ដើមឈើធំៗបន្សល់ចុងក្រោយ ឋិតក្នុងដែនជម្រកសត្វព្រៃកែវសីមា ទាក់ទាញអ្នកទេសចរ និងជម្រកសត្វព្រៃ កំពុងប្រឈមការបាត់បង់ជាបន្តបន្ទាប់ ដោយសារបទល្មើសព្រៃឈើ។
មន្ត្រីសង្គមស៊ីវិលដែលចុះឃ្លាំមើលបញ្ហានេះ សង្កេតឃើញថា ឆ្មាំអភិរក្សរបស់ក្រសួងបរិស្ថានដែលឈរជើង ការពារព្រៃក្នុងតំបន់នោះ មិនអើពើ និងមិនបានអនុវត្តច្បាប់លើជនល្មើស ដែលកាប់ និងដឹកជញ្ជូនឈើខុសច្បាប់នោះទេ។
មន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តមណ្ឌលគិរី លោក ប៊ី វ៉ាន់នី ប្រាប់វិទ្យុអាស៊ីសេរី នៅថ្ងៃទី៣ កក្កដា ថា ជារៀងរាល់យប់មានគោយន្តយ៉ាងហោចណាស់ ១០ គ្រឿង ដឹកជញ្ជូនឈើចេញពីព្រៃអភិរក្សមួយនេះ ឆ្លងកាត់ទីស្នាក់ការរបស់មន្ត្រីបរិស្ថាន ក្នុងឃុំស្រែឈូក ស្រុកកែវសីមា។
លោកសង្កេតឃើញថា កន្លងទៅទាល់តែបែកធ្លាយព័ត៌មាន ពីបទល្មើសព្រៃឈើ ទើបមន្ត្រីបរិស្ថាន ចុះអនុវត្តច្បាប់ម្តងម្កាល ដោយមិនបានអនុវត្តច្បាប់ជាប្រចាំ ដើម្បីឱ្យជនល្មើសរាងចាលនោះឡើយ។
លោក ប៊ី វ៉ាន្នី៖ «មន្ត្រីបរិស្ថានគាត់អនុវត្តច្បាប់ ប៉ុន្តែគាត់មិនបានអនុវត្តតួនាទីឱ្យត្រូវតាមច្បាប់ទេ គាត់ធ្វើតែតាមស្ថានការណ៍បត់បែន ពេលសារព័ត៌មានផ្សាយទៅគាត់ឱ្យគេផ្អាក ប៉ុន្តែចំណាត់ការផ្លូវច្បាប់យើងមើលឃើញអ្នកប្រព្រឹត្តមុខដដែលមិនទាន់ឃើញជាប់គុកផង។ អ្នកដឹកឈើ រកស៊ីឈើអត់មានជាប់ពន្ធនាគារផង»។
វិទ្យុអាស៊ីសេរី មិនទាន់អាចទាក់ទងសុំការបំភ្លឺរឿងនេះ ពីប្រធានមន្ទីរបរិស្ថានខេត្តមណ្ឌលគិរី លោក ឆៅ ប៊ុនធឿន បាននៅឡើយទេ ថ្ងៃទី៣ ខែកក្កដា។
លោក ប៊ី វ៉ាន់នី សោកស្តាយ ព្រៃអភិរក្សមួយនេះ ដែលជាមរកតធម្មជាតិមានតម្លៃជាប្រវត្តិសាស្ត្រ កំពុងឈានទៅរកការបាត់បង់កាន់តែខ្លាំង បង្កឱ្យប៉ះពាល់ប្រភេទឈើកម្រមានតម្លៃជាច្រើនប្រភេទ និងសត្វព្រៃ ជាពិសេសប៉ះពាល់ដល់ជីវភាពជនជាតិដើមភាគតិច៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។