សហគមន៍ការពារព្រៃឡង់ខែត្រក្រចេះ អះអាងថា បើទោះជាបទល្មើសព្រៃឡង់បានថយចុះបន្តិចក្តី ក៏ប៉ុន្តែនៅតែជាបញ្ហាគួរឲ្យព្រួយបារម្ភ ខណៈអ្នកលួចកាប់បំផ្លាញព្រៃឈើរានយកដី និងឈើមានតម្លៃ ភាគច្រើនជាជនចំណាកស្រុកនៅតែកើតមានដដែល។ ពួកគេរកឃើញថា ពលរដ្ឋចំណាកស្រុកមកពីខែត្រកំពង់ចាម ត្បូងឃ្មុំ និងខែត្រក្រចេះ បានមកដណ្ដើមដីគ្នានៅតំបន់ព្រៃឡង់ កាប់រានធ្វើចម្ការជាបន្តបន្ទាប់។
សហគមន៍ការពារព្រៃឡង់ខែត្រក្រចេះ អំពាវនាវនៅថ្ងៃទី១ កុម្ភៈ ស្នើឲ្យរដ្ឋាភិបាល និងស្ថាប័នពាក់ព័ន្ធ រកមធ្យោបាយទប់ស្កាត់ចលនាកាប់រានដីព្រៃក្នុងតំបន់ព្រៃការពារ បង្កឡើងដោយពលរដ្ឋចំណាកស្រុកឲ្យមានប្រសិទ្ធភាព។
ប្រធានសហគមន៍ការពារព្រៃឡង់ខែត្រក្រចេះ លោក ផៃ ប៊ុនលាង ឲ្យដឹងថា ពលរដ្ឋចំណាកស្រុកបានកាប់រានដីព្រៃឡង់ជាបន្តបន្ទាប់តាំងពីឆ្នាំ២០១៤ ឋិតនៅចំណុចស្ទឹងឆ្លាំង ខាងលិចភូមិយាវ នៅអមសងខាងផ្លូវរបស់ក្រុមហ៊ុនកូរ៉េ ហើយពលរដ្ឋទាំងនោះបានកាប់ព្រៃជារូបមន្តស្បែកខ្លា រួចដាំដំណាំស្វាយចន្ទី និងស្វាយ ជាដើម។
លោកចង់ឲ្យអាជ្ញាធររដ្ឋាភិបាល ចាត់វិធានការដោះស្រាយបញ្ហានេះឲ្យហ្មត់ចត់ ដោយផ្តល់ដីសម្បទានសង្គមកិច្ចជូនពលរដ្ឋទាំងនោះនៅតំបន់ដែលគេកាប់រានរួច និងជូនដំណឹងអប់រំណែនាំឲ្យបញ្ឈប់សកម្មភាពកាប់រាន ព្រមទាំងអនុវត្តច្បាប់ដាក់ទណ្ឌកម្ម ប្រសិនបើពួកគេនៅតែមានះមិនបញ្ឈប់កាប់រានដីព្រៃ។ លោកកត់សម្គាល់ថា ដីព្រៃដែលពួកគេទន្ទ្រានក្នុងមួយគ្រួសារមានចាប់ពីជាង ១ហិកតារដល់ ១០ហិកតារ អស់ប្រហែលជាង ៤០០ហិកតារ។ លោកបារម្ភថា វត្តមានពលរដ្ឋរស់នៅតំបន់នោះ បង្កហានិភ័យខ្ពស់ដល់ធនធានធម្មជាតិ ខណៈពួកគេច្រើនលួចកាប់រានដីព្រៃឡង់ ទន្ទ្រានយកជាសម្បត្តិឯកជនបំពានច្បាប់ នៅគ្រាដែលឆ្មាំអភិរក្ស និងសហគមន៍ធ្វេសប្រហែស៖ « បើគាត់នៅតែបណ្តោយចេះតែលួចហើយ បោះស្លាកព្រំ ដាក់ដីសម្បទានឲ្យគាត់ចែកឲ្យគាត់មួយគ្រួសារ ដូចថាពីរហិកតារអ៊ីចឹងឲ្យច្បាស់លាស់ទៅ ឲ្យគាត់ឈប់ទន្ទ្រាន »។
កាលពីខែមករា ឆ្នាំ២០១៧ មន្ត្រីបរិស្ថាន ៥នាក់ បានកាប់បំផ្លាញដំណាំស្វាយចន្ទី និងស្វាយរបស់ពលរដ្ឋចំណាកស្រុកទាំងនោះជាង ១ពាន់ដើម និងដុតបំផ្លាញខ្ទមចំនួន ២ខ្ទម ដែលគេសង់ក្នុងព្រៃអភិរក្ស។
មេឃុំកំពង់ចាម លោក ឈិត លាង ឲ្យដឹងថា អាជ្ញាធរឃុំបានចុះអប់រំផ្សព្វផ្សាយពលរដ្ឋ ដោយហាមដាច់ខាតមិនឲ្យពួកគេបន្តសកម្មភាពកាប់រានដីព្រៃឡង់បន្តទៀត ហើយអនុញ្ញាតឲ្យអាស្រ័យផលបណ្ដោះអាសន្នលើដីដែលកាប់រានកន្លងមក រង់ចាំក្រុមការងារថ្នាក់ស្រុក និងខែត្រចុះដោះស្រាយ។ លោកថា អាជ្ញាធរឃុំនឹងមិនចុះហត្ថលេខាទទួលស្គាល់ពាក្យស្នើសុំកាន់កាប់ដីធ្លីឲ្យពលរដ្ឋនៅតំបន់នោះទេ៖ « ខ្ញុំគ្រាន់តែណែនាំថា បើកាប់ប៉ុនណា ហើយនៅប៉ុណ្ណឹង អត់មានរើរានទៀត ហើយក៏អត់មានឲ្យចំណាកស្រុកចូលមកថ្មីទៀតទេ គ្រប់គ្រងឲ្យបាន »។
របាយការណ៍អាជ្ញាធរឃុំកំពង់ចាម បង្ហាញថា មានពលរដ្ឋ ១៧០គ្រួសារ ភាគច្រើនជាពលរដ្ឋចំណាកស្រុកដែលមកកាប់ទន្ទ្រានដីក្នុងបរិវេណព្រៃឡង់ អស់ប្រហែលជាង ៤០០ហិកតារ។
ពលរដ្ឋម្នាក់ក្នុងចំណោមពលរដ្ឋជាច្រើនទៀត រស់នៅស្រុកព្រែកប្រសព្វ ដែលបានទៅកាប់រានដីព្រៃនៅតំបន់នោះ ថ្លែងសុំមិនបញ្ចេញឈ្មោះ ឲ្យដឹងនៅថ្ងៃទី១ កុម្ភៈ ថា លោកពុំជំទាស់វិធានការដកហូតដីរបស់រដ្ឋាភិបាលនោះទេ តែលោកសុំឲ្យរដ្ឋាភិបាលប្រតិបត្តិវិធានការនេះឲ្យគ្រប់គ្នា និងមានតម្លាភាព។ លោកបញ្ជាក់ថា ពលរដ្ឋដែលទៅកាប់រានដីព្រៃភាគច្រើន សុទ្ធតែពលរដ្ឋក្រីក្រ ខ្វះខាតដីធ្វើកសិកម្ម បានបង្ខំចិត្តប្រថុយប្រថានកាប់រានដីប្រើប្រាស់ ជាទុនធ្វើចម្ការចិញ្ចឹមជីវិត៖ « គេចូលពីក្នុង ៤ ទៅ ៥គីឡូចំណុច អត់ទៅធ្វើមួយបន្តិច មកធ្វើជាប់នឹងផ្លូវទៅវិញ ហើយផ្លូវហ្នឹង គឺផ្លូវរបស់កូរ៉េ ដែលធ្វើ។ ប្រជាពលរដ្ឋដែលមានផ្លូវស្រួលហើយ ទៅនៅហើយ ទាំងគេទាំងខ្ញុំ »។
ព្រៃឡង់ ឋិតក្នុងចន្លោះខែត្រចំនួនបួន រួមមានខែត្រក្រចេះ ស្ទឹងត្រែង ព្រះវិហារ និងខែត្រកំពង់ធំ ត្រូវរដ្ឋាភិបាលប្រកាសបង្កើតជាដែនជម្រកសត្វព្រៃកាលពីថ្ងៃទី៩ ខែឧសភា ឆ្នាំ២០១៦ មានផ្ទៃដីជាង ៤៣ម៉ឺនហិកតារ (៤៣១.៦៨៣ហិកតារ) ឋិតក្រោមការគ្រប់គ្រងរបស់ក្រសួងបរិស្ថាន ដែលមានកាតព្វកិច្ចធានាកិច្ចគាំពារបរិស្ថាន ការអភិរក្សជីវចម្រុះ និងកិច្ចការពារធម្មជាតិក្នុងតំបន់ព្រៃឡង់ និងត្រូវសហការជាមួយក្រសួងរៀបចំដែនដី និងស្ថាប័នពាក់ព័ន្ធ។
សហគមន៍ការពារព្រៃឡង់បន្ថែមថា អាជ្ញាធរមូលដ្ឋានហាក់ដូចជាស្ទាក់ស្ទើរដោះស្រាយបញ្ហានេះ ព្រោះខ្លាចក្រែងបាត់សំឡេងគាំទ្រនៅពេលបោះឆ្នោតជ្រើសរើសក្រុមប្រឹក្សាឃុំ-សង្កាត់ខាងមុខ។
សហគមន៍ការពារព្រៃឡង់ទាំងបួនខែត្រ ទទូចឲ្យរដ្ឋាភិបាលប្រញាប់បោះបង្គោលកំណត់ព្រំប្រទល់ព្រៃឡង់ជាព្រៃអភិរក្សទាំងបួនខែត្រឲ្យច្បាស់លាស់ ប្រយោជន៍បង្កលក្ខណៈងាយស្រួលក្នុងការអភិរក្ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។