សង្គម​ស៊ីវិល និង​សកម្មជន​បរិស្ថាន​គាំទ្រ​កម្ពុជា​ដែល​ឈប់​ផលិត​អគ្គិសនី​ដោយ​ដុត​ធ្យូងថ្ម

ដោយ ឡេង ម៉ាលី
2023.11.30
សង្គម​ស៊ីវិល និង​សកម្មជន​បរិស្ថាន​គាំទ្រ​កម្ពុជា​ដែល​ឈប់​ផលិត​អគ្គិសនី​ដោយ​ដុត​ធ្យូងថ្ម លោកនាយករដ្ឋមន្ត្រី ហ៊ុន ម៉ាណែត (ស្ដាំទី៥) ចូលរួម​ពិធី​បិទ​ការ​សាងសង់​ទំនប់​វារីអគ្គិសនី​ស្ទឹងតាតៃលើ ស្ថិត​ក្នុង​ស្រុក​ថ្មបាំង ខេត្ត​កោះកុង នៅ​ថ្ងៃទី​៣០ ខែ​វិច្ឆិកា ២០២៣។
រូប៖ ហ្វេសប៊ុកលោក ហ៊ុន ម៉ាណែត

សង្គម​ស៊ីវិល និង​សកម្មជន​បរិស្ថាន​ថា ជា​រឿង​ល្អ​ដែល​កម្ពុជា​បញ្ឈប់​ការ​អភិវឌ្ឍ​រោងចក្រ​ផលិត​អគ្គិសនី ដោយ​ដុត​ធ្យូងថ្ម ហើយ​ងាក​មក​អនុវត្ត​គម្រោង​ផលិត​អគ្គិសនី​ដុត​ឧស្ម័ន​ធម្ម​ជាតិ (Liquefied Natural Gas- LNG)។ ពួកគេ​ថា គម្រោង​ថ្មី​នេះ​រួមចំណែក​ទប់ស្កាត់​បញ្ហា​បម្រែបម្រួល​អាកាសធាតុ។

មន្ត្រី​សង្គម​ស៊ីវិល និង​អ្នកការពារ​បរិស្ថាន​សង្កេត​ឃើញ​ថា ការ​បញ្ឈប់​រោងចក្រ​ផលិត​អគ្គិសនី​ដុត​ធ្យូង​ថ្ម របស់​រដ្ឋាភិបាល គឺជា​រឿង​ត្រឹមត្រូវ ដោយសារតែ​កន្លង​ទៅ​ការ​អនុវត្ត​គម្រោង​មួយ​នេះ បាន​បង្ក​ផល​ប៉ះពាល់​ធ្ងន់ធ្ងរ ដល់​បរិស្ថាន និង​សង្គម ច្រើន​ជាង ផល​ចំណេញ។

ការ​លើកឡើង​របស់​មន្ត្រី​សង្គម​ស៊ីវិល និង​សកម្មជន​បរិស្ថាន​នេះ​បន្ទាប់ពី​នាយករដ្ឋមន្ត្រី ហ៊ុន ម៉ាណែត បាន​ថ្លែង​នៅក្នុង​ពិធី​បិទ​ការ​សាងសង់​ទំនប់​វារីអគ្គិសនី​ស្ទឹងតាតៃលើ ស្ថិត​ក្នុង​ស្រុក​ថ្មបាំង ខេត្ត​កោះកុង នៅ​ថ្ងៃទី​៣០ ខែ​វិច្ឆិកា។

លោកនាយក​រដ្ឋមន្ត្រី ហ៊ុន ម៉ាណែត បាន​ថ្លែង​នៅ​ក្នុង​កម្ម​ពិធី​បិទ​ការ​សាងសង់​ទំនប់វារីអគ្គិសនី​ស្ទឹងតាតៃ លើ​ខេត្ត​កោះកុង​ថា ការបញ្ឈប់​រោងចក្រ​ផលិត​អគ្គិសនី​ដុត​ធ្យូងថ្ម ដើម្បី​ងាក​មក​អនុវត្ត​គម្រោង​ផលិត​អគ្គិសនី​ដុត​ឧស្ម័ន​តាម​បែប​ធម្មជាតិ (LNG) ដែល​អាច​ទប់ស្កាត់​ការ​បំភាយ​ឧស្ម័ន​កាបូន។

លោក ហ៊ុន ម៉ាណែត៖ «និង​ពិនិត្យ​លទ្ធភាព​ដាក់​ឱ្យ​រោងចក្រ​ផលិត​អគ្គិសនី​ដុត​ធ្យូងថ្ម​មាន​ស្រាប់ បញ្ឈប់​ដំណើរការ​មុន​កាល​កំណត់​នៅ​កម្ពុជា»

ក្រុមហ៊ុន រ៉ូយ៉ាល់គ្រុប (Royal Group) របស់​លោក គិត ម៉េង ទទួល​បាន​សិទ្ធិ​អភិវឌ្ឍ​រោងចក្រ​អគ្គិសនី​ដុត​ធ្យូងថ្ម​ដែល​អាច​ផលិត​ថាមពល​បាន​៧០០​មេហ្កាវ៉ាត់ នៅ​ក្នុង​ស្រុក​បុទុមសាគរ ខេត្ត​កោះកុង កាលពី​ថ្ងៃទី​៧ ខែកុម្ភៈ ឆ្នាំ​២០២០។ ទំហំ​វិនិយោគ​សរុប​នៅក្នុង​គម្រោង​នេះ​គឺ​ជាង​១ ពាន់​៣ រយ​លាន​ដុល្លារ​អាមេរិក (.៣៤៤) ក្នុង​នោះ​ទុន​ផ្ទាល់​របស់​ក្រុមហ៊ុន​មាន​៣០​ភាគរយ​និង​កម្ចី​ពី​ធនាគារ​មាន ៧០​ភាគរយ។

ចំណែក ធ្យូងថ្ម​ដែល​ត្រូវ​ប្រើ​ក្នុង​រោងចក្រ​នៅ​ខេត្ត​កោះកុង​នេះ ត្រូវ​នាំចូល​ពី​បរទេស ហើយ​អគ្គិសនី​កម្ពុជា​ធានា​ទិញ​ថាមពល ចំនួន​៨០​ភាគរយ ដែល​រោងចក្រ​នេះ​ផលិត​បាន ក្នុង​មួយឆ្នាំៗ​។ រោងចក្រ​នេះ​បាន​ត្រូវ​ដាក់​ឱ្យ​ដំណើរការ​នៅ​ឆ្នាំ​២០២៣ និង​២០២៤ ហើយ​ដំណើរការ​អាជីវកម្ម​របស់​រោងចក្រ​អគ្គិសនី​នេះ មាន​រយៈពេល​៣៥​ឆ្នាំ។

ទាក់ទង​នឹង​ការ​បិទ​បញ្ចប់​ការផលិត​អគ្គិសនី​ដោយ​ដុត​ធ្យូងថ្ម​នៅ​ខេត្តកោះកុង​នេះ អ្នកការពារ​សិទ្ធិមនុស្ស និង​បរិស្ថាន លោក សាន់ ម៉ាឡា ប្រាប់​វិទ្យុ​អាស៊ីសេរី​នៅ​ថ្ងៃទី​៣០​ខែវិច្ឆិកា​ថា ការ​ឈប់​ផលិត​អគ្គិសនី​ដុត​ធ្យូងថ្ម​នេះ គឺជា​រឿង​ល្អ ព្រោះថា​បើសិនជា​រដ្ឋាភិបាល​បន្ត​ឱ្យ​មាន​ការផលិត​អគ្គិសនី​ដុត​ធ្យូងថ្ម វា​បង្ក​ផល​ប៉ះពាល់​ដល់​ការរស់នៅ​របស់​ពលរដ្ឋ និង​បរិស្ថាន តាមរយៈ​ការ​បំពុល​ឧស្ម័ន​ពុល​ចេញ​ពី​ទឹក។

លោក សាន់ ម៉ាឡា៖ «សូម​អំពាវនាវ​ឱ្យ​រដ្ឋាភិបាល​មេត្តា​ប្រកាន់យក​នូវ​ទស្សនៈ​ឬក៏​ជំហរ​បែបនេះ​តទៅ ជាពិសេស​ប្រសិនបើ​មានគំនិត​ផ្ដួចផ្ដើម​ចង់​បង្កើន ឬក៏​បង្កើត​ប្រភព​អគ្គិសនី​សម្រាប់​អភិវឌ្ឍន៍​ប្រទេស​រដ្ឋាភិបាល​គួរតែ​សិក្សា​ជាមួយ​អ្នកជំនាញ ធ្វើ​ម៉េច​យើង​អាច​ផលិត​ប្រភព​ថាមពល​ស្អាត​ដែល​មិន​បង្ក​ផល​ជះ​មក​លើ​បរិស្ថាន ក៏ដូចជា​ប្រជាជន»

មន្ត្រី​សង្គម​ស៊ីវិល​លើកឡើង​ថា ការ​បញ្ឈប់​រោងចក្រ​ផលិត​អគ្គិសនី​ដុត​ធ្យូងថ្ម​នៅ​ខេត្ត​កោះកុង​នេះ ជា​រឿង​ប្រសើរ ក៏ប៉ុន្តែ​រដ្ឋាភិបាល​ក៏​គួរតែ​បញ្ឈប់​គម្រោង​បែបនេះ​នៅ​ទូទាំង​ប្រទេស។

ក្រៅពី​រោងចក្រ​ផលិត​អគ្គិសនី​ដុត​ធ្យូងថ្ម​នៅ​ខេត្តកោះកុង នៅ​ឯ​ខេត្ត​ឧត្តរមានជ័យ រដ្ឋាភិបាល​ក៏​បាន​ផ្ដល់​សិទ្ធិ​ឱ្យ​ក្រុមហ៊ុន ហាន សេង ឃូល ម៉ាញ (HAN SENG COAL MINES Co., LTD) អភិវឌ្ឍ​រោងចក្រ​អគ្គិសនី​ដុត​ធ្យូងថ្ម នៅ​ស្រុក​ត្រពាំង​ប្រាសាទ ក្នុង​ទំហំ ២៦៥​មេហ្កាវ៉ាត់។ ក្រុមហ៊ុន​នេះ មាន​ទំហំ​វិនិយោគ​សរុប ជិត​៣​រយ​(២៩៤) លាន​ដុល្លារ​អាមេរិក ក្នុង​នោះ​ទុន​ផ្ទាល់​របស់​ក្រុមហ៊ុន​មាន ៣០​ភាគរយ និង ៧០​ភាគរយ ទៀត ជា​កម្ចី​ពី​ធនាគារ។

រោងចក្រ​នេះ បាន​ដាក់​ឱ្យ​ដំណើរការ​នៅ​ឆ្នាំ​២០២១ និង​២០២២ ដោយ​ដំណើរការ​អាជីវកម្ម​មាន​រយៈពេល ២៥​ឆ្នាំ​។ អ្នកឃ្លាំមើល​ថា រដ្ឋាភិបាល​ក៏​គួរតែ​បិទ​រោងចក្រ​នេះ​ផង​ដែរ ដើម្បី​ទប់ស្កាត់​ផល​ប៉ះពាល់​សង្គម និង​បរិស្ថាន។

ការ​ផលិត​អគ្គិសនី​ដោយ​ដុត​ធ្យូងថ្ម គេ​ធ្វើឡើង​តាមរយៈ​ការ​ជីក​យក​ឧស្ម័ន​ពី​បាតដី ខាងក្រោម​ទឹក ដើម្បី​បំភាយ​ឧស្ម័ន​កាបូន ឱ្យ​ប្រែក្លាយ​ជា​ថាមពលអគ្គីសនី​សម្រាប់​ប្រើប្រាស់។

ទិន្នន័យ​របស់​ទីភ្នាក់ងារ​ថាមពល​អន្តរជាតិ (IEA) បាន​បង្ហាញ​កាលពី​ឆ្នាំ​២០២០​ថា ប្រទេស​ជឿនលឿន​មួយចំនួន​នៅ​តំបន់​អឺរ៉ុប​កំពុងតែ​ធ្វើ​យុទ្ធនាការ កាត់បន្ថយ​ការ​សាយភាយ​ឧស្ម័នកាបូនិច​ទៅ​ក្នុង​បរិយាកាស​ដោយ​ផ្លាស់ប្ដូរ​ទៅ ប្រើប្រាស់​ថាមពល​កកើត​ឡើងវិញ និង​ឧស្ម័ន​ធម្មជាតិ ជំនួស​ឱ្យ​ការប្រើប្រាស់​ថាមពល​បាន​មកពី​ការ​ដុត​ធ្យូងថ្ម​។ តាមរយៈ​យុទ្ធនាការ​នេះ ឧស្ម័នកាបូនិច​ដែល​សាយភាយ​ទៅ​ក្នុង​បរិយាកាស​ក្នុង​តំបន់​នេះ​បាន​ធ្លាក់ចុះ​ដល់​ទៅ ១២​ភាគរយ។

ចំណែក​ការ​សាយភាយ​ឧស្ម័នកាបូនិច​ចេញពី​ការប្រើ​ធ្យូងថ្ម​នៅ​លើ​ពិភពលោក​វិញ បាន​ថយ​ចុះ​ប្រមាណ ២០០​លាន​តោន ឬ ១,៣​ភាគរយ បើ​ប្រៀបធៀប​នឹង​ឆ្នាំ​២០១៨។ ឧស្ម័នកាបូនិច​ដែល​សាយភាយ​ទៅ​ក្នុង​បរិយាកាស គឺជា​មូលហេតុ​ចម្បង​នាំ​ឱ្យ​ភព​ផែនដី​ឡើង​កម្ដៅ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

អត្ថបទពេញនិយម
RFA
ពលរដ្ឋ​ខ្មែរ​នៅ​អូស្ត្រាលី​ធ្វើ​បាតុកម្ម​ទាមទារ​ឱ្យ​មេដឹកនាំ​កម្ពុជា​ស្ដារ​ប្រជាធិបតេយ្យ​និង​គោរព​សិទ្ធិ​មនុស្ស
បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។