លោក ទៀ បាញ់ បញ្ជា​ឱ្យ កងរាជអាវុធហត្ថ បង្ក្រាប​ការ​កាប់​ទន្ទ្រាន​ដី​ព្រៃ​រដ្ឋ

ដោយ វ៉ែន សុមេធ
2020-07-14
អ៊ីម៉ែល
មតិ
Share
បោះពុម្ព
លោក ទៀ បាញ់ រដ្ឋមន្ត្រីក្រសួង​ការពារ​ជាតិ។
លោក ទៀ បាញ់ រដ្ឋមន្ត្រីក្រសួង​ការពារ​ជាតិ។
រូប៖ ហ្វេសប៊ុក General TEA Banh

រដ្ឋមន្ត្រី​ក្រសួងការពារជាតិ លោក ទៀ បាញ់ បញ្ជា​ឱ្យ​កងរាជអាវុធហត្ថ​លើ​ផ្ទៃ​ប្រទេស ស្រាវជ្រាវ និង​បង្ក្រាប បទល្មើស​ធនធាន​ធម្មជាតិ​រួមមាន ការ​កាប់​ទន្ទ្រាន​ដី​ព្រៃ​សាធារណ​របស់​រដ្ឋ និង បទល្មើស​ព្រៃឈើ​គ្រប់​ប្រភេទ។ ចំណែក​មន្ត្រី​សង្គម​ស៊ីវិល និង ពលរដ្ឋ ចាត់ទុក​បទបញ្ជា​របស់​រដ្ឋមន្ត្រី​ក្រសួងការពារជាតិ​នេះ គ្មាន​ប្រសិទ្ធភាព​នោះ​ទេ។

រដ្ឋមន្ត្រី​ក្រសួងការពារជាតិ លោក ទៀ បាញ់ ថ្លែង​ថា កងរាជអាវុធហត្ថ មាន​តួនាទី​សំខាន់​ក្នុង​ការទប់ស្កាត់​បទល្មើស​ព្រៃឈើ។ ការ​ថ្លែង​បែបនេះ ក្នុង​ពិធី​ប្រារព្ធ​ខួប​លើក​ទី២៧ នៃ​ទិវា​បង្កើត​កងរាជអាវុធហត្ថ​លើ​ផ្ទៃ​ប្រទេស នៅ​ថ្ងៃ​ទី ១៤ ខែកក្កដា ក្នុង​រាជធានី​ភ្នំពេញ។

ទោះជា​យ៉ាង​ណា ក្រុម​ជនជាតិ​ដើម​ភាគតិច​ព្នង រស់នៅ​ខេត្ត​ភាគ​ឦសាន​និង​មន្ត្រី​សង្គម​ស៊ីវិល ចាត់​ទុក​ការ​លើកឡើង​របស់​រដ្ឋមន្ត្រី​ក្រសួងការពារជាតិ​រូប​នេះ ពុំ​មែន​ជា​ដំណោះស្រាយ​វិបត្តិ​ព្រៃឈើ មានប្រសិទ្ធភាព​នោះ​ទេ ព្រោះ​អ្នក​ពាក់ព័ន្ធ​ការ​កាប់​ទន្ទ្រាន​ដី​ព្រៃ​ជាច្រើន​ហិកតារ និង​ជួញដូរ​ឈើ​ខុស​ច្បាប់ មាន​ជាប់ពាក់ព័ន្ធ មន្ត្រី​មានអំណាច មន្ត្រី​យោធា អាជ្ញាធរ នគរបាល និង ក្រុម​ឧកញ៉ា​គ្រា​ក់ៗ ជា​ដើម។ សហគមន៍​ជនជាតិ​ដើម​ភាគតិច ខេត្ត​មណ្ឌលគិរី លោក គ្រើ​ង តុលា សង្កេតឃើញ​ថា ការ​បង្ក្រាប​បទល្មើស​ព្រៃឈើ​របស់ គណៈកម្មការ​ជាតិ​ទប់ស្កាត់ និង​បង្ក្រាប បទល្មើស​ព្រៃឈើ ធ្វើ​ឡើង គឺ​ផ្អែក​តាម​បទបញ្ជា ធំជាង​ការ​អនុវត្ត​ច្បាប់។ លោក​ថា នៅ​ពេល​ដែល មន្ត្រី​កំពូលៗ រួម​ទាំង​លោកនាយក​រដ្ឋមន្ត្រី ហ៊ុន សែន ចេញ​បញ្ជា​ម្ដងម្កាល គេ​ឃើញ​អាជ្ញាធរ​ពាក់ព័ន្ធ បាន​ចុះ​បង្ក្រាប​បាន​មួយ​ប្រាវ ហើយ​មួយ​រយៈ ខ្លី​ក្រោយមក ក៏​ស្ងាត់​ទៅវិញ៖ «យើង​ឃើញ​មានតែ​មួយ​ឆាវៗ វា​អត់មាន​ធ្វើ យុទ្ធនាការ​ហ្នឹង​ធ្វើ​រហូត​តាម​ផ្លូវ​ច្បាប់ ដូចជា​អត់​ឃើញ​ទេ។ អ៊ីចឹង​មានន័យថា រាល់ថ្ងៃ​បទបញ្ជា​របស់​សម្តេច ក៏​គ្មាន​ឥទ្ធិពល។ បទបញ្ជា​ពីណា​ក៏​អត់​ឥទ្ធិពល​ដែរ ដោយសារតែ គេ​កំណត់​រយៈពេល បទល្មើស​ព្រៃឈើ​នៅតែ​កើតឡើង»

ឆ្លើយតប​ការ​លើកឡើង​នេះ អ្នកនាំពាក្យ​កងរាជអាវុធហត្ថ​លើ​ផ្ទៃ​ប្រទេស លោក អេង ហ៊ី បកស្រាយ​ថា កងរាជអាវុធហត្ថ​គ្រប់​ខេត្ត​/ក្រុង បាន​បង្ក្រាប​បទល្មើស​ព្រៃឈើ​គ្រប់រូប​ភាពជា​ហូរហែ ផ្អែក​តាម​តួនាទី និង​ភារកិច្ច ដែល​រដ្ឋាភិបាល​ផ្តល់​ជូន។ លោក​បញ្ជាក់​ថា ការ​បង្ក្រាប​បទល្មើស​ព្រៃឈើ មាន​អាជ្ញាធរ​ដែនដី​អនុវត្ត​ច្បាប់​ជាប្រចាំ៖ «គាត់​ចង់ថា ភ្លើង​ចំបើង ជា​សិទ្ធិ​របស់​គាត់ តែ​អ្វី​ដែល​យើង​ធ្វើ ធ្វើជា​ប្រចាំ។ មិនមែន​គណៈកម្មការ​ជាតិ​ចុះទៅ​បាន​ធ្វើ​ទេ កម្លាំង​អាជ្ញាធរ​ដែនដី គេ​ធ្វើជា​ប្រចាំ។ សុំ​ឱ្យ​គាត់​ត្រួតពិនិត្យ​មើល។ អា​ហ្នឹង​សិទ្ធិ​សេរីភាព​របស់​គាត់ គាត់​និយាយ​អី​និយាយ​ទៅ ក៏ប៉ុន្តែ​ឱ្យ​សុំ​មើល ព័ត៌មាន​របស់​អាវុធហត្ថ​ដែល​បង្ក្រាប​រាល់ថ្ងៃ​ហ្នឹង​ក៏​មាន​ដែរ »

ក្រុម​ស្នូល​ព្រៃ​ឡង់ ខេត្ត​ស្ទឹងត្រែង លោក យឹម សុ​ភក្ត្រ សង្កេតឃើញ​ថា បច្ចុប្បន្ន​សកម្មភាព​កាប់​ទន្ទ្រាន​ដែន​ជម្រក​សត្វ​ព្រៃ​ឡង់​ទាំង ៤ខេត្ត កំពុង​កើតមាន​ពេញទំហឹង ដោយ​គ្មាន​ការអនុវត្ត​ច្បាប់ ហើយ​ក្នុង​នោះ​មាន​ជាប់ពាក់ព័ន្ធ កងកម្លាំង​ប្រដាប់​អាវុធ​ផង​ដែរ។ លោក​បញ្ជាក់​ថា គ្រាន់តែ​ឃុំ​កាំងចាម ស្រុក​ថាឡាបរិវ៉ាត់ មានការ​កាប់​ទន្ទ្រាន​ដែន​ជម្រក​សត្វ​ព្រៃ​ឡង់​អស់​ជាង ២ពាន់​ហិកតារ ដោយ​គ្មាន​ការ​បង្ក្រាប​នៅឡើយ​ទេ៖ «ជាពិសេស​ធ្វើការ​បង្ក្រាប លោក​ឧកញ៉ា​ធំៗ ដែល​មាន​ដី​រាប់ពាន់​ហិកតារ រំលោភ​ចូល​ដល់​តំបន់​ការពារ​ជាដើម នៅ​កន្លែង​ផ្សេងៗ ទៀត​ដូចជា​វរជ័យ និង ក្នុង​ព្រៃ​ឡង់។ សូម្បីតែ​ចៅហ្វាយស្រុក​ក៏​មានការ​ទន្ទ្រានព្រៃ ដើម្បី​បង្ក្រាប​ឱ្យ​មាន​ជំនឿ​ទុកចិត្ត គួរតែ​ធ្វើ​ពួក​ហ្នឹង​មុន ចាំ​ធ្វើ​ពលរដ្ឋ​តាម​ក្រោយ។ ពលរដ្ឋ​ងាយ​បាក់ស្បាត​ណាស់ មានតែ​អ្នកមាន​អំណាច​ទេ ដែល​មិន​ងាយ​បាក់ស្បាត»

រី​ឯ​មន្ត្រី​ពង្រឹង​សិទ្ធិ​អំណាច​សហគមន៍ នៃ​សមាគម​អាដហុក លោក ប៉ែន ប៊ុណ្ណារ៍ សង្កេតឃើញ​ថា ការ​កាប់​ទន្ទ្រាន​ដី​ព្រៃ​រដ្ឋ ក៏​មាន​ជាប់ពាក់ព័ន្ធ មន្ត្រី​យោធា និង​កងកម្លាំង​ប្រដាប់​មួយ​ចំនួន​ដែរ។ លោក​យល់ថា បើ​លោក ទៀ បាញ់ ចង់​ការពារ​ព្រៃឈើ​មែន​នោះ គួរតែ​រួមគ្នា​ដា​ក់​បណ្តឹង​បរិហារ ទៅ​តុលាការ ជាមួយ​លោក ដើម្បី​ឱ្យ​តុលាការ ពន្លឿន​សំណុំរឿង​បទល្មើស​ព្រៃឈើ​ហើយ​វែកមុខ​ជនល្មើស​មក​ផ្ដន្ទា​ទោស​ទៅ​តាម​ច្បាប់៖ «គ្រប់​សមាសភាព មិន​ត្រឹមតែ​មន្ត្រី​យោធា​ជាន់ខ្ពស់​ទេ សូម្បីតែ​មន្ត្រី​តាម​ក្រ​សួង​មួយៗ មាន​អំណាច​សុទ្ធតែ​មន្ត្រី​ជាន់​ខ្ពស់ មាន​ការ​កាប់​ទន្ទ្រាន​ដី​ព្រៃ​ច្រើន​ដែរ។ មាន​ការ​កាប់​ទន្ទ្រាន​ដី​ព្រៃ ជា​ពិសេស​កន្លែង​ណា ដី​ខ្លាញ់ៗ ហ្នឹង កន្លែង​មាន​តម្លៃ ដូច​នៅ​ខេត្ត​មណ្ឌលគិរី កន្លែង​ព្រៃ​ស សុទ្ធតែ​មាន​ឈ្មោះ តែម​ន្ត្រី​ជាន់ខ្ពស់ មាន​ទាំង​យោធា និង​មន្ត្រី​ស៊ីវិល ឡាយ​ឡំ​គ្នា។ បើ​នៅ​ព្រៃ​ផ្សេងៗ ទៀត សុទ្ធតែ​មាន​ពាក់ព័ន្ធ មន្ត្រី​ឧត្ដមសេនីយ៍ ពាក់ព័ន្ធ​ការ​កាប់​រាន​ដី​ព្រៃ​ទាំងអស់​ហ្នឹង»

កាលពី​ឆ្នាំ២០១៩ គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃ​ឈើ បាន​ឃាត់ខ្លួន​ឧកញ៉ា ២រួប គឺ​ឧកញ៉ា គង់ ក្រឹ​ង និងឧកញ៉ា​ស៊ឹង សំ​អុល។ រីឯ​តំណាង​អយ្យការ​អម​សាលាដំបូង​ខេត្ត​មណ្ឌលគិរី​បាន​កោះ​ហៅ មន្ត្រី​ជំនាញ​រដ្ឋបាល​ព្រៃឈើ មន្ត្រី​កង​រាជអាវុធហត្ថ ថៅកែ​ជនជាតិ​ចិន ឧកញ៉ា និង​អ្នក​ពាក់ព័ន្ធ​បទ​ល្មើស​ព្រៃ​ឈើ​ប្រមាណ ២០នាក់​ទៀត ទាក់ទិន​សំណុំរឿង​ប្រមូល​ផល​និង​អនុផល​ព្រៃឈើ ដោយ​គ្មាន​លិខិតអនុញ្ញាត។ ចំណែក​នៅ​ក្នុង​សំណុំរឿង​ព្រៃឈើ​ដាច់​ដោយ​ឡែក​មួយ​ទៀត តុលាការ​បាន​ឃុំ​ខ្លួន​មនុស្ស ១១នាក់ ក្នុង​នោះ ៥នាក់​ជន​ជាតិ​ខ្មែរ ៣នាក់​ជា​ជន​ជាតិ​វៀតណាម និង ៣នាក់​ទៀត​ជា​ជន​ជាតិ​ចិន។ ទោះ​ជា​យ៉ាង​ណា មន្ត្រី​សង្គម​ស៊ីវិល​សង្កេត​ឃើញ​ថា សំណុំរឿង​បទ​ល្មើស​ព្រៃឈើ​ទាំង​នេះ ហាក់​ស្ងាត់​ជ្រងំ និង​មិន​ឃើញ អនុវត្ត​ច្បាប់​ចំពោះ​មន្ត្រី​រដ្ឋាភិបាល ណា​ម្នាក់​នៅ​ឡើយ​ទេ បើ​ទោះ​បី​ជា​ពួក​គេ​ឃុបឃិត ​និង​ទទួល​ប្រយោជន៍​ពី​ឧក្រិដ្ឋ​កម្ម​ព្រៃ​ឈើ​យ៉ាង​ណា​ក្តី៕

 

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល