សហគមន៍ព្នងភូមិឡៅកា សង្កាត់សុខដុម ក្រុងសែនមនោរម្យ និងមន្ត្រីអង្គការអាដហុក (ADHOC) ខេត្តមណ្ឌលគិរី រកឃើញឈើមូលដែលសហគមន៍អភិរក្សសម្រាប់ទុកជាឈើច្បោះដងជ័រទឹកលក់ចិញ្ចឹមជីវិតរាប់រយដើម ត្រូវបានគេកាប់ធ្វើអាជីវកម្មរំលោភទៅលើសិទ្ធិគ្រប់គ្រង និងអាស្រ័យផលព្រៃឈើរបស់ជនជាតិដើមភាគតិច។
គល់ឈើប្រមាណ ៣០គល់ និងឈើមូលជាង ២០ដើម ដែលគេកាប់ថ្មីៗ ត្រូវបានសហគមន៍ភូមិឡៅកា សង្កាត់សុខដុម និងមន្ត្រីអង្គការអាដហុក រកឃើញជាវត្ថុតាងបទល្មើសព្រៃឈើដែលសហគមន៍បានប្ដឹងសុំឲ្យអាជ្ញាធរជួយទប់ស្កាត់។
នៅព្រឹកថ្ងៃទី១៨ ខែមករា សមាជិកសហគមន៍ឡៅកា ១០នាក់ និងមន្ត្រីអង្គការសិទ្ធិមនុស្សអាដហុក ពីរនាក់ បានធ្វើដំណើរចូលព្រៃដែនបម្រុងទុកអចិន្ត្រៃយ៍របស់រដ្ឋនាសង្កាត់សុខដុម ស្ថិតនៅចម្ងាយជាង ១០គីឡូម៉ែត្រពីក្រុងសែនមនោរម្យ ចំណុចអូរចុងចារ ដើម្បីប្រមូលវត្ថុតាងជាក់ស្ដែងទាក់ទិនជនល្មើសកាប់យកឈើមូលជាដើមច្បោះរបស់សហគមន៍រក្សាទុកប្រកបរបរដងជ័រទឹក។
មន្ត្រីសម្របសម្រួលអង្គការអាដហុក (ADHOC) ខេត្តមណ្ឌលគិរី លោក សុក រដ្ឋា កត់សំគាល់ថា ដើមច្បោះជាប្រភេទឈើត្រាច គគីរ ប្រមាណ ៣០ដើម ត្រូវគេកាប់រំលំ ដើមខ្លះត្រូវគេអារច្រៀកជាឈើជ្រុងនាំចេញអស់ នៅសល់តែគល់ និងចំនៀរឈើដោយឡែកឈើមូលប្រមាណ ២០ដើម បន្សល់នៅក្នុងព្រៃមិនទាន់អារច្រៀកនៅឡើយ។
លោកថា នេះជាវត្ថុតាងដែលដែលមន្ត្រីអាដហុក រកឃើញនេះគ្រាន់តែជាផ្នែកមួយនៃដើមច្បោះជាច្រើនកន្លែងទៀត ដែលគេកាប់ក្នុងព្រៃរបស់រដ្ឋនេះ៖ «ពិតជាមានការកាប់មែន ឃើញកាប់មែនៗ។ ការកាប់នេះ គ្រាន់តែចោះយកឈើសំខាន់ៗ ធំៗ។ ការកាប់នេះ ពិតដូចចំនួនគាត់អះអាង។ យើងស្រង់រូបភាពធម្មតា គេមិនមែនកាប់មួយកន្លែងទេ គឺគេចោះពិនិត្យជាក់ស្ដែង ព្រៃស្រោងសុទ្ធសាធ»។
ស្ត្រីជនជាតិដើមភាគតិចព្នង ភូមិឡៅកា អ្នកស្រី ផ្លឹក ណាវី ប្តឹងទាមទារសំណងដើមច្បោះផលិតជ័រទឹកដែលសមាជិកសហគមន៍ក្នុងភូមិជាមួយគ្នាកាប់លក់ទៅឲ្យឈ្មួញក្នុងមួយដើម ១លានរៀល។
ជនសង្ស័យដែលមានឈ្មោះក្នុងពាក្យប្ដឹងរួមមានឈ្មោះ ច្រើង ខែន មែវ ចន្ថា ញាន ថៃ និងប្រជាពលរដ្ឋចំណាកស្រុកឈ្មោះតា សឿន។ អ្នកស្រីចាត់ទុកសកម្មភាពកាប់ដើមច្បោះ អ្នកភូមិថា ជាការបំផ្លាញព្រៃឈើដែលអ្នកភូមិអភិរក្សសម្រាប់អាស្រ័យផល និងជាព្រៃអភិរក្សសម្រាប់សុំចុះបញ្ជីជាព្រៃត្រៀមបម្រុងសហគមន៍។
ទាក់ទិនបញ្ហានេះ នាយខណ្ឌរដ្ឋបាលព្រៃឈើខេត្តមណ្ឌលគិរី លោក វង សុកសិរី បញ្ជាក់នៅថ្ងៃទី១៨ ខែមករា ថា ស្ថាប័នលោកបានទទួលរបាយការណ៍នេះហើយ និងកំពុងរៀបចំចុះទៅពិនិត្យទីតាំងនោះនៅថ្ងៃស្អែក។ លោកថា ដើមឈើក្នុងដែនព្រៃបម្រុងទុកអចិន្ត្រៃយ៍គឺជាធនធានធម្មជាតិដែលរដ្ឋការពារ ហេតុនេះសហគមន៍មិនមានសិទ្ធិលក់ ឬកាប់ធ្វើអាជីវកម្មបានឡើយ៖ «ព្រោះដើមឈើជាជារបស់រដ្ឋ គាត់អាចអាស្រ័យផលបាន អ្នកលក់ក៏ខូចអ្នកកាប់ក៏ខុសដែរ។ របាយការណ៍មកដល់ហើយចាំស្អែកខ្ញុំទៅមើល»។
តាមការគ្រោងទុកមន្ត្រីអាដហុក និងរៀបចំឯកសារអន្តរាគមន៍ និងពាក្យបណ្ដឹងសហគមន៍ រួមនឹងរូបថតដែលជាវត្ថុតាងបទល្មើសព្រៃឈើនៅថ្ងៃទី១៩ ខែមករា ជូនស្ថាប័នពាក់ព័ន្ធ និងស្ថាប័នអយ្យការសាលាដំបូងខេត្តស៊ើបអង្កេតករណីនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។