ក្រុមយុវជនលើកឡើងថា ក្រសួងទេសចរណ៍គួរតែបើកលំហសិទ្ធិសេរីភាពឱ្យពលរដ្ឋចូលរួមផ្សព្វផ្សាយពីតំបន់អេកូទេសចរណ៍នៅក្នុងស្រុកជាមុនសិន ជាជាងស្នើជំនួយពីបណ្ដាប្រទេសផ្សេង ព្រោះ មិនមែនជាដំណោះស្រាយល្អក្នុងការទាក់ទាញភ្ញៀវទេសចរ។ ការលើកឡើងនេះគឺបន្ទាប់ពី រដ្ឋមន្ត្រីក្រសួងទេសចរណ៍ ជួបជាមួយឯកអគ្គរដ្ឋទូតឥណ្ឌាប្រចាំកម្ពុជាដើម្បីស្នើឱ្យរដ្ឋាភិបាលឥណ្ឌាជួយគាំទ្រសម្រាប់គម្រោងអភិវឌ្ឍន៍លើវិស័យទេសចរណ៍។
ក្រុមយុវជន និងមន្ត្រីអង្គការសង្គមស៊ីវិលគាំទ្រឱ្យរដ្ឋាភិបាលកម្ពុជាបង្កើនកិច្ចសហប្រតិបត្តិការលើវិស័យទេសចរណ៍ជាមួយរដ្ឋាភិបាលបរទេស ប៉ុន្តែការបង្កើនឱ្យមានភ្ញៀវទេសចរណ៍ទៅបានគឺទាល់តែរដ្ឋាភិបាលលុបបំបាត់អំពើពុករលួយ និងពង្រឹងប្រព័ន្ធសន្តិសុខសុវត្ថិភាពឱ្យបានខ្ពស់។
សកម្មជនចលនាមាតាធម្មជាតិ លោក លី ចាន់ដារ៉ាវុត ប្រាប់វិទ្យុអាស៊ីសេរីនៅថ្ងៃទី២៣ កញ្ញា ថា ស្ថាប័នពាក់ព័ន្ធ ជាពិសេសក្រសួងទេសចរណ៍នៅមិនទាន់ខំខិតប្រឹងប្រែងឱ្យអស់ពីសមត្ថភាពដើម្បីផ្សព្វផ្សាយពីតំបន់ធម្មជាតិនៅឡើយទេ ពីព្រោះនៅក្នុងគេហទំព័ររបស់ក្រសួងពុំសូវឃើញមានការផ្សព្វផ្សាយពីតំបន់ធម្មជាតិឡើយទេ។
លោក លី ចាន់ដារ៉ាវុត៖ «បើទោះជាយើងខិតខំយ៉ាងណាក៏ដោយទៅជួបភាគីពាក់ព័ន្ធយ៉ាងណាក៏ដោយបើយើងមិនធ្វើឱ្យក្នុងប្រទេសយើងឱ្យមានសន្តិសុខឱ្យមានសណ្ដាប់ធ្នាប់កាត់បន្ថយអំពើពុករលួយតាមព្រំដែននៅពេលដែលគេឆ្លងចូលមកហ្នឹងទេ យើងនឹងមិនទទួលបានភ្ញៀវទេសចរទេ ភ្ញៀវទេសចរមកលេងនៅប្រទេសកម្ពុជា គេយកលុយមកចាយនៅប្រទេសកម្ពុជាអ៊ីចឹងនៅពេលគេចូលមកកម្ពុជាប្រឈមនឹងការចាប់ជំរិត ការឆក់ ការប្លន់អីជាដើមហ្នឹង គ្មានអ្នកណាគេចង់ចូលមកលេងទេ»។
ស្រដៀងគ្នានេះ យុវជនសកម្មការងារសង្គម លោក នី ចាន់ដា ថ្លែងថា លោកហាក់គ្មានជំនឿទៅលើកិច្ចសហប្រតិបត្តិការនេះ ពីព្រោះកន្លងមករដ្ឋមន្ត្រីទេសចរណ៍ និងរដ្ឋមន្ត្រីបរិស្ថានក្ដី មិនលើកកម្ពស់ធនធានដែលមានស្រាប់នោះទេ ។ លោកបន្តថា បើចង់អភិវឌ្ឍន៍កន្លែងណាមួយជាតំបន់អេកូទេសចរណ៍ ស្ថាប័នពាក់ព័ន្ធត្រូវទប់ស្កាត់ការកាប់បំផ្លាញធនធានធម្មជាតិ និងលើកកម្ពស់យុវជនឱ្យចូលរួមការពារធនធានធម្មជាតិដើម្បីធានាដល់ការអភិវឌ្ឍតំបន់ទេសចរណ៍ធម្មជាតិ។
ប្រតិកម្មរបស់យុវជននេះគឺបន្ទាប់ពី រដ្ឋមន្ត្រីក្រសួងទេសចរណ៍ថ្មីគឺ លោក សុខ សូកេន ជួបពិភាក្សាជាមួយ ឯកអគ្គរដ្ឋទូតសាធារណរដ្ឋឥណ្ឌាប្រចាំកម្ពុជា អ្នកស្រី ដេវីនី កូប្រាហ្គាដេ (Devyani Khobragade) កាលពីថ្ងៃទី២២ កញ្ញា លើគម្រោងអភិវឌ្ឍន៍ទេសចរណ៍៣ចំណុច ទី១ការអភិវឌ្ឍកម្មវិធីលើវិស័យទេសចរណ៍ផ្សព្វផ្សាយពីតំបន់អេកូទេសចរណ៍ ទី២លើកកម្ពស់សកម្មភាពអេកូទេសចរណ៍នៅក្នុងសហគមន៍ផាត់សណ្ដាយ នៅខេត្តកំពង់ធំ និងលើកកម្ពស់សកម្មភាពអេកូទេសចរណ៍បឹងស្នេហ៍នៅក្នុងសហគមន៍ខេត្តព្រៃវែង។ លើសពីនេះរដ្ឋាភិបាលកម្ពុជាក៏បានជំរុញឱ្យរដ្ឋាភិបាលឥណ្ឌាវិនិយោគលើវិស័យឧស្សាហកម្មទេសចរណ៍ និងបានចុះកិច្ចព្រមព្រៀងបង្កើនជើងហោះហើររវាងទីក្រុងភ្នំពេញ និងទីក្រុងញូដេលីរបស់ឥណ្ឌាផងដែរ។
ជុំវិញរឿងនេះប្រធានមជ្ឈមណ្ឌលពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ថា ជំនួបទ្វេភាគីនេះមិនអាចជួយស្ដារមុខមាត់កម្ពុជាឱ្យមានភាពប្រសើរឡើងដើម្បីទាក់ទាញភ្ញៀវទេសចរ និងអ្នកវិនិយោគធំៗបាននៅឡើយនោះទេ។
លោក យង់ គិមអេង៖ «ខ្ញុំគ្រាន់តែសង្ឃឹម និងរំពឹងថា រដ្ឋាភិបាលហ្នឹងពិចារណាជុំវិញបញ្ហានេះធ្វើយ៉ាងណាឱ្យវិស័យទេសចរណ៍របស់យើងនេះក្លាយទៅជាវិស័យស្នូលសំខាន់ដែលប្រជាពលរដ្ឋទទួលបានផលប្រយោជន៍ហើយមានភាពរីកចម្រើនច្រើនទាំងសេដ្ឋកិច្ចរដ្ឋទាំងគ្រួសារពីព្រោះវិស័យទេសចរណ៍នេះសំខាន់ ហើយការពង្រឹងតម្លាភាពកាត់បន្ថយអំពើពុករលួយនៅក្នុងស្ថាប័នរដ្ឋនិងស្ថាប័នសាធារណៈផ្សេងទៀតនេះជារឿងសំខាន់»។
ទាក់ទិនបញ្ហានេះ រដ្ឋមន្ត្រីក្រសួងទេសចរណ៍ លោក សុខ សូកេន បដិសេធមិនបកស្រាយតាមប្រព័ន្ធទូរស័ព្ទនោះទេ។
កន្លងទៅប្រជាពលរដ្ឋរស់នៅពឹងផ្អែកលើវិស័យទេសចរណ៍បាននាំគ្នាត្អូញត្អែរពីការបាត់បង់ចំណូល និងជំពាក់បំណុលធនាគារវ័ណ្ឌក។ ពួកគាត់យល់ថា បញ្ហានេះដោយសារតែ កម្ពុជាមិនគោរពសិទ្ធិមនុស្ស អំពើពុករលួយជាប្រព័ន្ធ ការជួញដូរមនុស្ស អំពើឆបោកតាមប្រព័ន្ធអនឡាយ (Online) ដែលធ្វើឱ្យភ្ញៀវទេសចរមួយចំនួនបាត់បង់ទំនុកចិត្ត និងខ្លាចរអាមិនហ៊ានមកកម្សាន្តនៅកម្ពុជា។
របាយការណ៍ក្រសួងទេសចរណ៍បង្ហាញថា ក្នុងឆមាសទី ១ ឆ្នាំ ២០២៣ កម្ពុជាទទួលបានភ្ញៀវទេសចរអន្តរជាតិប្រមាណ ២លាន ៥សែននាក់ (២.៥០០.០០០) ។ ក្រុមយុវជន និងមន្ត្រីសង្គមស៊ីវិលយល់ឃើញថា រដ្ឋាភិបាលគួរតែងាកមក គោរពសិទ្ធិមនុស្ស និងពង្រឹងការអនុវត្តច្បាប់ឱ្យមានតម្លាភាពដើម្បីស្រូបទាញភ្ញៀវទេសចរណ៍ឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។