ពលរដ្ឋនៅខេត្តកំពង់ស្ពឺអះអាងថា អាជ្ញាធរមូលដ្ឋានបានឃុបឃិតគ្នាជាមួយជនល្មើសកាប់ទន្ទ្រានព្រៃសហគមន៍ទ្រង់ទ្រាយធំជាថ្មី ដោយពុំមានអាជ្ញាធរណាទប់ស្កាត់នៅឡើយទេ។ អ្នកភូមិព្រួយបារម្ភថា ព្រៃតំបន់នោះអាចហិនហោចក្នុងពេលដ៏ខ្លីខាងមុខ ប្រសិនបើអាជ្ញាធរពាក់ព័ន្ធមិនឆាប់ទប់ស្កាត់ទាន់ពេលទេនោះ។
សហគមន៍ព្រៃមេត្តាធម្មជាតិស្ថិតនៅភូមិពោធិ៍មាស ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺ លោក ឃុន សារិទ្ធិ ប្រាប់វិទ្យុអាស៊ីសេរី នៅថ្ងៃទី១១ មករាថា ពួកលោកចុះល្បាតនៅថ្ងៃទី១០ ខែមករា ស្ថិតនៅភូមិពោធិ៍មាស ឃុំត្រពាំងជោរ ស្រុកឱរ៉ាល់ រកឃើញព្រៃជាង ១០ហិកតារ ត្រូវបានជនល្មើសកាប់ទន្ទ្រាន។ លោកបន្តថា ប្រជាពលរដ្ឋបារម្ភ ខ្លាចបាត់បង់ព្រៃសហគមន៍មួយនេះ ទ្រង់ទ្រាយធំដោយពុំមានអាជ្ញាធរណាចាត់វិធានការនោះទេ។
លោកលើកឡើងថា សហគមន៍ព្រៃមេត្តាធម្មជាតិនេះ បានផ្តល់ប្រយោជន៍ដល់ពលរដ្ឋទុកជាកន្លែងផ្គត់ផ្គង់ស្មៅឱ្យគោស៊ី រួមនឹងផលប្រយោជន៍ផ្សេងៗ ដែលពលរដ្ឋបានពឹងអាស្រ័យផល។ លោកសោកស្ដាយបើសិនជាអាជ្ញាធរពាក់ព័ន្ធនៅតែមិនចាប់ជនល្មើសមកផ្ដន្ទាទោសតាមច្បាប់៖ « បើសិនជានៅតែកាប់ប៉ះពាល់ដល់ប្រជាពលរដ្ឋច្រើន ទី១ វាអស់ព្រៃធំៗ ហ្នឹងអស់ហើយ ហើយទី២ . ប្រជាពលរដ្ឋគាត់លំបាកក្នុងការការពារមកដេកយាមដេកអ៊ីចឹង មិនបានទៅរកស៊ីរកអីណាទេ គាត់ចេះតែមកការពារ ជួនក៏ទាន់ទៅ ជួនក៏អត់ទៅ ហើយគាត់ក៏នៅតែការពារអ៊ីចឹង » ។
លោកបន្តថា តំបន់ព្រៃសហគមន៍នេះ ត្រូវបានមន្ត្រីអាជ្ញាធរ សហការជាមួយទាហានចុះឈូសឆាយម្ដងហើយ ដោយជួលប្រជាពលរដ្ឋមកពីតំបន់ផ្សេងជាអ្នកចូលកាប់។ លោកបញ្ជាក់ថា ការកាប់ព្រៃសហគមន៍នេះ ក្នុងលេសយកដីផ្ដល់ដល់គ្រួសារយោធាក្រីក្រ ប៉ុន្តែលោកមើលឃើញថា ជាក់ស្ដែងអាចមានពាក់ព័ន្ធលក់ឱ្យក្រុមហ៊ុន ដើម្បីបូមខ្សាច់។ លោកស្នើឱ្យមន្ត្រីពាក់ព័ន្ធគួរតែដោះស្រាយជូនពួកគេ ដើម្បីអភិរក្សព្រៃសហគមន៍ទុកសម្រាប់មនុស្សជំនាន់ក្រោយ៖ « ខ្ញុំសូមសំណូមពរទៅដល់អាជ្ញាធរ ទៅដល់ក្រសួងពាក់ព័ន្ធទាំងអស់ មេត្តាជួយរកដំណោះស្រាយ ឬក៏ទុកព្រៃឱ្យប្រជាពលរដ្ឋសម្រាប់មើលគោមើលក្របីអាស្រ័យផលនៅក្នុងហ្នឹងផង គ្រាន់ទុកសម្រាប់ជម្រកសត្វព្រៃ ព្រោះអីឥឡូវនេះអស់ហើយ មិនមានកន្លែងមើលគោមើលក្របីទេ » ។
ពលរដ្ឋលើកឡើងថា ព្រៃសហគមន៍នេះមានប្រភេទដើមត្បែង ធ្នង និងជាតំបន់ដើមឈើស្រោងជាដែនជម្រកសត្វព្រៃ ដូចជា សត្វក្ងោក ទោច និងសត្វស្វាជាដើម។
ឆ្លើយតបនឹងក្ដីបារម្ភនេះ ប្រធានមន្ទីរបរិស្ថានខេត្តកំពង់ស្ពឺ លោក ឱម ម៉ាក់ធារី ប្រាប់វិទ្យុអាស៊ីសេរីថា ប្រជាសហគមន៍គួរតែដាក់របាយការណ៍មកខាងលោកដើម្បីចាត់វិធានការ។ លោកបន្តថា កន្លងមកក្រុមការងាររបស់លោកបានចុះដោះស្រាយទាំងជនអនាថា និងជនអនាធិបតេយ្យ មិនមានបទល្មើសទៀតនោះទេ។ លោកបញ្ជាក់ថា ការលើកឡើងប្រជាសហគមន៍នោះជារឿងមិនពិតនោះទេ៖ « ហើយអាដីគេអត់ជាប់ពាក់ព័ន្ធរឿងសហគមន៍ផង ឆ្លើយថា ដីសហគមន៍។ គេបានហៅប្រធានសហគមន៍មកសួរហើយ សុទ្ធតែបានចុះ ស . ជ . ណ របស់រាជរដ្ឋាភិបាល ហើយនាំគ្នាមកររញ៉េរញ៉ៃសម្បើមដល់ហើយ ខ្ញុំឆ្ងល់ដល់ហើយ » ។
ជុំវិញរឿងនេះ សកម្មជនបរិស្ថាននៃសមាគមបណ្ដាញយុវជនកម្ពុជា ហៅកាត់ថា CYN លោក សាន់ ម៉ាឡា បានលើកឡើងថា បទល្មើសព្រៃឈើនៅកម្ពុជាបានក្លាយជារឿងធម្មតាទៅហើយ ដែលសាធារណជនមើលឃើញថា ចំណាត់ការរបស់អាជ្ញាធរទៅលើជនល្មើសគ្មានប្រសិទ្ធភាព។ លោកបន្តថា លោកគ្មានជំនឿលើអាជ្ញាធរ ចាត់វិធានការតឹងរ៉ឹងទៅជនល្មើសតាមច្បាប់នោះទេ៖ « ខ្ញុំមិនសង្ឃឹមទេថា ស្ថានភាពអាចល្អប្រសើរ មន្ត្រីមានការភ្ញាក់រលឹក និងពង្រឹងនូវការអនុវត្តច្បាប់របស់ខ្លួន។ ដូច្នេះខ្ញុំមានតែអំពាវនាវឱ្យមហាជនសាធារណជន និងយុវជនធ្វើយ៉ាងម៉េចចូលរួមពួតដៃគ្នាកាន់តែសកម្មក្នុងការចូលរួមចំណែកការពារ ក៏ដូចជា បកអាក្រាតអំពីស្ថានភាពពិតនៃការកាប់បំផ្លាញព្រៃឈើនៅក្នុងប្រទេសកម្ពុជារបស់យើង » ។
ពលរដ្ឋ សហគមន៍ ព្រៃមេត្តាធម្មជាតិ ឃុំត្រពាំងជោរ ស្រុកឱរ៉ាល់ ខេត្តកំពង់ស្ពឺមានផ្ទៃដីទំហំជាង ២ពាន់ ៨រយហិកតារ (២.៨០០ហិកតា) ប៉ុន្តែក្រោយមកត្រូវបានរដ្ឋាភិបាលកាត់ទៅឱ្យក្រុមគ្រួសារយោធិនបញ្ជាការដ្ឋានរថក្រោះ កងទ័ពជើងគោក ង-៧០ ជាបន្តបន្ទាប់។ បច្ចុប្បន្នព្រៃសហគមន៍នេះនៅសល់ដីប្រហែលជាង ៨៨០ហិកតាប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។