ព្រៃឈើ​នៅ​តំបន់​អារ៉ែង​៥​ហិកតារ ត្រូវ​បាន​កាប់​បំផ្លាញ

ដោយ សុជីវី
2022.10.04
Share on WhatsApp
Share on WhatsApp
ព្រៃឈើ​នៅ​តំបន់​អារ៉ែង​៥​ហិកតារ ត្រូវ​បាន​កាប់​បំផ្លាញ ទិដ្ឋភាពក្រុមយុវជនពិនិត្យព្រៃនៅតំបន់អារ៉ែង ខេត្តកោះកុង ត្រូវគេកាប់ទន្ទ្រានកាលពីថ្ងៃទី២ ខែតុលា ឆ្នាំ២០២២។
រូប៖ ក្រុមយុវជនផ្តល់ឲ្យ

យុវជន​ខ្មែរ​ថាវរៈ​អះអាង​ថា ព្រៃ​នៅក្នុង​តំបន់​អារ៉ែង​ធំ​តូច​ទាំងអស់​ដែល​មាន​ទំហំ​៥​ហិកតារ នៅ​ស្រុក​ថ្មបាំង ខេត្ត​កោះកុង ត្រូវ​បាន​ក្រុម​មន្ត្រី​បរិស្ថាន​ស្រុក​ថ្មបាំង​កាប់​រំលំ​ទាំងអស់ ក្នុង​គោលបំណង​ឈូស​ឆាយ​ដើម្បី​ដី​ព្រៃ​នេះ ទៅ​ធ្វើ​ជា​ទ្រព្យសម្បត្តិ​ឯកជន​។ សកម្មជន​បរិស្ថាន យល់ឃើញ​ថា ព្រៃឈើ​នៅ​តំបន់​អារ៉ែង​កំពុង​ប្រឈម​ការ​បាត់បង់ ដោយសារតែ​ដី​នៅក្នុង​តំបន់​នោះ​កំពុង​ហក់​ឡើងថ្លៃ​ពី​មួយ​ឆ្នាំទៅ​មួយឆ្នាំ ហើយ​ពួកគេ​ស្នើសុំ​រដ្ឋាភិបាល​ទប់ស្កាត់​ការ​ជួញដូរ​ដី​ព្រៃ​តំបន់​នេះ​ជា​បន្ទាន់។

សកម្មជន​ក្រុម​ខ្មែរ​ថាវរៈ លោក ស្វាយ សំណាង ប្រាប់​វិទ្យុ​អាស៊ីសេរី​នៅ​ថ្ងៃទី​៣ តុលា ថា ព្រៃឈើ​នៅក្នុង​តំបន់​អារ៉ែង នៅ​តាម​ផ្លូវ​ឡើង​ទៅ​តំបន់​ម្រេញ​កង្កែប នៅ​ក្នុង​ឃុំ​ជំនាប់ ស្រុក​ថ្មបាំង ដែល​មាន​ទំហំ​ជាង​៥​ហិកតារ ត្រូវ​បាន​មន្ត្រី​បរិស្ថាន​នៅក្នុង​ស្រុក​ថ្មបាំង​កាប់​ផ្ដួលរំលំ​ទាំងអស់ កាលពី​ចុង ខែកញ្ញា កន្លងទៅ​។ លោក ស្វាយ សំណាង បន្ថែម​ថា ព្រៃឈើ​នៅ​តំបន់​អា​រ៉ែ​ង កំពុង​ប្រឈម​ក្នុង​ការ​បាត់បង់​យ៉ាង​ខ្លាំង បន្ទាប់ពី​ដី​នៅ​តំបន់​នេះ​មានតម្លៃ​កាន់តែ​ខ្ពស់​ពី​មួយ​ឆ្នាំទៅ​មួយឆ្នាំ ហើយ​លោក​ស្នើ​សុំ​ឱ្យ​អភិបាលខេត្ត​កោះកុង មាន​វិធានការ​ជាបន្ទាន់ ដើម្បី​ទប់ស្កាត់​ការ​កាប់​ទន្ទ្រាន​ដី​ព្រៃ មក​ធ្វើជា​កម្មសិទ្ធិ​ផ្ទាល់ខ្លួន​នេះ៖ «ខ្ញុំ​សុំ​សំណើ​ទៅ​អភិបាលខេត្ត​កោះកុង ជួយ​អន្តរាគមន៍ និង​ចូលរួម​ទប់ស្កាត់​ការ​កាប់​បំផ្លាញ​រុករាន​ដី​នេះ​បន្ត​ទៀត ពីព្រោះ​អី​ករណីនេះ វា​ទើបតែ​ចាប់ផ្ដើម​ពិតមែន តែ​ទៅ​ថ្ងៃ​ខាងមុខ​ខ្ញុំ​ជឿជាក់​ថា ប្រាកដ​ថា មាន​ការ​កើនឡើង​ការ​កាប់​ទន្ទ្រាន​នេះ បន្តបន្ទាប់​ទៀត ហើយ​ជាពិសេស​អភិបាល​ខេត្ត គួរតែ​ស្ដារ​មុខមាត់​ឡើងវិញ ទាក់ទង​ជាមួយនឹង​ការ ធ្វើ​ការងារ​មួយចំនួន​ដែល មើល​ឃើញ​ថា ធ្វើ​ឱ្យ​មន្ត្រី​មូលដ្ឋាន​ថ្នាក់ក្រោម​មួយ​ចំនួន​នៅ​ប្រព្រឹត្តិ​អំពើពុករលួយ​នៅ​តាម​មូលដ្ឋាន ទាក់ទង​ជាមួយ​ការ​បទល្មើស​ព្រៃឈើ​នៅ​តំបន់​អារ៉ែង​នេះ»

ឆ្លើយតប​ទៅ​នឹង​ការ​លើកឡើង​នេះ អភិបាលខេត្ត​កោះកុង អ្នកស្រី មិថុនា ភូថង ប្រាប់​វិទ្យុ​អាស៊ីសេរី​ថា ដី​ព្រៃ​ដែល​គេ​កាប់​ទន្ទ្រាន​ជាង​៥​ហិកតារ​នេះ គឺ​ជាប់​ពាក់ព័ន្ធ​ជាមួយនឹង​កម្មសិទ្ធិឯកជន​របស់​ជំទប់​ទី​២ ឃុំ​ជំនាប់ ហើយ​អ្នកស្រី​ក៏បាន​ចាត់វិធានការ​ឱ្យ​មន្ត្រី​បរិស្ថាន​ខេត្ត ចុះ​ស៊ើបអង្កេត​ពី​ការកាប់​ព្រៃឈើ​ទាំងនោះ​ហើយ​ដែរ​។ អ្នកស្រី មិថុនា ភូថង បន្ថែម​ថា ព្រៃ​នៅ​តំបន់​អា​រ៉ែ​ង​គឺ​ស្ថិត​នៅ​ក្នុង​តំបន់​ការពារ ហើយ​ការ​កាត់​ដី​ព្រៃ​ទាំងនេះ​មក​ធ្វើជា​កម្មសិទ្ធិ​ផ្ទាល់ខ្លួន​នេះ ធ្វើ​ទៅ​បាន លុះត្រាតែ​មានការ​កាត់​ឆ្វៀល​ដី​ព្រៃ​ពី​លោកនាយក​រដ្ឋមន្ត្រី ហ៊ុន សែន​។ ទោះជា​យ៉ាងណា អ្នកស្រី​ថា អ្នកស្រី​កំពុង​ពិនិត្យ​មើល​ថា ការ​កាប់​ដី​ព្រៃ​ទាំងនេះ មាន​ការ​ស្នើសុំ​ពី​អភិបាលស្រុក​ថ្មបាំង​ដែរ​ឬក៏​អត់​ទេ៖ «ជាទូទៅ​គឺ​យើង​សុំ​ទៅ​សម្ដេច​ទេ យើង​អត់​មាន​សិទ្ធិ​សុំ​ត្រឹម​ខ្ញុំ​ទេ ស្នើ​ទៅ​សម្ដេច គឺ​យើង​មានការ​កាត់​ឆ្វៀល​ហើយ ប៉ុន្តែ​បើ​គាត់​ត្រូវការ​អភិវឌ្ឍ​ដី ចាំ​មើល​ខ្ញុំ​ត្រូវ​ឆែក​ទៀត​។ គាត់​ត្រូវ​ស្នើ​នៅ​ក្នុង​នាម នៅក្នុង​ប្លង់​កម្មសិទ្ធិ​គាត់​ប៉ុន្មាន​ដែល​បាន​កាត់​ឆ្វៀល​ឱ្យ​ហ្នឹង គឺ​គាត់​ត្រូវ​ស្នើ​ទៅ​ស្រុក កន្លែង​នេះ​ខ្ញុំ​ត្រូវ​ប្រាកដ​ថា គាត់​បាន​ស្នើ​ទៅ​ស្រុក​ឬ​នៅ នូវ​ការ​ធ្វើ​ការ​អភិវឌ្ឍ​ដី​របស់​ខ្លួនឯង ដែល​ជា​កម្មសិទ្ធិ​ដែល​បាន​កាត់​ឆ្វៀល​ជូន​ហ្នឹង ពីព្រោះ​ជាជាង​កាប់​លើស កាប់​អី ពីព្រោះ​ច្បាប់​អត់ឱ្យ​មានការ​កាប់​លើស​ទេ​។​

ព្រៃឈើ​តំបន់​អា​រ៉ែ​ង គឺជា​កន្លែង​ដ៏​ស្រស់​ស្អាត​មួយ​ក្នុង​ខេត្តកោះកុង​ដែល​មាន​ប្រភេទ​សត្វព្រៃ​ដ៏​កម្រ អម​ដោយ​ព្រៃឈើ​ស្រស់​ត្រកាល បន្សល់​ចុងក្រោយ​នៅ​កម្ពុជា​។ តំបន់​នោះ​ជា​កន្លែង​ដែល​ជនជាតិ​ដើម​ភាគតិច​ជង​ជាង ១ ពាន់ ៥​រយ​នាក់ (.៥០០) កំពុង​រស់នៅ ជាមួយ​នឹង​បរិស្ថាន​ធម្មជាតិ​ស្រស់បំព្រង នៅ​តាម​បណ្ដោយ​ជ្រលង​ភ្នំ ដែល​មាន​សត្វព្រៃ​កម្រ​រស់​នៅ​រួមមាន សត្វ​ក្រពើ​ភ្នំ ត្រី​នាគ និង​ដំរី​ធំៗ​ជាដើម។

ជុំវិញ​រឿង​នេះ​ដែរ ស្ថាបនិក​អង្គការ​មាតា​ធម្មជាតិ គឺ​លោក អាឡិចហាន់ដ្រូ ហ្គន់សាឡេស ដេវិតសុន (Alejandro Gonzalez Davidson) យល់ឃើញ​ថា ការ​កាប់​ទន្ទ្រាន​ដី​ព្រៃ​ឈើ​ទាំងនេះ​ធ្វើឡើង​ទៅ​បាន ដោយសារ​មាន​អំពើពុករលួយ​ជា​ប្រព័ន្ធ​ពី​សំណាក់​មន្ត្រី​រដ្ឋាភិបាល​នៅក្នុង​ខេត្ត​កោះកុង និង​នៅក្នុង​ស្រុក​ថ្មបាំង​។ លោក អាឡិច បន្ថែម​ថា តំបន់​អារ៉ែង​ទាំង​មួល​គួរ​ត្រូវ​បាន​អភិរក្ស នឹង​មិន​ត្រូវ​បើក​ឱ្យ​មាន​ការ​ជួញដូរ​ដី​នៅក្នុង​តំបន់​នេះ​ឡើយ ព្រោះ​វា​ធ្វើ​ឱ្យ​បាត់​អត្តសញ្ញាណ ជនជាតិ​ដើម​ភាគតិច​ផង និង​នាំ​ឱ្យ​មាន​វិនាសកម្ម​ព្រៃឈើ​តំបន់​នេះ​ទាំងមូល​។

ក្រុម​យុវជន​ខ្មែរ​ថាវរៈ កាលពី​ខែមេសា ក៏​ធ្លាប់​បាន​ធ្វើ​ពិធី​បំបួស​ដើមឈើ​នៅក្នុង​តំបន់​អារ៉ែង​បាន​៣០​ដើម ដោយ​កាលនោះ​មានការ​ចូលរួម​ពី​ព្រះសង្ឃ និង​ប្រជា​សហគមន៍​ចំនួន​ជាង​៥០​នាក់​/​អង្គ​។ នេះ​គឺជា​លើកទីមួយ​ហើយ ដែល​ព្រៃ​នៅក្នុង​តំបន់​អារ៉ែង​ទំហំ​រហូតដល់​ជាង​៥​ហិកតារ ត្រូវ​កាប់​ទន្ទ្រាន និង​ចង់​យក​ធ្វើ​ជា​កម្មសិទ្ធិឯកជន ខណៈ​ក្នុង​ពេល​បច្ចុប្បន្ន​នេះ ដើម​គគីរ និង​ដើម​ឈើទាល តាម​បណ្ដោយ​ដងស្ទឹង​អារ៉ែង ដែល​ជា​អត្តសញ្ញាណ​ប្រពៃណី ជនជាតិ​ដើម​ភាគតិច​ជង​នៅ​តំបន់​នោះ​ជាច្រើន កំពុង​រង​ការ​កាប់​បំផ្លាញ និង​ប្រឈម​មុខ​ការ​បាត់បង់​ទាំងស្រុង​ផង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។