ទឹកជំនន់ស្ទឹងព្រែកត្នោតហក់ឡើងខ្លាំង ខណៈអាជ្ញាធរយឺតយ៉ាវក្នុងការជួយសង្គ្រោះ
2021.10.27
ទិដ្ឋភាពពីលើអាកាសដែលបង្ហាញពីស្ថានភាពទឹកជំនន់ និងការបាក់ទំនប់ទឹកនៅក្នុងសង្កាត់ទៀន ខណ្ឌដង្កោ រាជធានីភ្នំពេញនៅថ្ងៃទី២៧ ខែតុលា ឆ្នាំ២០២១។
រូប៖ រដ្ឋបាលរាជធានីភ្នំពេញ
ពលរដ្ឋមួយចំនួន ដែលរងគ្រោះទឹកជំនន់នៅខណ្ឌដង្កោឲ្យដឹងថា អាជ្ញាធរយឺតយ៉ាវក្នុងការជួយសង្គ្រោះពួកគាត់ ក្នុងពេលដែលទឹកឡើងកាន់តែខ្លាំង នៅថ្ងៃទី២៧ តុលា។ ពលរដ្ឋជាច្រើនត្រូវរកមធ្យោបាយជម្លៀសខ្លួនឯង ដោយប្រមូលសម្ភារៈប្រើប្រាស់ចាំបាច់ទៅរកទួលសុវត្ថិភាព។
ពលរដ្ឋរងគ្រោះពីទឹកជំនន់រាប់រយគ្រួសារកំពុងប្រមូលផ្ដុំគ្នា បោះតង់ស្នាក់នៅបណ្ដោះអាសន្នលើខ្នងទំនប់ ៧មករា ក្នុងស្ថានភាពគ្មានជម្រក ទឹកស្អាត អគ្គិសនី និងគ្មានស្បៀងអាហារហូបចុកគ្រប់គ្រាន់នោះទេ។
ពលរដ្ឋរស់នៅខណ្ឌដង្កោម្នាក់ លោក ហឿ សំអាត ឲ្យដឹងថា ទឹកបានហក់ឡើងកម្ពស់ ១តឹកថែមទៀតហើយ នៅថ្ងៃទី២៧ តុលា។ លោកបារម្ភថា អ្នកភូមិកាន់តែច្រើនថែមទៀត នឹងត្រូវជម្លៀសមកបន្ត ស្របពេលដែលបច្ចុប្បន្នមានអ្នករងគ្រោះប្រមាណ ១.០០០គ្រួសារ កំពុងស្នាក់នៅក្នុងតង់តាមបណ្ដោយខ្នងទំនប់ ៧មករា។
លោក ហឿ សំអាត បញ្ជាក់ថា ច្រើនថ្ងៃមកនេះ អាជ្ញាធរបានចុះទៅពិនិត្យ និងនាំកងកម្លាំងច្រកបាវខ្សាច់ទប់ទឹក និងសង្កត់ផ្លូវច្រើនកន្លែង តែអាជ្ញាធរមិនបានជួយជម្លៀស និងដឹកជញ្ជូនសម្ភារៈឲ្យពលរដ្ឋទេ គឺអ្នកភូមិត្រូវជម្លៀស និងរើឥវ៉ាន់តាមលទ្ធភាពដោយខ្លួនឯង។ លោកថា អាជ្ញាធរបានចែកអង្ករ និងត្រីខ មួយចំនួនឲ្យពលរដ្ឋដែលបានជម្លៀសទៅដល់លើខ្នងទំនប់ខ្លះដែរ តែលោកព្រួយបារម្ភខ្លាចស្បៀងអាហារទាំងនេះ មិនអាចផ្គត់ផ្គង់បានរយៈពេលយូរទេ ព្រោះទឹកនៅតែបន្តលិចលង់ ឯសម្ភារៈជាច្រើនត្រូវលិចត្រាំក្នុងទឹកនៅក្នុងផ្ទះរបស់ពួកគាត់៖ «ដាំបង្គោល ចង់តង់ចង់អ្វីជ្រក។ គេនៅជុំវិញទំនប់គ្រាន់តែជួរខ្ញុំជាង ១០០ ទេ។ តែបើនៅជុំវិញហ្នឹងច្រើនណាស់បង ចូលមួយពាន់ជាង។ អត់ទេ យើងជម្លៀសមកខ្លួនយើង។ ហែលដាក់ពោងហែលជញ្ជូនឥវ៉ាន់មក។ អានេះខ្ញុំនិយាយតាមត្រង់ទេ អត់មាននរណាទៅជម្លៀសខ្ញុំទេ ហើយខ្ញុំមកដោយខ្លួនទេ ដាក់ពោងដាក់ទូកអ្វីទេ។ ទូកអត់មានទេ ទើបតែមានថ្ងៃហ្នឹងដែរហ្នឹង បងប្អូនទិញផ្ញើមកមួយអ៊ីចឹងទៅ នាំគ្នាសណ្ដោងគ្នាទៅ។ នៅផ្ទះទទឹកខ្ទេចខ្ទីអស់ហើយ យកបានតែរបស់ដេកពួន។ (យប់ឡើង) អំពូលធម្មជាតិ បានន័យថាតែងងឹតគឺងងឹតហើយ។ យើងវាអត់មានភ្លើង (អគ្គិសនី) អ្វីប្រើផង»។
ពលរដ្ឋរស់នៅខណ្ឌដង្កោ តាមបណ្ដោយស្ទឹងព្រែកត្នោត បានជម្លៀសចេញពីផ្ទះ តាំងពីថ្ងៃទី២៥ តុលា មកដោយសារទឹកស្ទឹងហក់ឡើងខ្ពស់ដល់កម្រិតប្រកាសអាសន្ន និងបណ្ដាលឲ្យលិចភូមិឋាននៅតំបន់នោះ។ ពលរដ្ឋថា ទឹកជំនន់ឆ្នាំនេះលិចខ្លាំងជាងឆ្នាំមុន។ ពួកគេក៏កំពុងប្រឈមជីវភាពប្រចាំថ្ងៃដែរ ដោយសារមិនអាចចេញទៅប្រកបមុខរបរបាន ហើយត្រូវខូចខាតទ្រព្យសម្បត្តិ ផលដំណាំ ស្របពេលដែលពួកគាត់កំពុងរងគ្រោះក្នុងវិបត្តិជំងឺកូវីដ-១៩ (Covid-19) ស្រាប់។
ជុំវិញស្ថានភាពទឹកជំនន់នេះ វិទ្យុអាស៊ីសេរីមិនអាចសុំការបញ្ជាក់ពីអ្នកនាំពាក្យសាលារាជធានីភ្នំពេញ លោក ម៉េត មាសភក្ដី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ លោក ឃុន សុខា បានទេ។ ប៉ុន្តែ គេហទំព័រសាលារាជធានីភ្នំពេញចុះផ្សាយថា កាលពីយប់ថ្ងៃទី២៦ តុលាទឹកស្ទឹងព្រែកត្នោត បានហូរច្រោះ និងធ្លាយទ្វារទប់ទឹកមួយកន្លែង ដែលជាហេតុធ្វើឲ្យលិចលង់ដល់លំនៅឋានពលរដ្ឋចំនួន៥សង្កាត់ គឺសង្កាត់គយនយ សង្កាត់ទៀន សង្កាត់ស្ពានថ្ម សង្កាត់ព្រែកកំពឹស និងសង្កាត់រលួស។ អាជ្ញាធរក៏បានជម្លៀសពលរដ្ឋចេញពីលំនៅឋានជាបន្ទាន់។ អាជ្ញាធរកំពុងជួសជុលទ្វារទឹកនោះឡើងវិញហើយ។ គិតត្រឹមថ្ងៃទី២៧ តុលា មិនមានពលរដ្ឋរងគ្រោះថ្នាក់ដល់ជីវិតទេ។
ចំណែកអាជ្ញាធរខេត្តកណ្ដាល ក៏កំពុងដឹកនាំកងកម្លាំងចុះពិនិត្យមើលស្ថានភាពទឹក និងស្ដារប្រឡាយមួយចំនួនដែរ ដើម្បីបង្ហូរទឹកចេញពីទំនប់ ៧មករា ចូលទៅទន្លេបាសាក់ដែរ។ ហ្វេសប៊ុក (Facebook) រដ្ឋបាលខេត្តកណ្ដាលចុះផ្សាយថា ក្នុងករណីជន់លិច នឹងត្រូវប៉ះពាល់ដល់លំនៅឋាន ផលដំណាំរបស់ពលរដ្ឋនៅស្រុកកណ្ដាលស្ទឹង ក្រុងតាខ្មៅ និងស្រុកស្អាង។
ការជន់លិចស្ទឹងព្រែកត្នោតនៅប៉ុន្មានថ្ងៃនេះ ដោយសារមានភ្លៀងធ្លាក់ច្រើននៅខេត្តកំពង់ស្ពឺ និងភ្នំពេញ ហើយបណ្ដាលឲ្យទឹកភ្លៀងត្រូវហូរចាក់ចូលក្នុងស្ទឹងព្រែកត្នោតតែមួយគត់ ខណៈដែលបឹង ប្រឡាយ ដែលជាផ្ទៃស្ដុកទឹកផ្សេងទៀត ត្រូវបានលុបដើម្បីអភិវឌ្ឍន៍ស្ទើរគ្មានសល់។
អភិបាលខេត្តកំពង់ស្ពឺ លោក វ៉ី សំណាង ប្រាប់អាស៊ីសេរីថា នៅថ្ងៃទី២៧ តុលា ទឹកជំនន់នៅខេត្តនេះ ចាប់ផ្ដើមស្រកវិញហើយ ក្រោយពេលឈប់ធ្លាក់ភ្លៀងទៀត។ លោកពន្យល់ថា ព្យុះប៉ុន្មានថ្ងៃនេះបានបង្កជាភ្លៀងធ្លាក់ខ្លាំងនៅស្រុកឱរ៉ាល់ ស្រុកភ្នំស្រួច និងស្រុកសំរោងទង ហើយអាជ្ញាធរបានស្ទាក់ទឹកទុកក្នុងទំនប់ដែរ តែទឹកពេញអាងពេកទើបអាជ្ញាធរបង្ហើបទ្វារទឹកឲ្យហូរចេញខ្លះ៖ «វាអត់ទាន់ល្អប្រសើរប៉ុន្មានទេ។ ប៉ុន្តែវាស្រកអស់ ២ម៉ែត្រហើយហ្នឹង។ វានៅសល់តិចៗ អ៊ីចឹងណា។ ខ្ញុំមើលអាកាសធាតុនេះវាធ្លាក់ខ្យល់ហើយ។ អ៊ីចឹងបើសិនវាអត់មានព្យុះ ប្រហែលជាមិនទំនងមានភ្លៀងអ្វីទេ។ កន្លងមកដែលវាលិចលង់នេះ ដោយសារតែវាមានព្យុះ អាព្យុះមកវានាំទឹកភ្លៀងមក។ វាមិនខូចខាតអ្វីធ្ងន់ធ្ងរទេ។ យើងមើលទៅដូចវិលទៅរកស្ថានភាពដើមហើយ យ៉ាងហូរមួយថ្ងៃ ពីរទៀត អស់ហើយ»។
ជុំវិញករណីទឹកជំនន់នេះ អ្នកជំនាញផ្នែកអភិបាលកិច្ចទឹក លោក ហែម ឧត្ដម សង្កេតឃើញថា ការអភិវឌ្ឍន៍ទីក្រុងកន្លងមក រដ្ឋាភិបាលហាក់មិនសូវចាប់អារម្មណ៍ពីការបង្ហាញប្លង់មេ (Master Plan) រួមគ្នារវាងក្រសួងពាក់ព័ន្ធ ជាមួយវិស័យឯកជនទេ ដែលជាហេតុបណ្ដាលឲ្យមានការប៉ះពាល់ ឬការលិចលង់ទីក្រុងនៅក្រោយការអភិវឌ្ឍន៍រួច។ ក្រៅពីនេះ លោកក៏ជំរុញឲ្យអាជ្ញាធរមូលដ្ឋានចុះស្ដារប្រឡាយ ស្ទឹង ព្រែក ឲ្យបានញឹកញាប់កុំឲ្យរាក់ ឬមានការបង្រួមព្រែកឲ្យនៅទំហំតូចជាដើម៖ «ខ្ញុំមិនប្រាកដថាតើស្ថាប័នពាក់ព័ន្ធនៅក្នុងវិស័យអស់ហ្នឹង តើគាត់បានជជែកគ្នា គាត់មាន Master Plan ក្នុងការអភិវឌ្ឍន៍ទីក្រុងហ្នឹងរួមគ្នា ដែរឬអត់? ឧទាហរណ៍ថាវិស័យអចលនទ្រព្យហ្នឹងទាក់ទងនឹងក្រសួងរៀបចំដែនដី។ ឯចំណែកខាងក្រសួងធនធានទឹក ក្រសួងបរិស្ថាន អាជ្ញាធររាជធានី តើពួកគាត់បានអង្គុយជជែកគ្នាប៉ុណ្ណាពិគ្រោះយោបល់ និងមានផែនការអភិវឌ្ឍន៍រួមមួយ។ មិនមែនត្រឹមតែផែនការអភិវឌ្ឍន៍រៀងៗ ខ្លួនទេណា។ អ៊ីចឹងខ្ញុំមើលទៅវាមានកម្រិតកន្លែងហ្នឹង»។
ទឹកស្ទឹងព្រែកត្នោត បានជន់លិចផ្ទះសម្បែងផលដំណាំ និងសត្វចិញ្ចឹមរបស់ពលរដ្ឋធ្ងន់ធ្ងរនៅរយៈពេល ២ឆ្នាំចុងក្រោយនេះ។ ពលរដ្ឋ និងអ្នកឃ្លាំមើលយល់ថា ស្ថានភាពទឹកស្ទឹងព្រែកត្នោតកាន់តែខ្លាំងនេះ បណ្ដាលមកពីការលុបបឹងធម្មជាតិ ពិសេស គឺបឹងជើងឯក ដែលជាកន្លែងស្តុកទឹកធំជាងគេនៅម្ដុំនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- អាជ្ញាធរក្រុងភ្នំពេញមិនអនុញ្ញាតឱ្យបក្សកម្លាំងជាតិធ្វើបាតុកម្ម នៅទីលានប្រជាធិបតេយ្យ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ