អ្នកការពារ​ព្រៃ​ឡង់​ម្នាក់​នៅ​ខេត្ត​ស្ទឹងត្រែង​ត្រូវ​មន្ត្រី​បរិស្ថាន​ប្តឹង​ទៅ​តុលាការ

ដោយ សេក បណ្ឌិត
2022.06.11
Share on WhatsApp
Share on WhatsApp
អ្នកការពារ​ព្រៃ​ឡង់​ម្នាក់​នៅ​ខេត្ត​ស្ទឹងត្រែង​ត្រូវ​មន្ត្រី​បរិស្ថាន​ប្តឹង​ទៅ​តុលាការ ជនជាតិ​ដើម​ភាគតិច​កួយ រស់នៅ​ភូមិ​ឆ្វាំង ឃុំ​សំអាង ស្រុក​ថាឡាបរិវ៉ាត់ ខេត្ត​ស្ទឹងត្រែង លោក អ៊ុក ម៉ៅ ផ្តល់​បទសម្ភាសន៍​ដល់​អាស៊ីសេរី ​កាល​ពី​ចុង​ឆ្នាំ​២០១៦។
RFA

សមាជិក​សហគមន៍​ការពារ​ព្រៃ​ឡង់ លោក អ៊ុក ម៉ៅ ព្រួយ​បារម្ភ​ពី​សុវត្ថិភាព បន្ទាប់​ពី​មន្ត្រី​បរិស្ថាន​ខេត្ត​ស្ទឹងត្រែង ប្តឹង​លោក​ទៅ​តុលាការ​ពី​បទ​កាប់​រុករាន​ដី​ព្រៃ​អភិរក្ស។ អ្នកការពារ​ព្រៃឡង់​រូប​នេះ ចាត់ទុក​ពាក្យ​បណ្តឹង​នេះ ជា​ល្បិច​មូល​បង្កាច់ ដើម្បី​កាច់​បំបាក់​ស្មារតី​ពលរដ្ឋ​ដែល​លះបង់​ការពារ​ព្រៃឈើ ព្រោះ​ខ្លាចក្រែង​ប៉ះពាល់​ប្រយោជន៍​ឈ្មួញ និង​មន្ត្រី​ខិលខូច។

សកម្មជន​ការពារ​ព្រៃ​ឡង់ ដែល​ជា​ជនជាតិ​ដើម​ភាគតិច​កួយ រស់នៅ​ស្រុក​ថាឡាបរិវ៉ាត់ លោក អ៊ុក ម៉ៅ ហួសចិត្ត​នៅ​គ្រា​ដែល​មន្ត្រី​បរិស្ថាន​ខេត្តស្ទឹងត្រែង បាន​ប្តឹង​លោក​ទៅ​តុលាការ ដោយ​ចោទ​ពី​បទ​កាប់​រុករាន​ដី​ព្រៃឡង់​អស់​ជាង ២០​ហិកតារ។ លោក​អះអាង​ថា លោក​ពុំ​បាន​ប្រព្រឹត្ត​កំហុស​ដូច​ការ​ចោទប្រកាន់​ទេ ហើយ​លោក​ចាត់ទុក​ពាក្យ​បណ្តឹង​នេះ ជា​ល្បិច​មូល​បង្កាច់​គ្មាន​មូលដ្ឋាន ខណៈ​ដែល​មន្ត្រី​បរិស្ថាន មិន​បាន​បង្ហាញ​ទីតាំង​កាប់​រុករាន​ដី​ព្រៃ​អភិរក្ស​នៅ​ចំណុច​ណា​ឱ្យ​ប្រាកដ​នោះ​ឡើយ។

លោក​គិតថា ការ​ប្តឹងផ្តល់​នេះ ព្រោះ​មន្ត្រី​បរិស្ថាន មិន​សប្បាយ​ចិត្តនឹង​សកម្មភាព​របស់​ពួក​លោក ដែល​ឃ្លាំមើល​បទល្មើស​ព្រៃឈើ និង​តែងតែ​រិះគន់​អាជ្ញាធរ​មិន​អនុវត្ត​ច្បាប់​ព្រៃឈើ​ទៅ​ប្រព័ន្ធ​ផ្សព្វផ្សាយ។

លោក​បន្ថែម​ថា កន្លង​ទៅ ពួកលោក​បាន​ផ្តល់​ព័ត៌មាន និង​ទីតាំង​ឈូស​ឆាយ​ទន្ទ្រានព្រៃ​ឡង់​អស់​រាប់ពាន់​ហិកតារ ឋិត​ក្នុង​ឃុំ​អន្លង់​ជ្រៃ និង​ឃុំ​អន្លង់​ភេ ស្រុក​ថាឡាបរិវ៉ាត់ តែ​មិន​ឃើញ​មន្ត្រី​បរិស្ថាន​អនុវត្ត​ច្បាប់​ទេ បែរ​ជា​ទម្លាក់កំហុស​លើ​លោក​ទៅវិញ​៖ «ខ្ញុំ​អ្នកការពារ​ព្រៃ​សោះ ហៅ​ទៅ​ចោទ​ខ្ញុំ​ថា អ្នក​កាប់​បំផ្លាញ​ព្រៃឈើ ដល់​ពេល​គ្រឿងចក្រ វ៉ៃ​ព្រៃ​រាប់ពាន់​ហិកតារ មិន​ដែល​ទប់ស្កាត់​ផង មក​ទប់ស្កាត់​ពួក​ខ្ញុំ​អត់​ដឹង​អី​សោះ​។ មក​មួល​បង្កាច់​ពួក​ខ្ញុំ គាត់​គំរាមកំហែង​មិន​ឱ្យ​អ្នកការពារ​ព្រៃ​ដឹងឮ»

លោក អ៊ុក ម៉ៅ ខកចិត្ត​នៅ​គ្រា​ដែល​ប្រធាន​មន្ទីរ​បរិស្ថាន​ខេត្ត​ស្ទឹងត្រែង ដែល​ទើប​តែងតាំង​ថ្មី គឺ​លោក ស្រេង ជាហេង មិន​បំពេញ​តួនាទី​អនុវត្ត​ច្បាប់​ការពារព្រៃឈើ ដែល​កំពុង​ទទួលរង​ការ​កាប់​ឈើ​មាន​តម្លៃ និង​ឈូស​ឆាយ​ទន្ទ្រាន​យក​ដី​ធ្វើជា​កម្មសិទ្ធិ​អស់​រាប់ពាន់​ហិកតារ។ បន្ថែម​ពី​នេះ សកម្មភាព​កាប់​ឈើ​កំពុង​កើតឡើង​ច្រើន ឋិត​នៅ​ចំណុច​ជ្រៃ​ធំ ក្នុងភូមិ​ស្រឡៅ ឃុំ​អន្លង់​ជ្រៃ និង​មាន​តំបន់​ខ្លះទៀត ឋិត​នៅ​ឃុំ​ចម្ការលើ ស្រុក​ថាឡាបរិវ៉ាត់ នៃ​ដែន​ជម្រក​សត្វ​ព្រៃឡង់។

សកម្មជន​ការពារ​ព្រៃ​ឡង់​រូប​នេះ ចាត់ទុក​ពាក្យ​បណ្តឹង​នេះ ជា​ការ​គំរាមកំហែង បំបាក់​ទឹកចិត្ត​ជនជាតិ​ដើម​ភាគតិច ដែល​លះបង់​អាយុជីវិត ពេលវេលា ថវិកា​ផ្ទាល់ខ្លួន ការពារ​ធនធានធម្មជាតិ​។ លោក​ថា កន្លង​ទៅ មន្ត្រី​បរិស្ថាន​តែងតែ​រារាំង និង​គំរាម​ពួក​លោក មិន​ឱ្យ​ឃ្លាំមើល​បទល្មើស​ព្រៃឈើ​ក្នុង​តំបន់​ព្រៃ​ឡង់៖ «ព្រៃ​ធម្មតា​ភ្នែក​យើង​មើល​ឃើញ​ថា ឆ្ងាយ​តែ​មើល​មិន​ឃើញ​គោលដៅ​ដែល​គេ​ត្រូវ​កាប់ វាល​ឆ្ងាយ​ណាស់ រាប់​ពាន់​ហិកតារ នៅ​ជ្រៃ​ធំ បង​បរិស្ថាន​បើ​លោក​ការពារ​ព្រៃ​មក​ហៅ​ខ្ញុំ ខ្ញុំ​ជូន​ទៅ បើ​លោក​អ្នក​បំផ្លាញ​ទេ មិន​បាច់​ទៅ​មើល​ក៏​បាន​ដែរ​។ ខ្ញុំ​សូម​ផ្តាំផ្ញើ​តែ​ប៉ុណ្ណឹង​ទេ​»

កាលពី​ថ្ងៃទី​១៦ ឧសភា តំណាង​អយ្យការ​ខេត្ត​ស្ទឹងត្រែង លោក ស៊ិន រក្សា បាន​ចេញ​ដីកា​កោះហៅ លោក អ៊ុក ម៉ៅ ឱ្យ​ចូល​ខ្លួន​បំភ្លឺ នៅ​ថ្ងៃទី៨ មិថុនា ឆ្នាំ​២០២២ ពី​បទ​កាប់​រុករាន​ដី​ព្រៃ​យក​ធ្វើជា​កម្មសិទ្ធិ​។ ដីកា​កោះហៅ​នេះ មិន​បាន​បញ្ជាក់​ឈ្មោះ ដើម​បណ្តឹង​ទេ ប៉ុន្តែ​សកម្មជន​ព្រៃ​ឡង់​អះអាង​ថា ប្រធាន​មន្ទីរ​បរិស្ថាន​ខេត្ត​ស្ទឹងត្រែង លោក ស្រែង ជាហេង គឺជា​ដើម​បណ្តឹង​ក្នុង​សំណុំ​រឿង​នេះ។

តែ​យ៉ាងណា លោក អ៊ុក ម៉ៅ បន្ថែម​ថា ពាក្យ​បណ្តឹង​នេះ គឺ​ជា​ឱកាស​ឱ្យ​លោក​បកស្រាយ​ការពិត ព្រោះ​លោក​មាន​ភស្តុតាង និង​សាក្សី​ច្បាស់លាស់ បញ្ជាក់​ថា ដែនជម្រកសត្វព្រៃ​ឡង់​ជាច្រើន​ទីតាំង កំពុង​ទទួលរង​ការ​កាប់ និង​ឈូស​ឆាយ​ព្រៃ​ទ្រង់ទ្រាយ​ធំ ឋិត​ក្នុង​ឃុំ​អន្លង់​ជ្រៃ ឃុំ​ចម្ការលើ និង ឃុំ​អន្លង់​ភេ៖ «បើ​ពលរដ្ឋ​កាប់ចម្ការ​តិច​តួច​ចាប់ដក​កាំបិត​ពូថៅ បើ​គេ​ឈូស​ឆាយ​អស់​រាប់​រយ រាប់ពាន់​ហិកតារ អត់​ឃើញ​អស់​លោក​ណា មក​ធ្វើ​កើត​ទេ​។ ខ្ញុំ​សូម​ផ្តាំផ្ញើ​ទៅ​ថ្នាក់ដឹកនាំ​លើៗ​ផង មន្ត្រី​ក្រោមៗ​កំពុង​បំផ្លាញ​ជាតិ​ហើយ រាយការណ៍​១០​ដង ២០​ដង គាត់​មិនដែល​ធ្វើការ​ទេ បើ​ពលរដ្ឋ​កាប់​កាំ​បិទ​ពូថៅ ចាប់​ដាក់គុក​ច្រវាក់»

វិទ្យុ​អាស៊ីសេរី​មិន​ទាន់​អាច​ទាក់ទង សុំ​ការ​បំភ្លឺ​រឿង​នេះ ពី​តំណាង​អយ្យការ​ខេត្តស្ទឹងត្រែង លោក ស៊ិន រក្សា បាន​នៅ​ឡើយ​ទេ នៅ​ថ្ងៃទី​១០ មិថុនា។

រីឯ​ប្រធាន​មន្ទីរ​បរិស្ថាន​ខេត្ត​ស្ទឹងត្រែង លោក ស្រែង ជាហេង និង​ព្រះរាជអាជ្ញា​អម​តុលាការ​ខេត្ត​ស្ទឹងត្រែង លោក ចេត ខេមរ៉ា ក៏​វិទ្យុ​អាស៊ីសេរី មិន​អាច​សុំ​ការអធិប្បាយ​បាន​ដែរ ដោយ​ទូរស័ព្ទ​ហៅ​ចូល​ច្រើនដង តែ​គ្មាន​អ្នក​លើក។

ប៉ុន្តែ​អ្នកនាំពាក្យ​សាលា​ខេត្ត​ស្ទឹងត្រែង លោក ម៉ែន គុង ប្រាប់​វិទ្យុ​អាស៊ីសេរី​យ៉ាង​ខ្លី​ថា សំណុំ​រឿង​នេះ ជា​នីតិវិធី​របស់​តុលាការ ហើយ​ប្រសិនបើ​ពលរដ្ឋ​មិន​បាន​ប្រព្រឹត្ត​កំហុស​ដូច​ការ​ចោទប្រកាន់​ទេ គឺ​គ្មាន​ទោស​ឡើយ​៖ «ពលរដ្ឋ​ចូលរួម​ការពារ​ធនធាន​ធម្មជាតិ​មិន​ខុស​ទេ កុំឱ្យ​តែ​មាន​រឿង​អី​ផ្សេង​ទៀត»

ជុំវិញ​រឿង​នេះ មន្ត្រី​សម្របសម្រួល​សមាគម​អាដហុក (Adhoc) ខេត្តស្ទឹងត្រែង​លោក ប៊ី វ៉ាន់នី យល់​ថា ការប្រើ​អំណាច​ជា​មន្ត្រី​នគរបាល​យុត្តិធម៌ ប្តឹង​ពលរដ្ឋ​ដែល​លះបង់​ការពារ​ព្រៃឈើ គឺជា​ទង្វើ​គំរាមកំហែង​ស្មារតី​ពលរដ្ឋ ដែល​ជា​ផ្នែក​មួយ ធ្វើ​ឱ្យ​ព្រៃឈើ​កាន់តែ​បាត់បង់។ លោក​ស្នើ​ឱ្យ​ព្រះរាជអាជ្ញា ចុះ​ស៊ើបអង្កេត​ដល់ទី​តាំង​ជាក់ស្តែង ដើម្បី​រក​ការ​ពិត ជាពិសេស​ត្រូវ​ពិនិត្យមើល សកម្មភាព​កាប់​រាន​ដី​ព្រៃ​អភិរក្ស​អស់​រាប់ពាន់​ហិកតារ ដែល​មន្ត្រី​បរិស្ថាន​បណ្តែតបណ្តោយ៖ «នៅ​ឃុំ​កាំងចាម​កាប់​ចូល​ព្រៃឡង់ ហេតុ​អី​មិន​ឃើញ​មន្ត្រី​បរិស្ថាន​រៀបចំ​ឯកសារ​ដាក់​ពាក្យ​បណ្តឹង ទៅ​តុលាការ​ផង​។ នៅ​ខាង​អន្លង់​ជ្រៃ​ក៏​មាន​ការ​កាប់​បំផ្លាញ​ព្រៃ​ឡង់​ដែរ មិន​ឃើញ​មន្ត្រី​បរិស្ថាន​រៀបចំ​ឯកសារ​ដាក់​ចូល​តុលាការ​ដែរ»

សេចក្តី​រាយការណ៍​ពី​ប្រជា​សហគមន៍​ព្រៃ​ឡង់ បន្ថែម​ថា មក​ទល់​ពេល​នេះ ព្រៃឡង់​នៅ​ចំណុច​ភូមិ​មន និង​ភូមិ​វាល​ពោ​ធន៍​ឃុំ​អន្លង់​ជ្រៃ ត្រូវ​គេ​កាប់​អស់​ជាង ២ រយ​ហិកតារ (២០០) ជា​ថ្មី​ទៀត​។ រីឯ​ព្រៃឡង់​នៅ​ចំណុច​វាល​ព្រិច ក្នុងភូមិ​អន្លង់​ជ្រៃ ឃុំ​អន្លង់​ជ្រៃ ក៏​ត្រូវ​គេ​កាប់​បំផ្លាញ​អស់​ជិត ១​ពាន់​ហិកតារ នៅ​រយៈពេល ជាង ៤​ខែ​ចុង​ក្រោយនេះ​។ លើស​ពី​នេះ ក្រុម​អ្នក​កាប់​ឈើ​ជាច្រើន​ក្រុម ប្រដាប់​ដោយ​រណា​យន្ត​ជាច្រើន​គ្រឿង កំពុង​មមាញឹក​កាប់​រាន​ព្រៃ​ទាំង​តូច​ទាំង​ធំ រួច​ដុត​កម្ទេច​ចោល ដើម្បី​បម្លែង​តំបន់​នោះ ជា​ដី​កម្មសិទ្ធិ​ឯកជន។

ក្រមព្រហ្មទណ្ឌ​មាត្រា​៥២៨ ចែង​ថា មន្ត្រីរាជការ​សាធារណៈ មិន​ប្ដឹង​បរិហារ និង​មិន​អើពើ​បង្ក្រាប​បទល្មើស ឋិត​ក្នុង​ដែន​សមត្ថកិច្ច​របស់​ខ្លួន ត្រូវ​ផ្ដន្ទាទោស​ដាក់​ពន្ធនាគារ​ពី ១​ឆ្នាំ​ដល់ ៣​ឆ្នាំ និង​ពិន័យ​ជា​ប្រាក់​ពី ២​លាន​រៀល​ដល់ ៦​លាន​រៀល។

ព្រៃ​ឡង់​ឋិត​ក្នុង​ចន្លោះ​ខែត្រ​ចំនួន​បួន គឺ​ខែត្រ​ក្រចេះ ស្ទឹងត្រែង ព្រះវិហារ និង​ខែត្រ​កំពង់ធំ ត្រូវ​រដ្ឋាភិបាល​ប្រកាស​បង្កើត​ជា​ដែនជម្រកសត្វព្រៃ​កាលពី​ថ្ងៃទី​៩ ខែ​ឧសភា ឆ្នាំ​២០១៦ មាន​ផ្ទៃដី​ជាង ៤​សែន​ហិកតារ (៤៣១.៦៨៣​ហិកតារ​) ដែល​ឋិត​ក្រោម​ការគ្រប់គ្រង​របស់​ក្រសួង​បរិស្ថាន៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល