អាជ្ញាធរមានសមត្ថកិច្ចខេត្តកំពង់ឆ្នាំង កាលពីថ្ងៃទី១៣ មិថុនា បានចាប់ខ្លួនមនុស្ស២នាក់ក្រោយពីបានដាក់អន្ទាក់ចាប់សត្វននាលខ្យង ដែលជាប្រភេទសត្វកម្រជិតផុតពូជចំនួន៥ក្បាលនៅក្នុងខេត្តកំពង់ឆ្នាំង។
សមត្ថកិច្ចបានឱ្យដឹងថា ពួកគេទាំងពីរនាក់រស់នៅស្រុក រលាប្អៀរ ខេត្តកំពង់ឆ្នាំង។ សមត្ថកិច្ចកំពុងសាកសួរមុននឹងសម្រេចបញ្ជូនទៅតុលាការ។
សត្វននាលខ្យងទាំង៥ក្បាលនៅរស់រានមានជីវិតនៅឡើយ សមត្ថកិច្ចកំពុងរក្សាទុកនៅប៉ុស្តិ៍នគរបាលរដ្ឋបាលខេត្តកំពង់ឆ្នាំង។
មន្ត្រីសម្របសម្រួលសមាគមសិទ្ធិមនុស្សអាដហុក (Adhoc) ខេត្តកំពង់ឆ្នាំងលោក ស៊ុំ ចាន់គា មានប្រសាសន៍ថា សកម្មភាពដាក់អន្ទាក់ចាប់សត្វស្លាបនៅក្នុងខេត្តកំពង់ឆ្នាំង បានកើតឡើងដោយសារតែប្រជាពលរដ្ឋក្រីក្រ និងគ្មានមុខរបរពិតប្រាកដ៖ «វាជារឿងមួយដែលពិបាកដែរនៅពេលដែលប្រជាពលរដ្ឋមិនដឹងថា អាហ្នឹងជាបទល្មើសទេ។ ការចាប់សត្វស្លាបកម្រហ្នឹងមិនមែនគាត់មិនដឹងទេ។ ប៉ុន្តែប្រហែលជាដោយសារក្រពះ នៅពេលជីវភាពគាត់ធ្លាក់ដុនដាបទៅគឺគាត់រកហើយ»។
អាស៊ីសេរីមិនអាចទាក់ទងអធិការនគរបាលក្រុងកំពង់ឆ្នាំងលោក ឆាយ ខែមរ័ត្ន បានទេដោយសារតែលោកមិនលើកទូរស័ព្ទ។
អង្គការអភិរក្សសត្វព្រៃកម្ពុជាបានរកឃើញសត្វព្រៃចំនួន ១៦ប្រភេទ ជិតផុតពូជនៅកម្ពុជាដែលរួមមានសត្វ ទោសថ្ពាល់លឿង សត្វខ្ទីង ត្រយ៉ងយក្ស រមាំង ខ្លារខិន ទន្សោង ដំរីព្រៃ ស្វាកន្ទុយស ខ្លាពពក ខ្លាធំ ក្ងោក ខ្សឹប ត្រដក់ធំ ភេរោមច្រមុះ ត្មាត និង សត្វត្រយ៉ងចង្កំកស។ ចំណែកឯសត្វ ននាលខ្សង គឺជាប្រភេទសត្វកម្រដែលត្រូវការពារ។
ដោយឡែក សមត្ថកិច្ចខេត្តស្ទឹងត្រែង កាលពីថ្ងៃទី១២ មិថុនា បានចាប់ខ្លួនមនុស្សម្នាក់ដោយសារសម្លាប់សត្វស្វាកន្ទុយស ជាប្រភេទសត្វ ជិតផុតពូជដែរ។
ជនសង្ស័យដែលសមត្ថកិច្ចចាប់ខ្លួនជាកសិកររស់នៅក្នុងភូមិស្វាយរៀង ឃុំតាឡាត ស្រុកសេសានឈ្មោះ ណាំ យ៉ុន អាយុ៣៥ឆ្នាំ បានប្រើកាំភ្លើងខ្យល់បាញ់សម្លាប់ស្វាកន្ទុយស ជាប្រភេទស្វាផិតផុតពូជ កាលពីថ្ងៃទី១២ ខែមិថុនា។
អាជ្ញាធរខេត្តបានធ្វើកំណត់ហេតុប្រគល់ជនសង្ស័យ និងវត្ថុតាងឱ្យមន្ត្រីបរិស្ថានដើម្បីបន្តនីតិវិធី។ ស្វាកន្ទុយសជាប្រភេទស្វាពានរ វារស់នៅភាគខាងកើតទន្លេមេគង្គ នៃតំបន់ខ្ពង់រាបខាងកើត និងឦសានប្រទេសកម្ពុជា។
ស្វាប្រភេទនេះ ក៏មានរស់នៅប្រទេសតាមបណ្ដោយទន្លេមេគង្គ ដូចជាប្រទេសវៀតណាម និងប្រទេសឡាវ។
សហភាពអន្តរជាតិសម្រាប់ការអភិរក្សធម្មជាតិ (International Union for Conservation of Nature) បានដាក់បញ្ចូលពពួកស្វាប្រភេទនេះ ចូលទៅក្នុងបញ្ជីក្រហម ដែលជាបញ្ជីប្រភេទសត្វដែលជិតផុតពូជនៅក្នុងពិភពលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។