ក្រុមហ៊ុន គ្លូប៊ល ហ្គ្រីន (ខេមបូឌា) អេនើជី ឌីវេឡុបមេន (Global Green (Cambodia) Energy Development CO., LTD) របស់ឧកញ៉ា ទ្រី ដាលុច បន្តពង្រីកអាជីវកម្មរ៉ែដែកជិត ១០កន្លែង នៅក្នុងខេត្តព្រះវិហារ និងខេត្តស្ទឹងត្រែង ដែលធ្វើឲ្យប៉ះពាល់បរិស្ថាន និងដីស្រែចម្ការរបស់ប្រជាពលរដ្ឋនៅតំបន់នោះ។ សកម្មជនបរិស្ថានព្រួយបារម្ភថា ការធ្វើអាជីវកម្មរ៉ែដែកនេះ នឹងធ្វើឲ្យផលប៉ះពាល់បរិស្ថាន និងសង្គម កាន់តែច្រើនឡើង។
ក្រុមហ៊ុន គ្លូប៊ល ហ្គ្រីន ដែលជាកម្មសិទ្ធិរបស់កូនប្រុសច្បងរបស់ឧកញ៉ា ទ្រី ភាព និងជាអគ្គលេខាធិការរងនៃគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា គឺលោកឧកញ៉ា ទ្រី ដាលុច កំពុងបន្តពង្រីកអាជីវកម្មរ៉ែដែករបស់ខ្លួនបន្ថែមទៀត នៅក្នុងខេត្តព្រះវិហារ និងខេត្តស្ទឹងត្រែង ធ្វើឲ្យប៉ះពាល់ពលរដ្ឋនិងបរិស្ថានជុំវិញតំបន់នោះ។ តំបន់ធ្វើអាជីវកម្មរ៉ែដែក របស់ក្រុមហ៊ុន គ្លូប៊ល ហ្គ្រីន បង្កើនជិត ១០កន្លែងនោះ រួមមាន តំបន់ភ្នំដែក ភ្នំកោះកែវ ភ្នំថ្ម ភ្មំព្នៅ ភ្នំបង្កូវ ភ្នំដំណាក់ត្រា ដែលស្ថិតនៅ ស្រុកឆែប ស្រុកជ័យសែន និងស្រុករវៀង ខេត្តព្រះវិហារ និងមួយកន្លែងទៀតនៅភាគខាងជើងនៃដែនជម្រកសត្វព្រៃព្រៃឡង់ ត្រង់ចំណុចព្រំប្រទល់ខេត្តព្រះវិហារ និងខេត្តស្ទឹងត្រែង។
សមាជិកក្រុមស្នូល បណ្ដាញសហគមន៍ព្រៃឡង់ ខេត្តព្រះវិហារ ដែលបានតាមដានបញ្ហានេះ លោក ខេម សុឃី ប្រាប់វិទ្យុអាស៊ីសេរីនៅថ្ងៃទី៣០ ខែមេសាថា លោកព្រួយបារម្ភខ្លាចគម្រោងធ្វើអាជីវកម្មរ៉ែដែក និងធ្វើឲ្យប៉ះពាល់បរិស្ថាន ដោយមានការឈូសឆាយនូវគម្របព្រៃឈើ និងប៉ះពាល់ដីស្រែចម្ការរបស់អ្នកភូមិ ហើយមិនបានផ្ដល់សំណងសមរម្យដល់ពួកគេ។
លោក ខេម សុឃី៖ «អ៊ីចឹងស្នើសុំឲ្យរដ្ឋាភិបាល ចេញព័ត៌មានឲ្យទូលំទូលាយក្នុងការអភិរក្ស និងការអនុវត្តច្បាប់ឲ្យតឹងរ៉ឹង ចំពោះទៅលើការការពារទៅលើធនធានធម្មជាតិ នៅក្នុងតំបន់អភិរក្សព្រៃឡង់»។
ពលរដ្ឋម្នាក់នៅខេត្តព្រះវិហារ សុំមិនបញ្ចេញឈ្មោះ បានឲ្យដឹងថា សព្វថ្ងៃដីចម្ការស្វាយចន្ទីរបស់ប្រជាពលរដ្ឋជាច្រើនហិកតារនៅតំបន់កោះកែវ ត្រូវបានក្រុមហ៊ុន គ្លូប៊ល ហ្គ្រីន ឈូសឆាយដោយមិនមានសំណងសមរម្យដល់ពួកគេនោះទេ។ លោកថា បច្ចុប្បន្នក្រុមហ៊ុនមួយនេះ កំពុងលាក់បាំងព័ត៌មានមួយចំនួន ដោយពលរដ្ឋសង្ស័យថាក្រុមហ៊ុននេះ បានលួចនាំយករ៉ែមាស ទៅលក់នៅក្រៅប្រទេស ខណៈអាជ្ញាប័ណ្ណរបស់រដ្ឋាភិបាល គឺអនុញ្ញាតឲ្យត្រឹមតែរុករកនិងធ្វើអាជីវកម្មរ៉ែដែកប៉ុណ្ណោះ។
ពលរដ្ឋម្នាក់នៅខេត្តព្រះវិហារ សុំមិនបញ្ចេញឈ្មោះ៖ «យើងវាពិបាកសណ្ឋានថា វាជារ៉ែដែក ឬរ៉ែមាស និងរ៉ែលោហៈ។ ប្រសិនបើរ៉ែដែក វាមិនគួរកើបដាក់ឡានវិញទាំងអស់នោះទេ។ យើងវាសង្ស័យថា រ៉ែមាស ពីព្រោះវារាងក្រហមៗ។ រ៉ែនោះវាក្រហមមែនតែវាមិនដូចមាសតែម្ដងនោះទេ ក្រហមដូចដីក្រហមអ៊ីចឹង»។
ជុំវិញរឿងនេះ វិទ្យុអាស៊ីសេរីមិនអាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងរ៉ែនិងថាមពល លោក អ៊ឹង ឌីប៉ូឡា ដើម្បីសុំការអត្ថាធិប្បាយបានទេ នៅថ្ងៃទី៣០ ខែមេសា ដោយសារទូរស័ព្ទចូលតែគ្មានអ្នកទទួល។ ចំណែកតំណាងក្រុមហ៊ុន គ្លូប៊ល ហ្គ្រីន លោក ហាក់ ស៊ីណាត ក៏វិទ្យុអាស៊ីសេរីមិនអាចទាក់ទងបានដែរ នៅថ្ងៃដដែលនេះ។
ទាក់ទិននឹងបញ្ហានេះ អ្នកសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន យល់ឃើញថា រាល់ការអភិវឌ្ឍន៍ឬវិនិយោគ រដ្ឋាភិបាលត្រូវតែមានការវាយតម្លៃអំពីផលប៉ះពាល់សង្គមនិងបរិស្ថាន ឲ្យត្រឹមត្រូវ និងតម្លាភាព ហើយត្រូវមានការចូលរួមពីប្រជាពលរដ្ឋកំពុងរស់នៅតំបន់នោះជាមុនសិន បើពុំដូច្នោះទេ ការអភិវឌ្ឍន៍ទាំងនោះ មិនបានឆ្លុះបញ្ចាំងពីភាពត្រឹមត្រូវនិងស្របតាមច្បាប់នោះទេ។
លោក អូត ឡាទីន៖ «ពិនិត្យមើលការវិនិយោគរ៉ែនេះ ក្រុមហ៊ុនហាក់បីដូចជាទទួលបានចំណូលច្រើន ក៏ប៉ុន្តែយើងងាកទៅមើលបញ្ហាប្រឈមរបស់ប្រជាពលរដ្ឋវិញ កម្រិតជីវភាពរបស់ប្រជាពលរដ្ឋវាមិនមានភាពល្អប្រសើរពីការធ្វើអាជីវកម្មនេះនោះទេ អ៊ីចឹងខ្ញុំគិតថារដ្ឋាភិបាលគួរតែត្រួតពិនិត្យឡើងវិញ ទៅលើក្រុមហ៊ុនទាំងឡាយណាដែលទទួលបានសិទ្ធិធ្វើសម្បទានជាពិសេសសម្បទានរ៉ែនេះ»។
កាលពីថ្ងៃទី១០ ខែមេសា បណ្ដាញសហគមន៍នៅខេត្តព្រះវិហារ បានចេញសេចក្ដីថ្លែងការណ៍ អំពីការធ្វើអាជីវកម្មរ៉ែដែក របស់ក្រុមហ៊ុន គ្លូប៊ល ហ្គ្រីន ដែលបានធ្វើឲ្យខូចខាតព្រៃសហគមន៍ និងប៉ះពាល់ដល់មុខរបរប្រពៃណីរបស់ជនជាតិដើមភាគតិច ដូចជាការដងជ័រទឹក ដកផ្សិតប៉ក់ ឱសថបុរាណ និងការធ្វើអាជីវកម្មរ៉ែបែបលក្ខណៈគ្រួសារ បណ្ដាលឱ្យពួកគាត់បាត់បង់ប្រាក់ចំណូលសម្រាប់ទ្រទ្រង់ជីវភាព និងធ្វើឲ្យសហគមន៍កាន់តែក្រីក្រថែមទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។