ចាប់ពីពេលនេះតទៅ តំបន់មួយចំនួននៅលើដងទន្លេមេគង្គ ក្នុងខេត្តស្ទឹងត្រែង និងខេត្តក្រចេះ នឹងក្លាយជាតំបន់គ្រប់គ្រងសត្វផ្សោតទន្លេមេគង្គ ទៅតាមការកំណត់របស់រដ្ឋាភិបាល។
អនុក្រឹត្យរដ្ឋាភិបាលចេញ កាលពីថ្ងៃទី២៧ ខែកុម្ភៈ ឱ្យដឹងថា ការកំណត់តំបន់គ្រប់គ្រងសត្វផ្សោតនេះមានគោលបំណងការពារ និងអភិរក្សសត្វផ្សោត ឱ្យមានប្រសិទ្ធភាព សំដៅចូលរួមអភិវឌ្ឍវិស័យអេកូទេសចរណ៍ លើកកម្ពស់សេដ្ឋកិច្ច សង្គម និងជីវភាពពលរដ្ឋ។
ប្រភពដដែលបញ្ជាក់ថា តំបន់គ្រប់គ្រងផ្សោតទន្លេមេគង្គនេះមានប្រវែង ១២០គីឡូម៉ែត្រ ក្នុងនោះខេត្តស្ទឹងត្រែងមានប្រវែង ៣៥ គីឡូម៉ែត្រ និងខេត្តក្រចេះមានប្រវែង ៨៥គីឡូម៉ែត្រ។ តំបន់នេះលាតសន្ធឹងពីប៉ែកខាងក្រោមស្ពានមិត្តភាពកម្ពុជា-ចិន ស្ទឹងត្រែង ក្នុងខេត្តស្ទឹងត្រែង រហូតដល់កោះទ្រង់ក្នុងខេត្តក្រចេះ ដែលមានទំហំសរុប ៦២១គីឡូម៉ែត្រក្រឡា។
ជំរឿនសត្វផ្សោតឆ្នាំ២០២០ បង្ហាញថា មានសត្វផ្សោតត្រឹមតែ ៨៩ក្បាលប៉ុណ្ណោះ ដែលរស់នៅក្នុងទន្លេមេគង្គ ចាប់ពីខេត្តក្រចេះ ដល់ខេត្តស្ទឹងត្រែង។ ការគំរាមកំហែងរបស់សត្វផ្សោត រួមមានការនេសាទខុសច្បាប់ និងការសាងសង់ទំនប់វារីអគ្គិសនីនៅផ្នែកខាងលើនៃទន្លេមេគង្គ។
របាយការណ៍អង្គការមូលនិធិសកលសម្រាប់អភិរក្សធនធានធម្មជាតិ ហៅកាត់ថា WWF បង្ហាញថា សត្វផ្សោតសរុប ១១ក្បាល បានងាប់នៅក្នុងឆ្នាំ២០២២ ។ រីឯសត្វផ្សោតដែលងាប់ក្នុងរយៈពេល ៣ឆ្នាំចុងក្រោយនេះ មានសរុប ២៩ក្បាល៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។