ពលរដ្ឋ​និង​អាជីវករ​ខេត្ត​ត្បូងឃ្មុំ​អំពាវនាវ​អាជ្ញាធរ​ឲ្យ​ប្រមូល​សំរាម​ជុំវិញ​ផ្សារ​មេមត់

ដោយ សូត សុខប្រាថ្នា
2015-04-24
Share
សំរាម​ផ្សារ​មេមត់ ត្បូងឃ្មុំ ៦២០ សំរាម​នៅ​ចំហៀង​ផ្សារ​មេមត់ ស្រុក​មេមត់ ខេត្ត​ត្បូងឃ្មុំ។ រូបថត​ថ្ងៃ​ទី​២២ ខែ​មេសា ឆ្នាំ​២០១៥
RFA/Saut Sokprathna

អាជីវករ និង​ពលរដ្ឋ​រស់នៅ​បរិវេណ​ផ្សារ​មេមត់ ស្រុក​មេមត់ ខេត្ត​ត្បូងឃ្មុំ អំពាវនាវ​ឲ្យ​អាជ្ញាធរ និង​ម្ចាស់​ផាស៊ី​ផ្សារ គប្បី​ប្រមូល​សំរាម និង​រៀបចំ​សណ្ដាប់ធ្នាប់​ក្នុង​បរិវេណ​ផ្សារ​ឲ្យ​បាន​ស្អាត។ ការ​អំពាវនាវ​នេះ នៅ​ពេល​ដែល​សំរាម​រាយប៉ាយ​ក្នុង​ផ្សារ និង​មាន​ក្លិន​ស្អុយ បង្ក​ផល​ប៉ះពាល់​ដល់​សុខភាព​ពលរដ្ឋ​រស់នៅ​ទីនោះ។

គំនរ​សំរាម​នៅ​រាយប៉ាយ​នៃ​កំណាត់​ក្រោយ​ផ្សារ​កន្លែង​លក់​បន្លែ ត្រី សាច់ និង​នៅ​ក្នុង​តូប​លក់​ដូរ​ខ្លះ​នៃ​ជួរ​ផ្សារ​មេមត់ បង្ហាញ​ថា មិន​សូវ​មាន​អ្នក​សម្អាត​ដិតដល់​នោះ​ឡើយ។ កន្លែង​ខ្លះ​មាន​ក្លិន​ស្អុយ​ស្ទើរ​ទ្រាំ​មិន​បាន ហើយ​ខ្លះ​ទៀត​ក្លាយ​ជា​ជ្រាំ​មាន​ដង្កូវ​ចេញ​ពី​សំរាម​ដែល​នៅ​សេសសល់​ទៀត​ផង។ ពលរដ្ឋ​រស់នៅ​ទីនោះ​បាន​ត្រឹម​រអ៊ូរទាំ ដោយសារ​តែ​ពួក​គាត់​ទ្រាំ​លក់​ដូរ និង​ទ្រាំ​រស់នៅ​ដោយ​ពិបាក។

ពលរដ្ឋ​រស់នៅ​ក្បែរ​កន្លែង​ដាក់​សំរាម លោក អ៊ឹង សុខផេង មាន​ប្រសាសន៍​ថា សំរាម​ក្នុង​ផ្សារ គឺ​មិន​ឃើញ​អ្នក​មក​ប្រមូល​ជាច្រើន​ខែ​មក​ហើយ ទើប​តែ​នៅ​ព្រឹក​ថ្ងៃ​ទី​២២ មេសា ឃើញ​មាន​ប្រមូល​ខ្លះ ប៉ុន្តែ​ប្រមូល​មិន​អស់​ឡើយ ហើយ​តែង​ធ្វើ​បែប​នេះ​រហូត បើ​ទោះ​បី​ជា​ពលរដ្ឋ​ប្រាប់​ទៅ​អាជ្ញាធរ​ឲ្យ​ជួយ​ដោះស្រាយ ក៏​គ្មាន​ប្រយោជន៍​ដែរ៖ «បាទ! ប្រាប់​ទៅ​អាជ្ញាធរ​ភូមិ​ឃុំ គេ​មិន​បាន​យក​ចិត្ត​ទុក​ដាក់​ឲ្យ​យើង​ទេ។ ប៉ះពាល់​យ៉ាង​ម៉េច​ទៅ បើ​សំរាម​នៅ​ក្បែរ​ផ្ទះ​ក្បែរ​សម្បែង​អ៊ីចឹង? តាម​ពិត​ទៅ​ប៉ះពាល់​ប្រជាជន​ដែល​រស់នៅ​ជុំវិញ​គំនរ​សំរាម គឺ​ខូច​សុខភាព​ដល់​ពលរដ្ឋ​ជា​ខ្លាំង»

ពលរដ្ឋ​ម្នាក់​ទៀត អ្នកស្រី ឈាវ ហៀង ចង់​ឲ្យ​អាជ្ញាធរ និង​ម្ចាស់​ផាស៊ី​ផ្សារ គប្បី​យក​សំរាម​ទៅ​ដាក់​កន្លែង​ណា​ផ្សេង​ក្រៅ​ពី​ផ្សារ ជៀសវាង​ធ្វើ​ឲ្យ​ពលរដ្ឋ​មើល​បំណាំ​គ្នា ហើយ​ចេះ​តែ​យក​សំរាម​ដាក់​ក្នុង​ផ្សារ គួបផ្សំ​នឹង​ការ​ប្រមូល​សំរាម​មិន​បាន​ទាន់​ពេលវេលា​ទៀត​នោះ។ អ្នកស្រី​បន្ត​ថា បើ​នៅ​រដូវ​វស្សា​វិញ កន្លែង​ដាក់​សំរាម​ទាំង​នោះ​ក្លាយ​ជា​ភក់​ជ្រាំ កាន់​តែ​ពិបាក​លក់​ដូរ និង​ពិបាក​រស់នៅ​ថែម​ទៀត៖ «ឲ្យ​យក​ទៅ​ដាក់​ណា​ដាក់​ទៅ។ បើ​មិន​អ៊ីចឹង​ទេ មួយ​មក​បោះ ពីរ​មក​បោះ​មិន​ឈប់​ទេ»

ក្រៅ​ពី​បញ្ហា​សំរាម​ហើយ បញ្ហា​សន្តិសុខ​សណ្ដាប់ធ្នាប់​ក្នុង​ផ្សារ គឺ​មិន​មាន​ការ​គ្រប់គ្រង​ឲ្យ​បាន​ត្រឹមត្រូវ​នោះ​ទេ។ ជាក់ស្ដែង កន្លែង​លក់​ដូរ​ដាក់​លក់​ស្ទើរ​តែ​រក​ផ្លូវ​ដើរ​មិន​បាន កន្លែង​ចត​ឡាន​ម៉ូតូ មិន​បាន​រៀបចំ​ឲ្យ​ប្រសើរ ជាដើម។

ទាក់ទង​បញ្ហា​នេះ ម្ចាស់​ម៉ៅការ​ផាស៊ី​ផ្សារ​មេមត់ អ្នកស្រី ផួង បុប្ផា មាន​ប្រសាសន៍​ថា ការ​ប្រមូល​សំរាម​អាច​ស្ទះ​ខ្លះ ពិសេស​នៅ​ក្រោយ​ពេល​ចូល​ឆ្នាំ ព្រោះ​កម្មករ​នាំ​គ្នា​ឈប់​សម្រាក ប៉ុន្តែ​មិន​កកស្ទះ​រាប់​ខែ​ដូច​ការ​លើក​ឡើង​នោះ​ទេ។ អ្នកស្រី​បន្ត​ថា ផល​វិបាក​ត្រង់​ថា មាន​ពលរដ្ឋ​ខ្លះ​មិន​បាន​ចុះ​ឈ្មោះ​បង់​ប្រាក់​ថ្លៃ​ប្រមូល​សំរាម​ទេ ប៉ុន្តែ​នាំ​គ្នា​យក​សំរាម​មក​ចោល​គ្មាន​សណ្ដាប់ធ្នាប់។ លើស​ពី​នេះ អ្នកស្រី​ថា​មក​ពី​អាជ្ញាធរ​គ្មាន​សមត្ថភាព​គ្រប់គ្រង​ពលរដ្ឋ​ទាំង​នោះ និង​ម្យ៉ាង​ទៀត អាជ្ញាធរ​មិន​បាន​សហការ​ជាមួយ​ម្ចាស់​ផាស៊ី​ផ្សារ​ឡើយ៖ «ឲ្យ​ប៉ូលិស​ជួយ​រៀបចំ​ផ្សារ​មិន​ដឹង​នៅ​ណា​ទេ? បើ​ប៉ូលិស​អង្គុយ​សំកុក​នៅ​ក្នុង​បេន​ចាំ​យក​ក្បាល​ឡាន​មាន»

អ្នកស្រី​ថា បើ​ចង់​ឲ្យ​ការ​ប្រមូល​សំរាម​បាន​ស្អាត និង​មាន​សណ្ដាប់ធ្នាប់​ក្នុង​ផ្សារ​នោះ គឺ​ទាល់​តែ​អាជ្ញាធរ​សហការ ពីព្រោះ​ខាង​អ្នកស្រី​មិន​មាន​សិទ្ធិ​អំណាច​ណា​មួយ​បង្ខំ​ឲ្យ​ពលរដ្ឋ​ធ្វើ​តាម​នោះ​ទេ ហើយ​ពលរដ្ឋ​ក៏​មិន​ត្រូវ​បន្ត​ចោល​សំរាម​តាម​តែ​អំពើ​ចិត្ត​នោះ​ដែរ។

ដោយ​ឡែក​អភិបាល​ស្រុក​មេមត់ លោក ចេង ប៊ុណ្ណារ៉ា មាន​ប្រសាសន៍​ថា វា​ជា​ការ​ទទួល​ខុស​ត្រូវ​របស់​ម្ចាស់​ភាស៊ី​ផ្សារ ពីព្រោះ​ជា​អ្នក​យក​លុយ​ពី​គេ។ ចំណែក​សំរាម​តាម​ផ្ទះ ប្រសិន​បើ​ពលរដ្ឋ​មិន​បាន​បង់​ប្រាក់ ហើយ​យក​សំរាម​ទៅ​ចោល​ក្នុង​បរិវេណ​ផ្សារ គប្បី​មាន​ការ​ណែនាំ​ពួក​គាត់​តែ​ម្តង។ លោក​បន្ត​ថា រីឯ​បញ្ហា​សណ្ដាប់ធ្នាប់​ផ្សារ​វិញ ខាង​អាជ្ញាធរ​បាន​ណែនាំ​ដល់​ពលរដ្ឋ​ជាច្រើន​លើក​ច្រើន​សា​មក​ហើយ រហូត​ដល់​មាន​ចាប់​ពលរដ្ឋ​ដែល​សង់​តូប​ខុស​ច្បាប់​ទៅ​ណែនាំ​ផង ប៉ុន្តែ​ពួក​គាត់​នៅ​តែ​បំពាន៖ «ចំណុច​ហ្នឹង​ដែល​យើង​ថា​ត្រូវ​គោរព​ច្បាប់​ទាំងអស់​គ្នា។ ការ​ណែនាំ​មាន​ហើយ ច្បាប់​មាន​ហើយ បង​ប្អូន​មិន​គោរព​តាម​ហ្នឹង​ហើយ ចេះ​តែ​ធ្វើ​ត​គ្នា​អ៊ីចឹង​ទៅ។ តាម​គ្នា​អ៊ីចឹង។ អត់​មាន​អ្នក​ណា​យល់​ដឹង​ពី​ច្បាប់»

អភិបាល​ស្រុក​ដដែល​ថា ប្រសិន​ចង់​ឲ្យ​បញ្ហា​ទាំង​នេះ​អាច​ដោះស្រាយ​បាន គប្បី​មាន​ការ​ចូលរួម​សហការ​ទាំងអស់​គ្នា។

ទោះ​បី​យ៉ាង​ណា​ក៏ដោយ សមាជិក​ក្រុមប្រឹក្សា​ស្រុក​មេមត់ លោក គង់ សំអាន មាន​ប្រសាសន៍​ថា បញ្ហា​នេះ​ទាំង​អាជ្ញាធរ និង​ម្ចាស់​ផាស៊ី​ផ្សារ ហាក់​រុញ​ដាក់​គ្នា​ទៅ​វិញ​ទៅ​មក ដោយ​មិន​មាន​ទំនួល​ខុស​ត្រូវ​ទេ។ លោក​បន្ត​ថា កន្លង​មក​នៅ​អង្គ​ប្រជុំ​ប្រចាំ​ខែ​ម្តងៗ លោក​តែង​លើក​បញ្ហា​ទាំង​នេះ​ជា​បញ្ហា​អាទិភាព ប៉ុន្តែ​ជា​យូរ​មក​ហើយ​នៅ​តែ​គ្មាន​ដំណោះស្រាយ៖ «រឿង​ប្រជាពលរដ្ឋ​គាត់​អាច​បំពេញ​ឲ្យ​បាន ប៉ុន្តែ​សព្វថ្ងៃ​ខ្ញុំ​មើល​ការ​អនុវត្ត​ការងារ​របស់​ផាស៊ី​ហ្នឹង វា​អត់​ត្រឹមត្រូវ»

លោក​យល់​ថា ដើម្បី​ដោះស្រាយ​បញ្ហា​ទាំង​នេះ ទាំង​អាជ្ញាធរ និង​ម្ចាស់​ផ្សារ គប្បី​ជួប​ពិភាក្សា​គ្នា​ជៀសវាង​ចេះ​តែ​រុញ​ការ​ទទួល​ខុស​ត្រូវ​ដាក់​គ្នា និង​ចេះ​តែ​មាន​គំនិត​ស៊ុមគ្រលុំ​គ្នា​នោះ៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល