កម្មកររោងចក្រទាមទារដំឡើងប្រាក់ឈ្នួលសម្រាប់ឆ្នាំ២០២៥ ខណៈក្រសួងការងារគ្រោងប្រជុំចរចាកំណត់ប្រាក់ឈ្នួលអប្បបរមា

ដោយ មាន ឫទ្ធិ
2024.08.13

ក្រសួងការងារ និងបណ្ដុះបណ្ដាលវិជ្ជាជីវៈ នឹងចាប់ផ្ដើមកិច្ចប្រជុំចរចាកំណត់ប្រាក់ឈ្នួលអប្បបរមាដល់កម្មកររោងចក្រកាត់ដេរ សំលៀកបំពាក់ និងផលិតស្បែកជើងសម្រាប់ឆ្នាំ២០២៥ ចាប់ពីថ្ងៃទី១៤ ខែសីហា។

កិច្ចប្រជុំចរចាកំណត់ប្រាក់ឈ្នួលអប្បបរមានេះ មានការចូលរួមដោយសមាជិកក្រុមប្រឹក្សាជាតិប្រាក់ឈ្នួលអប្បបរមាចំនួន ៥១រូប មកពីតំណាងភាគីរាជរដ្ឋាភិបាល តំណាងភាគីកម្មករ និងតំណាងភាគីថៅកែរោងចក្រ។ ប្រាក់ឈ្នួលអប្បបរមាត្រូវបានដំឡើងចំនួន២០៤ ដុល្លារសម្រាប់ឆ្នាំ២០២៤។

ប្រធានសហជីពសេរីកម្មករប្រចាំរោងចក្រខេនស្ព័តស៊ូ (Can Sports Shoes) ខេត្តកំពង់ឆ្នាំង លោក កាន សុខវី ថាប្រាក់ខែដែលលោក និងកម្មកររោងចក្រផ្សេងទៀតទទួលបាននាពេលបច្ចុប្បន្ននេះនៅតែមិនទាន់អាចធ្វើឱ្យជីវភាពបានល្អប្រសើរបាននៅឡើយទេ។ លោកថាមានកម្មករជាច្រើននៅមិនមានលទ្ធភាពរកអាហារដែលមានជីវជាតិ និងផ្គត់ផ្គង់ការសិក្សាកូនៗរបស់ពួកគាត់បាននៅឡើយទេ ហើយលោកសង្ឃឹមថារដ្ឋាភិបាលនឹងគិតគូរពីបញ្ហាទាំងនេះ។

លោក កាន សុខវី ៖«ចង់ឱ្យបងប្អូនកម្មករកម្មការិនីទាំងអស់ដែលធ្វើការនៅក្នុងរោងចក្រកាត់ដេរ វិស័យស្បែកជើងឱ្យបានប្រាក់ខែគ្រប់២៥០ ដុល្លារទៅដើម្បីឱ្យបានជីវភាពគាត់សមរម្យទីមួយ ទីពីរឱ្យគាត់ចំណាយលើម្ហូបអាហារ ទីបីចំណាយលើកូនរៀន ការសិក្សារបស់កូន ហើយទីបួននោះគាត់ជំពាក់អង្គការក្នុងមានម្នាក់ៗចូល៩០ ទៅ៩៥ភាគរយហើយដែលជំពាក់អង្គការនោះ ដូច្នេះបើប្រាក់ខែគោលដូចសព្វថ្ងៃនេះគាត់ស៊ីមិនគ្រប់មិនគ្រាន់ទេ »។

គិតត្រឹមឆ្នាំ២០២៣មានកម្មកររោងចក្រកាត់ដេរសំលៀកបំពាក់ និងស្បែកជើងជាង៧សែននាក់ដែលភាគច្រើនជាស្ត្រី។ កម្មករ ត្អូញត្អែរថា ពួកគាត់បានខិតខំធ្វើការដោយទទួលបានកម្រៃតិចតួចសម្រាប់ផ្គត់ផ្គង់គ្រួសារ។ សហភាពអឺរ៉ុបបានដកប្រព័ន្ធអនុគ្រោះពន្ធ (EBA) ចំនួន ២០ភាគរយក្នុងឆ្នាំ២០២០ ហើយក្នុងឆ្នាំដដែលនោះសហរដ្ឋអាមេរិកបានផ្អាកប្រព័ន្ធអនុគ្រោះពន្ធ (GSP) ដែលធ្វើឱ្យប៉ះពាល់ដល់អ្នកវិនិយោគទុន និងកម្មករក្នុងវិស័យកាត់ដេរសំលៀកបំពាក់ និងស្បែងជើង។ ការដកហូតប្រព័ន្ធអនុគ្រោះពន្ធពីបណ្ដាប្រទេសប្រជាធិបតេយ្យនេះគឺក្រោយពេលដែលរដ្ឋាភិបាលកម្ពុជាដែលដឹកនាំដោយលោក ហ៊ុន សែន បញ្ជាឱ្យតុលាការរំលាយគណបក្សសង្គ្រោះជាតិ និងបន្តដឹកនាំប្រទេសតាមបែបផ្ដាច់ការ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។

អត្ថបទពេញនិយម

RFA

ប្រធានព្រឹទ្ធសភា លោក ហ៊ុន សែន ចោទទីប្រឹក្សារបស់លោកថា បានយកឈ្មោះលោកទៅបោកប្រាស់អ្នកដទៃ

អត្ថបទពេញនិយម

សេដ្ឋកិច្ច

រដ្ឋាភិបាលគួរកែទម្រង់គោលនយោបាយ «ដើម្បីទាក់ទាញទេសចរចិន និងបរទេសទស្សនាកម្ពុជា»

រដ្ឋាភិបាលគួរកែទម្រង់គោលនយោបាយ «ដើម្បីទាក់ទាញទេសចរចិន និងបរទេសទស្សនាកម្ពុជា»