អ្នកជំនាញសាទរលទ្ធផលកិច្ចប្រជុំថ្នាក់រដ្ឋមន្ត្រីការបរទេសតំបន់មេគង្គជាមួយសហរដ្ឋអាមេរិក ថាជាឱកាសដើម្បីទប់ទល់នឹងឥទ្ធិពលរបស់ចិនជុំវិញបញ្ហាវិបត្តិទឹកទន្លេមេគង្គ ដែលទើបបិទបញ្ចប់ទៅកាលពីល្ងាចថ្ងៃទី១១ កញ្ញា។ ការសាទរនេះ កើតមានឡើងស្របពេលដែលសហរដ្ឋអាមេរិក ប្រកាសផ្តល់មូលនិធិដល់ប្រទេសតំបន់មេគង្គនូវទឹកប្រាក់ជាង១៥០លានដុល្លារ ដើម្បីពង្រឹងគម្រោងចែករំលែកទិន្នន័យធនធានទឹក គ្រោះមហន្តរាយ និងការបង្ការឧក្រិដ្ឋកម្មឆ្លងដែន។
អ្នកជំនាញអភិបាលកិច្ចទឹក លោក ហែម ឧត្តម ថា តាមរយៈយន្តការថ្មីនេះ ប្រទេសក្នុងអនុតំបន់ទន្លេមេគង្គ រួមទាំងកម្ពុជាផង អាចទាញយកនូវឱកាសជាច្រើនដើម្បីធ្វើយ៉ាងណារក្សាតុល្យភាពទប់ទល់នឹងឥទ្ធិពលចិន ដែលគ្រប់គ្រងខ្សែទឹកខាងលើនៃទន្លេមេគង្គតាមរយៈទំនប់វារីអគ្គិសនីដ៏សម្បើមរបស់ខ្លួន៖ « បើសិនជាយើងមើលពីរូបភាពនយោបាយសម្រាប់ប្រទេសនៅក្នុងតំបន់ ជាពិសេសកម្ពុជា ខ្ញុំគិតថា វាជា ឱកាសល្អទៅវិញ បើសិនជាយើងចេះច្នៃ មានន័យថា ចេះរក្សាតុល្យភាពរវាងភាគីពាក់ព័ន្ធផ្នែកការទូតជាមួយនឹងមហាអំណាចទាំងពីរនេះ … ហើយទាក់ទងជាមួយនឹងជំនួយ ជាមួយនឹងអីហ្នុងក៏វាមកតាមហ្នុងដែរ ហើយឥឡូវមានអាមេរិកទៀត។ បានន័យថា យើងមានឱកាស ទាំងកម្ពុជា ទាំងប្រទេសផ្សេងៗហ្នុង ប៉ុន្តែ វាអាស្រ័យដែរ »។
ការលើកឡើងរបស់អ្នកជំនាញរូបនេះ កើតមានឡើងក្រោយរដ្ឋមន្ត្រីការបរទេសតំបន់មេគង្គ ជាមួយរដ្ឋមន្ត្រីការបរទេសអាមេរិក ទើបនឹងបិទបញ្ចប់កិច្ចប្រជុំភាពជាដៃគូរវាងតំបន់មេគង្គ និងសហរដ្ឋអាមេរិកជាលើកទីមួយ ដែលបានប្រព្រឹត្តិទៅតាមប្រព័ន្ធវីដេអូ កាលពីល្ងាចថ្ងៃទី១១ កញ្ញា។ គិតមកទល់ម៉ោងផ្សាយនេះ ក្រសួងការបរទេសកម្ពុជា នៅមិនទាន់ប្រកាសលទ្ធផលអំពីកិច្ចប្រជុំនេះនៅឡើយទេ។ រីឯ អ្នកនាំពាក្យក្រសួងការបរទេស លោក កុយ គួង ក៏មិនទាន់ឆ្លើយតបសំណួររបស់អាស៊ីសេរី តាមបណ្តាញសង្គមតេឡេក្រាម (Telegram) នៅឡើយដែរ ជុំវិញបញ្ហានេះ។
ក៏ប៉ុន្តែ ភ្នាក់ងារសារព័ត៌មាន រ៉យទ័រ (Reuters) របស់អង់គ្លេស រាយការណ៍ឲ្យដឹង ដោយផ្អែកតាមប្រភពពីទូរទស្សន៍រដ្ឋវៀតណាម VTV ថា សហរដ្ឋអាមេរិក បានសន្យាផ្តល់ទឹកប្រាក់យ៉ាងហោចណាស់ ១៥៣ លានដុល្លារ ដល់គម្រោងកិច្ចសហប្រតិបត្តិការនានានៅក្នុងតំបន់មេគង្គ។ គម្រោងកិច្ចសហប្រតិបត្តិការទាំងនោះ រួមមានគម្រោងធ្វើឲ្យប្រសើរឡើងដល់ការចែករំលែកទិន្នន័យធនធានទឹក គម្រោងគ្រប់គ្រងគ្រោះមហន្តរាយ និងគម្រោងបង្ការឧក្រិដ្ឋកម្មឆ្លងដែនសម្រាប់ប្រទេសក្នុងតំបន់មេគង្គ។
កិច្ចប្រជុំភាពជាដៃគូតំបន់មេគង្គជាមួយនឹងសហរដ្ឋអាមេរិកនេះ ធ្វើឡើងនៅមិនដល់ពីរសប្តាហ៍ផង ក្រោយពីប្រទេសក្នុងតំបន់មេគង្គទើបនឹងបិទបញ្ចប់កិច្ចប្រជុំមេគង្គ-ឡាងឆាងលើកទី៣ ជាមួយចិន កាលពីចុងខែសីហា ក្នុងគ្រាដែលបញ្ហាវិបត្តិទឹកទន្លេមេគង្គកំពុងឡើងកំដៅខ្លាំងក្រោយពីមានការរកឃើញថា ប្រទេសចិនទំនងជាអាចបិទ ឬរាំងខ្ទប់ទឹកនៅខ្សែទឹកខាងលើទន្លេមេគង្គតាមរយៈទំនប់វារីអគ្គិសនីដ៏សម្បើមរបស់ខ្លួន។ បញ្ហាទំនប់វារីអគ្គិសនីរបស់ចិន ជាមួយនឹងបញ្ហាប្រែប្រួលអាកាសធាតុ បានធ្វើឲ្យប្រទេសនៅតាមខ្សែទឹកខាងក្រោមទន្លេមេគង្គ ជាក់ស្តែងបឹងទន្លេសាបរបស់ប្រទេសកម្ពុជាជួបប្រទះនូវគ្រោះរីងស្ងួត និងរាំងស្ងួតមិនធ្លាប់មានពីមុនមក ដែលធ្វើឲ្យប៉ះពាល់ធ្ងន់ធ្ងរដល់ប្រជានេសាទ និងការធ្លាក់ចុះទិន្នផលត្រីយ៉ាងខ្លាំង។
Great meeting with my counterparts from across this week to discuss building upon our five years of strategic partnership. We continue to support ASEAN centrality, sovereignty, and rule of law in the region. A united ASEAN is in the region's interest.
រដ្ឋមន្ត្រីការបរទេសអាមេរិក លោក ម៉ៃ ផុមភីអូ (Mike Pompeo) បានសរសេរនៅលើទំព័រទ្វីតធ័រ (Twitter) ផ្លូវការរបស់លោក នៅប៉ុន្មានម៉ោងក្រោយបិទបញ្ចប់កិច្ចប្រជុំនេះ និងកិច្ចប្រជុំបន្តបន្ទាប់ជាមួយប្រទេសក្នុងតំបន់អាស៊ានថា សហរដ្ឋអាមេរិក នឹងបន្តផ្តល់កិច្ចគាំទ្រដល់ការផ្តោតលើភាពជាចំណុចស្នូលរបស់អាស៊ាន អធិបតេយ្យ និងនីតិរដ្ឋនៅក្នុងតំបន់នេះ។ លោកគូសបញ្ជាក់ថា តំបន់អាស៊ានមួយដែលមានការឯកភាពគ្នា គឺជាអត្ថប្រយោជន៍រួមរបស់តំបន់នេះ។
លោក ហែម ឧត្តម ថា យន្តការកិច្ចសហប្រតិបត្តិការថ្មីជាមួយអាមេរិកនេះ នឹងក្លាយជាឱកាស នៃការរក្សាតុល្យភាពកុំឲ្យប្រទេសក្នុងតំបន់រងឥទ្ធិពលខ្លាំងពេកពីប្រទេសចិន៖ « បើសិនជាយើងចេះកែច្នៃវា ដើម្បីធ្វើម៉េចឲ្យទទួលបាននូវកិច្ចសហប្រតិបត្តិការមួយដែលស្មោះត្រង់ ហើយដែលអាចបម្រើទៅទាំងបរិស្ថាន និងការអភិវឌ្ឍន៍ដែលស្អាតស្អំ ឬមួយការអភិវឌ្ឍន៍ដែលមាននិរន្តរភាពយូរអង្វែងនោះ នោះកម្ពុជា ឬប្រទេសទាំងប៉ុន្មានជាពិសេសក្នុងតំបន់ទន្លេមេគង្គគួរជ្រើសរើសអាទិភាព ជាពិសេសទាក់ទងនឹងនីតិវិធីអន្តរជាតិ ឬក៏ច្បាប់ទាក់ទងនឹងបញ្ហាទឹកឆ្លងដែន »។
នៅមុនកិច្ចប្រជុំនេះ ក្រសួងការបរទេសអាមេរិក ធ្លាប់ប្រកាសថា ភាពជាដៃគូរវាងសហរដ្ឋអាមេរិក និងតំបន់មេគង្គនេះ នឹងពង្រីកបន្ថែមទៅលើកិច្ចសហប្រតិបត្តិការដែលបានចាប់ផ្តើមឡើងតាំងពីឆ្នាំ២០០៩មក ក្រោមគំនិតផ្ដួចផ្ដើមតំបន់មេគង្គក្រោម ដោយពង្រឹងស្វ័យភាព ឯករាជ្យវិស័យសេដ្ឋកិច្ច និងការអភិវឌ្ឍន៍ប្រកបដោយចិរភាពរបស់ប្រទេសនៅតំបន់មេគង្គ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។