កម្មកររោងចក្រ សិន តៃ ហ្គាមែន ខេមបូឌា (Zhen Tai Garment Cambodia) នៅខណ្ឌសែនសុខ រាជធានីភ្នំពេញ ទទូចឱ្យថៅកែទទួលយកកម្មករ ចូលធ្វើការវិញ ក្រោយថៅកែបន្តព្យួរការងារកម្មករជារយៈពេល៣ខែ។ ការស្នើសុំនេះធ្វើឡើងបន្ទាប់ពីស្ថាប័នពាក់ព័ន្ធពុំមានដំណោះស្រាយលើវិវាទការងារនេះជាង៣ខែហើយ។
ក្រុមកម្មករជិត ៦រយនាក់ (៥៦៥) លើកឡើងថា រយៈពេល៣ខែមកនេះពួកគេមានជីវភាពខ្វះខាត និងគ្មានលទ្ធភាពដោះស្រាយបំណុលធនាគារនោះទេ។ ក្រុមកម្មករសោកស្ដាយ ដែលថៅកែរោងចក្រមិនទទួលពួកគេចូលធ្វើការងារវិញ ដោយសារការប្រកាន់បក្ខពួក និងរើសអើងសហជីព។
ប្រធានសហជីពស្មារតីកម្មករកម្ពុជា លោក កឹម សុភេន ប្រាប់វិទ្យុអាស៊ីសេរីនៅថ្ងៃទី១៩ ខែកុម្ភៈ ថា លោកមានជីវភាពខ្វះខាតខ្លាំង និងប្រឈមនឹងការជំពាក់បំណុលធនាគារ បន្ទាប់ពីថៅកែរោងចក្រមិនព្រមទទួលយកកម្មករចូលធ្វើការ។ ប្រធានសហជីពរូបនេះអះអាងថា ថៅកែរោងចក្រមានចេតនាបំបែកសំឡេងសហជីព មិនឱ្យធ្វើការនៅរោងចក្របន្ត ដោយសារសហជីពតែងចេញតវ៉ានៅពេលថៅកែបញ្ឈប់កម្មករ៖
«ខ្ញុំស្នើសុំដល់លោកថៅកែ សិន តៃ បើសិនជាលោកនៅតែបន្តការអូសបន្លាយក្នុងការព្យួរការងារបងប្អូនកម្មករដដែលៗហើយអ្នកធ្វើនៅតែធ្វើលោកធ្វើអ៊ីចឹងមិនត្រឹមត្រូវទេ លោក ពិចារណាជួយសម្រួលជីវភាពដល់បងប្អូនកំពុងព្យួរការងារផងគាត់លំបាកណាស់វេទនាខ្លាំងណាស់ហើយបើលោក ធ្វើបែបនេះគឺអយុត្តិធម៌ណាស់សម្រាប់បងប្អូនដែលព្យួរការងារ»។
ស្រដៀងគ្នានេះដែរ កម្មការិនីបម្រើការនៅរោងចក្រ សិន តៃ លោកស្រី ផល ចាន់ថន រៀបរាប់ថា លោកស្រីគ្មានប្រាក់ឱ្យកូនទៅរៀននោះទេ ដោយសារថៅកែផ្ដល់ប្រាក់ឧបត្ថម្ភត្រឹមតែ៣០ដុល្លារក្នុងមួយខែ ដែលមិនគ្រប់គ្រាន់សម្រាប់ថ្លៃជួលផ្ទះផង។ លោកស្រីបន្តថា កម្មករដែលមិនមែនជាសមាជិកសហជីពថៅកែទទួលឱ្យចូលធ្វើការងារវិញ ប៉ុន្តែកម្មករជាសមាជិកសហជីពនៅតែបន្តព្យួរការងារ ដោយថៅកែលើកឡើងថាក្រុមហ៊ុនកំពុងជួបវិបត្តិសេដ្ឋកិច្ចគ្មានអ្នកបញ្ជាទិញ៖
«សូមផ្ដែផ្ដាំទៅថៅកែរោងចក្រ ក៏ដូចជាម្ចាស់គ្រប់គ្រងសហគ្រាសហ្នឹង សូមឱ្យគាត់ហ្នឹងធ្វើការបង្វែរផ្លាស់ប្ដូរឱ្យបានពួកខ្ញុំចូលធ្វើការដើម្បីសម្រួលជីវភាពខ្ញុំក៏ដូចជាកម្មករផ្សេងៗទៀត»។
ទោះជាបីជាយ៉ាងណា កាលពីដើមខែកុម្ភៈ ថៅកែរោងចក្រ សិន តៃ ហ្គាមែន រូបនេះធ្លាប់ព្យួរកម្មករចំនួន២ខែរួចមកហើយ ក្រោមហេតុផលថា គ្មានអ្នកបញ្ជាទិញទំនិញ និងខ្វះខាតសម្ភារៈដើម្បីដំណើរការចង្វាក់ផលិតកម្ម។ ក្រុមកម្មករភាគច្រើនជាស្ត្រីចាត់ទុកថា ថៅកែរោងចក្រប្រកាន់បក្ខពួក រើសអើងសហជីព និងមានចេតនាបង្ខំឱ្យសហជីពឈប់ធ្វើការដោយខ្លួនឯង។រោងចក្រនេះមានកម្មករធ្វើការសរុបជាង៣ពាន់នាក់ (៣.០៨៥) ក្នុងនោះ ជាង២ពាន់នាក់ (២.៥២០) កំពុងធ្វើការ និងជិត ៦រយនាក់ (៥៦៥) ទៀតត្រូវបានព្យួរការងារ។
វិទ្យុអាស៊ីសេរីមិនអាចទាក់ទងអគ្គលេខាធិការរង នៃគណៈកម្មាធិការសម្រាប់ដោះស្រាយបញ្ហាកូដកម្មបាតុកម្មនៃក្រសួងការងារលោក ទេស រុក្ខាផល និងប្រធានរដ្ឋបាលរោងចក្រ សិន តៃ ហ្គាមេន អ្នកស្រី អ៊ុន សុភា ដើម្បីបញ្ជាក់ជុំវិញរឿងនេះបានទេនៅថ្ងៃទី១៩ ខែកុម្ភៈ។
ទាក់ទិនរឿងនេះ អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក លើកឡើងថា ក្រសួងការងារគួរជួយពន្លឿនដោះស្រាយវិវាទការងារជូនកម្មករជាជាងការពារប្រយោជន៍ដល់ថៅកែរោងចក្រ ហើយក្រសួងក៏ជាអាជ្ញាកណ្ដាលដែរ ដូច្នេះត្រូវធ្វើការដោយគោរពទៅតាមច្បាប់។ លោកបញ្ជាក់ថា បើក្រសួងការងារនៅតែបន្តការពារថៅកែរោងចក្របែបនេះអាចនាំឱ្យប៉ះពាល់ដល់ជីវភាពកម្មករ និងធ្វើឱ្យពួកគាត់ ប្រឈមនឹងជំពាក់បំណុលធនាគារវ័ណ្ឌក៖
«សូមកម្មករទាំងអស់នៅក្នុងប្រទេសកម្ពុជាដែលរងគ្រោះដោយសារការព្យួរការងារឬក៏ការបិទរោងចក្រជាពិសេសមិនទទួលបានប្រាក់ឈ្នួលពីថៅកែសូមកុំអស់សង្ឃឹម យើងជ្រើសរើសមេដឹកនាំខុសគឺធ្វើឱ្យប៉ះពាល់ដល់ជីវភាពយ៉ាងខ្លាំង ហើយនិងការរស់នៅរបស់ពួកគាត់អ៊ីចឹងហើយខែកក្កដា ឆ្នាំ២០២៣ ខាងមុខនេះគឺជាការបោះឆ្នោតតំណាងរាស្ត្រកម្មករក៏ដូចជាសហជីពត្រូវមើលឱ្យច្បាស់ថាតើបក្សណាមួយដែលមានគោលនយោបាយច្បាស់លាស់ក្នុងការការពារផលប្រយោជន៍កម្មករសហជីព»។
កាលពីថ្ងៃទី៨ ខែកុម្ភៈ ខាងអធិការការងារចុះមកសម្របសម្រួលវិវាទការងារនេះម្ដងរួចហើយ ប៉ុន្តែមិនទទួលបានដំណោះស្រាយ។ ភាគីកម្មករស្នើសុំថៅកែ ៤ចំណុច ទី១ស្នើឱ្យព្យួរការងារកម្មករដោយមានការផ្លាស់ប្ដូរគ្នាម្ដងម្នាក់ ទី២ថៅកែត្រូវផ្ដល់ប្រាក់ចំនួន២សែនរៀល (២.០០០.០០) បន្ថែមដល់កម្មករដែលត្រូវព្យួរការងារ ទី៣.ស្នើឱ្យក្រុមហ៊ុនកុំព្យួរការងារស្ត្រីដែលមានផ្ទៃពោះ និងទី៤.ស្នើឱ្យថៅកែកុំមានការរើសអើងកម្មករសហជីព។ បើទោះជាយ៉ាងណា ថៅកែរោងចក្ររូបនេះច្រានចោលសំណើទាំងនេះ ដោយទទូចឱ្យអធិការការងារសម្រេចព្យួរការងារកម្មករបន្តទៀត។
កម្មករ និងសង្គមស៊ីវិលអំពាវនាវដល់ក្រសួងការងារ និងស្ថាប័នពាក់ព័ន្ធជួយដោះស្រាយវិវាទការងារនេះឱ្យឆាប់រហ័ស ដើម្បីឱ្យពួកគាត់មានជីវភាពសមរម្យ ហើយលើកទឹកចិត្តឱ្យពួកគាត់ធ្វើការងារក្នុងស្រុកកាត់បន្ថយការចំណាកស្រុកទៅក្រៅប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។