យុទ្ធនាការ​ស្ដីពី​​ផល​ប៉ះពាល់​ដោយសារ​គម្រោង​សង់​ទំនប់​វារីអគ្គិសនី​ដនសាហុង

ដោយ មុំ សុផុន
2014.03.30
Share on WhatsApp
Share on WhatsApp
ទំនប់​វារីអគ្គិសនី ដនសាហុង ៦១០ ពលរដ្ឋ​និង​សង្គម​ស៊ីវិល​ជិះ​ទូក​ធ្វើ​យុទ្ធនាការ​ទាមទារ​ឲ្យ​រដ្ឋាភិបាល​ឡាវ បញ្ឈប់​គម្រោង​សាងសង់​ទំនប់​វារីអគ្គិសនី​ដនសាហុង នៅ​តាម​ដង​ទន្លេ​ក្នុង​ស្រុក​ថាឡាបរិវ៉ាត់ ខេត្ត​ស្ទឹងត្រែង នៅ​ថ្ងៃ​ទី​៣០ មីនា ឆ្នាំ​២០១៤។
Photo: RFA

យុទ្ធនាការ​សម្ដែង​ការ​ព្រួយ​បារម្ភ​ចំពោះ​ផល​ប៉ះពាល់​បណ្ដាល​មក​ពី​គម្រោង​សង់​ទំនប់​វារីអគ្គិសនី​ដនសាហុង (Don Sahong) នៅ​ប្រទេស​ឡាវ បាន​ធ្វើ​ដល់​ថ្ងៃ​ទី​២ ហើយ នៅ​ថ្ងៃ​ទី​៣០ ខែ​មីនា ឆ្នាំ​២០១៤។

យុទ្ធនាការ​នេះ​មាន​ការ​ចូល​រួម​ពី​មន្ត្រី​អង្គការ​ក្រៅ​រដ្ឋាភិបាល​ប្រចាំ​តំបន់ ក្នុង​ខេត្ត​ស្ទឹងត្រែង អាជ្ញាធរ​ដែន​ដី និង​ប្រជាពលរដ្ឋ​ប្រមាណ ២០០​នាក់ គឺ​ធ្វើ​នៅ​ក្បែរ​អន្លង់​ផ្សោត ក្នុង​ឃុំ​ព្រះរំកិល ស្រុក​ថាឡាបរិវ៉ាត់ ខេត្ត​ស្ទឹងត្រែង នៅ​ក្បែរ​ព្រំដែន​ប្រទេស​ឡាវ ដែល​នៅ​ចម្ងាយ​ប្រហែល ២​គីឡូម៉ែត្រ នៃ​តំបន់​ស៊ីផាន់ដន ដែល​ឡាវ​គ្រោង​សាងសង់​ទំនប់​វារីអគ្គិសនី​ដនសាហុង​នោះ។

សត្វ​ផ្សោត​ទឹក​សាប​ដ៏​កម្រ​របស់​ពិភពលោក​ដែល​មាន​នៅ​កម្ពុជា នឹង​អាច​ផុត​ពូជ​ក្នុង​ពេល​ខាង​មុន ហើយ​ជីវភាព​របស់​ពលរដ្ឋ​ដែល​រស់​នៅ​តាម​ដង​ទន្លេ​មេគង្គ នឹង​ប្រែប្រួល​នៅ​ពេល​ដែល​ទំនប់​វារីអគ្គិសនី​ដនសាហុង ប្រទេស​ឡាវ​ត្រូវ​សាងសង់​ឡើង។

ទំនប់​វារីអគ្គិសនី​ដែល​អាច​ផលិត​កម្លាំង​ថាមពល​អគ្គិសនី​ប្រមាណ​ពី ២៤០ ដល់ ៣៦០​មេហ្គាវ៉ាត់ ហើយ​រដ្ឋាភិបាល​ប្រទេស​ឡាវ បាន​ចំណាយ​ប្រាក់​លើក​គម្រោង​សាងសង់​នេះ​ប្រមាណ ៣០០​លាន​ដុល្លារ​អាមេរិក​នេះ ត្រូវ​រង​ការ​រិះគន់​ពី​អង្គការ​សង្គម​ស៊ីវិល និង​ប្រជាពលរដ្ឋ​ថា មិន​បាន​សិក្សា​ពី​ផល​ប៉ះពាល់​ពី​គម្រោង​សាងសង់​នោះ​ឲ្យ​បាន​ច្បាស់​លាស់​ឡើយ។

អនុ​ប្រធាន​ឆ្មាំ​ទន្លេ លោក ដន បាន់ បញ្ជាក់​ថា ទីជម្រក​សត្វ​ផ្សោត និង​តំបន់​ដែល​សត្វ​ផ្សោត​ធ្វើ​ចរាចរណ៍​ចុះ​ឡើង​ប្រហែល ១៩០​គីឡូ​ម៉ែត្រ ចាប់​ពី​តំបន់​កាំពី ខេត្ត​ក្រចេះ ដល់​ក្បែរ​ល្បាក់ខោន ប្រទេស​ឡាវ នេះ នឹង​រងគ្រោះ​កាន់​តែ​ធ្ងន់ធ្ងរ ហើយ​ជា​ពិសេស​នឹង​ប៉ះពាល់​ដល់​ផល​ត្រី និង​ពូជ​ត្រី​កម្រ​ផ្សេងៗ​ទៀត​ដែល​​បំឡាស់​ទី​តាម​ដង​ទន្លេ​មេគង្គ។

ទាំង​ពលរដ្ឋ អាជ្ញាធរ ព្រម​ទាំង​មន្ត្រី​អង្គការ​ក្រៅ​រដ្ឋាភិបាល សុទ្ធតែ​បាន​លើក​ឡើង​ពី​ការ​ព្រួយ​បារម្ភ ជា​ពិសេស​ផល​ប៉ះពាល់​អវិជ្ជមាន​ដែល​អាច​នឹង​កើត​មាន​ឡើង​ដល់​ពលរដ្ឋ​ដែល​រស់នៅ​តាម​ដង​ទន្លេ​មេគង្គ ក្នុង​ប្រទេស​កម្ពុជា នោះ។

ក្រុម​ប្រឹក្សា​ស្រុក​ថាឡាបរិវ៉ាត់ ខេត្ត​ស្ទឹងត្រែង លោក ឈឺន ឈន ថ្លែង​ថា ទោះ​យ៉ាង​ណា​ការ​ទាក់​ទង​គ្នា​រវាង​អាជ្ញាធរ​ថ្នាក់​ខេត្ត និង​ថ្នាក់​តំបន់​នៅ​តែ​មាន​ការ​អធ្យាស្រ័យ​គ្នា​ដដែល ទាំង​ការ​ចេញ​ចូល​របស់​ប្រជាពលរដ្ឋ ក៏​ប៉ុន្តែ​ការ​សាងសង់​ទំនប់​វារីអគ្គិសនី​ដនសាហុង នេះ គឺ​ត្រូវ​តែ​សិក្សា​បែប​បច្ចេកទេស​ឲ្យ​បាន​ច្បាស់​លាស់​មុន​នឹង​សាងសង់​ឡើង ព្រោះ​វា​នឹង​ធ្វើ​ឲ្យ​ប៉ះពាល់​ដល់​អ្នក​ដែល​រស់នៅ​តាម​ដង​ទន្លេ​ផ្នែក​ខាង​ក្រោមៗ ជាពិសេស​គឺ​ពលរដ្ឋ​ដែល​រស់នៅ​អាស្រ័យ​ផល​ពី​ទន្លេ​មេគង្គ ដូច​ជា​នេសាទ និង​កសិកម្ម​ជា​ដើម។

អ្វី​ដែល​ធ្វើ​ឲ្យ​អ្នក​ចូល​រួម​កាន់តែ​ព្រួយ​បារម្ភ​នោះ គឺ​ប៉ះពាល់​ដល់​បរិស្ថាន​ទន្លេ សង្គម វប្បធម៌ ប្រពៃណី​​ និង​ធ្វើ​ឲ្យ​ផ្លាស់ប្ដូរ​ការ​រស់​នៅ​របស់​ប្រជាពលរដ្ឋ។

លោក វង្ស កុសល មន្ត្រី​ផ្នែក​ច្បាប់​របស់​វេទិកា​នៃ​អង្គការ​មិន​មែន​រដ្ឋាភិបាល​ស្ដីពី​កម្ពុជា (NGO Forum) ថ្លែង​ថា ការ​សិក្សា​ពី​ផល​ប៉ះពាល់​ពី​ការ​សង់​ទំនប់​នោះ ត្រូវ​តែ​មាន​ការ​ចូល​រួម​ពី​គ្រប់​ភាគី​ដែល​ពាក់​ព័ន្ធ ទាំង​ផ្នែក​ខាង​លើ និង​ផ្នែក​ខាង​ក្រោម​នៃ​ដង​ទន្លេ​មេគង្គ ជា​ពិសេស​គឺ​ពលរដ្ឋ​ដែល​រង​ផល​ប៉ះពាល់​ដោយ​ផ្ទាល់​នៅ​តាម​ដង​ទន្លេ។

រដ្ឋាភិបាល​ប្រទេស​ឡាវ ត្រូវ​តែ​គោរព​កិច្ច​ការ​ព្រមព្រៀង​របស់​គណៈកម្មការ​​កិច្ច​ការ​ទន្លេ​មេគង្គ​ឆ្នាំ​១៩៩៥។ គោរព​ស្មារតី​ការ​សម្រេច​ចិត្ត​របស់​ប្រជាពលរដ្ឋ​ប្រទេស​អាស៊ាន​ដែល​ធ្វើ​នៅ​ប្រទេស​មីយ៉ាន់ម៉ា ឬ​ភូមា កាល​ពេល​ថ្មីៗ​នេះ។

ទោះ​យ៉ាង​ណា ក្រុម​មន្ត្រី​អង្គការ​ដែល​រៀបចំ​យុទ្ធនាការ​នោះ នៅ​ក្នុង​ខេត្ត​ស្ទឹងត្រែង បាន​ស្នើ​ឲ្យ​រដ្ឋាភិបាល​ប្រទេស​ឡាវ សិក្សា​ស្រាវជ្រាវ​ឲ្យ​បាន​ច្បាស់​លាស់​លើ​គ្រប់​វិស័យ ពី​ផល​ប៉ះ​នៃ​គម្រោង​វារីអគ្គិសនី​ដនសាហុង នេះ ហើយ​ត្រូវ​ពិគ្រោះ​យោបល់​ឲ្យ​ទូលំទូលាយ​ជា​មួយ​ប្រជាពលរដ្ឋ មន្ត្រី​អង្គការ​ក្រៅ​រដ្ឋាភិបាល​ដែល​ធ្វើ​ការ​ពាក់​ព័ន្ធ ហើយ​បង្ហាញ​របាយ​ការណ៍​ឲ្យ​បាន​ច្បាស់​លាស់។ មិន​ត្រឹម​តែ​ប៉ុណ្ណោះ ស្នើ​ឲ្យ​គណៈកម្មការ​ទន្លេ​មេគង្គ ជំរុញ​ឲ្យ​រដ្ឋាភិបាល​នៃ​ប្រទេស​ឡាវ សិក្សា​ដោយ​ឯករាជ្យ​ស្ដីពី​ផល​ប៉ះពាល់​នៃ​គម្រោង​វារីអគ្គិសនី​ដនសាហុង​នេះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។