ពលរដ្ឋជិត ៣ម៉ឺនគ្រួសារ (២៩.១៤៥) រស់នៅក្នុងខេត្តចំនួន ៤ តាមដងទន្លេមេគង្គលើកំពុងរងផលប៉ះពាល់ដោយសារទឹកជំនន់លិចលំនៅឋាន ប៉ះពាល់ផលដំណាំរាប់ពាន់ហិកតារ សត្វពាហនៈ ជម្លៀសចេញពីលំនៅឋាន និងមនុស្ស ៤នាក់ស្លាប់ដោយសារលង់ទឹក។
ពលរដ្ឋមួយចំនួនរងគ្រោះដោយទឹកជំនន់នៅខេត្តស្ទឹងត្រែងត្អូញថា ការចែកអំណោយរបស់អាជ្ញាធរមានភាពខ្វះចន្លោះច្រើន ឬមិនបានផ្តល់ជូនពលរដ្ឋរងគ្រោះឲ្យគ្រប់ជ្រុងជ្រោយនោះទេ។
ពលរដ្ឋរងគ្រោះដោយទឹកជំនន់រស់នៅខេត្តស្ទឹងត្រែង ក្រចេះ ត្បូងឃ្មុំ និងខេត្តកំពង់ចាមកំពុងប្រឈមវិបត្តិខ្វះស្បៀងអាហារ សេដ្ឋកិច្ចធ្លាក់ចុះ ក្រោយពីផលដំណាំពួកគេនៅរដូវវស្សាឆ្នាំនេះច្រើនហិកតារខូចខាតទាំងស្រុង។ អ្នកភូមិអំពាវនាវឲ្យរបប លោក ហ៊ុន សែន ចែកអំណោយជូនពលរដ្ឋរងគ្រោះឲ្យពិតប្រាកដ តម្លាភាព និងមិនរើសអើងនិន្នាការនយោបាយ ខណៈអាជ្ញាធរមូលដ្ឋានមួយចំនួនហាក់រើសអើងក្នុងការផ្តល់អំណោយ។
ពលរដ្ឋរងគ្រោះដោយទឹកជំនន់រស់នៅស្រុកសៀមប៉ាង ខេត្តស្ទឹងត្រែងថ្លែងមិនហ៊ានបញ្ចេញឈ្មោះ ឲ្យដឹងនៅថ្ងៃទី៣ សីហាថា ថ្មីៗ នេះអាជ្ញាធរខេត្តស្ទឹងត្រែងបានចុះចែកអំណោយជូនពលរដ្ឋរងគ្រោះដោយទឹកជំនន់ជាច្រើនគ្រួសារ នៅស្រុកសៀមប៉ាង ក៏ប៉ុន្តែមានពលរដ្ឋមួយចំនួនធំ ដែលរងផលប៉ះពាល់ធ្ងន់ធ្ងរ មិនបានទទួលអំណោយមនុស្សធម៌ពីអាជ្ញាធរនោះទេ។ លោកអង្កេតឃើញថា មានពលរដ្ឋខ្លះពុំមែនជាជនរងគ្រោះ បែរជាបានទទួលអំណោយមនុស្សធម៌ពីអាជ្ញាធរទៅវិញ៖ «មិនចែកជូនរងគ្រោះទៅជាចែកខុសជនរងគ្រោះទៅវិញ ទៅឲ្យមេភូមិមេឃុំ បែងចែកសាច់ញត្តិបងប្អូនគេទៅវិញ។ អានេះខ្លះអានោះខ្លះយាប់ណាស់ »។
កាលពីថ្ងៃទី៣ កក្កដាកន្លងទៅ អភិបាលខេត្តស្ទឹងត្រែង លោក ម៉ុម សារឿន បានចុះចែកអំណោយមនុស្សធម៌ជូនពលរដ្ឋជាង ៤រយគ្រួសារ (៤៣៨) គ្រួសារ នៅឃុំស្រែសំបូរ ឃុំថ្មកែវ និងឃុំសន្តិភាព ស្រុកសៀមប៉ាង ខេត្តស្ទឹងត្រែង ដែលរងគ្រោះទឹកជំនន់ហូរចូលទន្លេសេកុង ដោយសារការបាក់ទំនប់វារីអគ្គិសនី សេពានសេណាមណយ ខេត្តអត្តពឺ ប្រទេសឡាវ។ អ្នកភូមិថា មានពលរដ្ឋរាប់រយគ្រួសារទៀត មានជីវភាពខ្វះខាតត្អូញថា ពួកគេមិនបានទទួលអំណោយពីអាជ្ញាធរនៅឡើយទេ។
អ្នកនាំពាក្យគណៈកម្មាធិការជាតិ គ្រប់គ្រងគ្រោះមហន្តរាយ លោក កែវ វី បានបដិសេធមិនបំភ្លឺរឿងនេះទេ ដោយលោកជំរុញឲ្យសួរអនុប្រធានប្រចាំការគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា។
អាស៊ីសេរីបានព្យាយាមទាក់ទងអនុប្រធានប្រចាំការគណៈកម្មាធិការជាតិគ្រប់គ្រងគ្រោះមហន្តរាយ លោក ញឹម វណ្ណដា តែទូរស័ព្ទហៅចូលច្រើនដង គ្មានអ្នកទទួលនៅថ្ងៃទី៣ សីហា។
តែយ៉ាងណា លោក កែវ វី បានប្រាប់កាសែតក្នុងស្រុកថា ខេត្តចំនួន ៤តាមដងទន្លេមេគង្គលើ រងផលប៉ះពាល់ដោយទឹកជំនន់ចំនួនជិត ៣ម៉ឺនគ្រួសារ (២៩.១៤៥) ហើយប្រជាពលរដ្ឋចំនួនជាង ៣ពាន់គ្រួសារ (៣.៤៧៦) ត្រូវជម្លៀសទៅទីទួលមានសុវត្ថិភាពបានចំនួន ២៣ទីតាំង។ លោកថាលំនៅឋានពលរដ្ឋ ១២ខ្នង ត្រូវបានរុះរើដោយសារបាក់ច្រាំងទន្លេ ជម្លៀសសត្វពាហនៈបានជាង ៩ពាន់ក្បាល (៩.៦៣២) លិចសាលារៀនជាង ១៣៦កន្លែង លិចវត្ត ៥៤កន្លែង ក្នុងនោះមានវិហារចាម៧កន្លែង និងមណ្ឌលសុខភាព ៩កន្លែង។ លោកថា ពលរដ្ឋនៅខេត្តក្រចេះរងគ្រោះដោយទឹកជំនន់មានជាង ៣ពាន់គ្រួសារ រួមទាំងគោក្របីត្រូវបានជម្លៀសទៅកាន់ទីទួលសុវត្ថិភាព។ ចំណែកមនុស្ស ៤នាក់ស្លាប់ដោយសារលង់ទឹក ក្នុងនោះមានកុមារ ៣នាក់។ ជនរងគ្រោះ ៤នាក់នោះ ២នាក់ រស់នៅខេត្តស្ទឹងត្រែង ម្នាក់នៅខេត្តក្រចេះ និងម្នាក់ទៀតនៅខេត្តកំពង់ចាម។
ប្រធានអង្គការសម្ព័ន្ធគណនេយ្យភាពសង្គមកម្ពុជា (ANSA) លោក សន ជ័យ យល់ថា ការចែកអំណោយខ្វះចន្លោះ ឬមិនបានចែកជួនពលរដ្ឋរងគ្រោះផ្ទាល់ ទំនងជាអាជ្ញាធរមូលដ្ឋានភូមិ/ឃុំមានការរើសអើងនិន្នាការនយោបាយ និងលម្អៀង។ លោកស្នើសុំឲ្យអាជ្ញាធរជាតិត្រូវចុះពិនិត្យឲ្យបានត្រឹមត្រូវ ចៀសវាងកុំឲ្យពលរដ្ឋឋិតក្នុងភាពងាយរងគ្រោះកាន់តែធ្ងន់៖ «យើងចង់ឃើញការយកចិត្តទុកដាក់ពីរដ្ឋាភិបាល និងផ្តល់ដំណោះស្រាយសមរម្យ បើកាលណាអាជ្ញាធរលម្អៀង ពលរដ្ឋនឹងរងគ្រោះធ្ងន់ធ្ងរ។ ថ្មីៗ លោក ហ៊ុន សែន និងលោក ស ខេង ស្នើសុំឲ្យអាជ្ញាធរឈប់រើសអើងក្នុងការបម្រើពលរដ្ឋ »។
របាយការណ៍អាជ្ញាធរខេត្តស្ទឹងត្រែង បង្ហាញថា ពលរដ្ឋជិត ៥.០០០នាក់ ស្មើនឹងជាង ១.២៨៩រយគ្រួសារ ស្ថិតនៅឃុំចំនួន ៤ ក្នុងស្រុកសៀមប៉ាង ខេត្តស្ទឹងត្រែង ដែលរងការលិចលង់ដោយសារទឹកជំនន់ហូរពីប្រទេសឡាវ ត្រូវបានអាជ្ញាធរជម្លៀសចេញពីផ្ទះសម្បែង និងពុំមានពលរដ្ឋណាម្នាក់ស្លាប់បាត់បង់ជីវិតនោះឡើយ។
ក្រសួងធនធានទឹក និងឧតុនិយមព្យាករថា គិតមកដល់ម៉ោង ១រសៀល ថ្ងៃទី៣ ខែសីហា ស្ថានភាពទឹកជំនន់នៅទន្លេមេគង្គលើ បានបន្តស្រកចុះជាបន្តបន្ទាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។