សាលា​ក្រុង​បដិសេធ​មិន​ទទួល​លិខិត​យុវជន​ស្នើ​ជិះ​កង់​ប្រឆាំង​ការ​សង់​ទំនប់​វារីអគ្គិសនី

ដោយ ខែ សុណង
2015-05-30
Share
សាលា​រាជធានី​ភ្នំពេញ ៦២០ សាលា​រាជធានី​ភ្នំពេញ កាល​ពី​ថ្ងៃ​ទី​១ ខែ​កក្កដា ឆ្នាំ​២០១៣។
Photo: RFA

ក្រុម​យុវជន​មក​ពី​សាកលវិទ្យាល័យ​មួយ​ចំនួន បាន​ខក​ចិត្ត​ចំពោះ​មន្ត្រី​សាលា​រាជធានី​ភ្នំពេញ ដែល​មិន​អនុញ្ញាត​ឲ្យ​ពួក​គេ​ជួប​ជុំ​គ្នា​ថ្ងៃ​ទិវា​បរិស្ថាន​ពិភពលោក នៅ​ថ្ងៃ​ទី​៥ ខែ​មិថុនា ជិះ​កង់​ផ្សព្វផ្សាយ​ពី​ផល​ប៉ះពាល់​ដោយសារ​គម្រោង​សាងសង់​ទំនប់​វារីអគ្គិសនី​ដនសាហុង (Don Sahong) ប្រទេស​ឡាវ។

ក្រុម​យុវជន​បាន​ប្រកាន់​ជំហរ​ថា​នឹង​ទៅ​ដាក់​ញត្តិ​នៅ​តាម​ស្ថានទូត​ចំនួន​៣ និង​រដ្ឋសភា ហើយ​ជិះ​កង់​ផ្សព្វផ្សាយ​ពី​ផល​ប៉ះពាល់​មក​កម្ពុជា ដោយសារ​គម្រោង​សាងសង់​ទំនប់​វារីអគ្គិសនី ដនសាហុង ប្រទេស​ឡាវ បើ​ទោះ​ជា​សាលា​រាជធានី​មិន​អនុញ្ញាត​ក្ដី។

ប្រធាន​ក្រុម​យុវជន​ខ្មែរ​មហា​នគរ យុវជន ហេង សំណាង ថ្លែង​នៅ​ថ្ងៃ​ទី​៣០ ឧសភា ថា នៅ​ថ្ងៃ​ទី​៥ មិថុនា ខាង​មុខ គឺ​ជា​ថ្ងៃ​ទិវា​បរិស្ថាន​ពិភពលោក ពួក​គេ​នឹង​ជួប​ជុំ​គ្នា​នៅ​សួនច្បារ​មុខ​វត្ត​បទុមវតី ស្លៀកពាក់​ខោអាវ​ជា​រាង​សត្វ​ផ្សោត ជិះ​កង់​ដើម្បី​ផ្សព្វផ្សាយ​ពី​សត្វ​ដ៏​កម្រ​នេះ​ដែល​នឹង​ត្រូវ​ផុត​ពូជ បើ​សិន​គម្រោង​សាងសង់​ទំនប់​ដំណើរ​ការ។

យុវជន​ដដែល​បញ្ជាក់​ថា កាល​ពី​ថ្ងៃ​សុក្រ ទី​២៩ ឧសភា ពួក​គេ​បាន​យក​លិខិត​ជូន​ដំណឹង​ពី​គម្រោង​ជួប​ជុំ​នេះ ដាក់​ទៅ​សាលា​រាជធានី ប៉ុន្តែ​មន្ត្រី​រដ្ឋបាល​បដិសេធ​មិន​ទទួល​លិខិត ដោយ​លើក​ហេតុផល​ថា​កៀក​ថ្ងៃ​ពេក៖ «ខ្ញុំ​នៅ​តែ​បន្ត​ធ្វើ​ដដែល ទោះ​ហាម​ឃាត់​យ៉ាង​ម៉េច​ក៏ដោយ។ យើង​នឹង​ដាក់​ញត្តិ​ទៅ​ស្ថានទូត​ចំនួន​៣ គឺ​ស្ថានទូត​ថៃ ម៉ាឡេស៊ី និង​ស្ថានទូត​ឡាវ និង​គណៈកម្មការ​ទី​៣ នៃ​រដ្ឋសភា។ ញត្តិ​នេះ​មាន​អត្ថន័យ​ថា មិន​ពេញ​ចិត្ត​នឹង​ការ​សង់​វារីអគ្គិសនី ដនសាហុង ដែល​កសាង​នៅ​ពេល​ឆាប់ៗ​នេះ​មែន»

ឆ្លើយ​តប​បញ្ហា​នេះ អ្នក​នាំ​ពាក្យ​សាលា​រាជធានី​ភ្នំពេញ លោក ឡុង ឌីម៉ង់ មាន​ប្រសាសន៍​ថា ក្រុម​យុវជន​ទាំង​នេះ​ធ្វើ​ឡើង​ខុស​នីតិវិធី​នៃ​ការ​ស្នើសុំ ដោយសារ​តែ​ពួក​គេ​ដាក់​លិខិត​មក​កាន់​ការិយាល័យ​រដ្ឋបាល​កៀក​ថ្ងៃ​ពេក៖ «តាម​ច្បាប់ គាត់​ត្រូវ​យក​មក​ដាក់ ៥​ថ្ងៃ​នៃ​ថ្ងៃ​ធ្វើ​ការ មុន​នឹង​គាត់​ស្នើសុំ។ យើង​ធ្វើ​អត់​ទាន់»

ទោះ​ជា​មាន​ការ​អះអាង​បែប​នេះ​ក្ដី ក៏​ត្រូវ​បាន​មន្ត្រី​ឃ្លាំ​មើល​ការ​រំលោភ​សិទ្ធិ​មនុស្ស​រិះគន់។

មន្ត្រី​បច្ចេកទេស​ផ្នែក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ (Licadho) លោក អំ សំអាត មាន​ទស្សនៈ​ថា ការ​លើក​ឡើង​របស់​អ្នក​នាំ​ពាក្យ​សាលា​រាជធានី​នេះ គ្រាន់​តែ​ជា​អំណះអំណាង​មួយ​សម្រាប់​ការ​ដោះស្រាយ​ក្នុង​កាលៈទេសៈ​មួយ ដែល​សាលា​រាជធានី​ពុំ​អនុញ្ញាត​ឲ្យ​ក្រុម​យុវជន​ធ្វើ​តែ​ប៉ុណ្ណោះ។ ផ្ទុយ​ទៅ​វិញ លោក​មាន​ជំនឿ​ថា ការ​អនុញ្ញាត​ឲ្យ គឺ​អាស្រ័យ​ទៅ​លើ​ឆន្ទៈ​របស់​សាលា​ក្រុង៖ «នៅ​ក្នុង​ច្បាប់​បាតុកម្ម​តម្រូវ​ការ​ជូន​ដំណឹង​ទៅ​អាជ្ញាធរ ដើម្បី​ប្រារព្ធ​ពិធី​អ្វី​មួយ​ឲ្យ​បាន​មុន ៥​ថ្ងៃ។ ពាក្យ​ថា ជូន​ដំណឹង និង​ការ​សុំ​ច្បាប់ គឺ​វា​ខុស​គ្នា​ឆ្ងាយ​ណាស់»

កាល​ពី​ថ្ងៃ​ទី​១៣ ដល់​ថ្ងៃ​ទី​១៦ ខែ​ឧសភា ក្រុម​យុវជន​មួយ​ក្រុម​បាន​ចុះ​ធ្វើ​កម្មសិក្សា​នៅ​តំបន់​ទំនប់​វារីអគ្គិសនី​ដនសាហុង របស់​ប្រទេស​ឡាវ និង​ភូមិ​អន្លង់ស្វាយ នៅ​ឃុំ​ព្រះរំកិល ស្រុក​ថាឡាបរិវ៉ាត់ ខេត្ត​ស្ទឹងត្រែង រយៈពេល ៤​ថ្ងៃ ពួក​គេ​បាន​រក​ឃើញ​ថា បើ​ភាគី​ប្រទេស​ឡាវ សាងសង់​ទំនប់​នេះ កម្ពុជា នឹង​ជួប​ប្រទះ​បញ្ហា​ជាច្រើន ទាំង​ផល​ប៉ះពាល់​ទៅ​លើ​មនុស្ស និង​ជីវចម្រុះ។

ប្រសិន​បើ​គម្រោង​នេះ​ដំណើរ​ការ នឹង​ធ្វើ​ឲ្យ​ប៉ះពាល់​ប្រជាពលរដ្ឋ​រស់នៅ​ក្នុង​ខេត្ត​ចំនួន​១០ ស្ថិត​នៅ​តាម​ដង​ទន្លេ​នៃ​ប្រទេស​កម្ពុជា និង​ប៉ះពាល់​ដល់​ជីវចម្រុះ​ក្នុង​ទឹក ហើយ​ត្រី​ផ្សោត​ជា​សត្វ​កម្រ នឹង​ត្រូវ​ផុត​ពូជ។ ជាង​នេះ​ទៅ​ទៀត ពលរដ្ឋ​ខ្មែរ​ចំនួន ៥០​ភូមិ ស្មើ​នឹង ៤​ម៉ឺន ៥​ពាន់​នាក់ ដែល​រស់​ក្បែរ​តំបន់​នោះ នឹង​ត្រូវ​បាត់បង់​មុខ​របរ។ អ្នក​សិក្សា​ស្រាវជ្រាវ សំណូមពរ​ឲ្យ​ភាគី​ឡាវ ផ្អាក​ការ​សាងសង់​ទំនប់​វារីអគ្គិសនី ក្រោម​ការ​វិនិយោគ​របស់​ក្រុមហ៊ុន​សាងសង់​ពី​ប្រទេស​ម៉ាឡេស៊ី ហើយ​ងាក​មក​សិក្សា​ពី​ផល​ប៉ះពាល់​ផ្លូវ​ទឹក​ផ្នែក​ខាង​ក្រោម​ជា​មុន​សិន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល