មុន​បញ្ចប់​តួនាទី​ជា​នាយករដ្ឋមន្ត្រី លោក ហ៊ុន សែន កាត់​ដី​ជាង ៤​រយ​ហិកតារ​ឱ្យ​បក្ខពួក​ខ្លួន

ដោយ ទីន ហ្សាការីយ៉ា
2023.12.29
មុន​បញ្ចប់​តួនាទី​ជា​នាយករដ្ឋមន្ត្រី លោក ហ៊ុន សែន កាត់​ដី​ជាង ៤​រយ​ហិកតារ​ឱ្យ​បក្ខពួក​ខ្លួន លោក ហ៊ុន សែន ប្រធានគណបក្សប្រជាជនកម្ពុជា ក្នុងពិធីចុះហត្ថលេខា​ចងសម្ព័ន្ធភាពគណបក្សរបស់ខ្លួន កាលពីថ្ងៃទី២៥ ខែ​តុលា ឆ្នាំ​២០២៣។
រូប៖ ហ្វេសប៊ុកលោក ហ៊ុន សែន

មុន​នឹង​ចុះ​ចេញ​ពី​តំណែង​កាល​ពី​ខែ​សីហា កន្លង​ទៅ អតីត​នាយករដ្ឋមន្ត្រី លោក ហ៊ុន សែន បាន​ចេញ​អនុក្រឹត្យ ៥​ផ្សេងគ្នា កាត់​ដី​ទ្រព្យសម្បត្តិ​សាធារណៈ​របស់​រដ្ឋ​សរុប​ជាង ៤​រយ​៥០​ហិកតារ (៤៥១) ទៅ​ឱ្យ​បុគ្គល​ឯកជន និង​ក្រុមហ៊ុន​កាន់កាប់​។ មន្ត្រី​សង្គម​ស៊ីវិល​យល់​ឃើញ​ថា ការ​កាត់​ដី​ឧទ្យានជាតិ និង​ទ្រព្យសម្បត្តិ​សាធារណៈ​របស់​រដ្ឋ​ទៅ​ឱ្យ​បុគ្គល​ឯកជន​កាន់កាប់​ទាំងនោះ ធ្វើឡើង​ដោយ​មិន​មាន​តម្លាភាព​នោះ​ទេ និង​ស្នើ​ឱ្យ​រដ្ឋាភិបាល​គួរ​វាយតម្លៃ​អំពី​ផល​ប្រយោជន៍​ទ្រព្យសម្បត្តិ​សាធារណៈ​ឱ្យ​បាន​ត្រឹមត្រូវ មុននឹង​សម្រេច​ផ្ដល់​ឱ្យ​បុគ្គល​ឯកជន​កាន់កាប់។

អតីត​លោកនាយក​រដ្ឋមន្ត្រី ហ៊ុន សែន មុននឹង​ផ្ទេរ​តួនាទី​ទៅ​ឱ្យ​កូនប្រុស​ច្បង​របស់​លោក​នោះ លោក​បាន​កាត់​ផ្ទៃដី​ឧទ្យាន​ជាតិ​៣​កន្លែង​នៅ​តាម​បណ្ដា​ខេត្ត និង​ផ្ទៃ​បឹង​២​កន្លែង​នៅ​ក្នុង​រាជធានី​ភ្នំពេញ ឱ្យទៅ​ក្រុមហ៊ុន​ឯកជន និង​បុគ្គល​ដែល​មាន​ទំនាក់ទំនង​ជិតស្និទ្ធ​នឹង​លោក​កាន់កាប់។

សកម្មជន​ចលនា​មាតា​ធម្មជាតិ និង​ជា​អ្នក​តាមដាន​ស្ថានការណ៍​សង្គម លោក លី ចាន់ដារ៉ាវុត យល់ឃើញ​ថា លោក ហ៊ុន សែន បាន​សម្រុក​កាត់​ផ្ទៃដី​ទ្រព្យសម្បត្តិ​សាធារណៈ​របស់​រដ្ឋ​នៅ​មុន​ពេល​បោះឆ្នោត និង​ក្រោយពេល​បោះឆ្នោត ឱ្យទៅ​ក្រុមហ៊ុន និង​បុគ្គល​ឯកជន ដើម្បី​ជា​ថ្នូរ​ទៅ​នឹង​ការ​ផ្ទេរ​អំណាច​ទៅ​ឱ្យ​កូនប្រុស​ច្បង​របស់​លោក គឺ​លោក ហ៊ុន ម៉ាណែត។ លោក​អះអាង​ទៀត​ថា ការ​កាត់​ផ្ទៃដី​ឧទ្យាន​ជាតិ និង​បឹងបួ​ទៅ​ឱ្យ​បុគ្គល​ឯកជន​គ្រប់គ្រង​ទាំងនេះ មិន​ត្រឹមតែ​ធ្វើ​ឱ្យប៉ះពាល់​ទៅដល់​ធនធានធម្មជាតិ និង​ជម្រក​សត្វព្រៃ ប៉ុណ្ណោះ​ទេ តែ​ក៏​ធ្វើ​ឱ្យ​ប៉ះពាល់​ប្រជា​សហគមន៍​ដែល​ធ្លាប់​អាស្រ័យ​ផល​ធនធានធម្មជាតិ ដែល​បាន​កាត់​ឆ្វៀល​ទៅ​ឱ្យ​បុគ្គល​ឯកជន​ទាំងនោះ​។​

លោក លី ចាន់ដារ៉ាវុត៖ «សម្រាប់​នាយករដ្ឋមន្ត្រី​ថ្មី គួរតែ​រៀនសូត្រ​ពី​រដ្ឋាភិបាល​ចាស់ មើល​ទៅ​លើ​ផល​ប៉ះពាល់​នៃ​ការ​អភិវឌ្ឍ គួរតែ​បញ្ឈប់​ការ​កាត់​ដី​ចែក​ឯកជន ជាពិសេស​ចែក​បក្ខពួក​គ្នាឯង​ហ្នឹង ហើយ​ទី​២​ខ្ញុំ​យល់ថា គួរតែ​ធ្វើការ​ពិនិត្យ​ទៅលើ​គម្រោង​ផ្ដល់​ដី​សម្បទាន​កន្លងមក ជាពិសេស​ទៅលើ​ផល​ប៉ះពាល់​ទៅដល់​ប្រជាពលរដ្ឋ​នៅ​តាម​មូលដ្ឋាន​នៅ​បុទុមសាគរ នៅ​លើ​ភ្នំ​បូកគោ​ជាដើម ដែល​ធ្វើការ​ឈូស​ឆាយ​ច្រើន​មែនទែន យើង​គួរតែ​ដក​យក​មកវិញ ហើយ​ធ្វើ​ការ​ដាំដុះ​(​ដើមឈើ​) មកវិញ ដើម្បី​រក្សា​ឱ្យ​បាន​ឧទ្យាន​ជាតិ​របស់​យើង»

ព្រះរាជកិច្ច​ចេញផ្សាយ​ដោយ​ទីស្ដីការ​គណៈរដ្ឋមន្ត្រី កាលពី​ថ្ងៃទី​២៦ ខែ​ធ្នូ បង្ហាញ​ថា លោក ហ៊ុន សែន បាន​ចេញ​អនុក្រឹត្យ​កាត់​ដី ជា​ទ្រព្យសម្បត្តិ​សាធារណៈ​របស់​រដ្ឋ​ប្រមាណ ៤៥០​ហិកតារ ឱ្យទៅ​ក្រុមហ៊ុន​ឯកជន​គ្រប់គ្រង កាលពី​ថ្ងៃទី​១៥ ខែ​សីហា។ ផ្ទៃដី​ដែល​បាន​កាត់​ទាំងនោះ​រួម​មាន ឧទ្យាន​ជាតិ​មុនីវង្ស (​បូកគោ) ក្នុង​សង្កាត់​ព្រែក​ត្នោត ក្រុង​បូកគោ ខេត្តកំពត ជិត​៣​រយ​ហិកតារ (២៩១) ត្រូវ​បាន​កាត់​ទៅ​ឱ្យ​ក្រុមហ៊ុន សុគន្ធ ខេភី ក្លូប៊ល អ៊ិនវេសមិន ខូអិលធីឌី (SOKUN KP GLOBAL INVESTMENT Co.LTD) ធ្វើជា​តំបន់​សេដ្ឋកិច្ច​ពិសេស និង​អភិវឌ្ឍ​ទេសចរណ៍។

ដី​ឧទ្យាន​ជាតិ​កែប ស្ថិតនៅ​សង្កាត់​ព្រៃធំ និង​សង្កាត់​កែប ក្រុងកែប ប្រមាណ​៦០​ហិកតារ ឱ្យទៅ​ក្រុមហ៊ុន ផាមឃីន ឌីវេឡុបមិន ឯ.(PUMKIN DEVELOPMENT Co.LTD) និង​ដី​ជាង ៦០​ហិកតារ​ផ្សេងទៀត (៦០,១៧) ឱ្យទៅ​ក្រុមហ៊ុន រ៉ូយ៉ាល់ ដាយនែមីក ឯ.(ROYAL DYNAMIC Co.LTD) ដើម្បី​អភិវឌ្ឍន៍​ជា​តំបន់​ទេសចរណ៍ ផ្សារភ្ជាប់​នឹង​ធម្មជាតិ។

ដី​ជម្រក​សត្វព្រៃ​ពាម​ក្រសោប ស្ថិត​នៅ​ភូមិ​កោះកាពិ ស្រុក​កោះកុង ខេត្ត​កោះកុង ជាង ១៥​ហិកតារ (១៥,៣៩ ហិកតារ) ឱ្យទៅ​ក្រុមហ៊ុន​កោះមូល រីសត ឯ.(KOK MOUL ECO RESORT Co.LTD)

ដី​បឹងជើង​ឯក និង​ប្រឡាយ​ស្ថិតនៅ​ខណ្ឌ​មានជ័យ និង​ខណ្ឌដង្កោ រាជធានី​ភ្នំពេញ ជិត​៦​ហិកតារ (,) ឱ្យទៅ​លោក លាង ឃុន និង​លោក ថៃ ជាហួត ធ្វើ​ជា​កម្មសិទ្ធិឯកជន។

ដោយឡែក​នៅ​មុន​ការ​តែងតាំង​រដ្ឋាភិបាល​ថ្មី​ត្រឹមតែ ៥​ថ្ងៃ គឺ​នៅ​ថ្ងៃទី​១៧ ខែ​សីហា លោក ហ៊ុន សែន បាន​ឆ្លៀត​កាត់​ផ្ទៃដី​បឹងតាមោក ជាង ១៦​ហិកតារ​ទៀត ឱ្យទៅ​ទីប្រឹក្សា​ផ្ទាល់​របស់​លោក គឺ​លោក ឡាញ់ ភារ៉ា ធ្វើ​ជា​កម្មសិទ្ធិ​ផ្ទាល់ខ្លួន។

ទាក់ទង​នឹង​បញ្ហា​នេះ វិទ្យុ​អាស៊ីសេរី​មិន​អាច​ទាក់ទង​ប្រធាន​អង្គភាព​អ្នកនាំពាក្យ​រដ្ឋាភិបាល លោក ប៉ែន បូណា ដើម្បី​សុំ​ការ​បកស្រាយ​ជុំវិញ​រឿង​នេះ​បាន​ឡើយ នៅ​ថ្ងៃ​ទី​២៨ ខែ​ធ្នូ។

ជុំវិញ​រឿង​នេះ ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍ និង​សន្តិភាព លោក យង់ គិមអេង មាន​ប្រសាសន៍​ថា ការ​ផ្ដល់​ដី​ទ្រព្យសម្បត្តិ​សាធារណៈ​របស់​រដ្ឋ ឱ្យទៅ​បុគ្គល​ឯកជន​ភាគច្រើន ធ្វើឡើង​ដោយ​មិន​មាន​តម្លាភាព​នោះ​ឡើយ។ លោក​បន្ត​ថា រដ្ឋាភិបាល​មិន​គួរ​បន្ត​ផ្ដល់​ដី​ឧទ្យានជាតិ ឬ​បឹងបួ​ទៅ​ឱ្យ​បុគ្គល​ណា​ម្នាក់​ធ្វើជា​កម្មសិទ្ធិ​ផ្ទាល់ខ្លួន ក្នុង​ពេល​ដី​ដែល​ជា​ទ្រព្យសម្បត្តិ​រដ្ឋ​ទាំងនោះ នៅតែ​អាច​ផ្ដល់​ផលប្រយោជន៍​ដល់​ប្រជា​សហគមន៍​ដែល​រស់នៅ​ក្បែរ​តំបន់​នោះ។

លោក យង់ គិមអេង៖ «ការ​ធ្វើ​អនុប្រយោគ​អី​ជា​ហូរហែ​ហ្នឹង ចេះតែ​ធ្វើ​បាន ប៉ុន្តែ​ត្រូវ​សួរ​ថា វា​អស់​ផលប្រយោជន៍​សាធារណៈ​ឬ​នៅ​? ហើយ​ជុំវិញ​បញ្ហា​ហ្នឹង​ដែរ ការ​ធ្វើ​សម្បទាន​ដី​ហ្នឹង ត្រូវ​ធ្វើ​យ៉ាងណា​កុំឱ្យ​ប៉ះពាល់​ទៅដល់​ប្រជាពលរដ្ឋ​ដែល​ជា​អ្នក​រស់​នៅ​ក្នុង​តំបន់​នោះ»

ក្រោម​ការដឹកនាំ​រយៈពេល ៦​អាណត្តិ អតីត​នាយករដ្ឋមន្ត្រី លោក ហ៊ុន សែន បាន​កាត់​ដី​ឧទ្យាន​ជាតិ​ព្រៃឈើ ដែនជម្រកសត្វព្រៃ និង​បឹង​ធម្មជាតិ រាប់​ម៉ឺន​ហិកតារ​ទៅ​ឱ្យ​ក្រុម​ឧកញ៉ា និង​អ្នក​ដែល​មាន​ទំនាក់ទំនង​ស្និទ្ធស្នាល​នឹង​គ្រួសារ​របស់​លោក ដោយ​គ្មាន​តម្លាភាព។ ជាក់ស្ដែង​ទីប្រឹក្សា​ផ្ទាល់​របស់​លោក គឺ​លោក ឡាញ់ ភារ៉ា បាន​ទទួល​ដី​បឹងតាមោក សរុប ៣០​ហិកតារ ដោយ​ការ​បង់​ពន្ធអាករ​ផ្សេងៗ គឺជា​បន្ទុក​របស់​រដ្ឋ ខណៈ​ប្រជាពលរដ្ឋ​រស់នៅ​ក្បែរ​បឹង​តា​មោក​ជាង ២​រយ​គ្រួសារ ដែល​មាន​ដី​សរុប​មិន​ដល់ ៥​ហិកតារ​ផង​នោះ នៅតែ​បន្ត​រង​ការ​គំរាមកំហែង ឱ្យ​ដោះដូរ​ដី និង​បណ្ដេញ​ចេញ​ពី​ផ្ទះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។