ក្រុមយុវជនជិះកង់ដើម្បីព្រៃព្រះរកា បានទៅដល់គោលដៅក្នុងឃុំប្រមេរ ស្រុកត្បែងមានជ័យ ខេត្តព្រះវិហារ នៅថ្ងៃទី២ ធ្នូ ក៏ប៉ុន្តែការជិះកង់ថ្ងៃចុងក្រោយនេះ អាជ្ញាធរខេត្តព្រះវិហារបានចុះទៅសួរនាំពួកគាត់។
សកម្មជនបរិស្ថាន និងជាអ្នកចូលរួមរៀបចំយុទ្ធនាការជិះកង់ ដើម្បីព្រៃព្រះរកា លោក សាន់ ម៉ាឡា ប្រាប់អាស៊ីសេរីថា អាជ្ញាធរបានដាក់កម្លាំងតាមឃ្លាំមើល និងថតរូបក្រុមយុវជននៅតាមផ្លូវពីទីរួមខេត្តព្រះវិហារទៅដល់ឃុំប្រមេរ។ លោកថា ពេលទៅដល់ឃុំប្រមេរ អាជ្ញាធរពាក់ព័ន្ធបានចុះទៅសួររកលិខិតអនុញ្ញាត ហើយពួកលោកក៏បានពន្យល់ពីគោលបំណង និងសកម្មភាពនេះ។ ក្រោយមក អភិបាលខេត្តព្រះវិហារស្ដីទីក៏បានឱ្យក្រុមយុវជនសរសេរលិខិតផ្ទាល់ដៃ ដើម្បីស្នើសុំចុះល្បាតព្រៃព្រះរកា ហើយអាជ្ញាធរក៏បានអនុញ្ញាតភ្លាមៗ រួចក៏បានសន្យាបញ្ជូនកម្លាំងមកជួយល្បាតព្រៃព្រះរកាថែមទៀត ប្រសិនបើក្រុមយុវជនត្រូវការ៖ «»
ក្រុមយុវជនឈប់សម្រាកនៅសហគមន៍ជនជាតិដើមភាគតិចកួយឃុំប្រមេរនៅយប់ថ្ងៃទី២ ធ្នូ ហើយព្រឹកឡើង ពួកគាត់នឹងចុះល្បាតព្រៃព្រះរកាជាមួយប្រជាសហគមន៍ និងមន្ត្រីឧទ្យានុរក្ស។ ក្រុមយុវជនគិតថា ជនល្មើសកាប់ឈើក្នុងព្រៃព្រះរកាទំនងជាបានផ្អាកសកម្មភាព និងលាក់ខ្លួនហើយ បន្ទាប់ពីបានឮដំណឹងនេះ។ ក៏ប៉ុន្តែក្រុមយុវជនយល់ថា យ៉ាងហោចណាស់ក៏ពួកគាត់អាចប្រមូលភស្តុតាងស្ដីពីបទល្មើសព្រៃឈើក្នុងដែនជម្រកសត្វព្រៃព្រះរកា ដើម្បីដាក់ជូនក្រសួងបរិស្ថានដែលជាស្ថាប័នសាមីដែរ។
នៅលើក្រដាស ព្រៃព្រះរកាមានទំហំជាង ៩ម៉ឺនហិកតារស្ថិតនៅចន្លោះព្រំប្រទល់ស្រុកចំនួន៣ គឺស្រុកត្បែងមានជ័យ ស្រុកជាំក្សាន្ត និងស្រុកឆែប របស់ខេត្តព្រះវិហារ។ ទោះជាយ៉ាងណា សកម្មជនបរិស្ថានរកឃើញថា ព្រៃអភិរក្សមួយនេះកំពុងរងការបំផ្លិចបំផ្លាញឥតឈប់ឈរ ដោយសកម្មភាពកាប់ឈើធ្វើអាជីវកម្ម និងការទន្ទ្រានដីយកធ្វើជាកម្មសិទ្ធិឯកជនដោយខុសច្បាប់៕
(ក្រុមយុវជនជិះកង់ដើម្បីព្រៃព្រះរកា បានទៅដល់គោលដៅក្នុងឃុំប្រមេរ ស្រុកត្បែងមានជ័យ ខេត្តព្រះវិហារ នៅថ្ងៃទី២ ខែធ្នូ ឆ្នាំ២០១៩។ រូប៖ ហ្វេសប៊ុកលោក ម៉ា ចិត្រា)
(ក្រុមយុវជនជិះកង់ដើម្បីព្រៃព្រះរកា នៅតាមផ្លូវពីភ្នំពេញទៅខេត្តព្រះវិហារ នៅថ្ងៃទី១ ខែធ្នូ ឆ្នាំ២០១៩។ រូប៖ ហ្វេសប៊ុកលោក ម៉ា ចិត្រា)
(ក្រុមយុវជនជិះកង់ដើម្បីព្រៃព្រះរកា ពេលចេញដំណើរពីភ្នំពេញទៅខេត្តព្រះវិហារ នៅថ្ងៃទី៣០ ខែវិច្ឆិកា ឆ្នាំ២០១៩។ រូប៖ RFA)
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។