សណ្ឋាគារ​ជាង ៤០ និង​កន្លែង​ផ្ដល់​សេវាកម្ម​ភ្ញៀវ​ទេសចរ​មួយ​ចំនួន​ធំ​នៅ​សៀមរាប​ត្រូវ​បិទទ្វារ

ដោយ វ៉ែន សុមេធ
2020-03-22
អ៊ីម៉ែល
មតិ
Share
បោះពុម្ព
អ្នកទេសចរ​ជនជាតិ​កូរ៉េ ​មក​ទស្សនា​ប្រាសាទ​អង្គរវត្ត នៅ​ឆ្នាំ​២០១៩។
អ្នកទេសចរ​ជនជាតិ​កូរ៉េ ​មក​ទស្សនា​ប្រាសាទ​អង្គរវត្ត នៅ​ឆ្នាំ​២០១៩។
RFA

ទីក្រុង​អង្គរ​ខេត្ត​សៀមរាប បាន​ប្រែក្លាយ​ជា​ស្ងប់ស្ងាត់​ក្រោយពី​ផ្ទុះ​ជំងឺ​រលាក​ផ្លូវ​ដង្ហើម​កូវីដ-១៩ ពុំ​ធ្លាប់​មាន បណ្តាល​ឱ្យ​សណ្ឋាគារ​លំដាប់​ពិភពលោក​ជាង ៤០កន្លែង និង​កន្លែង​ផ្ដល់​សេវាកម្ម​ភ្ញៀវ​ទេសចរ​ជាច្រើន​កន្លែង​ទៀត​ត្រូវ​បង្ខំចិត្ត​បិទទ្វារ​។ កត្តា​នេះ ធ្វើ​ឱ្យ​ពលរដ្ឋ​រាប់​ពាន់​នាក់​បាត់បង់​ការងារ​ធ្វើ និង​ប្រាក់ចំណូល​។ ក្រុម​ពលរដ្ឋ​អំពាវនាវ​ឱ្យ​រដ្ឋាភិបាល រក​មធ្យោបាយ​សង្គ្រោះ​វិបត្តិ​សេដ្ឋកិច្ច​​ជា​ប្រព័ន្ធ​នេះ។

ក្រុម​អ្នក​ម៉ូតូ​កង់​បី អ្នកលក់​វត្ថុ​អនុស្សាវរីយ និង ពលរដ្ឋ​មួយ​ចំនួន​ទៀត​រស់នៅ​ក្រុង​សៀមរាប បង្ហាញ​ក្តី​កង្វល់​រួម​ពី​ការធ្លាក់ចុះ​ជីវភាព​កាន់តែ​ធ្ងន់ធ្ងរ បន្ទាប់ពី​ផ្ទុះ​ជំងឺ​រលាក​ផ្លូវ​ដង្ហើម​កូ​វីដ​-១៩  ​ធ្វើ​ឱ្យ​ប្រភព​ការងារ និង​ប្រាក់ចំណូល​ប្រជាជន រស់​ពឹង​ផ្អែកលើ​វិស័យ​ទេសចរ​កាន់តែ​ថយ​ចុះ​មួយ​កម្រិត​ទៀត​។

ពលរដ្ឋ​ថា ទីក្រុង​អង្គរ​ដែល​ធ្លាប់​មាន​មនុស្ស​អ៊ូអរ និង​មាន​ភ្ញៀវ​ទេសចរ​ចម្រុះ​ជាតិ​សាសន៍​មក​កម្សាន្ត​រាប់​លាន​នាក់ ក្នុង​មួយឆ្នាំៗ ក៏ប៉ុន្តែ​នៅ​រយៈពេល​ប៉ុន្មាន​ខែ​ចុងក្រោយ​នេះ បែរជា​ស្ងាត់ជ្រងំ ធ្វើ​ឱ្យ​កន្លែង​ផ្ដល់​សេវាកម្ម​ភ្ញៀវ​ទេសចរណ៍ កន្លែង​លក់​វត្ថុ​អនុស្សាវរីយ និង​ភោជនីយដ្ឋាន​ជាច្រើន​បាន​បិទទ្វារ និង​ក្ស័យធន​។ រីឯ​សណ្ឋាគារ និង​ផ្ទះសំណាក់​តូចៗ​ជាច្រើន​ទៀត ស្ទើរតែ​គ្មាន​ភ្ញៀវ​ទាល់តែសោះ។

អ្នក​រត់​ម៉ូតូ​កង់​បី​ម្នាក់ ឈ្មោះ ប៉ក់ ថូរ ប្រាប់​អាស៊ីសេរី​ថា​  ភាព​ស្ងប់ស្ងាត់​នៃ​ភ្ញៀវ​ទេសចរ​ពុំ​ធ្លាប់​ជួប​នេះ បាន​រុញច្រាន​ឱ្យ​ជីវភាព​ប្រជាជន​ធ្លាក់​ចុះ​ជា​ប្រព័ន្ធ​។ លោក​បាន​ឈប់​រត់​ម៉ូតូ​កង់​បី ដោយសារ​តែ​ខ្សត់​ភ្ញៀវ ហើយ​បច្ចុប្បន្ន លោក​បាន​ធ្វើជា​កម្មករ​សំណង់​ជំនួស ដើម្បី​រក​ប្រាក់​សង​ធនាគារ និង​ចិញ្ចឹមជីវិត​។ លោក​បន្ថែម​ថា គ្រួសារ​លោក បាន​ខ្ចី​ប្រាក់​ធនាគារ​ជាង ៧០០០​ដុល្លារ ដើម្បី​ទិញ​ដី បង់ថ្លៃ​សាលា​ឱ្យ​កូន និង​ទិញ​ម៉ូតូ​កង់​បី ហើយ​ក្នុង​មួយ​ខែ​លោក​ត្រូវ​សង់​ធនាគារ​វិញ​ជាង ២០០​ដុល្លារ ក៏ប៉ុន្តែ​នៅ​គ្រា​ដែល​ភ្ញៀវ​ទេសចរ​ធ្លាក់​ចុះ ធ្វើ​ឱ្យ​គ្រួសារ​លោក​ជួប​ការ​លំបាក​៖ «ភោជនីយដ្ឋាន សណ្ឋាគារ​អី​ផ្សេងៗ ធ្លាប់​សំបូរ​ភ្ញៀវ​ឥឡូវនេះ ស្ងាត់ជ្រងំ​តែម្ដង បង្ក​ជា​ក្តី​កង្វល់​ដ៏​ធំ​សម្រាប់​ពលរដ្ឋ​រស់នៅ​ពឹង​ផ្អែកលើ​វិស័យ​ទេសចរ​នេះ​។ ភ្ញៀវ​ទេសចរ​ស្ងាត់​តែម្ដង និយាយ​ឱ្យ​ចំ​ទៅ ស៊ឹង​ក្លាយ​ជា​ទីក្រុង​ខ្មោច​បាត់​ហើយ​។ មានការ​ផ្លាស់ប្ដូរ​ខ្លាំង​មែនទែន ដោយសារតែ​ពលរដ្ឋ​នៅ​ខេត្ត​សៀមរាប​នេះ មាន​ក្តី​កង្វល់​ខ្លាំង​ណាស់​ដោយសារតែ​យើង ខ្ចី​បុល​ពី​ធនាគារ យក​មក​រកស៊ី​វិស័យ​ទេសចរ ទិញ​ដី ទិញ​ឡាន សង្ឃឹមថា មាន​ភ្ញៀវ​ទេសចរ​ដឹង តែ​ឥឡូវ​អត់​មាន​ភ្ញៀវ​ទេសចរ​ដឹក។ ម្នាក់ៗ​ មិនដឹង​ថា ត្រូវ​គិត​ដោះស្រាយ​យ៉ាងណា​ទេ ចំពោះ​ធនាគារ និង​គ្រឹះស្ថាន​ហិរញ្ញវត្ថុ គេ​នៅតែ​យក​ការ​ប្រាក់​​យក​​រហូត»

អាជីវករ​ម្នាក់​លក់​វត្ថុ​អនុស្សាវរីយ​នៅ​ផ្សារ​ចាស់ ក្នុង​ក្រុង​សៀមរាប ថ្លែង​សុំ​លាក់​ឈ្មោះ​ត្អូញ​ថា ជីវភាព​គ្រួសារ​លោកស្រី  ​ពឹងផ្អែក​ទាំងស្រុង លើ​វិស័យ​ទេសចរ តាមរយៈ​លក់​វត្ថុ​អនុស្សាវរីយ ក៏ប៉ុន្តែ​នៅ​គ្រា​ដែល​ភ្ញៀវ​ទេសចរ​ធ្លាក់​ចុះ​ខ្លាំង ធ្វើ​ឱ្យ​គ្រួសារ​លោកស្រី​ជួប​វិបត្តិ​សេដ្ឋកិច្ច និង​គ្មាន​ប្រាក់​បង្វិល​សង​ធនាគារ​។ លោកស្រី​ថា គ្រួសារ​លោកស្រី​បាន​ជំពាក់​បំណុល​ធនាគារ​ជាង ៣​ម៉ឺន​ដុល្លារ ដោយ​ត្រូវ​សង​ត្រឡប់​ទៅវិញ​ជាង ៦០០​ដុល្លារ ក្នុង​មួយ​ខែៗ​  ប៉ុន្តែ​នៅ​រយៈពេល​ប៉ុន្មាន​ខែ​ចុងក្រោយ​នេះ ពួកគេ​ប្រឈម​ខ្វះ​ប្រាក់​បង្វិល​សង​ម្ចាស់បំណុល ដោយសារតែ​ខ្សត់​ភ្ញៀវ​។  ​លោកស្រី​អំពាវនាវ​ឱ្យ​រដ្ឋាភិបាល អន្តរាគមន៍​ទៅ​ធនាគារ ឱ្យ​បន្ថយ​ការប្រាក់ និង​ពន្យារពេល​សង​មួយ​រយៈ​សិន អំឡុង​ពេល​ដែល​ផ្ទុះ​ជំងឺ​សាហាវ​នេះ​៖ «លក់ដូរ​វា​អត់​ដឹង​ហ្មង អង្គុយ​តាំង​ពី​ព្រឹក​រហូតដល់​យប់ ជួន​កាល​បាន ១០​ដុល្លារ ជូន​កាល​អស់ហើយ​២០​ដុល្លារ​ទៅផ្ទះ​វិញ​។  ​បើ​យើង​បិទតូប យើង​អត់​មាន​ចំណូល​សោះ​។ ខាង​ធនាគារ គេ​អត់​ស​ម្រូ​ល​ឱ្យ​យើង​ផង ខ្ញុំ​ខ្ចី​ធនាគារ មករក​ស៊ី ហើយ​និង​ធ្វើ​ផ្ទះ​បន្តិចបន្តួច​។ បាន​ទាក់ទង​គេ​ម្សិលមិញ​ដែរ គេ​អត់​មាន​សម្រួល​ថា ឱ្យ​យើង​បង់​តែ​ការប្រាក់ ឬមួយ​ក៏​ម៉េច​ទេ​? គេ​ថា គេ​អត់​មាន​វិធានការ​ហ្នឹង​ផង គេ​ថា ឱ្យ​យើង​ព្យាយាម​ឱ្យ​អស់ពី​សមត្ថភាព ធ្វើ​ម៉េច​រកលុយ​បង់​ឱ្យ​គេ»

អ្នករត់​ម៉ូតូ​កង់​បី​ម្នាក់ទៀត​រស់នៅ​ក្រុង​សៀមរាប លោក វិន ភារម្យ បារម្ភ​ថា វិបត្តិ​សេដ្ឋកិច្ច​នេះ អ្នក​ដែល​រងគ្រោះ​ធ្ងន់ធ្ងរ​ជាងគេ គឺ​ពលរដ្ឋ​ក្រីក្រ រក​មួយថ្ងៃ​ស៊ី​មួយថ្ងៃ និង​អ្នក​ដែល​ជំពាក់​លុយ​ធនាគារ។​  លោក​ថា បច្ចុប្បន្ន​មាន​សណ្ឋាគារ​តិចតួច​ប៉ុណ្ណោះ​នៅ​បន្ត​ដំណើរការ ដោយសារ​ម្ចាស់​សណ្ឋាគារ គឺជា​ឧកញ៉ា និង អ្នកមាន​ទ្រព្យ​ច្រើន​។  ​ចំណែក ទំនិញ​លក់​លើ​ទីផ្សារ​ដូចជា ត្រី​សាច់ បន្លែ និង​ផ្លែឈើ​ជាដើម ក៏​ឡើងថ្លៃ​ដែរ​៖ «កាន់តែ​ធ្ងន់​មែនទែន​ហើយ រកតែ​លុយ​ទិញ​អង្ករ​មិន​បាន​ហូប​ផង ធ្ងន់ធ្ងរ​ជាងគេ អ្នក​ជំពាក់​លុយ​ធនាគារ​ហ្នឹង ហើយ​ស្រុក​ខ្មែរ​យើង គេ​អ្នកមាន​លុយ​គេ​ចាយ​មិន​អស់ អា​ខ្លះ អូតែល (HOTEL) ៤ ទៅ ៥ លុយ​គេ​ចាយ​ដូច​ក្រដាស ដល់ពេល​យើង​ប្រជាជន​សាមញ្ញ​ធម្មតា​។ យើង​អ្នកក្រ យើង​រកតែ​អង្ករ​មិន​បាន​ហូប​ផង បាន​ព្រឹក​ខ្លះ​ល្ងាច បាន​ល្ងាច​ខ្វះ​ព្រឹក»

អាស៊ីសេរី​បាន​ព្យាយាម​ទាក់ទង​អភិបាលខេត្ត សៀមរាប លោក ទៀ សីហា ដើម្បី​សុំ​ការ​អធិប្បាយ​ជុំវិញ​ក្តី​បារម្ភ​នេះ ក៏ប៉ុន្តែ​ទូរ​សព្ទ​ហៅ​ចូល​គ្មាន​អ្នកទទួល នៅ​ថ្ងៃទី២១ មីនា។

ចំណែក​អ្នកនាំពាក្យ​ក្រសួង​ទេសចរណ៍ លោក តុប សុភ័ក ក៏​មិន​អាច​ទាក់ទង​បាន​ដែរ នៅ​ថ្ងៃ​ដដែល​នេះ​។ តែ​លោក​បាន​ប្រាប់ វីអូឌី (VOD)​ថា ការ​ផ្ទុះ​ជំងឺ​កូវីដ​-១៩ ធ្វើ​ឱ្យ​ភ្ញៀវ​ទេសចរ​ធ្លាក់​ចុះ​នៅ​ខេត្ត​សៀមរាប​យ៉ាង​គំហុក ដែល​នាំ​ឱ្យ​សណ្ឋាគារ​ប្រមាណ​៤១ ត្រូវ​បាន​បិទទ្វារ ក្នុងចំណោម​សណ្ឋាគារ​ជាង​២០០​កន្លែង​។

លោក​ថា ភ្ញៀវ​ទេសចរ​នៅ​ខេត្ត​សៀមរាប អត្រា​ថយ​ចុះ​ប្រមាណ ៨០​ភាគរយ​មក​ទល់​ពេល​នេះ បណ្តាល​ឱ្យ​មាន​ផល​ប៉ះពាល់​ជាច្រើន។

ចំណែកលោក​នាយករដ្ឋមន្ត្រី ហ៊ុន សែន បាន​ប្រកាស​មិន​យកពន្ធ​ផ្ទះសំណាក់ និង​សណ្ឋាគារ​ខេត្ត​សៀមរាប រយៈពេល ៤ខែ ដើម្បី​ជួយ​សម្រាល​ការ​លំបាក​របស់​ម្ចាស់​អាជីវកម្ម​។ រីធនាគារ​ជាតិ​នៃ​​កម្ពុជា បាន​ណែនាំ​ឱ្យ​ធនាគារ និង​គ្រឹះស្ថាន​មីក្រូហិរញ្ញវត្ថុ​ទាំងអស់ ក្នុង​ប្រទេស​កម្ពុជា ពន្យារពេល​សង​ប្រាក់​ដើម និង​ការប្រាក់​ជូន​ពលរដ្ឋ​ដែល​ខ្ចីបុល​។ ក៏ប៉ុន្តែ​ពលរដ្ឋ​រស់នៅ​ក្រុង​សៀមរាប​អះអាង​​ថា ពួកគេ​នៅ​មិនទាន់​ត្រូវ​បាន​គ្រឹះស្ថាន​មីក្រូហិរញ្ញវត្ថុ និង​ធនាគារ បន្ថយ​ការប្រាក់ និង​ពន្យារពេល​សង​ប្រាក់​នៅឡើយ​ទេ​មក​ទល់​ពេល​នេះ។

ប្រធាន​មជ្ឈមណ្ឌល​ប្រជាពលរដ្ឋ ដើម្បី​អភិវឌ្ឍន៍ និង​សន្តិភាព លោក យង់ គិមអេង យល់​ថា ផល​ប៉ះពាល់​ប្រព័ន្ធ​សេដ្ឋកិច្ច​ទាំងនេះ បណ្តាល​មក​ពី​ជំងឺ​ដ៏​សាហាវ​នេះ ធ្វើ​ឱ្យ​ពលរដ្ឋ​លើ​ពិភពលោក និង​​ពលរដ្ឋ​​ខ្មែរ​​ភ័យ​ខ្លាច មាន​ហ៊ាន​ដើរហើរ​ច្រើន​។ លោក​បារម្ភ​ថា ប្រាក់ចំណូល​ពលរដ្ឋ​ក្រីក្រ ដែល​ប្រកប​របរ​តូចតាច នឹង​ជួប​វិបត្តិ​កាន់តែ​ធ្ងន់ ប្រសិនបើ​ជំងឺ​កូវីដ-១៩ អូស​បន្លាយ​ពេល​៖ «ដំណាក់​កាល​​នេះ​​គឺ រដ្ឋាភិបាល​គួរតែ​ឱ្យ​អាជ្ញាធរ​ថ្នាក់ក្រោម​ជាតិ គិត​គូ​តើ​គ្នា​ប្រឈមមុខ ជីវភាព​រស់នៅ​ប្រចាំថ្ងៃ ជាពិសេស​ការ​ហូប​ចុង តើ​មាន​ប៉ុន្មាន​ភាគរយ ដែល​គាត់​អាច​ប្រឈម​បញ្ហា​ហ្នឹង ហើយ​​អាច​​រក​តើ រដ្ឋ​អាច​ដោះស្រាយ​នៅក្នុង​រយៈពេល​ខ្លី ឱ្យ​គាត់​បាន​ស្អី​ខ្លះ​?​បាទ ! យ៉ាងហោចណាស់ ស្បៀងអាហារ​ហូបចុក​មួយ​ចំនួន ដែល​អាច​ឱ្យ​គាត់​ដោះស្រាយ​ជីវភាព​ប្រចាំថ្ងៃ»

មន្ត្រី​សង្គម​ស៊ីវិល​សង្កេតឃើញ​ថា ក្រោយពី​កើតមាន​ជម្លោះ​នយោបាយ និង​ការ​ធ្លាក់​ចុះ​ប្រជាធិបតយ្យ នៅ​អំឡុង​ឆ្នាំ ២០១៧ ធ្វើ​ឱ្យ​ថយ​ចុះ​ភ្ញៀវ​ទេសចរ​លោក​ខាង​លិច តែ​កើន​ឡើង​ភ្ញៀវ​ទេសចរ​ជនជាតិ​ចិន ក៏ប៉ុន្តែ​ក្រោយពី​ផ្ទុះ​ជំងឺ​ដ៏​សាហាវ​នេះ​នៅ​រយៈពេល​ប៉ុន្មាន​ខែ​ចុងក្រោយ​នេះ ភ្ញៀវ​ទេសចរ​ជនជាតិ​ចិន​បាន​ថយ​ចុះ​ច្រើន ជះឥទ្ធិពល​អាក្រក់​ដល់​សេដ្ឋកិច្ច ជីវភាព​ប្រជាជន និង​កន្លែង​ផ្ដល់​សេវាកម្ម​ភ្ញៀវ​ទេសចរ​ជាដើម៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (1)
Share

poor real estate managment

The roots cause to closed down more hotels resort in Siem Reab city because the real estate land developers aren't underestimated how many hotels should required to build for the guess stay there?this mean that they didn't prepared when the worst case scenarios coming like this today"too many hotels built out there"it should be limit size of guesses.Siem Reab city is depend on to make money from tourists who come to see the AngKor Wat heritage temple only,so what it is happening right now?many hotels run of businesses,and what will happen to others?just wait and see incoming day.So,next time the real estate developer have to be careful with take a measure to prevent this happen again and again...am sorry to say this.I seen this generally in Cambodian businessmen strategy most of them if they saw someone made good business and then other will try to do the same thing or build the same like them,they won't to break up the business ideas to do or create other things and likely to jumping in the same business hot spots,so that why cause the hotels business collapsed by built too many hotel rooms by without guess to stay.

Mar 22, 2020 05:14 PM

គេហទំព័រ​ទាំងមូល