មន្ត្រីគណបក្សសង្គ្រោះជាតិ និងអ្នកឃ្លាំមើលសង្គម លើកឡើងថា ប្រសិនបើមើលមួយភ្លេត ក្រុមគ្រួសារលោក ហ៊ុន សែន ហាក់ដូចជាគិតគួរសម្បើមណាស់អំពីសុខទុក្ខរបស់ប្រជាពលរដ្ឋក្នុងពេលមានវិបត្តិជំងឺកូវីដ-១៩នេះ ប៉ុន្តែបើពិនិត្យឲ្យដិតដល់ គឺពួកគេកំពុងក្រសោបយកអំណាច និងផលប្រយោជន៍សេដ្ឋកិច្ចជាច្រើន។
តំណាងរាស្ត្រគណបក្សសង្គ្រោះជាតិលោក អ៊ំ សំអាន សង្កេតឃើញថា មានមូលហេតុជាច្រើនដែលបង្ហាញថា គ្រួសារលោក ហ៊ុន សែន កំពុងប្រើវិបត្តិកូវីដ ដើម្បីកេងចំណេញនយោបាយ និងសេដ្ឋកិច្ចនេះ ក្នុងនោះដូចជា លោក ហ៊ុន សែន ផ្តល់ឱកាស និងសិទ្ធិអំណាចខ្ពង់ខ្ពស់ដល់កូនប្រុសច្បង គឺលោក ហ៊ុន ម៉ាណែត ដឹកនាំក្រុមការងារប្រយុទ្ធប្រឆាំងជំងឺកូវីដ-១៩។ លោកយល់ថា ទង្វើនេះ គឺជាការព្យាយាមលើកស្ទួយលោក ហ៊ុន ម៉ាណែត ឲ្យលេចធ្លោ ដើម្បីត្រៀមស្នងដំណែងនៅថ្ងៃខាងមុខ។ ទន្ទឹមគ្នានេះ ប្រពន្ធនិងកូនៗផ្សេងទៀតរបស់លោក ហ៊ុន សែន ក៏ឆ្មក់ឱកាសឃោសនានយោបាយក្នុងពេលចែកអំណោយ។ ម្យ៉ាងវិញទៀត តំណាងរាស្ត្របក្សប្រឆាំងរូបនេះ កត់សម្គាល់ថា កូនប្រសា និងកូនបង្កើតរបស់លោក ហ៊ុន សែន មានក្រុមហ៊ុន ឬមុខជំនួញជាច្រើនដែលរកស៊ីផ្គត់ផ្គង់ និងចែកចាយគ្រឿងឧបភោគបរិភោគក្នុងអំឡុងពេលបិទខ្ទប់នេះ ខណៈពលរដ្ឋ ឬអាជីវករភាគច្រើនត្រូវបានហាមឃាត់ការលក់ដូរ៖ «ការរៀបចំកន្លែងធ្វើចត្តាឡីស័ក និងកន្លែងព្យាបាលអ្នកជំងឺកូវីដជាដើម គឺលោក ហ៊ុន ម៉ាណែត និងប្រពន្ធរបស់គាត់ជាអ្នកចាត់ចែងទាំងអស់ ហើយគាត់អត់មានជំនាញខាងហ្នឹងផង និងមិនមែនជាមន្ត្រីសុខាភិបាលជាន់ខ្ពស់ផង។ ដល់ពេលចឹង មន្ត្រីសុខាភិបាល រដ្ឋមន្ត្រីសុខាភិបាល រដ្ឋលេខាធិការអនុរដ្ឋលេខាធិការ បែរជាអត់មានសិទ្ធិចាត់ចែងធំទៅលើរឿងហ្នឹងទៅវិញ ដូច្នេះមានន័យថា អោយលោក ហ៊ុន ម៉ាណែត បញ្ចេញស្នាដៃដើម្បីឲ្យគាត់មានប្រជាប្រិយភាពទាំងក្នុងជួរបក្ស ទាំងក្នុងរដ្ឋាភិបាល និងក្នុងចំណោមមហាជនដើម្បីស្នងដំណែងលោក ហ៊ុន សែន នៅពេលអនាគត»។
លោក អ៊ំ សំអាន យល់ថា ទង្វើកេងចំណេញនយោបាយ និងផលប្រយោជន៍ផ្នែកសេដ្ឋកិច្ចរបស់គ្រួសារលោក ហ៊ុន សែន នេះ គឺជារឿងមិនត្រឹមត្រូវនោះទេ ព្រោះពាក់ព័ន្ធនឹងអំពើពុករលួយ និងការរំលោភអំណាចជាដើម។ លើសពីនេះ លោកបារម្ភថា ទង្វើបែបនេះ ក៏មិនអាចទប់ស្កាត់ជំងឺកូវីដ និងដោះស្រាយទុក្ខលំបាកប្រជាពលរដ្ឋឲ្យមានប្រសិទ្ធិភាពបានឡើយ៖ «លោក ហ៊ុន សែន គាត់ផ្តល់តួនាទីទៅឲ្យលោក ហ៊ុន ម៉ាណែតនេះ ដែលលោក ហ៊ុន ម៉ាណែត ផ្កាយ៣តែគ្រប់គ្រងរហូតដល់ផ្កាយ៤ ក្នុងអនុគណៈកម្មការផ្នែកសន្តិសុខនេះ ។ យើងឃើញថា រំលោភអំណាចផង រំលោភទៅលើឋានានុក្រមនៅក្នុងជួរកងកម្លាំងប្រដាប់អាវុធដែរ ដូច្នេះគេចំណេញទាំងផ្នែកនយោបាយ ទាំងផ្នែកសេដ្ឋកិច្ច»។
ចាប់តាំងពីផ្ទុះជំងឺកូវីដ-១៩ ក្នុងសហគមន៍ជាលើកទី៣មក លោកនាយករដ្ឋមន្ត្រី ហ៊ុន សែន មិនបានចេញពីផ្ទះចុះជួប និងចែកអំណោយដោយផ្ទាល់ដៃដល់ពលរដ្ឋដែលរងផលប៉ះពាល់នោះទេ។ មេដឹកនាំដែលធ្លាប់មើលស្រាលជំងឺកូវីដរូបនេះ ផ្តល់ឱកាសឲ្យកូនៗរបស់លោកស្ទើរគ្រប់គ្នាដើរតួនាទីជំនួសលោក និងមន្ត្រីកំពូលៗដទៃទៀត។ ជាក់ស្តេង កូនប្រុសច្បងរបស់លោក គឺលោក ហ៊ុន ម៉ាណែត ត្រូវបានតែងតាំងជាប្រធានអនុគណៈកម្មការគ្រប់គ្រងសន្ដិសុខ និងសណ្ដាប់ធ្នាប់នៅតាមគោលដៅនិងតំបន់ចត្តាឡីស័ក។ រីឯភរិយារបស់លោកហ៊ុន ម៉ាណែត គឺអ្នកស្រី ពេជ្រ ច័ន្ទមុនី ដឹកនាំក្រុមគ្រូពេទ្យស្ម័គ្រចិត្តសម្តេចតេជោ ដើម្បីព្យាបាលអ្នកកើតជំងឺកូវីដ។ ក្រុមគ្រូពេទ្យស្ម័គ្រចិត្តនេះ មានកម្លាំងរាប់សិបនាក់ និងហាក់មានធនធានសម្ភារៈគ្រប់គ្រាន់ ដោយសារតែលោក ហ៊ុន សែន យកចិត្តទុកដាក់ខ្លាំងជាងមន្ទីរពេទ្យរដ្ឋតាំងតែពីដើមមក។ ជាមួយគ្នានេះ លោក ហ៊ុន សែន ព្យាយាមលើកសរសើពីកូនប្រុសច្បងរបស់លោកជាបន្តបន្ទាប់ និងថែមទាំងអួតប្រាប់មេដឹកនាំវៀតណាមថា លោក ហ៊ុន ម៉ាណែត កំពុងប្រឹងប្រែងសម្រាលទុក្ខលំបាក និងផ្តល់ក្តីសង្ឃឹមដល់ពលរដ្ឋកម្ពុជា ក្នុងការប្រយុទ្ធប្រឆាំងនៃការរីករាលដាលជំងឺកូវីដ-១៩ យ៉ាងពេញទំហឹង។ ចំណែកស្ថាប័នកាកបាទក្រហមកម្ពុជា ស្ថិតក្រោមដឹកនាំរបស់ភរិយាលោក ហ៊ុន សែន គឺអ្នកស្រី ប៊ុន រ៉ានី វិញ ក៏រងការរិះគន់ថា ហាក់មិនសូវសកម្មចែកអំណោយដល់ពលរដ្ឋរងផលប៉ះពាល់ពីវិបត្តិកូវីដនេះទេ ប៉ុន្តែបើចុះចែកកន្លែងណា តែងផ្ញើសារកន្លែងនោះឲ្យពលរដ្ឋដឹងគុណដល់ក្រុមគ្រួសាររបស់លោក ហ៊ុន សែន។ កូនៗមួយចំនួនទៀត ក៏ដើរតួនាទីយកអំណោយដែលដាក់ឈ្មោះលោក ហ៊ុន សែន និងភរិយា ចែកតាមវត្ត និងចែកពលរដ្ឋ ទោះបីជាអំណោយមួយចំនួនជារបស់រដ្ឋក្តី។
ក្រៅពីនេះ អ្នកឃ្លាំមើលពិនិត្យឃើញថា ក្រុមហ៊ុន ឬមុខជំនួញជាច្រើនរបស់សមាជិកគ្រួសារត្រកូលហ៊ុន ក៏ជាអ្នករកស៊ីបោះដុំស្បៀងអាហារ ឬគ្រឿងឧបភោគបរិភោគផ្សេងៗដល់អាជ្ញាធររដ្ឋាភិបាល ដើម្បីយកធ្វើជាអំណោយចែកជូនដល់ពលរដ្ឋ ក្នុងអំឡុងពេលបិទខ្ទប់នេះដែរ។ ក្រុមហ៊ុនទាំងនោះ មានដូចជាក្រុមហ៊ុនផលិតទឹកបរិសុទ្ធវីតាល់របស់អ្នកស្រី ហ៊ុន ម៉ាណា និងក្រុមហ៊ុនសោមា គ្រុប (SOMA Group) ក្រោមការគ្រប់គ្រងរបស់កូនប្រសារលោក ហ៊ុន សែន គឺលោក សុខ ពុទ្ធិវុទ្ធ ដែលរកស៊ីចែកចាយរាប់តាំងពីស៊ុត សាច់គោ អង្ក ទឹកពិសារ និងថាមពលអគ្គិសនីជាដើម។ សមាជិកគ្រួសារបស់លោក ហ៊ុន សែន ក៏មានក្រុមហ៊ុនលក់ថ្នាំពេទ្យផងដែរ។
អ្នកវិភាគនយោបាយលោក គឹម សុខ ថ្លែងថា គ្រួសារលោក ហ៊ុន សែន បានប្រើវិបត្តិកូវីដនេះ កេងចំណេញផលប្រយោជន៍ច្រើនទាំងការប្រមូលផ្តុំអំណាចទាំងសេដ្ឋកិច្ច តាមមធ្យោបាយផ្សេងៗ ដើម្បីត្រៀមឲ្យលោក ហ៊ុន ម៉ាណែត ឡើងស្នងដំណែងបន្តពីលោក។ ទោះជាយ៉ាងណា លោក យល់ថា កិច្ចខិតខំរបស់លោក ហ៊ុន សែន ក្នុងការលើកបន្តុបលោក ហ៊ុន ម៉ាណែត នេះ ទំនងជាមិនទាន់រៀបរយទាំងស្រុងនោះទេ ព្រោះផ្ទៃក្នុងបក្សកាន់អំណាច ក្រុមឈ្មួញធំៗមួយចំនួន រួមទាំងពលរដ្ឋមួយភាគធំផង មិនទាន់ពេញចិត្តនៅឡើយ៖ «លោក ហ៊ុន សែន ក្លាយជាអ្នកប្រមូលទ្រព្យពីអ្នកមាន ពួកឧកញ៉ា នៅក្នុងឈ្មោះប្រមូលទានមនុស្សធម៌ផង ហើ់យសំខាន់បំផុតក្លាយទៅជាអ្នកប្រមូលអំណាចឲ្យមូលក្នុងដៃគ្រួសារហ៊ុន តែម្តង គឺដូចជាក្រុមគ្រួសារហ៊ុន រៀបចំយុទ្ធសាស្ត្រនយោបាយថ្មី ជាពិសេសពាក់ព័ន្ធនឹងការផ្ទេរអំណាចពីលោក ហ៊ុន សែន ទៅកូនប្រុស ហ៊ុន ម៉ាណែត ។ នេះជាការពង្រឹងអំណាចគ្រួសារហ៊ុន និងទ្រព្យគ្រួសារហ៊ុន ក្នុងពេលរីករាលដាលជំងឺកូវីដនេះ»។
ទាក់ទងករណីនេះ អ្នកនាំពាក្យគណបក្សប្រជាជនកម្ពុជាលោក សុខ ឥសាន ឆ្លើយតបថា ការចោទប្រកាន់ទាំងនេះ គឺជាចេតនានយោបាយមូលបង្កាច់បង្ខូចក្រុមគ្រួសាររបស់លោកនាយករដ្ឋមន្ត្រី ហ៊ុន សែន។ លោក អះអាងថា អាជ្ញាធររាជធានីភ្នំពេញ និងតាមបណ្តាខេត្ត សុទ្ធតែមានភារកិច្ច និងការទទួលខុសត្រូវរៀងៗខ្លួនក្នុងការទប់ស្កាត់ជំងឺកូវីដ និងចាត់ចែងអំណោយជូនដល់ប្រជាពលរដ្ឋដែលរងផលប៉ះពាល់ មិនមែនមានភារកិច្ចផ្តាច់មុខតែសមាជិកក្រុមគ្រួសាររបស់លោក ហ៊ុន សែន នោះទេ៖ «ក្នុងការចែកអំណោយនេះ ក៏វាជាគុណសម្បត្តិរបស់អ្នកចែក មិនថា គណបក្សនយោបាយនេះ ជាគណបក្សនយោបាយណាទេ ហើយមានគណបក្សជាង៤០ប្លាយ តើមានអ្នកណាមានអង្ករមានស្រូវមានស្បៀងទៅចែកប្រជាជន ដូច្នេះកុំថា គេបិទសេរីភាព បើយើងអត់ចែកយើងអត់មានប្រជាប្រិយភាព។ ប៉ុន្តែបើយើងទៅចែកយើង ត្រូវបង្ហាញថា គណបក្សប្រជាជននិងរាជរដ្ឋាភិបាល ដឹកនាំដោយគណបក្សប្រជាជនគេ ចែក ដូច្នេះប្រជាជនគេដឹងតើ អ្នកណាដែលផ្តល់ឲ្យប្រជាជន ហើយអ្នកណាដែលបានតែ ថាបានតែនិយាយ»។
ទន្ទឹមគ្នានេះ លោក សុខ ឥសាន បន្តអះអាងថា មូលហេតុដែលរដ្ឋាភិបាលហាមអ្នកលក់ដូរតូចតាច ព្រោះខ្លាចឆ្លងជំងឺកូវីដ ប៉ុន្តែរដ្ឋាភិបាលមិនបានហាមក្រុមហ៊ុនធំៗមិនឲ្យលក់ចែកចាយនោះទេ។ លោក ថ្លែងការពារថា ក្រុមហ៊ុនធំៗមួយចំនួន រួមទាំងក្រុមហ៊ុនរបស់ក្រុមគ្រួសាររបស់លោកនាយករដ្ឋមន្ត្រីផង មិនអាចកេងចំណេញអ្វីក្នុងវិបត្តិកូវីដនេះបានឡើយ ព្រោះសុទ្ធតែលក់ក្រោមតម្លៃទីផ្សារ៖ «អ៊ីចឹងទេ ក្រុមហ៊ុនអ្នកដទៃ មិនថា តែក្រុមហ៊ុននៅក្នុងក្រុមគ្រួសាររបស់កូនៗសម្តេចនាយករដ្ឋមន្ត្រីទេ ក៏លក់ថោកជាងទីផ្សារ តើប្អូនឯងទៅ ចោទថា ចំណេញម៉េច។ឥឡូវនេះវាអត់មានចំណេញទេ វាមានតែខាត ប៉ុន្តែយើងត្រូវ យល់ថា វាជាទឹកចិត្តសប្បុរសធម៌លក់ក្នុងតម្លៃមួយដែលថោកជាងទីផ្សារ ហើយបើលក់ថ្លៃជាងទីផ្សារសួរថា អ្នកណាគេទិញ»។
កាលពីឆ្នាំ២០១៦ អង្គការឃ្លាំមើលពិភពលោក គ្លបល វីនេស (Global Witness) បានចេញផ្សាយរបាយការណ៍មួយដែលបង្ហាញថា ត្រកូល "ហ៊ុន" កំពុងក្ដោបក្ដាប់សេដ្ឋកិច្ចធំៗ របស់កម្ពុជា ដោយអំពើពុករលួយ រំលោភអំណាច និងរំលោភសិទ្ធិមនុស្ស ដើម្បីការពារអំណាចរបស់លោក ហ៊ុន សែន។ អង្គការអន្តរជាតិមួយនេះ រកឃើញថា សែស្រឡាយត្រកូល ហ៊ុន មានចំណែកហ៊ុននៅក្នុងក្រុមហ៊ុនក្នុងស្រុកចំនួន១១៤ក្រុមហ៊ុន និងមានទុនវិនិយោគជាង២០០លានដុល្លារអាមេរិក។ ក្នុងចំណោមក្រុមហ៊ុនទាំង១១៤ នេះ មានដល់ទៅ១០៣ក្រុមហ៊ុនទៅហើយដែលសែស្រឡាយត្រកូល ហ៊ុន មានតួនាទីធ្វើជាប្រធាន ជានាយកក្រុមហ៊ុន ឬមានហ៊ុនលើសពី២៥ភាគរយឡើងទៅ។ ក្រុមហ៊ុនទាំងអស់នោះជាប្រភេទក្រុមហ៊ុនពាណិជ្ជកម្ម ហិរញ្ញវត្ថុ បដិសណ្ឋារកិច្ច និងការកម្សាន្ត ទេសចរណ៍ សំណង់ និងអចលនទ្រព្យ ថាមពល រុករករ៉ែ ព័ត៌មាន កីឡា កសិកម្ម ទូរគមនាគមន៍ ល្បែង សន្តិសុខ តំបន់សេដ្ឋកិច្ចពិសេស វាយនភ័ណ្ឌ រុក្ខាប្រមាញ់ និងថ្នាំពេទ្យជាដើម។
លោក គឹម សុខ មើលឃើញថា ការណ៍ដែលលោក ហ៊ុន សែន ព្យាយាមប្រមូលផ្តុំអំណាច និងសេដ្ឋកិច្ចសម្រាប់គ្រួសាររបស់លោកបែបនេះ នឹងធ្វើឲ្យវិធានការទប់ស្កាត់ជំងឺកូវីដ មិនសូវមានប្រសិទ្ធិភាពឡើយ។ លោក បន្តថា លទ្ធផលអាក្រក់បង្ហាញឲ្យឃើញថា ចំនួនអ្នកស្លាប់និងអ្នកឆ្លងជំងឺកូវីដ នៅតែបន្តកើនឡើង ហើយប្រជាពលរដ្ឋ ក៏ផ្ទុះការតវ៉ាទាមទារស្បៀងអាហារជាបន្តបន្ទាប់ជាដើម៖ «កាលណាលោក ហ៊ុន សែន តែងតាំងកូនប្រុសរបស់គាត់ក្នុងគណៈកម្មការដឹកនាំ កូនប្រសាររបស់គាត់ក្នុងគណៈកម្មការបច្ចេកទេសសុខា ភិបាល វារឹតតែអត់មានប្រសិទ្ធិភាពការងារ ពីព្រោះមន្ត្រីក្នុងគណៈកម្មការនេះ អត់ហ៊ាននិយាយអ្វីប៉ះពាល់ដល់ការសម្រេចិត្តខុសឬការចាត់ចែងខុសរបស់លោក ហ៊ុន សែន ឬកូនប្រុសរបស់លោក ហ៊ុន សែន ព្រោះកាលណាគេនិយាយទៅ ធ្វើឲ្យគ្រួសារ លោក ហ៊ុន សែន ខឹងសម្បារ ម្លោះហើយគណៈកម្មការនេះគ្រាន់តែជាគណៈកម្មការសម្តែងទេ»។
មន្ត្រីគណបក្សសង្គ្រោះជាតិ និងអ្នកឃ្លាំមើលសង្គម លើកឡើងថា នៅពេលសមាជិកគ្រួសាររបស់លោក ហ៊ុន សែន ជាអ្នកធ្វើការងាររាជការផង ជាអ្នកចែកអំណោយផង និងជាអ្នករកស៊ីផងក្នុងលក្ខណៈវិលជុំបែបនេះ គឺប្រាកដជាអាចពាក់ព័ន្ធនឹងអំពើពុករលួយ ទំនាស់ផលប្រយោជន៍ រំលោភបំពានអំណាចជាដើម។ ពួកគេបន្តថា បញ្ហាទាំង នេះ ក៏មិនអាចជួយឲ្យគ្រួសារលោក ហ៊ុន សែន ឬគណបក្សកាន់អំណាចបង្កើនប្រជាប្រិយភាព និងមិនអាចផ្ទេរអំណាចឱ្យលោក ហ៊ុន ម៉ាណែត ប្រកបដោយកិត្តិយសបាននោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។