ក្រុមយុវជន និងសកម្មជនការពារព្រៃឈើអះអាងថា អាជ្ញាធរខេត្តកំពង់ធំបានបណ្តែតបណ្តោយឱ្យកើតមានសកម្មភាពកាប់រានព្រៃសហគមន៍ទ្រង់ទ្រាយធំ ដែលធ្វើឱ្យវិបត្តិព្រៃឈើកាន់តែរីកធំឡើងពិបាកដោះស្រាយ។ ការលើកឡើងនេះ ក្រោយពីពួកគេបានចុះសិក្សាស្រាវជ្រាវ ពីស្ថានភាពព្រៃសហគមន៍ក្បាលខ្លាក្នុងខេត្តកំពង់ធំ កាលពីសប្ដាហ៍មុន។
ក្រុមយុវជន និង សកម្មជនការពារព្រៃឈើ សង្កេតឃើញថា សកម្មភាពកាប់រានទន្ទ្រានដីព្រៃសហគមន៍ បានក្លាយជាទម្លាប់ពេញនិយមមួយ បន្ទាប់ពីសកម្មភាពកាប់ឈើមានតម្លៃ ធ្វើអាជីវកម្ម និងការដាក់អន្ទាក់ចាប់សត្វព្រៃខុសច្បាប់។ ពួកគេបារម្ភថា ប្រសិនបើរដ្ឋាភិបាល និងអាជ្ញាធរខេត្តនេះ មិនរកមធ្យោបាយដោះស្រាយបញ្ចប់បញ្ហាទាំងនេះទេ ព្រៃអភិរក្សគ្រប់តំបន់ នឹងហិនហោចបន្តិចម្តងៗជារៀងរាល់ថ្ងៃ។
មន្ត្រីសម្របសម្រួលគម្រោងនៃសមាគមបណ្ដាញយុវជនកម្ពុជា (CYN) លោក អូត ឡាទីន ប្រាប់វិទ្យុអាស៊ីសេរី នៅថ្ងៃទី១៤ ខែមីនា ថាព្រៃសហគមន៍ក្បាលខ្លា មានផ្ទៃដីជិត ២ ពាន់ហិកតាកំពុងឋិតក្នុងភាពមិនច្បាស់លាស់ ក្នុងការគ្រប់គ្រង និងការដោះស្រាយ។ លោកចោទថា ទម្លាប់អាក្រក់របស់អាជ្ញាធរ គឺពន្យារពេលមិនដោះស្រាយ បទល្មើសព្រៃឈើ ដែលក្រុមជនល្មើសទើបតែកាប់រានព្រៃថ្មីៗ ហើយបែរជារង់ចាំរហូតដល់ដំណាំស្វាយចន្ទីរ និងដំណាំផ្សេងទៀតរីកធំឡើង ទើបដោះស្រាយ៖ «ពេលបញ្ហាកើតឡើងដំបូងអត់ព្រមកម្រើក អត់ព្រមដោះស្រាយ ដល់ពេលបញ្ហាកាន់តែរីកធំ មានការលំបាកដោះស្រាយ ហើយផ្ដេកផ្ដួលបណ្ដែតបណ្ដោយតាមហ្នឹងទៅ។ សម្រាប់ព្រៃកាន់តែរេចរឹល ហើយទឹកចិត្តអ្នកការពារព្រៃឈើ ព្រៃកាន់តែតូចទៅ ធ្វើឱ្យគាត់បាក់ទឹកចិត្តដែរ ក្នុងការពារព្រៃ»។
កាលពីសប្តាហ៍មុន ក្រុមយុវជន ២៨នាក់ មកពីរាជធានីភ្នំពេញ បានចុះស្រាវជ្រាវ និងសិក្សាពីស្ថានភាពព្រៃសហគមន៍ក្បាលខ្លារយៈពេល ៥ ថ្ងៃ ចាប់ពីថ្ងៃទី៤ ដល់ថ្ងៃទី៨ មីនា។ បេសកកម្មនេះ ពួកគេរកឃើញបទល្មើសកាប់រានដីព្រៃសហគមន៍ និងសកម្មភាពកាប់ឈើមានតម្លៃ ក្នុងដែនអភិរក្សនេះអស់ជាច្រើនហិកតា ដោយជំនួសមកវិញនូវដំណាំស្វាយចន្ទីរ និងដំណាំផ្សេងៗទៀត។ ក្រុមយុវជនថា ប្រជាសហគមន៍ កំពុងវាស់វែង ទំហំព្រៃសហគមន៍ដែលទើបតែកាប់ទន្ទ្រានរយៈពេលជាង ២ ខែចុងក្រោយនេះ ដើម្បីធ្វើរបាយការណ៍ ជូនមន្ត្រីជំនាញដោះស្រាយ។
ប្រធានព្រៃសហគមន៍ក្បាលខ្លាលោក វង់ សាន បានថ្លែងប្រាប់ក្រុមយុវជនថា ព្រៃសហគមន៍នេះ ផ្ដល់ប្រយោជន៍ដល់ពលរដ្ឋចំនួនពីរភូមិ គឺភូមិស្រែចង់ និងភូមិក្បាលខ្លានៃឃុំសណ្តាន់ ស្រុកសណ្ដាន់ ខេត្តកំពង់ធំ។ លោកថា ប្រយោជន៍ព្រៃនេះ តាមរយៈមុខរបរប្រពៃណីរបស់ពលរដ្ឋ ដូចជា រកវល្លិ ជ័រ ផ្ដៅ រកឃ្មុំ បេះផ្សិតក្ងោកលក់ និងចាប់អាពីងលក់នៅពេលទំនេរ។ លោកបារម្ភថា ប្រសិនបើបញ្ហាប្រឈមទាំងឡាយគ្មានការដោះស្រាយពីអាជ្ញាធរឱ្យច្បាស់លាស់ទេចលនាកាប់ព្រៃរានយកដីនឹងកាន់តែធំឡើង ហើយព្រៃនឹងកាន់តែរួមតូច។
វិទ្យុអាស៊ីសេរីមិនទាន់អាចសុំការបំភ្លឺរឿងនេះ ពីអភិបាលស្រុកសណ្តាន់លោក ឡុង គីស៊ឹង និង អភិបាលខេត្តកំពង់ធំលោក ងួន រតនៈ បាននៅឡើយទេ នៅថ្ងៃទី១៤ ខែមីនា ដោយទូរសព្ទហៅចូលច្រើនដង តែគ្មានអ្នកលើក។
សកម្មជនការពារព្រៃឈើ ខេត្តកំពង់ធំលោក ហឿន សុភាព មានប្រសាសន៍ថា ការរកឃើញរបស់ក្រុមយុវជន ជារឿងត្រឹមត្រូវ ព្រោះអាជ្ញាធរធ្វេសប្រហែសច្រើន ក្នុងការអភិរក្សព្រៃឈើ។ លោកថា ទម្លាប់មិនល្អមួយទៀត គឺអាជ្ញាធរតែងតែប្រើលេសឆ្លើយដោះសារ ដែលជាហេតុលើកទឹកចិត្តឱ្យក្រុមជនល្មើស បន្តបំផ្លាញព្រៃឈើ ដោយគ្មានទោសពៃរ៍៖ «រឿងអាក្រក់មួយ នៅពេលដែលក្រុមយុវជន គាត់ស្រាវជ្រាវបានហើយ រៀបចំដាក់ពាក្យបណ្តឹងទៅខាង អាជ្ញាធរ និងសមត្ថកិច្ច តែអាជ្ញាធរមានហេតុផល យកលេសថា ចេះចុះ ពន្យារពេលដល់ក្រុមទាំងអស់នោះ។ នៅតែលើកទឹកចិត្តឱ្យក្រុមបំផ្លាញ កាប់បំផ្លាញបន្ថែមទៀត»។
ព្រៃសហគមន៍ក្បាលខ្លា មានទំហំជិត ២ពាន់ហិកតា (១៨០០) បានបង្កើតឡើងកាលពីឆ្នាំ២០០៦ ដោយទទួលស្គាល់ពីក្រសួងកសិកម្ម កាលពីឆ្នាំ២០១៥។
ប្រជាសហគមន៍ស្រមៃថា ប្រសិនបើព្រៃសហគមន៍នេះ ក្លាយជាតំបន់ទេសចរណ៍ធម្មជាតិ ពលរដ្ឋចំនួនពីរភូមិ នឹងមានជីវភាពធូរធា កាត់បន្ថយសកម្មភាពល្មើសច្បាប់ផ្សេងៗ និងជួយការពារគម្របព្រៃឈើនៅកម្ពុជាល្អប្រសើរ ទប់ទល់នឹងបម្រែបម្រួលអាកាសធាតុ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។