កម្ពុជាបញ្ជាក់សាជាថ្មីពីការប្តេជ្ញាចិត្តយ៉ាងមុតមាំសហការជាមួយគ្រប់ភាគីពាក់ព័ន្ធក្នុងតំបន់ និងអន្តរជាតិ ដើម្បីពង្រឹងអភិបាលកិច្ច និងការគ្រប់គ្រងធនធានទឹក និងអាងទន្លេមេគង្គប្រកបដោយចីរភាព។
ការបញ្ជាក់សាជាថ្មីនេះ ធ្វើឡើងនៅក្នុងពេលដែលលោកនាយករដ្ឋមន្ត្រី ហ៊ុន សែន ទៅចូលរួមកិច្ចប្រជុំកំពូលលើកទី៤ ស្តីពីបញ្ហាទឹកនៅតំបន់អាស៊ី-ប៉ាស៊ីហ្វិក នៅប្រទេសជប៉ុន ដែលបានបញ្ចប់កាលពីថ្ងៃទី២៤ ខែមេសា ម្សិលម៉ិញ។
សេចក្តីប្រកាសព័ត៌មានរបស់ក្រសួងការបរទេសកម្ពុជា ផ្សាយកាលពីថ្ងៃទី២៤ ខែមេសា អំពីលទ្ធផលនៃកិច្ចប្រជុំនោះ ឱ្យដឹងថា លោក ហ៊ុន សែន បានបញ្ជាក់នូវជំនឿថា ឆន្ទៈនយោបាយកម្រិតខ្ពស់ ការខិតខំប្រឹងប្រែង និងការធ្វើសកម្មភាពរួមគ្នា នឹងធានាការសម្រេចបាននូវគោលដៅទឹកសម្រាប់ការអភិវឌ្ឍប្រកបដោយចីរភាពនេះ។ លោក ហ៊ុន សែន បានគូសបញ្ជាក់ពីសារសំខាន់នៃទឹកដែលជាធនធានចាំបាច់សម្រាប់ការអភិវឌ្ឍប្រកបដោយចីរភាព ដោយលោកបានជំរុញឱ្យភាគីពាក់ព័ន្ធធ្វើការរួមគ្នាដើម្បីគ្រប់គ្រងទឹកប្រកបដោយចីរភាពសម្រាប់ពេលបច្ចុប្បន្ន និងអនាគត។
ក្រសួងការបរទេសកម្ពុជា ឱ្យដឹងថា ថ្នាក់ដឹកនាំនៃប្រទេសដែលបានចូលរួមកិច្ចប្រជុំកំពូលនេះ បានដាក់ចេញនូវ «សេចក្តីប្រកាសទីក្រុងខឹម៉ាមូតុ» ប្តេជ្ញាពង្រឹងការអភិវឌ្ឍហេដ្ឋារចនាសម្ព័ន្ធប្រកបដោយគុណភាពសម្រាប់វិស័យទឹក ដោយរួមបញ្ចូលទាំងផ្នែករឹង និងផ្នែកទន់ រួមទាំងការគ្រប់គ្រងទិន្នន័យផង។
បញ្ហាសន្តិសុខទឹក និងចែកចាយធនធានទឹកកំពុងក្លាយជាបញ្ហាសំខាន់ដែលកាន់តែកើនកម្តៅមួយនៅក្នុងតំបន់មេគង្គ ស្របពេលដែលប្រទេសនៅតាមខ្សែទឹកខាងលើជាពិសេសប្រទេសចិនបានសាងសង់ និងមានគម្រោងសាងសង់ទំនប់វារីអគ្គិសនីខ្នាតយក្សជាច្រើននៅលើផ្ទៃអាងទន្លេនេះដើម្បីផលិតចរន្តអគ្គិសនី និងស្តុកធនធានទឹកសម្រាប់ទុកប្រើប្រាស់នៅក្នុងប្រទេសខ្លួន។
ការណ៍នេះ កំពុងធ្វើឱ្យរំហូរទឹកតាមបែបធម្មជាតិរបស់ទន្លេមេគង្គបានប្រែប្រួលខុសប្រក្រតី ដែលក្រុមអ្នកវិទ្យាសាស្ត្រព្រមានថា អាចបង្កឱ្យគ្រោះថ្នាក់ដល់ជីវចម្រុះ ជាពិសេសធនធានត្រីនៅតាមប្រទេសខ្សែទឹកខាងក្រោម ជាពិសេសតំបន់បឹងទន្លេសាបរបស់កម្ពុជា ព្រមទាំងបង្កការប៉ះពាល់ដោយផ្ទាល់និងដោយប្រយោលដល់ជីវភាពរស់នៅប្រចាំថ្ងៃរបស់ពលរដ្ឋរាប់លាននាក់ដែលរស់នៅពឹងផ្អែកលើធនធានពីទន្លេមេគង្គនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។