សហគមន៍​ជនជាតិ​ដើម​ភាគ​តិច​ចារ៉ាយ​ខេត្ត​រតនគិរី​ដាក់​រោង​យាម​ការពារ​ព្រៃ​ឈើ

ដោយ រដ្ឋា វិសាល
2015-08-25
Share
ជនជាតិ​ដើម​ភាគ​តិច​ចារ៉ាយ​ការពារ​ព្រៃ រតនគិរី ៦២០ សហគមន៍​ជនជាតិ​ដើម​ភាគ​តិច​ចារ៉ាយ រស់នៅ​ភូមិ​ឡំ ឃុំ​ប៉ក់ញ៉ៃ ស្រុក​អូរយ៉ាដាវ ខេត្ត​រតនគិរី ប្រារព្ធ​ពិធី​សែន​ព្រេន​សម្ពោធ​រោង​យាម​ការពារ​ព្រៃ​ឈើ នៅ​ចំណុច​ព្រៃ​មួង​តូម ចម្ងាយ​ប្រមាណ ៣​គីឡូ​ម៉ែត្រ​ពី​ព្រំដែន​ប្រទេស​វៀតណាម កាល​ពី​ថ្ងៃ​ទី​២០ ខែ​សីហា ឆ្នាំ​២០១៥។
រូបភាព​សហគមន៍

សហគមន៍​ជនជាតិ​ដើម​ភាគ​តិច​ចារ៉ាយ រស់នៅ​ភូមិ​ឡំ ឃុំ​ប៉ក់ញ៉ៃ ស្រុក​អូរយ៉ាដាវ ខេត្ត​រតនគិរី បាន​ប្រារព្ធ​ពិធី​សែន​ព្រេន​សម្ពោធ​រោង​យាម​ការពារ​ព្រៃ​ឈើ ដើម្បី​ទប់ស្កាត់​កុំ​ឲ្យ​ពលរដ្ឋ​វៀតណាម ឆ្លង​ដែន​មក​កាប់​ឈើ​ក្នុង​ព្រៃ​បាន​ត​ទៅ​ទៀត។ ចំណែក​មន្ត្រី​ព្រៃ​ឈើ ស្វាគមន៍​ការ​ចូលរួម​របស់​សហគមន៍​ដែល​ស្ម័គ្រ​ចិត្ត​បង្កើត​ក្រុម​យាម​ការពារ​ព្រៃ​ឈើ​ធនធាន​ធម្មជាតិ​មាន​តម្លៃ​របស់​ជាតិ។

អ្នក​ភូមិ​ប្រមាណ ១០០​នាក់ បាន​រៀបចំ​សែន​ព្រេន​អារក្ស​អ្នក​តា​ព្រៃ​ភ្នំ​ឲ្យ​ដឹង​ឮ និង​ជួយ​ថែ​រក្សា​ព្រៃ​ឈើ ដែល​កាន់​តែ​បាត់បង់​ទៅ​ដោយសារ​តែ​ពលរដ្ឋ​វៀតណាម លួច​ឆ្លង​ដែន​ចូល​មក​កាប់​ដោយ​ខុស​ច្បាប់ ហើយ​ដឹក​ជញ្ជូន​ទៅ​ប្រទេស​វៀតណាម។

ការ​សែន​ព្រេន​នេះ ធ្វើ​ឡើង​នៅ​ចំណុច​ព្រៃ​មួង​តូម ចម្ងាយ​ប្រមាណ ៣​គីឡូ​ម៉ែត្រ​ពី​ព្រំដែន​ប្រទេស​វៀតណាម ឋិត​ក្នុង​ភូមិ​ឡំ កាល​ពី​ថ្ងៃ​ទី​២០ ខែ​សីហា។ អ្នក​ភូមិ​កាប់​ជ្រូក​សែន​ស្រាបៀ ដើម្បី​សម្ពោធ​រោង​យាម​ការពារ​ព្រៃ​ឈើ ដែល​អ្នក​ភូមិ​អភិរក្ស​ទុក​ជា​ព្រៃ​សហគមន៍ និង​ជា​ព្រៃ​ត្រៀម​បម្រុង​អ្នក​ភូមិ​ប្រើប្រាស់ និង​អាស្រ័យ​ផល​តាម​ប្រពៃណី​ជនជាតិ​ដើម​ភាគ​តិច។

ប្រធាន​គណៈកម្មការ​ល្បាត​សហគមន៍ ដែល​ដឹក​នាំ​ពិធី​សម្ពោធ​រោង​យាម​នេះ គឺ​លោក សល់ ញ៉ុង រៀបរាប់​ថា គោល​បំណង​ដែល​ធ្វើ​ឲ្យ​អ្នក​ភូមិ​សង់​រោង​យាម​ការពារ​ព្រៃ​នេះ គឺ​ដោយសារ​តែ​សហគមន៍​សង្កេត​ឃើញ​ពលរដ្ឋ​វៀតណាម តែង​តែ​លួច​ចូល​មក​កាប់​ឈើ​ក្នុង​ដី​ខ្មែរ។ ដោយឡែក​សមត្ថកិច្ច​ព្រំដែន​នៅ​តំបន់​នោះ មិន​បាន​យក​ចិត្ត​ទុក​ដាក់​ទប់ស្កាត់​ករណី​នេះ​ទេ។ ហេតុ​នេះ អ្នក​ភូមិ​សម្រេច​ចិត្ត​ធ្វើ​រោង​យាម​នេះ​ឡើង ដើម្បី​ស្នាក់នៅ ខណៈ​សមាជិក​សហគមន៍​ចែក​វេន​គ្នា​ដើរ​ល្បាត​ការពារ​ព្រៃ។ លោក​បន្ត​ថា បាន​ធ្វើ​លិខិត​ជម្រាប​ជូន​អាជ្ញាធរ​ឃុំ ដើម្បី​រក្សា​ទុក​ព្រៃ​តំបន់​នោះ​ជា​ព្រៃ​អភិរក្ស​សហគមន៍ ក៏ប៉ុន្តែ​មិន​ទាន់​មាន​សមត្ថកិច្ច​ជំនាញ​ពាក់ព័ន្ធ​ប្រគល់​ព្រៃ​នោះ​មក​សហគមន៍​អភិរក្ស​ផ្លូវ​ការ​នៅ​ឡើយ៖ «ចង់​ការពារ​ព្រៃ​ឲ្យ​នៅ​គង់វង្ស ប៉ុន្តែ​ខាង​អាជ្ញាធរ​មិន​ទាន់​ទទួល​ស្គាល់​ដែរ ប៉ុន្តែ​ខ្ញុំ​ធ្វើ​ក្នុង​ភូមិ​ខ្ញុំ​សុំ​ការពារ​ព្រៃ​ទៅ​ស៊ីញេ​មេ​ឃុំ មេ​ឃុំ​ទទួល​ដែរ។ បើ​វៀតណាម វា​ចូល​កាប់​ឈើ ខ្ញុំ​ចាប់ ៧​នាក់​ប្រគល់​ឲ្យ​គេ ចាប់​ប្រគល់​ឲ្យ​គេ»

រោង​យាម​ដែល​សហគមន៍​សង់​មាន​ទំហំ ២០​ម៉ែត្រ​ការ៉េ ធ្វើ​ពី​ឈើ​ប្រក់​ស័ង្កសី និង​ជញ្ជាំង​បិទ​បាំង​ដោយ​បន្ទះ​ឫស្សី​សម្រាប់​ជា​កន្លែង​ស្នាក់នៅ​វេលា​យប់ ខណៈ​ក្រុម​ល្បាត​សហគមន៍​ចុះ​ល្បាត​ព្រៃ។ គណៈកម្មការ​សហគមន៍​មាន​គ្នា ២០​នាក់​ចែក​ជា​បី​ក្រុម ចុះ​ល្បាត​ព្រៃ​ក្នុង​មួយ​រយៈពេល​បី​ទៅ​បួន​ថ្ងៃ​ក្នុង​មួយ​ក្រុម និង​ជាពិសេស ខណៈ​មាន​សេចក្តី​រាយការណ៍​ថា ពលរដ្ឋ​វៀតណាម ចូល​មក​លួច​កាប់​ឈើ ក្រុម​ល្បាត​សហគមន៍​ចុះ​ទៅ​យាម​ជា​ប្រចាំ​នៅ​រោង​ការពារ ដើម្បី​ឃ្លាំ​មើល​ឃាត់​ខ្លួន និង​រឹប​អូស​គ្រឿង​សម្ភារៈ​វត្ថុ​តាង​បទល្មើស​ព្រៃ​ឈើ​ពី​សំណាក់​ជនជាតិ​វៀតណាម។

ទាក់ទិន​ការ​អភិរក្ស​ព្រៃ​ឈើ​នេះ មេ​ឃុំ​ប៉ក់ញ៉ៃ លោក រចំ ហ្លើច ចាត់​ទុក​ថា ជា​បំណង​ប្រាថ្នា​របស់​សហគមន៍​ដើម្បី​អភិរក្ស​ព្រៃ​ឈើ ក៏ប៉ុន្តែ​លោក​ទទួល​ស្គាល់​ថា មិន​ទាន់​មាន​មន្ត្រី​ជំនាញ​ទទួល​ស្គាល់ ឬ​ប្រគល់​ព្រៃ​នោះ​ទុក​ជា​ព្រៃ​សហគមន៍​អភិរក្ស​ផ្លូវ​ការ​នៅ​ឡើយ។ លោក​ថា អាជ្ញាធរ​មិន​បាន​ហាម​ឃាត់ ឬ​រារាំង​បំណង​ប្រាថ្នា​របស់​សហគមន៍ ដែល​បង្កើត​រោង​យាម​ព្រៃ​នោះ​ឡើយ ចៀសវាង​រង​ការ​ចោទ​ប្រកាន់​ថា អាជ្ញាធរ​ពាក់ព័ន្ធ​ឃុបឃិត​ឲ្យ​ពលរដ្ឋ​វៀតណាម ចូល​កាប់​ឈើ​នោះ៖ «កន្លែង​គេ​ការពារ​ហ្នឹង​ណា ប៉ុន្តែ​អត់​មាន​លក្ខន្តិកៈ គេ​អត់​ទទួល​ស្គាល់ អ្នក​ភូមិ​ចេះ​តែ​លើក​ដាក់ ខ្ញុំ​អត់​ដឹង​ដែរ។ ថ្ងៃ​មុន គេ​មក​ធ្វើ​ពាក្យ​ស្នើសុំ​ខ្ញុំ​សហការ​ដាក់​ឲ្យ​ថ្នាក់​លើ ខ្ញុំ​មិន​ដឹង​ដែរ ខ្ញុំ​មិន​ធ្វើ គេ​ខឹង​យើង គេ​ថា​យើង​លក់​ឲ្យ​គេ​លក់​ឲ្យ​អា​យួន»

ចំណែក​សមាជិក​សហគមន៍ លោក រម៉ាស់ ស្វាន់ បញ្ជាក់​ថា សមាជិក​ក្រុមប្រឹក្សា​ឃុំ​មួយ​រូប និង​មន្ត្រី​ប៉ូលិស​រដ្ឋបាល​ឃុំ បាន​ចូលរួម​ពិធី​សែន​ព្រេន​សម្ពោធ​រោង​យាម​សហគមន៍។ លោក​កត់​សម្គាល់​ថា ចាប់​ពី​ឆ្នាំ​២០១២ រហូត​បច្ចុប្បន្ន ជនជាតិ​វៀតណាម បាន​ចូល​មក​កាប់ និង​ដឹក​ជញ្ជូន​ឈើ​មាន​តម្លៃ​ពី​ក្នុង​ព្រៃ​ជាប់​តំបន់​ព្រំដែន ដោយ​ពុំ​មាន​ការ​ទប់ស្កាត់។ យ៉ាង​ណា​មិញ សហគមន៍​ត្រូវ​តែ​ចាត់​វិធានការ​យាម​ការពារ​ព្រៃ​ដោយ​ខ្លួន​ឯង ដើម្បី​អភិរក្ស​ព្រៃ​បាន​នៅ​គង់វង្ស​សម្រាប់​កូន​ចៅ​ជំនាន់​ក្រោយ៖ «សម្ពោធ​ហ្នឹង​កាប់​ជ្រូក​សែន​ព្រៃ​ការពារ​ចាប់​ពី​ថ្ងៃ​នេះ​ត​ទៅ ការពារ​ទាំងអស់​សហគមន៍​ទាំង​មូល។ ចាប់​ពី​ពួក​ខ្ញុំ​ទៅ​ចាប់​ឡាន​ក្រុមហ៊ុន​ស្ងាត់​ផ្អាក​ហើយ​ឥឡូវ។ តាម​គម្រោង គេ​ធ្វើ​ការ​ថា​មួយ​ខែ​បី​ដង»

ព្រៃ​ឈើ​ដែល​សហគមន៍​អភិរក្ស​មាន​ទំហំ​ជិត ២០​គីឡូ​ម៉ែត្រ​បួន​ជ្រុង។ ព្រៃ​នោះ​ជា​ប្រភេទ​ព្រៃ​ស្រោង សម្បូរ​ឈើ​មាន​តម្លៃ ដែល​សហគមន៍​គ្រោង​ស្នើសុំ​អាជ្ញាធរ​ពាក់ព័ន្ធ​ទុក​ជា​ព្រៃ​ការពារ​សហគមន៍ និង​មួយ​ផ្នែក ទុក​ជា​ព្រៃ​ត្រៀម​បម្រុង​សហគមន៍ មុន​ពេល​សហគមន៍​ចុះ​បញ្ជី​ដីធ្លី​ជា​កម្មសិទ្ធិ​សមូហភាព។

យ៉ាង​ណា​ក៏ដោយ មន្ត្រី​ឃ្លាំ​មើល​បញ្ហា​ព្រៃ​ឈើ​នៃ​សមាគម​អាដហុក (ADHOC) ខេត្ត​រតនគិរី លោក ឆាយ ធី ថ្លែង​ថា ការ​បង្កើត​រោង​យាម​ព្រៃ​ឈើ គឺ​មាន​សារសំខាន់​ដើម្បី​ទប់ស្កាត់​សកម្មភាព​លួច​កាប់​ឈើ​អនាធិបតេយ្យ​នៅ​តំបន់​នោះ ជាពិសេស​ពលរដ្ឋ​វៀតណាម តែង​ចូល​មក​លួច​កាប់​ឈើ​នៅ​វេលា​យប់ ខណៈ​ក្រុម​ល្បាត​សហគមន៍​វិល​ត្រឡប់​មក​ភូមិ​វិញ។ លោក​ថា កន្លង​ទៅ​នេះ សហគមន៍​បាន​សហការ​ជាមួយ​សមត្ថកិច្ច​ជំនាញ​ទប់ស្កាត់ និង​រឹប​អូស​វត្ថុ​តាង​បទល្មើស​ព្រៃ​ឈើ និង​ឃាត់​ខ្លួន​ជនជាតិ​វៀតណាម ច្រើន​ករណី​ពាក់ព័ន្ធ​ចូល​មក​កាប់​ឈើ​ក្នុង​ព្រៃ​ដី​ខ្មែរ​នៅ​តំបន់​នោះ៖ «ការ​ធ្វើ​ប៉ុស្តិ៍​ហ្នឹង​ងាយ​ស្រួល​ទប់ស្កាត់​ដែរ​នៅ​ពេល​យប់ ព្រោះ​យើង​ឃើញ​ថា កន្លង​មក​ជនជាតិ​វៀតណាម គាត់​ឆ្លង​ចូល​នៅ​វេលា​រសៀល​ម៉ោង ៦ ហើយ​គាត់​កាប់​ដឹក​ទៅ​វិញ​នៅ​ម៉ោង ១០​យប់។ សហគមន៍​គាត់​មិន​ដឹង​មាន​ជម្រើស​បែប​ណា ទើប​គាត់​នាំ​គ្នា​សាងសង់​រោង​យាម​មួយ​នៅ​កណ្ដាល​ព្រៃ ដែល​ជា​ច្រក​ងាយ​ឆ្លង​ទៅ​ប្រទេស​វៀតណាម តាម​ច្រក​របៀង»

ដូច​គ្នា​នេះ​ដែរ នាយ​ខណ្ឌ​រដ្ឋបាល​ព្រៃ​ឈើ​ខេត្ត​រតនគិរី លោក វង សុខសិរី បាន​ស្វាគមន៍​ការ​បង្កើត​រោង​យាម​ការពារ​ព្រៃ​ដោយ​ស្ម័គ្រ​ចិត្ត​របស់​សហគមន៍ ថា​ជា​សកម្មភាព​ល្អ​រួម​ចំណែក​ការពារ​ព្រៃ​ឈើ។ លោក​ថ្លែង​ថា ប្រសិន​សហគមន៍​ចង់​បង្កើត​តំបន់​នោះ​ជា​ព្រៃ​សហគមន៍ ឬ​ទុក​ជា​ព្រៃ​ត្រៀម​បម្រុង សហគមន៍​ត្រូវ​ធ្វើ​លិខិត​ស្នើសុំ​មក​មន្ត្រី​ជំនាញ​ពាក់ព័ន្ធ ដើម្បី​ពិនិត្យ​សម្រេច​ការ​ស្នើសុំ​នោះ៖ «មាន​ឆន្ទៈ​ការពារ​ព្រៃ​អត់​បញ្ហា បើ​គាត់​ចង់​បង្កើត​សហគមន៍​ទៀត ឲ្យ​គាត់​ធ្វើ​លិខិត​ស្នើ​ស្នាម​មក។ ឲ្យ​តែ​ក្នុង​បំណង​ការពារ​អ្នក​ណា​ក៏​បាន​ដែរ»

ចាប់​ពី​ឆ្នាំ​២០១២ រហូត​បច្ចុប្បន្ន សហគមន៍​ភូមិ​ឡំ បាន​រឹប​អូស​ម៉ាស៊ីន​កាត់​ឈើ​បាន ៥​គ្រឿង ត្រាក់ទ័រ​ពីរ​គ្រឿង រថយន្ត​ច្នៃ​ដឹក​ឈើ​មួយ​គ្រឿង និង​ឃាត់​ខ្លួន​ពលរដ្ឋ​វៀតណាម ៧​នាក់ ពាក់ព័ន្ធ​លួច​ចូល​កាប់​ឈើ​ក្នុង​ព្រៃ​អភិរក្ស។ ដោយឡែក​សហគមន៍​ភូមិ​ឡំ ក៏​បាន​រក​ឃើញ​គំនរ​ឈើ​មូល​រាប់​ពាន់​ដើម ដែល​គេ​លួច​កាប់​ដោយ​ខុស​ច្បាប់​នៅ​តំបន់​នោះ។

យ៉ាង​ណា​ក្តី តំណាង​សហគមន៍​ភូមិ​ឡំ លោក រម៉ាស់ ស្វាន់ ឲ្យ​ដឹង​ថា មន្ត្រី​អង្គការ​សង្គម​ស៊ីវិល​កំពុង​ជួយ​រៀបចំ​ឯកសារ​ចុះ​បញ្ជី​កំណត់​អត្តសញ្ញាណ និង​បង្កើត​លក្ខន្តិកៈ​សហគមន៍​ផ្លូវ​ការ ដើម្បី​ចុះ​បញ្ជី​ដីធ្លី​សហគមន៍​ជា​កម្មសិទ្ធិ​សមូហភាព ដើម្បី​ថែ​រក្សា​អត្តសញ្ញាណ​ជនជាតិ​ដើម​ភាគ​តិច និង​ថែ​រក្សា​ព្រៃ​ឈើ​បាន​នៅ​គង់វង្ស​ទៅ​ថ្ងៃ​អនាគត៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល