សកម្មជន​ព្រៃឈើ​រក​ឃើញ​ក្រុមហ៊ុន​៣ កាប់​ឈើ​មូល​ធំៗ​ក្នុង​ព្រៃ​ឡង់ និង​តំបន់​ក្បែរ​នោះ

ដោយ ម៉ៅ សុធានី
2020-11-14
Share
ឈើ PNT រវៀង ព្រះវិហារ គំនរ​ឈើ​ក្បែរ​ក្រុមហ៊ុន PNT ស្រុក​រវៀង ខេត្ត​ព្រះវិហារ កាល​ពី​ថ្ងៃ​ទី១១ ខែ​វិច្ឆិកា ឆ្នាំ​២០២០។
រូប​សហគមន៍​ព្រៃឡង់

សកម្មជន​បរិស្ថាន​អះអាង​ថា មាន​ក្រុមហ៊ុន​ចំនួន​៣ គឺ​ក្រុមហ៊ុន ស៊ីងបាយអូថេក ( Think Biotech Co.,Ltd) ក្រុមហ៊ុន ធីង៉ា អភិវឌ្ឍន៍ (THY NGA CO., LTD. DEVELOPMENT AND INVESTMENT) និង​ក្រុមហ៊ុន​ភីអ៊ីនធី (PNT) នៅតែ​បន្ត​សកម្មភាព​កាប់​ឈើ​នៅ​តំបន់​ដែន​ជម្រក​​សត្វព្រៃ​ឡង់ និង​ឈើ​មូល​ធំៗ​ដុះ​តាម​ស្រែចម្ការ​របស់​ពលរដ្ឋ​នៅ​ជាប់​ព្រៃឡង់ ក្នុង​ខេត្ត​ព្រះវិហារ​។ ការ​លើកឡើង​នេះ ក្រោយពី​ពួកគេ បាន​ចុះ​ស្រាវជ្រាវ បទល្មើស​ព្រៃឈើ​នៅ​តំបន់​នោះ រយៈពេល​ជាង ១​សប្ដាហ៍​នា​ពេល​ថ្មីៗ​នេះ។

គំនរ​ឈើ​រាប់​រយ​ដើម មានមុខ​កាត់​ចាប់ពី ៤​តឹក​ឡើង​ទៅ ប្រវែង​ជាង ៥​ម៉ែត្រ ត្រូវ​បាន​ក្រុម​សកម្មជន​បរិស្ថាន និង​ប្រជា​សហគមន៍​ប្រទះឃើញ ក្បែរ​បរិវេណ​ក្រុមហ៊ុន ភីអ៊ីនធី ឋិត​ក្នុង​ឃុំ​រួសរាន់ ស្រុក​រវៀង ខេត្តព្រះវិហារ​។ សកម្មជន​បរិស្ថាន​ថា រថយន្ត​ច្នៃ ៧​គ្រឿង កំពុង​សម្រុក​ដឹក​ឈើ​មូល​ធំៗ​រួមមាន ធ្នង់ នាងនួន ឈ្លីក កកោះ និង ដើមឈើ​ផលិត​ជ័រទឹក ដែល​ដុះ​តាម​ចម្ការ​ស្រែ​អ្នកស្រុក ចូល​ក្នុង​ការដ្ឋាន​របស់​ក្រុមហ៊ុន ភីអ៊ីនធី។

ប្រជា​សហគមន៍​ការពារ​ព្រៃឈើ រស់នៅ​ខេត្ត​ព្រះវិហារ លោក ចាន់ វាសនា ឱ្យ​ដឹង​នៅ​ថ្ងៃ​ទី១៣ វិច្ឆិកា​ថា ពលរដ្ឋ​នៅ​មូលដ្ឋាន​មួយ​ចំនួន បាន​ស៊ី​ឈ្នួល​កាប់​ឈើ​លក់​ឱ្យ​ក្រុមហ៊ុន ភីអ៊ីនធី។ លោក​ថា ក្នុង​ការដ្ឋាន​របស់​ក្រុមហ៊ុន​នេះ មាន​ម៉ាស៊ីន​អារ​ឈើ​ខ្នាត​ធំ កំពុង​ធ្វើ​អាជីវកម្ម​ឈើ​ទ្រង់ទ្រាយ​ធំ ដែល​មាន​មន្ត្រី​យោធា ជិះ​រថយន្ត​ស្លាក​លេខ ខ​.​ម កាង​ការពារ​។ លោក​បញ្ជាក់​ថា ក្នុង​បរិវេណ​ក្រុមហ៊ុន ពុំ​មាន​ឈើ​សម្រាប់​កាប់​ធ្វើ​អាជីវកម្ម​ទៀត​ទេ៖ «ក្រុមហ៊ុន​ហ្នឹង​វា ជួល​ពលរដ្ឋ​យក​ជា​ខែល កាប់​ឈើ​ដឹក ជា​រៀងរាល់ថ្ងៃ ហើយ​គេ​ដាក់​ក្នុង​ម៉ាស៊ីន​ច្រៀក​ជា​រៀងរាល់ថ្ងៃ រោងចក្រ​របស់​វា តែមួយ​កន្លែង តែ​វា​មាន​ទាហាន​យាម អត់​មាន​ឱ្យ​ចូល​បាន​ទេ។ និយាយ​ទៅ​ខ្ញុំ​មានការ​ព្រួយបារម្ភ និង​សោកស្ដាយ ព្រៃឈើ​រលាយ​ហិនហោច ដោយសារ​ក្រុមហ៊ុន​ហ្នឹង»

ចំណែក សកម្មជន​បរិស្ថាន លោក ហេង ស្រស់ ដែល​ចុះ​សង្កេត​រឿង​នេះ ថ្លែង​ថា ក្រុមហ៊ុន​ស៊ីងបាយអូថេក នៅតែ​បន្ត​កាប់​ឈើ​ទ្រង់ទ្រាយ​ធំ ក្នុង​តំបន់​ព្រៃ​ឡង់ រួច​ដឹក​លក់​ឱ្យ​ក្រុមហ៊ុន​អង្គរ​ប្លាយវូដ (Angkor Plywood) នៅ​ជាយ​ក្រុង​ភ្នំពេញ​។ លោក​ថា រីឯ​ក្រុមហ៊ុន​ធីង៉ា​អភិវឌ្ឍន៍​វិញ បាន​បញ្ជូន​កម្លាំង​កម្មករ​រាប់​សិប​នាក់ ចូល​ទៅ​កាប់​ឈើ​ក្នុង​ចម្ការ​ស្រែ​របស់​ពលរដ្ឋ ឋិត​នៅ​ស្រុក​រវៀង ខេត្ត​ព្រះវិហារ​។ លោក​បន្ថែម​ថា ក្រុមហ៊ុន​ទាំងនេះ ធ្វើ​អាជីវកម្ម​ឈើ​ជា​ថ្មី​ទៀត ជាង ១​សប្ដាហ៍​មក​ហើយ ៖ «ជាក់ស្ដែង​យើង​ទទួល​បាន​ឯកសារ​មួយ ដែល​បញ្ជាក់​ថា រដ្ឋបាល​ព្រៃឈើ​បាន​ចេញ​លិខិត ធានា​ឱ្យ​រថយន្ត​អា​រ៉េវ​ទាំងអស់​នោះ ដើម្បី​ធ្វើការ​ដឹកជញ្ជូន​ឈើ មិន​មាន​អ្នកណា​ប៉ះពាល់ មិន​មាន​នរណា​រំខាន​ទៅដល់ ការ​ដឹកជញ្ជូន​ឈើ របស់​ក្រុមហ៊ុន PNT ហ្នឹង​ទេ​។ អ៊ីចឹង​ហើយ យើង​ហ៊ាន​អះអាង​ថា សមត្ថកិច្ច និង​មន្ត្រី​ជំនាញ គឺជា​អ្នក​ចូល​ដៃ​ចូល​ជើង ជាមួយ​ឈ្មួញ កាប់​បំផ្លាញ​ព្រៃឈើ »​។​

អាស៊ីសេរី​មិនទាន់​អាច​ទាក់ទង​តំណាង​ក្រុមហ៊ុន​ទាំង​៣ ដែល​រង​ការ​ចោទប្រកាន់​ថា បន្ត​កាប់​ឈើ​ក្នុង​ព្រៃ​ឡង់​នោះ​បាន​ទេ នៅ​ថ្ងៃ​ទី​១៣ វិច្ឆិកា​។ ទោះជា​យ៉ាងណា ក្រុមហ៊ុន​ស៊ីងបាយអូថេក ធ្លាប់​បាន​ចេញមុខ​បដិសេធ​ថា ក្រុមហ៊ុន​មិន​មាន​ពាក់ព័ន្ធ​នឹង​សកម្មភាព​កាប់​ឈើ​ក្នុង​តំបន់​ព្រៃ​ឡង់​នោះ​ឡើយ។

ចំណែក អ្នកនាំពាក្យ​ក្រសួង​បរិស្ថាន លោក នេត្រ ភក្ត្រា វិញ ចាត់​ទុក​ការ​លើកឡើង​របស់​សកម្ម​ជន​បរិស្ថាន​ថា ជា​ការ​យល់​ច្រឡំ និង​បំផ្លើស​ព័ត៌មាន​។ លោក​បកស្រាយ​ថា គំនរ​ឈើ​ដែល​សកម្មជន​បរិស្ថាន​រក​ឃើញ​នោះ ជា​ឈើ​ដែល​ក្រុមហ៊ុន​ប្រមូល​ផល ក្នុង​អនុ​តំបន់​ចំនួន ៤​ទីតាំង​ផ្សេងៗ​គ្នា ក្នុង​បរិវេណ​ដី​សម្បទាន​ដី​សេដ្ឋកិច្ច​របស់​ក្រុមហ៊ុន ភីអ៊ីនធី។ លោក​បដិសេធ​ថា គ្មាន​ការ​កាប់ និង​ជញ្ជូន​ឈើ​ចេញពី​តំបន់​ព្រៃ​ឡង់​ចូល​ក្រុមហ៊ុន​ទេ ព្រោះ​មន្ត្រី​ឧទ្យានុរក្ស​បាន​ដើរ​ល្បាត​យ៉ាង​ហ្មត់ចត់។

ផ្ទុយ​ពី​ការ​លើកឡើង​របស់​លោក នេត្រ ភក្ត្រា ប្រជា​សហគមន៍​អះអាង​ថា ក្នុង​ទីតាំង​ដី​សម្បទាន​សេដ្ឋកិច្ច​របស់​ក្រុមហ៊ុន មិន​មាន​ឈើ​សម្រាប់​កាប់​ធ្វើ​អាជីវកម្ម​ទៀត​ឡើយ។

មន្ត្រី​ពង្រឹង​សិទ្ធិ​អំណាច​សហគមន៍​នៃ​សមាគម​អាដហុក លោក ប៉ែន ប៊ុណ្ណារ៍ យល់​ថា សកម្មជន​បរិស្ថាន គួរតែ​ប្រមូល​ភស្តុតាង និង​ឯកសារ​ពាក់ព័ន្ធ​នានា បង្ហាញ​ពី​ឧក្រិដ្ឋកម្ម​ព្រៃឈើ​ទាំងនេះ ដាក់​ជូន​ព្រះរាជអាជ្ញា ដើម្បី​ចាត់វិធានការ​ច្បាប់ លើ​ក្រុមហ៊ុន​ទាំងនោះ រួម​ទាំង​អាជ្ញាធរ​ដែល​បណ្ដែតបណ្ដោយ​ផង​ដែរ​។ លោក​ចង់​ឃើញ រដ្ឋមន្ត្រី​ក្រសួង​យុត្តិធម៌​ថ្មី លោក កើត រិទ្ធ អនុវត្ត​ការ​ប្តេជ្ញាចិត្ត​របស់​ខ្លួន ដោះស្រាយ​សំណុំរឿង​ឧក្រិដ្ឋកម្ម​ព្រៃឈើ​ទាំងនេះ​ឱ្យ​មាន​ប្រសិទ្ធភាព​៖ «អយ្យ​ការដែល​តំណាង​ឱ្យ​រដ្ឋាភិបាល ដែល​ការពារ​សុវត្ថិភាព​សន្តិសុខ ឬមួយ​ធនធានធម្មជាតិ លោក​ត្រូវតែ​យក​រឿង​ហ្នឹង​មក​ស៊ើបអង្កេត​។ ប៉ុន្តែ​កន្លងមក យើង​មិនដែល​ឃើញ ធ្វើ​អ៊ីចឹង​សោះ​។ យើង​ឃើញ​ថា ទាល់​តែ​មាន​បណ្ដឹង​ចូល​អយ្យការ បាន​គាត់​ចាប់​ផ្ដើម​ធ្វើ»

សកម្មជន​បរិស្ថាន​អះអាង​ថា ពួកគេ​មាន​ភស្តុតាង​ច្បាស់លាស់ និង​ត្រៀម​ផ្ញើ​របាយការណ៍​ទៅ​ស្ថាប័ន​ពាក់ព័ន្ធ ជាពិសេស​ម្ចាស់​ជំនួយ ដើម្បី​ឱ្យ​មាន​វិធានការ​ច្បាប់ និង​បញ្ឈប់​សកម្មភាព​កាប់​ឈើ​ខុស​ច្បាប់។

ព្រះរាជអាជ្ញា​អម​សាលាដំបូង​ខេត្ត​ព្រះវិហារ លោក ទី សុវណ្ណថាល់ ជំរុញ​ឱ្យ​សកម្មជន​បរិស្ថាន​ដាក់ ភស្តុតាង​រឹងមាំ មក​តំណាង​អយ្យការ ដើម្បី​ឱ្យ​ស្ថាប័ន​របស់​លោក មាន​វិធានការ​តាម​ច្បាប់ ចំពោះ​អ្នក​ពាក់ព័ន្ធ និង​មន្ត្រី​ដែល​បណ្ដែតបណ្ដោយ​។ លោក​បញ្ជាក់​ថា សកម្មជន​បរិស្ថាន ត្រូវ​មាន​ភស្តុតាង និង​ឯកសារ​ច្បាស់លាស់ ដើម្បី​ជា​មូលដ្ឋាន​ក្នុង​ការ​ស៊ើបអង្កេត និង​អនុវត្ត​ច្បាប់៖ «អ្នកណា​ថា ឧក្រិដ្ឋកម្ម​ព្រៃឈើ ឱ្យ​បង្ហាញមុខ​ឱ្យ​បាន​ច្បាស់លាស់​មក​? បើ​ជំនាញ​មិន​ចាប់​ខ្ញុំ​នឹង​ដាក់​ទណ្ឌកម្ម ទៅ​លើ​ជំនាញ​វិញ​។ អ្នកណា​ថា ឧក្រិដ្ឋកម្ម ឱ្យ​រក​ភស្តុតាង និង​បង្ហាញមុខ​?»

អង្គការ​ជាតិ និង​អន្តរជាតិ​បាន​រក​ឃើញ​ថា ក្នុង​រយៈពេល ២០​ឆ្នាំ​ចុង​ក្រោយនេះ ទំហំ​ព្រៃ​ឡង់​ជាង​១​សែន​ហិកតារ (១០២ ៤៣៦) ឬ​ស្មើនឹង​២៤% ត្រូវ​បាន​បាត់បង់ ក្លាយ​ជា​វាលរហោឋាន​។ បន្ថែម​ពី​នេះ​ទៀត គិត​ត្រឹម​ឆ្នាំ​២០១៩ ព្រៃ​ឡង់​ទំហំ​ជិត ៦​ម៉ឺន​ហិកតារ (៥៨ ១៣៨ ) ត្រូវ​បាន​បំប្លែង​ទៅជា​ដីចម្ការ​ដំណាំ ហើយ​មាន​ផ្ទៃដី​តែ​ជាង ១ ពាន់​ហិកតារ (១ ១១១) ប៉ុណ្ណោះ ត្រូវ​បាន​ដាំ​ដុះ​កូនឈើ​ឡើងវិញ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)

មើល​មតិ​ទាំង​អស់.

បញ្ចេញ​មតិយោបល់៖

បញ្ចូលមតិរបស់អ្នកដោយបំពេញទម្រង់ខាងក្រោមជាអក្សរសុទ្ធ។ មតិនឹងត្រូវសម្រេចដោយអ្នកសម្របសម្រួល និងអាចពិនិត្យកែប្រែឲ្យស្របតាម លក្ខខណ្ឌនៃការប្រើប្រាស់ របស់វិទ្យុអាស៊ីសេរី។ មតិនឹងមិនអាចមើលឃើញភ្លាមៗទេ។ វិទ្យុអាស៊ីសេរី មិនទទួលខុសត្រូវចំពោះខ្លឹមសារនៃមតិដែលបានចុះផ្សាយឡើយ។ សូមគោរពមតិរបស់អ្នកដទៃ ហើយប្រកាន់ខ្ជាប់នូវការពិត។

គេហទំព័រ​ទាំងមូល