេញថ្លៃទឹកភ្លើងដល់គ្រួសារអ្នកស្លាប់ និងអ្នកឆ្លងកូវីដ រយៈពេល៣ទៅ ៥ខែ។ ចំពោះពលរដ្ឋដែលជាប់ធ្វើចត្តាឡីស័ក និងរស់នៅក្នុងតំបន់បិទខ្ទប់វិញ រដ្ឋនឹងជួយបង់ថ្លៃទឹកថ្លៃភ្លើងរយៈពេលពីរខែ ព្រមទាំងជួយថវិកា ៣០ម៉ឺនរៀលនិងស្បៀងអាហារជាដើម។ មិនបានប៉ុន្មានថ្ងៃផង រដ្ឋាភិបាលបានប្រកាសប្តូរពីការផ្តល់លុយ ៣០ម៉ឺនរៀលទៅជាផ្តល់ស្បៀងអាហារជំនួសវិញ។ លើសពីនេះ អគ្គិសនីកម្ពុជា នៅតែទាមទារឱ្យពលរដ្ឋក្នុងតំបន់បិទខ្ទប់ត្រូវទូទាត់ថ្លៃភ្លើងតាមរយៈធនាគារ ឬតាមទីតាំងបង់ប្រាក់ណាមួយដែលនៅជិតបំផុត។ ចំណែកពលរដ្ឋមួយចំនួនវិញ ពួកគាត់បានផ្ទុះការ តវ៉ាដោយសារមិនទទួលបានជំនួយពីអាជ្ញាធរទាន់ពេលវេលា។
ម្ចាស់ផ្ទះជួលក្នុងតំបន់លឿងទុំ នៅខណ្ឌពោធិ៍សែនជ័យ លោកស្រី ឃុត ស្រីអូន ថ្លែងថា ដោយសារក្តីអាណិតចំពោះកម្មករដែលបាត់បង់ការងារធ្វើនោះ លោកស្រីបានសម្រេចបញ្ចុះតម្លៃបន្ទប់ជួលចំនួន ៥០ភាគរយ។ លោកស្រីបន្តថា លោកស្រីមិនអាចផ្អាកយកថ្លៃបន្ទប់ជួលទាំងស្រុងបានឡើយ ព្រោះលោកស្រី កំពុងជាប់បំណុលគ្រឹះស្ថានមីក្រូហិរញ្ញវត្ថុដែលបានខ្ចីសម្រាប់សាងសង់បន្ទប់ជួលកន្លងមក៖ « ដូចខ្ញុំ បើឱ្យខ្ញុំអត់យកថ្លៃឈ្នួលបង់ផ្ទះទាំងស្រុង មានតែឱ្យខ្ញុំងាប់វិញល្អជាង ព្រោះអីខ្ញុំត្រូវអត់បាយដែរ ខ្ញុំនៅបង់ធនាគារ ខ្ញុំមានកូន រៀនតាមអនឡាញ (Online) ត្រូវបង់ត្រូវអីដែរ ហើយណាមួយខ្ញុំក៏មិនទាន់ធ្វើការ ប្រាក់ខែមិនដឹងនៅណាណី ហើយប្តីក៏នៅផ្ទះ កូនក៏ផ្ទះគ្រប់តែគ្នាអ៊ីចឹង។ អ៊ីចឹង ខ្ញុំសុំឱ្យគាត់ ( រដ្ឋាភិបាល ) គិតគួរថា បើឱ្យម្ចាស់ផ្ទះអត់យកទាំងស្រុងហ្មង វាអត់កើតព្រោះអីជួបបញ្ហាដូចគ្នា ហើយចំពោះបើអត់យកថ្លៃទឹកថ្លៃភ្លើងទាល់តែខាងអគ្គិសនីអត់យកពីខ្ញុំដែរ ហើយបើគេយកពីខ្ញុំដែរ តើឱ្យខ្ញុំធ្វើម៉េច»។
ក្រៅពីបញ្ហាថ្លៃឈ្នួលផ្ទះ និងបញ្ហាទឹកភ្លើងនោះ លោក ហ៊ុន សែន ក៏បានណែនាំម្ចាស់រោងចក្រ សហគ្រាសទាំងអស់ ឈប់បំភ័យកម្មករថា ទាល់តែចាក់វ៉ាក់សាំង ទើបអាចធ្វើការងារបានឡើងវិញ។ លោកបញ្ជាក់ថា ក្នុងស្ថានភាពពេលនេះ មិនទាន់អាចអនុវត្តនូវការកំណត់លក្ខខណ្ឌឱ្យកម្មករចាក់វ៉ាក់សាំង ទើបឱ្យចូលធ្វើការងារបានទេ ព្រោះកម្ពុជានៅមិនទាន់មានវ៉ាក់សាំងបង្ការជំងឺកូវីដគ្រប់គ្រាន់នៅឡើយ។ ក្រសួងការងារ ក៏បានចេញសេចក្តីណែនាំភ្លាមៗដល់រោងចក្រសហគ្រាស ឱ្យអនុវត្តទៅតាមអ្វីដែលលោក ហ៊ុន សែន លើកឡើងហើយមន្ត្រីក្រសួងនឹងចុះធ្វើអធិការកិច្ចរឿងនេះ។ ម្យ៉ាងវិញទៀត ក្រសួងណែនាំដល់ម្ចាស់រោងចក្រសហគ្រាស ឱ្យចាប់ផ្តើមបើកប្រាក់ឈ្នួលសម្រាប់ខែមេសា ចំនួន ៥០% និងប្រាក់ឧបត្ថម្ភនានាដែលបានពន្យារពេលនៅក្នុងអំឡុងពេលនៃការបិទខ្ទប់កន្លងទៅ ជូនកម្មករនិយោជិតមិនឱ្យហួសពីថ្ងៃទី១៤ ខែឧសភាខាងមុខនេះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។