ពលរដ្ឋក្នុងសហគមន៍ទួលព័ន្ធតាឡីបឹងស្នេហ៍ នៅខេត្តព្រៃវែង ព្រួយបារម្ភការឆ្លងជំងឺផ្ដាសាយបក្សី អេច.ប្រាំ.អិន.មួយ (H5N1) ពីសត្វព្រៃ ទៅសត្វស្រុក នៅតំបន់អភិរក្ស បន្ទាប់ពីសត្វស្លាបកម្របន្តងាប់ ១២១ក្បាលទៀត នៅថ្ងៃទី២៦ មីនា។ អាជ្ញាធរជំនាញកំពុងជួយសង្គ្រោះសត្វស្លាបកម្រផ្សេងទៀត និងទប់ស្កាត់ការចម្លងជំងឺនេះ។
សត្វស្លាបកម្រ ដែលងាប់ នៅតំបន់អភិរក្សទួលព័ន្ធតាឡី កើនដល់ប្រមាណ ៨០០ក្បាលហើយ។ ប្រធានសហគមន៍ទួលព័ន្ធតាឡីបឹងស្នេហ៍ លោក ពុទ្ធ បូរ ឱ្យដឹងថា សត្វស្លាបកម្រ ដែលងាប់ច្រើនជាងគេ គឺសត្វចង្កៀលខ្យង។ លោកបារម្ភថា សត្វនេះ អាចជាភ្នាក់ងារចម្លងជំងឺពីមួយកន្លែង ទៅមួយកន្លែងទៀត ព្រោះសត្វកម្រប្រភេទនេះ ហើរបានឆ្ងាយ។
លោកបន្តថា ខែប្រាំង សត្វខ្វះចំណី និងទឹកផឹក ដូច្នេះសត្វស្លាប តែងតែហើរពីតំបន់អភិរក្សមួយ ទៅតំបន់ផ្សេងទៀត ឬហើរពីកន្លែងផ្សេង មកតំបន់អភិរក្ស ឬតំបន់ព្រៃ និងសម្បូរទឹក។ លោកបញ្ជាក់ថា អាជ្ញាធរ នៅមិនទាន់រកឃើញប្រភពនៃការឆ្លងជំងឺផ្ដាសាយបក្សី ឬ H5N1 នៅឡើយទេ៖ «ខ្ញុំសន្និដ្ឋាន ជាមួយសហគមន៍ថា ទី១ បញ្ហា ដោយសារក្ដៅពេក។ ទី២ គឺបែបថា ចំណីមិនអាចផ្គត់ផ្គង់កូនចៅវាបាន វាក្ដៅហួតហែងអ៊ីចឹង វាដើររកចំណីស៊ីមិនបាន ហើយទី៣ បើកាលណា វានៅហ្នឹងច្រើនពេកទៅ វាដូចថា ច្របូកច្របល់ អាចម៍នោម អ្វីអ៊ីចឹងទៅ។ សូម្បីតែមាន់ ទា យើងចិញ្ចឹមរាល់ថ្ងៃ វានៅតែធំក្លិន ចុះទម្រាំព្រៃ ហើយវានៅ ថា រាប់លានក្បាល»។
សត្វចង្កៀលខ្យង និងសត្វស្លាបកម្រផ្សេងទៀត ក្នុងតំបន់អភិរក្សធនធានធម្មជាតិទួលព័ន្ធតាឡីបឹងស្នេហ៍ បានងាប់ ជាបន្តបន្ទាប់ ចាប់តាំងពីថ្ងៃទី១៧ មីនា។ កាលពីដំបូង សត្វនេះ ងាប់ប្រមាណ ២០ក្បាល ហើយពលរដ្ឋ ក្នុងសហគមន៍ គិតថា ជាការងាប់តាមធម្មតា ព្រោះ រាល់ឆ្នាំ ឱ្យតែដល់ខែប្រាំង សត្វចង្កៀលខ្យង តែងតែងាប់ ដោយសារ អាកាសធាតុក្ដៅ និងការខ្វះចំណី ជាដើម។ប៉ុន្តែ ចំនួនសត្វងាប់ ចេះតែងាប់កើនឡើងច្រើនទៅៗ ទើបប៉ុន្មានថ្ងៃក្រោយមក សហគមន៍បានរាយការណ៍ប្រាប់អាជ្ញាធរជំនាញ។ មន្ត្រីក្រសួងកសិកម្ម បានពិនិត្យសំណាកសត្វស្លាប ដែលងាប់ទាំងនោះ ហើយរកឃើញថា បក្សីទាំងនោះងាប់ដោយសារ មេរោគនៃជំងឺផ្តាសាយបក្សីបង្កដោយអនុក្រុមម្យ៉ាង (ប្រភេទ A/H5N1)។
ក្រសួងកសិកម្ម បានចេញលិខិតណែនាំឱ្យអាជ្ញាធរទប់ស្កាត់ការឆ្លងរាលដាលជំងឺនេះ ជាបន្ទាន់ ដោយត្រូវដុតបំផ្លាញចោល ចំពោះសត្វដែលសង្ស័យថា មានជំងឺ ខ្មោចសត្វស្លាប និងបំផ្លាញចោលផលិតផលបក្សី នៅក្នុងតំបន់ផ្ទុះជំងឺនេះ តាមវិធានការបច្ចេកទេសពេទ្យ ជាដាច់ខាត។ ក្រសួងក៏ស្នើឱ្យផ្អាក ពលរដ្ឋចេញចូល ឬឆ្លងកាត់តំបន់ផ្ទុះជំងឺនេះ បណ្ដោះអាសន្ន ហើយត្រូវដាក់តំបន់អភិរក្សទួលព័ន្ធតាឡីបឹងស្នេហ៍ ជាតំបន់ត្រួតពិនិត្យ និងតាមដាន។ ក្រសួងក៏កំពុងសិក្សាស្រាវជ្រាវ រកប្រភពជំងឺផ្ដាសាយបក្សី ក្នុងរយៈពេល ៣០ថ្ងៃ និងឃ្លាំមើលចលនាបក្សីជាប្រចាំ។
ជុំវិញការងាប់សត្វស្លាបកម្រ ក្នុងតំបន់អភិរក្សនេះ អាជ្ញាធរខេត្តព្រៃវែង បានចេញលិខិត ជូនដំណឹង ប្រាប់ ពលរដ្ឋ កុំឱ្យប៉ះពាល់ ឬបរិភោគសត្វទាំងនោះ ជាដាច់ខាត ព្រោះអាចឆ្លងជំងឺពីសត្វមកមនុស្ស។ បន្ថែមពីនេះ អភិបាលរង និងជាអ្នកនាំពាក្យសាលាខេត្តព្រៃវែង លោក ចាន់ ថា ប្រាប់អាស៊ីសេរីថា អាជ្ញាធរ កំពុងអនុវត្តសេចក្ដីណែនាំរបស់ក្រសួងជំនាញ និងណែនាំឱ្យពលរដ្ឋ កុំបរិភោគសត្វកម្រ ដែលងាប់នោះ ព្រោះបារម្ភពីការឆ្លងជំងឺ៖ «ឥឡូវនេះ ក្រោយពេលក្រសួងកសិកម្ម គាត់បានពិនិត្យមូលហេតុនៃការឆ្លងការងាប់មួយចំនួនហ្នឹង។ ស្ថាប័នហ្នឹង កំពុងតែចាត់ចែង ដើម្បីរកវិធានការទប់ស្កាត់ការរីករាលដាលឆ្លងទៅបក្សីបន្តទៀតដែរ។ មកដល់ពេលហ្នឹង មិនទាន់មានការប៉ះពាល់អ្វីទេ។ ប៉ះពាល់តែបក្សីដែលនៅទៅនោះ។ ឯប្រជាពលរដ្ឋ ក្នុងសហគមន៍មិនទាន់មានអ្វីទេ»។
សត្វស្លាបកម្រ ដែលងាប់ក្នុងតំបន់អភិរក្ស មានច្រើនប្រភេទ ដូចជា សត្វចង្កៀលខ្យង សត្វត្រយងខ្លួនរលោង សត្វខ្វែក សត្វកុកគ្រោង សត្វក្អែក និងសត្វប្រភេទផ្សេងទៀត។ ទោះយ៉ាងណា ក្រោយការណែនាំរបស់អាជ្ញាធររួចមក ប្រធានសហគមន៍ លោក ពុទ្ធ បូរ ឱ្យដឹងថា កសិករធ្វើស្រែ និងនេសាទ ដែលរស់នៅសហគមន៍ បានប្រុងប្រយ័ត្ន និងមិនប៉ះពាល់សត្វងាប់ទេ ហើយនាំគ្នាពាក់ម៉ាស់ ពេលចេញទៅនេសាទត្រី។
តំបន់អភិរក្សទួលព័ន្ធតាឡីបឹងស្នេហ៍ ត្រូវបានក្រសួងបរិស្ថាន កំណត់ជាតំបន់អភិរក្សធនធានធម្មជាតិ នៅឆ្នាំ២០២១។ តំបន់នេះ មានផ្ទៃបឹង និងដី ៣.៥៥៧ហិកតារ ស្ថិតក្នុងភូមិសាស្ត្រក្រុងព្រៃវែង និងស្រុកបាភ្នំ។ ក្នុងតំបន់អភិរក្សទាំងមូល មានសត្វស្លាបកម្ររស់នៅ ៥៣ប្រភេទ និងមានចំនួនប្រមាណពីរលានក្បាល។ សត្វចង្កៀលខ្យង រស់នៅច្រើនជាងគេ ប្រហែលខ្ទង់រាប់ម៉ឺនក្បាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។