ពលរដ្ឋមានជម្លោះដីធ្លី និងសង្គមស៊ីវិល ដែលតាមដានករណីជម្លោះដីធ្លីនៅខេត្តព្រះសីហនុ ហៅការចាប់ខ្លួនពលរដ្ឋ ៤នាក់ នៅសហគមន៍អូរខ្សាច់ ខេត្តព្រះសីហនុ គឺជារឿងអយុត្តិធម៌។ ពួកគេយល់ថា តុលាការគួរទម្លាក់ចោលបទចោទ និងដោះលែងពលរដ្ឋទាំងនោះឲ្យមានសេរីភាពឡើងវិញ។
សង្គមស៊ីវិលមើលឃើញថា ការចាប់ខ្លួនពលរដ្ឋ គឺជាការបំពានច្បាប់ ព្រោះពេលក្រុមកងរាជអាវុធហត្ថខេត្តព្រះសីហនុ ចាប់ខ្លួនពលរដ្ឋទាំងនោះ គឺគ្មានដីកានោះទេ ការចាប់ខ្លួននោះទៀតសោតក្នុងពេលពលរដ្ឋកំពុងកាប់ឆ្ការដីរបស់ពួកគេ ដែលកាន់កាប់អស់រយៈពេលជាង ២៥ឆ្នាំមកហើយ។សំណុំរឿងនេះកំពុងស្ថិតក្នុងការឃ្លាំមើលរបស់មន្ត្រីសង្គមស៊ីវិលជាតិ និងអន្តរជាតិ។
កូនប្រុសរបស់លោកស្រី ឡុច ទូច ដែលជាសកម្មជនដីធ្លីម្នាក់និងកំពុងជាប់ឃុំ លោក ហ៊ី រ៉ា ត្អូញត្អែរថា ចាប់តាំងសមត្ថកិច្ចចាប់ខ្លួនលោក ស្រី ឡុច ទូច លោកមិនដែលបានជួបមុខម្តាយរបស់លោកទេ។ ពលរដ្ឋរូបនេះនៅតែអះអាថា ម្តាយរបស់លោកមិនបានរំលោភយកដី ដូចការចោទប្រកាន់នោះទេ។
បច្ចុប្បន្នមាន ក្រុមអ្នកច្បាប់មកពីក្រុមមេធាវីយុត្តិធ៌មជិតដប់នាក់ ស្ម័គ្រចិត្តការពារក្តីជូនពលរដ្ឋរងគ្រោះដីធ្លី ៤នាក់។
អ្នកសម្របសម្រួលនៃសមាគមសម្ព័ន្ធសហគមន៍កសិករកម្ពុជាក្នុងខេត្តព្រះសីហនុ លោក ញិល ភាព ដែលតាមដានដំណើររឿងនេះឲ្យអាស៊ីសេរីដឹងពីដំណើររឿងនេះថា ក្រុមពលរដ្ឋដែលកំពុងរងការចោទប្រកាន់ និងឃុំខ្លួននៅពេលនេះ ពួកគេបានចូលទៅរស់នៅតំបន់សហគមន៍អូរខ្សាច់តាំងពីឆ្នាំ១៩៩២ ដែលកាលនោះវាជាកន្លែងប្រឈមមុខគ្នារវាងកងទ័ពរដ្ឋកម្ពុជា និងក្រុមខ្មែរក្រហម។ លោកបន្តទៀតថា រហូតដល់ឆ្នាំ២០០៧ ស្រាប់តែមានក្រុមអ្នកមានលុយ និងអំណាចនៅក្នុងជួររដ្ឋាភិបាលចោទប្រកាន់ក្រុមពលរដ្ឋថា ចូលរស់នៅលើដីកម្មសិទ្ធិរបស់ពួកគេដោយសំអាងថា ពួកគេមានប្លង់កម្មសិទ្ធិ។
អ្នកតាមដានករណីដីធ្លីរូបនេះឲ្យដឹងទៀតថា ទោះមានការចោទប្រកាន់បែបនេះក្ដី ក៏ក្រុមពលរដ្ឋនៅតែអាចរស់នៅ និងប្រើប្រាស់នៅលើដីមានជម្លោះដដែល។ លោករៀបរាប់ទៀតថា រហូតដល់ថ្ងៃទី៦ ខែឧសភា ស្រាប់តែមានឧកញ៉ា តាន់ តាត់ ដែលជាថៅកែផែស្ងួត តេង ឡាយ និងឈ្មោះ ឡុញ វណ្ណៈ ជាឈ្មួញដីប្តឹងទៅកងរាជអាវុធហត្ថខេត្តព្រះសីហនុឲ្យចាប់ខ្លួនពលរដ្ឋចំនួន ៦នាក់។ ប៉ុន្តែក្រោយមកសមត្ថកិច្ចដោះលែងពលរដ្ឋពីររូបឲ្យនៅក្រៅឃុំ។ លោកបន្តថា ភាគីលោក តាន់ តាត់ និង ឡុញ វណ្ណៈ បានអះអាងថា ពួកគេមានប័ណ្ណកម្មសិទ្ធិលើដីធ្លី កាលពីឆ្នាំ១៩៩៥។
មន្រ្តីសង្គមស៊ីវិលងឿយឆ្ងល់ថា ហេតុអីឈ្មោះ តាន់ តាត់ និង ឡុញ វណ្ណៈ មិនដែលទៅរស់នៅដីជម្លោះផងហេតុអីពួកគេទទួលបានប័ណ្ណកម្មសិទ្ធ។ ជាងនេះទៅទៀត ការចេញប័ណ្ណកម្មសិទ្ធិនេះ គឺចេញក្រោយពេលពលរដ្ឋទៅរស់នៅទីនោះ។ តើការចេញប័ណ្ណនេះស្របទៅតាមច្បាប់ភូមិបាលដែរឬទេ ព្រោះដីនៅតំបន់មានជម្លោះនោះគឺស្ថិតក្នុងបរិវេណដីគម្របព្រៃឈើឆ្នាំ២០០២ដែលរាជរដ្ឋាភិបាលបម្រុងទុកនាពេលកន្លងមក។
អ្នកសម្របសម្រួលសមាគម អាដហុក ប្រចាំខេត្តព្រះសីហនុ អ្នកស្រី ជាប សុធារី ឲ្យដឹងដែរថា ក្រុមពលរដ្ឋមានលិខិតបញ្ជាក់ពីអាជ្ញាធរមូលដ្ឋាន ហើយក្រុមពលរដ្ឋមានលក្ខណៈគ្រប់គ្រាន់ក្នុងនាមជាម្ចាស់លើដីធ្លីរបស់ខ្លួន។ មន្រ្តីសង្គមស៊ីវិលរូបនេះបន្តថា សមាគម អាដហុក កំពុងតាមដានលើសំណុំរឿងយ៉ាងចិត្តទុកដាក់។
កាលពីថ្ងៃទី៦ ខែឧសភា មេបញ្ជាការកងរាជអាវុធហត្ថខេត្តព្រះសីហនុ លោក ហេង ប៊ុនទី បានបញ្ជាកម្លាំងចុះចាប់ពលរដ្ឋចំនួន ៦នាក់ នៅសហគមន៍អូរខ្សាច់ ភូមិ៤ ឃុំអូរត្រេះ ស្រុកស្ទឹងហាវ ខណៈពួកគេកំពុងត្រួសត្រាយសំអាតស្មៅ និងកាប់ព្រៃនៅលើដីមានជម្លោះ។ ប៉ុន្តែក្រោយមកតុលាការសម្រេចដោះលែងពលរដ្ឋពីររូបឲ្យទៅផ្ទះវិញ។
ពលរដ្ឋ ៤នាក់ត្រូវបានតុលាការខេត្តសីហនុសម្រេចចោទប្រកាន់ពីបទ «ប្រើហិង្សាលើអ្នកកាន់កាប់អចលនវត្ថុដោយសុច្ចរិត» ទៅតាមមាត្រាទី២៥៣នៃច្បាប់ភូមិបាល តាមពាក្យបណ្តឹងរបស់លោកឧកញ៉ា តាន់ តាត់ និងឈ្មោះ ឡុញ វណ្ណៈ។ ការចោទប្រកាន់នេះធ្វើឲ្យក្រុមពល រដ្ឋទាំង៤នាក់ប្រឈមមុខជាប់ពន្ធនាគារពី៦ខែទៅ២ឆ្នាំ និងរងការពិន័យរហូតដល់ទៅ២៥លានរៀល។
ពលរដ្ឋ និងសង្គមស៊ីវិលយល់ថា ឈ្មួញដីធ្លីដែលមានលុយ និងអំណាច គឺឧកញ៉ា តាន់ តាត់ ដែលជាថៅកែផែស្ងួត តេង ឡាយ និងឈ្មោះ ឡុញ វណ្ណៈ បានប្រើទឹកលុយបញ្ជាកងរាជអាវុធហត្ថឲ្យចាប់ខ្លួនពលរដ្ឋ និងប្រើប្រព័ន្ធតុលាការចោទប្រកាន់លើពលរដ្ឋក្រីក្រ។
អាស៊ីសេរីបានសុំបំភ្លឺករណីចាប់ខ្លួនពលរដ្ឋនេះពីមេបញ្ជាការកងរាជអាវុធហត្ថខេត្តព្រះសីហនុ លោក ហេង ប៊ុនទី ដែលដឹកនាំកម្លាំងចុះចាប់ពលរដ្ឋនេះ ប៉ុន្តែលោកមិនបានពន្យល់ពីការចាប់ខ្លួននេះទេ ដោយលោករុញឲ្យទៅសួរអ្នកនាំពាក្យកងរាជអាវុធហត្ថលើផ្ទៃប្រទេសជាអ្នកឆ្លើយបំភ្លឺ ទៅ វិញ។
អាស៊ីសេរីបានសុំការបញ្ជាក់ពីភាគី លោក តាន់ តាត់ ប៉ុន្តែនៅពេលលោកដឹងថា អ្នករាយការណ៍ព័ត៌មានរបស់វិទ្យុអាស៊ីសេរីទូរស័ព្ទទៅ លោក តាន់ តាត់ បែរជានិយាយថា ច្រឡំលេខទូរស័ព្ទ និងបិទទូរស័ព្ទឈប់ឆ្លើយតប។
ក្រុមពលរដ្ឋគ្រោងនាំគ្នាទាមទារទៅស្ថាប័នទាក់ទង រួមមាន សាលាខេត្តព្រះសីហនុ តុលាការខេត្តព្រះសីហនុ ក្រសួងដែនដី និងក្រសួងកសិកម្ម ដើម្បីឲ្យមានការដោះលែង និងទម្លាក់បទចោទលើក្រុមពលរដ្ឋទាំង ៤រូបនោះវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។