ប្រជា​នេសាទ​តំបន់​បឹង​ទន្លេសាប​ជាច្រើន​គ្រួសារ​ប្រឈម​ដាច់​បាយ​ដោយសារ​គ្មាន​ត្រី

ដោយ យន់ សាមៀន
2019-11-30
អ៊ីម៉ែល
មតិ
Share
បោះពុម្ព
មង​ក្រឡា​ញឹក​នៅ​ក្នុង​ដែន​អភិរក្ស​តំបន់​បឹង​ទន្លេសាប នៃ​ឃុំ​កោះជីវាំង ស្រុក​ឯកភ្នំ ខេត្ត​បាត់ដំបង។ រូបថត​ថ្ងៃ​ទី​៦ ខែ​សីហា ឆ្នាំ​២០១៥
មង​ក្រឡា​ញឹក​នៅ​ក្នុង​ដែន​អភិរក្ស​តំបន់​បឹង​ទន្លេសាប នៃ​ឃុំ​កោះជីវាំង ស្រុក​ឯកភ្នំ ខេត្ត​បាត់ដំបង។ រូបថត​ថ្ងៃ​ទី​៦ ខែ​សីហា ឆ្នាំ​២០១៥
Photo Provided

ប្រជា​នេសាទ​នៅ​តំបន់​បឹង​ទន្លេសាប​ស្រុក​ឯក​ភ្នំ ខេត្ត​បាត់ដំបង រាប់ពាន់​គ្រួសារ​ប្រឈម​នឹង​ការ​ដាច់​ស្បៀងអាហារ​នៅ​ពេល​ខាងមុខ ដោយសារ​ផល​ត្រី​ឆ្នាំនេះ​ថយ​ចុះ​ខុស​ប្រក្រតី ធ្វើ​ឱ្យ​ពួកគាត់​មិន​អាច​រក​ប្រាក់​ចំណូល​បាន​ច្រើន​ដូច​ឆ្នាំ​កន្លង​ទៅ។ អ្នកភូមិ​អះអាង​ថា សព្វថ្ងៃ​ពួកគាត់​អាច​នេសាទ​រក​ប្រាក់​ចំណូល​បាន​ពី​១ម៉ឺន ៥​ពាន់ (១៥.០០០) ទៅ ៣ម៉ឺន (៣០.០០០) រៀល​ក្នុង​មួយថ្ងៃ​ប៉ុណ្ណោះ។

ប្រជា​នេសាទ​នៅ​ស្រុក​ឯក​ភ្នំ ព្រួយបារម្ភ​ថា នៅ​ក្នុង​រដូវ​ដែល​សម្បូរ​ត្រី​ចាប់ផ្ដើម​ខ្សត់​ត្រី​ធ្វើ​ឱ្យ​ពិបាក​រក​ប្រាក់​ចំណូល​បែប​នេះ​ហើយ ទម្រាំ​តែ​ដល់​រដូវប្រាំង​ពិតប្រាកដ​ទៀត​ពួកគាត់​មិន​ដឹង​ជា​ដាច់​បាយ​លំបាក​យ៉ាង​ណា​ទេ។

ប្រជា​នេសាទ​នៅ​រស់នៅ​តំបន់​បឹង​ទន្លេសាប ក្នុង​ឃុំ​កោះជីវាំង ថ្លែង​សុំ​មិន​ឱ្យ​បញ្ចេញ​ឈ្មោះ ដើម្បី​សុវត្ថិភាព​ផ្ទាល់ខ្លួន ឱ្យ​ដឹង​នៅ​ថ្ងៃ​ទី​៣០ វិច្ឆិកា​ថា រដូវ​សំបូរ​ត្រី​ឆ្នាំនេះ ពួកគាត់​ធ្វើ​នេសាទ​រក​ប្រាក់​ចំណូល​ស្ទើរតែ​មិន​គ្រប់​ទិញ​អង្ករ​ច្រក​ឆ្នាំ​ផង។ លោកស្រី​បន្ត​ថា អ្នកភូមិ​ដែល​នេសាទ​ជា​លក្ខណៈ​គ្រួសារ ដែល​មាន​គ្នា ២​នាក់​ដាក់មង​ក្រឡា​ញឹក​រាប់​រយ​ម៉ែត្រ​បាន​កូន​ត្រី​ប្រហែល​ពី ២០​ទៅ ៤០​គីឡូក្រាម ហើយ​លក់​បាន​ប្រាក់​ប្រមាណ​ពី ២​ម៉ឺន ទៅ ៤​ម៉ឺន​រៀល (៤០.០០០) ក្នុង​មួយថ្ងៃ។លោកស្រី​បន្ថែម​ថា ប្រាក់​នេះ​នៅ​ពេល​ទូទាត់​ថ្លៃ​សាំង​កាណូត​បើក​ទៅ​នេសាទ ហើយ​នៅ​២​ម៉ឺន ៥​ពាន់​រៀល (២៥.០០០)​ប៉ុណ្ណោះ ដើម្បី​ដោះស្រាយ​ជីវភាព​គ្រួសារ៖ «ពី​មុន​មក​យើង​រាយ​មង​៥​ហ៊ុន​កន្លះ ឬ​៦​ហ៊ុន​អី វា​ជាប់​ត្រី​ច្រើន តែ​ឥឡូវនេះ​វា​សឹងតែ​ត្រី​វា​មិន​ចង់​មើល​មង​ហ្នឹង​ទៀត។ រាយ​មង​១០​ដៃ​បាន​ត្រី ៤​ក្បាល​អី ជាក់ស្ដែង​ប្អូន​ខ្ញុំ​វា​ទៅ​រាយ ពី​មុន​មក​វា​ដាក់​មង​២​ដៃ ត្រី​ជាប់​ស្អេកស្កះ តែ​ឥឡូវ​អត់​សោះ។ ឆ្នាំនេះ​រឹតតែ​អត់​ជាង​ឆ្នាំទៅ​មិញ​ទៀត អ្នកខ្លះ ទៅ​ធ្វើ​កម្មករ​គេ​នៅ​លើ​គោក​នៅ​ទន្លេសាប​អត់​សូវ​មាន​មនុស្ស​ច្រើន​ដូច​មុន​ទេ យើង​រក​អត់​សូវ​បាន​ហើយ​ជីវភាព​រឹតតែ​យ៉ាប់​ទៅៗ»

លោក​បន្ត​ថា កាល​ពី​ឆ្នាំ​កន្លង​ទៅ​ក្នុង​រដូវ​សំបូរ​ត្រី​បែប​នេះ ពួកគាត់​អាច​នេសាទ​យ៉ាង​ហោច​ណាស់​ក៏ រក​ប្រាក់​បាន ៥​ម៉ឺន​រៀល (៥០.០០០)​ក្នុង​មួយថ្ងៃ ក៏​នៅតែ​មិន​អាច​សន្សំ​ប្រាក់​ឱ្យ​កូន​បាន​រៀន​សូត្រ​គ្រប់គ្រាន់​ផង ទម្រាំ​តែ​ឆ្នាំនេះ​រក​ប្រាក់​មិន​សូវ​បាន​ទៀត មិន​ដឹង​ជា​ជីវភាព​ដុនដាប​យ៉ាងណា​នោះ​ទេ​នៅ​ពេល​ខាង​មុខ។

រីឯ​ប្រជា​នេសាទ​នៅ​ឃុំ​ព្រៃ​ចាស់ ស្រុក​ឯក​ភ្នំ ឯណោះ​វិញ លោក អ៊ឹម ឌុង ថ្លែង​ថា អ្នកភូមិ​នៅ​តំបន់​លោក​ធ្វើ​នេសាទ​រក​ប្រាក់​មិន​គ្រប់​ដោះស្រាយ​ជីវភាព​គ្រួសារ​នោះ​ទេ។ លោក​បន្ត​ថា មូលហេតុ​ដែល​រក​ប្រាក់​មិនបាន ដោយសារ​ផល​ត្រី​ឆ្នាំនេះ​ថយ​ចុះ​ខុស​ប្រក្រតី ដោយ​ក្នុង​មួយថ្ងៃ​ពួកគេ​អាច​រក​ប្រាក់​ចំណូល​ពី​របរ​នេសាទ​បាន​ពី​១​ម៉ឺន ទៅ​៣​ម៉ឺន​រៀល​ប៉ុណ្ណោះ៖ «បាទ​!​វា​ខ្សត់​ខ្លាំង​អត់​ជាង​ឆ្នាំមុន​ឆ្ងាយ​ណាស់ ខុសគ្នា​ដូច​ថា​ឆ្នាំមុន​បាន​ត្រី​១​តោន​អីចឹង​ឆ្នាំនេះ​ចាប់​ត្រី​បានតែ​២០០ ទៅ​៣០០​គីឡូក្រាម​ទេ។អ្នក​ដាក់​បរណរ៉ាវ​ក៏​អត់​អ្នក​ដាក់​ជា​លក្ខណៈ​គ្រួសារ ក៏​អត់​បាន​ត្រី​ដូច​តែ​គ្នា​ហ្នឹង តែ​ធ្វើ​ម៉េច​បើ​យើង​អត់​មាន​មុខ​របរ​អី​ធ្វើ ចេះតែ​រក​ទៅ​អ្នក​ទន្លេ។ មិន​ដឹង​គិត​យ៉ាងម៉េច​ទេ មានតែ​តាម​ដំណើរ​ហ្នឹង​ទៅ បើ​អត់​ដូច​តែ​គ្នា​ទូទៅ​ហើយ មិន​ដឹង​ធ្វើ​ម៉េច​ទេ»

លោក​បន្ថែម​ថា សព្វថ្ងៃ​មនុស្ស​ពេញកម្លាំង​ការ​ចាប់​ផ្ដើម​នាំគ្នា​ធ្វើ​ចំណាកស្រុក​ទៅ​ស្វែងរក​ការងារ​ធ្វើ​នៅ​ភ្នំពេញ នៅ​ព្រំដែន​កម្ពុជា​-​ថៃ និង​មួយ​ចំនួន​ទៀត​ទៅ​ធ្វើ​ការ​នៅ​ប្រទេស​ថៃ​ស្ទើរ​ស្ងាត់​ពី​ភូមិ។

ទាក់ទង​បញ្ហា​នេះ​ប្រធាន​រដ្ឋបាល​ជលផល ខេត្ត​បាត់ដំបង លោក ជួង សុភា ប្រាប់​អាស៊ីសេរី​ថា ទិន្នផល​ត្រី​នៅ​តំបន់​បឹង​ទន្លេសាប​ឆ្នាំនេះ​ថយ​ចុះ​ជាង​ឆ្នាំ​កន្លង​ទៅ ប្រមាណ​២០​ភាគរយ។ លោក​បន្ត​ថា មូលហេតុ​ដែល​ត្រី​ថយ​ចុះ ដោយសារតែ​ឆ្នាំនេះ​ទឹកទន្លេ​សាប​ឡើង​យឺត ហើយ​ទឹក​ឡើង​តិច​ជាង​ឆ្នាំ​មុខ​មួយ​ម៉ែត្រ​កន្លះ ដែល​ធ្វើ​ឱ្យ​ប៉ះពាល់​ដល់​ការលូតលាស់​របស់​ត្រី។ លោក​បញ្ជាក់​ថា អាជ្ញាធរ​ខេត្ត​បាន​ត្រៀម​ផែនការ ដើម្បី​ជួយ​ដល់​ប្រជាពលរដ្ឋ​រង​ផល​ប៉ះពាល់​ពី​របប​នេសាទ​នេះ​នៅ​ពេល​មុខ​រួច​ហើយ ប៉ុន្តែ​លោក​មិនបាន​បញ្ជាក់​វិធី​ជួយ​ពលរដ្ឋ​ដោយ​របៀប​ណា​នោះ​ទេ៖ «អាជ្ញាធរ​ដែនដី​និយាយ​យើង​នឹង​ព្យាយាម​ជួយ​រឿង​ហ្នឹង​បាទ​! ហើយ​ជួយ​គាត់​រយៈ​វិធី​ណា​នោះ​អាស្រ័យ​ទៅ​អភិបាលខេត្ត​និង​មន្ត្រី​រដ្ឋាភិបាល​បាទ។ ប៉ុន្តែ​រាល់ថ្ងៃ​អាជ្ញាធរ​កំពុងតែ​ឱ្យ​មេភូមិ​ស្រាវជ្រាវ រក​មើល​មាន​ប្រជាពលរដ្ឋ​ណាខ្លះ​ខ្វះខាត យើង​ហ្នឹង​វិធី​ជួយ​គាត់​តាម​ជាក់ស្ដែង សំខាន់​ជំនាញ​ជលផល​គឺ​រក​មុខរបរ​បន្ថែម​ជូន​គាត់​បាទ»

របាយការណ៍​រដ្ឋបាល​ជលផល​ខេត្ត​បាត់ដំបង​ឱ្យ​ដឹង​ថា មាន​ប្រជា​នេសាទ​ប្រមាណ ១​ម៉ឺន​គ្រួសារ​កំពុង​ប្រកប​របប​នេសាទ​ត្រី​នៅ​តំបន់​បឹង​ទន្លេសាប​ក្នុង​ខេត្ត​បាត់ដំបង ហើយ​ប្រជាពលរដ្ឋ​៥​ពាន់​គ្រួសារ រស់នៅ​ខេត្ត​បាត់ដំបង ក្រៅពីនោះ​អ្នក​នេសាទ​ចំណាក​ស្រុក។

លោក ជួង សុភាព អះអាង​ថា អ្នក​នេសាទ​ប្រមាណ​៤០​ភាគរយ ក្នុងចំណោម ១​ម៉ឺន​គ្រួសារ​រង​ផល​ប៉ះពាល់​ដែល​ប្រឈម​នឹង​ការ​ដាច់​ស្បៀង​នៅ​ពេល​ខាងមុខ ដោយសារ​ផល​ត្រី​ថយ​ចុះ។ លោក​បន្តថា ប្រជាពលរដ្ឋ​ដែល​ប៉ះពាល់​ខ្លាំង​មាន​២​ឃុំ គឺ​ឃុំ​ព្រៃ​ចាស់ និង​ឃុំ​កោះ​ជី​វាំង នៅ​តំបន់​បឹង​ទន្លេសាប​ស្រុក​ឯក​ភ្នំ ដែល​ពួកគាត់​ពឹងផ្អែក​ទៅលើ​របប​នេសាទ​ដើម្បី​រក​ប្រាក់​ចំណូល​ដោះស្រាយ​ជីវភាព​គ្រួសារ ដោយសារ​ពួកគាត់​មិន​អាច​ដាំ​ដុះ​ដូច​ពលរដ្ឋ​នៅ​តំបន់​ផ្សេង​ឡើយ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល