សហគមន៍ជនជាតិដើមភាគតិចខេត្តរតនគិរីគ្រោងប្ដឹងក្រុមហ៊ុនឈូសឆាយដីព្រៃ
2016.01.30
ក្រុមសហគមន៍ភូមិសមុទ្រលើ ឃុំសេដា ស្រុកលំផាត់ ខេត្តរតនគិរី ជួបប្រជុំគ្នានៅសាលាប្រជុំភូមិ នៅថ្ងៃទី២៩ ខែមករា ឆ្នាំ២០១៦ ដើម្បីរៀបចំពាក្យប្ដឹងក្រុមហ៊ុន រត្ន សាខន រឿងឈូសឆាយដីសហគមន៍។
Photo provided
ប្រជាពលរដ្ឋរស់នៅភូមិសមុទ្រលើស្រុកលំផាត់ ខេត្តរតនគិរី ទាមទារឲ្យអាជ្ញាធរពាក់ព័ន្ធចុះដោះស្រាយបញ្ហាដីធ្លីជូនពួកគាត់តាមការសន្យា ពីព្រោះក្រុមហ៊ុន និងមន្ត្រីពាក់ព័ន្ធមិនទាន់បានចាត់វិធានការកាត់ដីជូនអ្នកភូមិតាមការសម្របសម្រួលពីតំណាងរាជរដ្ឋាភិបាលនៅឡើយ។
ប្រជាពលរដ្ឋភូមិសមុទ្រលើជាង ៥០នាក់ នៅថ្ងៃទី២៩ ខែមករា បានជួបប្រជុំគ្នានៅសាលាប្រជុំភូមិរបស់សហគមន៍ដើម្បីពិភាក្សាលើគម្រោងដាក់ពាក្យប្ដឹងក្រុមហ៊ុន រត្ន សាខន ដែលបានរំលោភកិច្ចសន្យាឈូសឆាយដីត្រៀមបម្រុងសហគមន៍។
ការជួបប្រជុំគ្នានេះ ធ្វើឡើងបន្ទាប់ពីក្រុមហ៊ុន រត្ន សាខន បន្តឈូសឆាយដីព្រៃអស់ជាង ៣០០ហិកតារបន្ថែមទៀត ដើម្បីពង្រីកដីសម្បទាន ខណៈអ្នកភូមិកំពុងរង់ចាំដំណោះស្រាយតាមការសន្យារបស់អាជ្ញាធរពាក់ព័ន្ធការកាត់ចេញដីត្រៀមបម្រុងរបស់សហគមន៍ជាង ២ពាន់ហិកតារពីដីសម្បទានរបស់ក្រុមហ៊ុន។
ប្រធានសហគមន៍ភូមិសមុទ្រលើ លោក ទុយ ញ៉េប អះអាងថា អ្នកភូមិនឹងរៀបចំពាក្យប្ដឹងក្រុមហ៊ុនតាមរយៈអង្គការសិទ្ធិមនុស្ស ដើម្បីអន្តរាគមន៍ស្វែងរកដំណោះស្រាយ និងបញ្ឈប់ការរំលោភបំពាន៖ «ឯកឧត្ដម លី ធុច ចុះមកហ្នឹង ២ពាន់ហិកតារ មិនទាន់បានទេ នៅលើក្រុមហ៊ុនទាំងអស់។ ខ្ញុំរៀបចំប្រជុំនេះដើម្បីឲ្យសហគមន៍ធ្វើពាក្យប្ដឹងដើម្បីពឹងពាក់លើអង្គការអាដហុក»។
ដូចគ្នានេះដែរចាស់ទុំប្រចាំភូមិ លោក សល់ ញូ កត់សំគាល់ដែរថា ការអូសបន្លាយពេលវេលាកាត់ដីប្រគល់ជូនអ្នកភូមិជាហេតុធ្វើឲ្យអ្នកភូមិអស់ជំនឿលើការសន្យារបស់ក្រុមហ៊ុន និងមន្ត្រីមូលដ្ឋាន។ម្យ៉ាងវិញទៀតដីព្រៃសហគមន៍កាន់តែច្រើនត្រូវបានក្រុមហ៊ុនរំលោភឈូសឆាយ៖ «ប្រជាពលរដ្ឋមិនយល់ព្រមឲ្យក្រុមហ៊ុនឈូសទេ មិនយល់ព្រមឲ្យបរិស្ថានធ្វើជម្រកសត្វព្រៃក្នុងដីសហគមន៍ទេ អ៊ីចឹងហើយបានជាគេមិនអស់ចិត្តថា ឲ្យមេសហគមន៍ជូនរបាយការណ៍ទៅថ្នាក់លើ»។
ក្រុមហ៊ុន រត្ន សាខន ទទួលបានដីសម្បទានសេដ្ឋកិច្ចជាង ៧ពាន់ហិកតារ ឋិតក្នុងដែនជម្រកសត្វព្រៃលំផាត់ ខេត្តរតនគិរី ដែលជាតំបន់សហគមន៍ភូមិសមុទ្ទលើ បានរស់នៅនឹងអាស្រ័យផលព្រៃឈើតំបន់នោះតាមលក្ខណៈប្រពៃណីជនជាតិដើមភាគតិចច្រើនជំនាន់មកហើយ។ ករណីនេះអ្នកភូមិតវ៉ារក្សាដីតំបន់នោះទុកជាដីត្រៀមបម្រុងអាស្រ័យផលរបស់សហគមន៍។
កាលពីជិតពាក់កណ្ដាលខែកុម្ភៈ បេសកជនតំណាងរាជរដ្ឋាភិបាល លោក លី ធុច ជាទេសរដ្ឋមន្ត្រីរួមជាមួយមន្ត្រីពាក់ព័ន្ធអាជ្ញាធរខេត្តរតនគិរី បានសម្របសម្រួលឲ្យក្រុមហ៊ុន រត្ន សាខន ទទួលយករូបមន្តស្បែកខ្លា ពោលគឺបង្កើតក្រុមការងារចុះសិក្សាកាត់ដីត្រៀមបម្រុងចេញពីដីសម្បទានសេដ្ឋកិច្ចក្រុមហ៊ុនជូនប្រជាពលរដ្ឋតាមការតវ៉ារបស់ពលរដ្ឋ ក៏ប៉ុន្តែរហូតបច្ចុប្បន្នក្រុមការងារសិក្សាវាស់វែងកាត់ដីនេះ នៅមិនទាន់សម្រេចលទ្ធផលជូនប្រជាពលរដ្ឋនៅឡើយ។
ទាក់ទិនករណីនេះដែរ អភិបាលស្ដីទីស្រុកលំផាត់ លោក នូ ថេរ មានប្រសាសន៍បញ្ជាក់ថា ក្រុមការងារបានរៀបចំឯកសារស្ដីពីការស្នើសុំកាត់ដីជូនពលរដ្ឋដាក់ជូនក្រសួងបរិស្ថានដែលជាអ្នកគ្រប់គ្រងតំបន់ដែនជម្រកសត្វព្រៃសម្រេច ក៏ប៉ុន្តែមិនទាន់ឃើញការឆ្លើយតបយ៉ាងណានៅឡើយ។
លោកទទួលស្គាល់ថា ក្រុមហ៊ុនបានឈូសឆាយដីបន្ត ក៏ប៉ុន្តែអាជ្ញាធរបានបញ្ឈប់ការឈូសឆាយនោះវិញ ហើយដោយសារតែក្រុមហ៊ុនភាន់ច្រឡំតំបន់ឈូសឆាយដីសម្បទានទើបធ្វើឲ្យអ្នកភូមិតវ៉ាជាថ្មីនេះ៖ «ខ្ញុំបានចុះទៅហើយ រឿងសំណើបានដាក់ដល់ក្រសួងហើយ ប៉ុន្តែមិនទាន់ធ្លាក់មក។ រឿងឈូសឆាយខ្ញុំបានឲ្យផ្អាកហើយរឿងភ័ន្តច្រឡំគ្នាកន្លែងដី ២ពាន់ហិកតារហ្នឹង»។
រីឯប្រធានទីស្នាក់ការបរិស្ថានដែនជម្រកសត្វព្រៃលំផាត់ គឺលោក ធិម វិចិត្រ អះអាងដែរថា អាជ្ញាធរពាក់ព័ន្ធបានផ្អាកមិនឲ្យក្រុមហ៊ុនឈូសឆាយទៅលើតំបន់ដីមានទំនាស់នោះទេ ពីព្រោះអាជ្ញាធរកំពុងរង់ចាំការសម្រេចពីថ្នាក់ក្រសួង៖ «មានការច្រឡំគ្នាអ្នកចុះវាស់វែង និងអ្នកនៅផ្សេងគ្នា អ៊ីចឹងពេលចុះទៅប្រជាពលរដ្ឋថាត្រង់នេះក្រុមហ៊ុនថា ត្រង់នោះ។ ឥឡូវកន្លែងហ្នឹងគេឲ្យផ្អាកទាំងអស់ហើយ ទាំងប្រជាពលរដ្ឋ ទាំងក្រុមហ៊ុនក៏អត់»។
វិទ្យុអាស៊ីសេរី មិនអាចទាក់ទងតំណាងក្រុមហ៊ុន រត្ន សាខន សុំអធិប្បាយករណីនេះបានទេ នៅថ្ងៃទី២៩ ខែមករា។ ទោះជាយ៉ាងនេះក៏ដោយ មន្ត្រីថ្នាក់មូលដ្ឋាននៃមជ្ឈមណ្ឌលអប់រំច្បាប់សម្រាប់សហគមន៍លោក លោក មាស សុភា ដែលបានចូលរួមសង្កេតការណ៍ករណីទំនាស់ដីធ្លីសហគមន៍ភូមិសមុទ្ទលើអះអាងថា លោកនឹងចុះអង្កេតករណីឈូសឆាយដីជាថ្មីរបស់ក្រុមហ៊ុនរំលោភទៅលើកិច្ចសន្យាកាត់ដីជូនសហគមន៍ លោកអំពាវនាវផងដែរឲ្យអាជ្ញាធរពាក់ព័ន្ធប្រញាប់ដោះស្រាយការតវ៉ារបស់សហគមន៍ដើម្បីបញ្ចប់ជម្លោះដីធ្លីមួយនេះ៖ «ដំណោះស្រាយហ្នឹងមានភាពយឺតយ៉ាវធ្វើឲ្យសហគមន៍កាន់តែអូសបន្លាយពេល។ ខាងខ្ញុំនឹងចុះទៅតាមដាន និងអង្កេតរឿងហ្នឹងឲ្យបានឆាប់ ហើយព្យាយាមពន្លឺគណៈកម្មការហ្នឹងឲ្យបានឆាប់»។
នៅរសៀលថ្ងៃទី២៩ ខែមករា បន្ទាប់ពីបញ្ចប់កិច្ចជួបពិភាក្សាគ្នា អ្នកភូមិសមុទ្រលើគ្រប់ក្រុមគ្រួសារបានផ្ដិតមេដៃលើពាក្យប្ដឹង និងប្រគល់សិទ្ធិជូនតំណាងអ្នកភូមិ ៥នាក់ នាំយកពាក្យប្ដឹងក្រុមហ៊ុន រត្ន សាខន ដាក់ជូនការិយាល័យសមាគមការពារសិទ្ធិមនុស្សអាដហុក នៅថ្ងៃច័ន្ទ សប្ដាហ៍ក្រោយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទពេញនិយម
RFA
- ពលរដ្ឋនៅតំបន់បឹងតាមោក ចោទប្រកាន់អាជ្ញាធរខណ្ឌព្រែកព្នៅថា ប្រើអំពើហិង្សា
- វៀតណាមព្រមានថា ព្រែកជីកហ្វូណនតេជោអាចជួយសម្រួលវត្តមានយោធាចិនក្នុងទឹកដីកម្ពុជាកាន់តែជ្រៅ
- ពលរដ្ឋខ្មែរ-អូស្ត្រាលីម្នាក់ ដែលរិះគន់រដ្ឋាភិបាលកម្ពុជា រងការវាយដំពីជនមិនស្គាល់មុខមួយក្រុម ពេលទៅលេងស្រុកខ្មែរ
- ក្រសួងដែនដីបានហៅអតិថិជនបុរីពិភពថ្មីទៅពិភាក្សា ដើម្បីរកដំណោះស្រាយ
- ការប្រារព្ធពិធីបុណ្យចូលឆ្នាំថ្មី នៅតាមតំបន់មួយចំនួននៅស្រុកសុរិន្ទ
