អ្នកជំនាញកសិកម្មបារម្ភពីកសិដ្ឋានចម្ការចេករបស់ប្រទេសចិននៅកម្ពុជាអាចធ្វើឲ្យខូចខាតដល់បរិស្ថាន
2020.07.29
ផ្លែចេក ដែលតាំងលក់នៅផ្សារនាគមាស រាជធានីភ្នំពេញ កាលពីថ្ងៃទី៩ ខែមីនា ឆ្នាំ២០២០។
រូប៖ ពលរដ្ឋ
អ្នកជំនាញកសិកម្មបារម្ភពីកសិដ្ឋានចម្ការចេករបស់ចិននៅកម្ពុជាអាចធ្វើឲ្យខូចខាតដល់បរិស្ថាន និងធ្វើឱ្យប៉ះពាល់ដល់សុខភាពប្រជាពលរដ្ឋប្រើប្រាស់ ដោយសារតែថ្នាំគីមី ដែលយកទៅប្រើប្រាស់លើចម្ការចេកអាចហូរចូលទឹកស្ទឹង បឹង និងទន្លេ ប្រសិនបើពុំមានការទប់ស្កាត់។ មន្ត្រីរដ្ឋាភិបាលថា កម្ពុជាចេះគិតគូរច្បាស់លាស់ពីបញ្ហាបរិស្ថានមុននឹងអនុញ្ញាតឲ្យក្រុមហ៊ុនចិនបើកកសិដ្ឋានដាំចេកនៅកម្ពុជា។
ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន និងជាអ្នកជំនាញកសិកម្ម លោកបណ្ឌិត យ៉ង សាំងកុមារ បញ្ជាក់ថា លោកមិនជំទាស់ចំពោះរដ្ឋាភិបាលកម្ពុជាអនុញ្ញាត ឱ្យក្រុមហ៊ុនចិនមកវិនិយោគដាំចេកនៅកម្ពុជានោះទេ។ ប៉ុន្តែរដ្ឋាភិបាលត្រូវគិតគូរពីបញ្ហាបរិស្ថានជាមុនសិន។
លោកនិយាយថា ក្រុមហ៊ុនចិនត្រូវដាំដុះតាមស្តង់ដារបរិស្ថានដែរ ដូចជាចម្ការកុំឈូសឆាយព្រៃឈើអស់ពេក ហើយនឹងការប្រើប្រាស់សារធាតុគីមី ដែលយកទៅបាញ់លើដំណាំចេក ត្រូវប្រុងប្រយ័ត្នកុំឲ្យជាតិគីមីហូរតាមទឹកចូលស្ទឹង ចូលអូរ ដែលធ្វើប៉ះពាល់បរិស្ថានទាំងមូល ទាំងសត្វ និងមនុស្ស។
លោកបន្តថា លើសពីនេះក្រុមហ៊ុនចិនគួរតែសហការណ៍ជាមួយកសិករជិតខាងដែលដាំដំណាំចេក ដើម្បីជួយឱ្យពួកគេមាឱកាសអាចនាំផលិតផលរបស់ខ្លួនចេញទៅប្រទេសចិនដែរ ចៀសវៀងដំណាំកសិកម្មនេះទទួលបានផលប្រយោជន៍សម្រាប់តែក្រុមហ៊ុនធំៗ៖ «ផលប៉ះពាល់ទៅលើបរិស្ថាន និងសុខភាព ដូចយើងពិបាកវាស់ណាស់ពីព្រោះវាមានផលប៉ះពាល់ទូលំទូលាយ។ វាអាចប៉ះពាល់ដល់អាយុជីវិត ប៉ះពាល់ដល់សុខភាព ។ វាទាមទារឲ្យមានក្រុមហ៊ុនហ្នឹងមានការទទួលខុសត្រូវ។ ទាមទារឲ្យមានការតាមដានត្រួតពិនិត្យច្បាស់លាស់ពីខាងកម្ពុជាយើងហ្នឹងជាពិសេសខាងបរិស្ថាន ខាងសុខាភិបាល»។
ការលើកឡើងរបស់អ្នកជំនាញកសិកម្មនេះធ្វើឡើងក្រោយពី រដ្ឋបាលគយប្រទេសចិនបានសម្រេចអនុញ្ញាតក្រុមហ៊ុន ស៊ីង ហ៊ីយី អាគ្រីខាល់ឈើ (Sing He Yi Agriculture Co., Ltd) និងក្រុមហ៊ុនកសិកម្មផ្សេងទៀតសរុបចំនួន៥ បង្កើតសហគ្រាសដំណាំចម្ការ និងរោងចក្រវេចខ្ចប់នាំចេញផ្លែចេកពីប្រទេសកម្ពុជាទៅកាន់ប្រទេសចិន។
គេហទំព័រស្ថានទូតចិនប្រចាំប្រទេសកម្ពុជាបានផ្សាយថា រហូតមកដល់បច្ចុប្បន្ននេះ ក្រុមហ៊ុនចិនមានចម្ការចេកក្នុងប្រទេសកម្ពុជាដែលបានចុះឈ្មោះមានចំនួនរហូតដល់ ១៥ ក្រុមហ៊ុន ដែលនឹងបង្កើនការដាំដុះដំណាំចេករហូតដល់ជាង ៨ពាន់ហិកតារ និងមានរោងចក្រវេចខ្ចប់ចំនួន ២១ កន្លែង ដើម្បីជួយលើកកម្ពស់លើសមត្ថភាពកែច្នៃផលិតកម្ម ទម្រង់នៃការនាំចេញ និងការប្រកួតប្រជែងរបស់ដំណាំចេកនៅក្នុងប្រទេសកម្ពុជា ទៅកាន់ទីផ្សារប្រទេសចិន។
អ្នកនាំពាក្យក្រសួងកសិកម្មលោក ស្រី វុឌ្ឃី មានប្រសាសន៍ថា កម្ពុជាកំពុងត្រូវការប្រញាប់ផ្នែកដំណាំចេកនាំចេញទៅកាន់ប្រទេសចិន។ លោកនិយាយថារាជរដ្ឋាភិបាលកម្ពុជាមានគោលនយោបាយជំរុញវិនិយោគលើវិស័យកសិកម្ម និងកសិឧស្សាហកម្ម ដើម្បីជួយដល់កំណើនសេដ្ឋកិច្ចជាតិ ដើម្បីឲ្យស្របតាមគោលនយោបាយអភិវឌ្ឍន៍វិស័យឧស្សាហកម្មកម្ពុជាឆ្នាំ២០១៥-២០២៥ ដែលនឹងត្រូវជំរុញឱ្យការនាំចេញផលិតផលកសិកម្មកែច្នៃសម្រេចបាន ១២% នៃផលិតផលនាំចេញសរុបនៅឆ្នាំ២០២៥។
លោកបញ្ជាក់ថារដ្ឋាភិបាល កំពុងចរចាបើកទីផ្សារផលិតផលកសិកម្មចូលទៅកាន់ប្រទេសចិន ជប៉ុន កូរ៉េ អឺរ៉ុប អាមេរិក និងប្រទេសមួយចំនួនទៀត ដើម្បីជំរុញការនាំចេញផលិតផលកសិកម្ម។
លោកបញ្ជាក់ថា ប្រទេសចិនពេលនេះបានយល់ព្រមឱ្យផលិតផលចេកស្រស់នាំចូលទៅកាន់ប្រទេសរបស់ខ្លួនស្របតាមវិធានបច្ចេកទេស និងមិនប៉ះពាល់ដល់បញ្ហាបរិស្ថាន។
អ្នកជំនាញផ្នែកសេដ្ឋកិច្ច និងគ្រប់គ្រងហិរញ្ញវត្ថុ លោក ង៉ែត ជូរ មានប្រសាសន៍ថា ការអនុញ្ញាតឱ្យក្រុមហ៊ុនចិនមកវិនិយោគដាំដំណាំចេកនៅក្នុងប្រទេសកម្ពុជាមានផលប្រយោជន៍រយៈពេលខ្លីដល់ប្រជាកសិករមានការងារធ្វើ។ ប៉ុន្តែសម្រាប់រយៈពេលវែង ប្រសិនបើរដ្ឋាភិបាលធ្វើយ៉ាងណា ឲ្យការវិនិយោគមកពីប្រទេសចិន ផ្ទេរផ្នែកបច្ចេកវិជ្ជា និងបណ្ដុះបណ្ដាលធនធានមនុស្សដល់កសិករកម្ពុជាក្នុងការដាំដុះដំណាំចេកទៅតាមបច្ចេកទេស គឺជារឿងល្អដើម្បីជួយអភិវឌ្ឍន៍ធនធានមនុស្ស និងសេដ្ឋកិច្ចល្អប្រសើរនាពេលអនាគត៖ «ប៉ុន្តែវិធីសាស្ត្រដែលល្អលើសពីហ្នឹងទៀត ដើម្បីលើកកម្ពស់ អាជីវកម្មក្នុងស្រុក គឺយើងព្យាយាមធ្វើយ៉ាងណា ដើម្បីឱ្យចិនដែលមកបង្កើតគឺជាដៃគូ សហការគ្នាជាមួយក្រុមហ៊ុនក្នុងស្រុក។ អ៊ីចឹងចង់មិនចង់ការផ្ទេរបច្ចេកទេស និងឱកាស បានផលចំណេញហ្នឹងគេមិនយកទៅវិញទៅក្រៅប្រទេសហ្នឹងទាំងស្រុងទេគឺនឹងរីកនៅក្នុងស្រុកអីចឹង»។
ប្រទេសចិន បានចរចាជាមួយកម្ពុជាអស់រយៈពេលបីឆ្នាំមកហើយ ដើម្បីនាំចូលបន្លែ និងផ្លែឈើពីប្រទេសកម្ពុជា តែមិនបានទទួលលទ្ធផលដោយសារតែផលិតផលនាំចូលពីកម្ពុជា មិនស្របតាមបទដ្ឋានម្ហូបអាហាររបស់ប្រទេសចិន។ បន្ទាប់ពីការចរចាគ្នាអស់ពេលមួយរយៈ ទើបប្រទេសទាំងពីរបានសម្រេចឈានទៅដល់កិច្ចព្រមព្រៀងមួយនៃការនាំចូលផ្លែចេកពីប្រទេសកម្ពុជា កាលពីខែសីហា ឆ្នាំ២០១៨។
ទោះជាយ៉ាងណាក៏ដោយ អ្នកជំនាញកសិកម្ម និងសេដ្ឋកិច្ចយល់ថារដ្ឋាភិបាលកម្ពុជាគួរតែគិតគូរពីបញ្ហាបរិស្ថាន នឹងការប្រើប្រាស់សារធាតុគីមីដែលប្រើប្រាស់លើដំណាំចេកដើម្បីចៀសវាងផលប៉ះពាល់ដល់សុខភាពប្រជាពលរដ្ឋ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- សាលាដំបូងរាជធានីភ្នំពេញ តម្កល់សាលក្រមកំបាំងមុខទៅលើប្រធានសហជីព លោក ម៉ម រិទ្ធី ឱ្យជាប់ពន្ធនាគារ ១៨ខែ
- សភាអឺរ៉ុប ជំរុញឱ្យសើរើប្រព័ន្ធអនុគ្រោះពន្ធ EBA នៅសល់៨០% និងដាក់ទណ្ឌកម្មជាក់លាក់លើរដ្ឋាភិបាលកម្ពុជា
- លោក ហ៊ុន សែន ស្នើមេដឹកនាំចិនឱ្យផ្ដល់ជំនួយ និងប្រាក់កម្ចីបន្ថែម ក្នុងគ្រាដែលកម្ពុជាអាចប្រឈមនឹងទណ្ឌកម្មសេដ្ឋកិច្ចពីសំណាក់សហភាពអឺរ៉ុប
- អ្នកវិភាគជំរុញឱ្យលោក ហ៊ុន ម៉ាណែត ឱ្យក្លាហានហ៊ាននិយាយជាមួយអ្នកសារព័ត៌មាន
- លោក ហ៊ុន សែន ប្ដេជ្ញាបន្តប្រកាន់ជំហរគោលនយោបាយចិនតែមួយ និងថា ប្រទេសចិនបានជួយនយោបាយកម្ពុជាឱ្យមានឯករាជ្យ