ដេប៉ូ​អារ​ច្រៀក​ឈើ​ខ្នាត​ធំ​នៅ​បាត​អាង​សេសាន​ក្រោម​ពីរ​ខេត្ត​ស្ទឹងត្រែង​ត្រូវ​បាន​ដុត​​ចោល​ស្ងាត់ៗ

ដោយ វ៉ែន សុមេធ
2019-05-05
អ៊ីម៉ែល
មតិ
Share
បោះពុម្ព
សាឡង់​អូស​ឈើ​បណ្ដែត​ទឹក​នៅ​ទន្លេ​ស្រែពក ក្នុង​ឃុំ​ស្រែគរ ស្រុក​សេសាន ខែត្រ​ស្ទឹងត្រែង កាល​ពី​ថ្ងៃ​ទី​១ ខែ​វិច្ឆិកា ឆ្នាំ​២០១៧។
សាឡង់​អូស​ឈើ​បណ្ដែត​ទឹក​នៅ​ទន្លេ​ស្រែពក ក្នុង​ឃុំ​ស្រែគរ ស្រុក​សេសាន ខែត្រ​ស្ទឹងត្រែង កាល​ពី​ថ្ងៃ​ទី​១ ខែ​វិច្ឆិកា ឆ្នាំ​២០១៧។
រូប​សហគមន៍ស្រែគរ

ពលរដ្ឋ និង​សកម្មជន​បរិស្ថាន អះអាង​ថា ដេប៉ូ​អារ​ច្រៀក​ឈើ​ខ្នាត​ធំ នៅ​តំបន់​បាត​អាង​នៃ​ទំនប់​វារីអគ្គិសនី​សេស​សាន​ក្រោម​ពីរ ក្នុង​ខេត្ត​ស្ទឹងត្រែង ត្រូវ​បាន​ដុត​បំផ្លាញ​ចោល​ដោយ​ស្ងាត់ៗ​។ រីឯ​ចម្រៀក និង​គំនរ​ឈើ​រាប់​សិប​ម៉ែត្រ​គួប ក៏​ត្រូវ​បំផ្លាញ​ចោល​ដែរ ដោយ​មានការ​យាមល្បាត​យ៉ាង​ប្រុង​ប្រយ័ត្ន មិន​អនុញ្ញាត​ឲ្យ​សហគមន៍​មូលដ្ឋាន ថត​យក​រូបភាព និង​វីដេអូ ចេញពី​តំបន់​នោះ​ទេ។

ពលរដ្ឋ​រស់នៅ​ឃុំ​ស្រែគរ និង​សកម្មជន​បរិស្ថាន ឲ្យ​ដឹង​នៅ​ថ្ងៃទី៥ ឧសភាថា រ៉ៃ​អារ​ច្រៀក​ឈើ​ជាង ៥០ និង​គំនរ​ឈើ​រាប់​សិប​ម៉ែត្រគូប ក្នុង​តំបន់​បាត​អាង​ នៃ​ទំនប់​វារីអគ្គិសនី​សេសាន​ក្រោម​ពីរ​ ត្រូវ​ជន​មិន​ស្គាល់​អត្តសញ្ញាណ ដុត​កម្ទេច​ចោល​ទាំង​អស់​​ដោយ​ពុំ​ដឹង​មូលហេតុ។ អ្នកភូមិ​​សង្ស័យ​ថា ការ​ដុត​បំផ្លាញ​ការដ្ឋាន​អារ​ឈើ​ខ្នាត​យក្ស​នេះ ទំនង​ធ្វើឡើង​ដោយ​នគរបាល​របស់​ក្រសួងមហាផ្ទៃ ពុំ​មែន​ជា​មន្ត្រី​អាវុធហត្ថ របស់​គណៈកម្មការ​ជាតិ ទប់ស្កាត់ និង​បង្ក្រាប​បទល្មើស​ព្រៃឈើ​នោះ​ទេ។

ពលរដ្ឋ​រស់នៅ​ឃុំ​ស្រែគរ (​ថ្មី​) ថ្លែង​សុំ​លាក់​ឈ្មោះ ឲ្យ​ដឹង​ថា អ្នកភូមិ​នៅ​មិនទាន់​ប្រាកដ​ថា ស្ថាប័ន​ណាមួយ ចេញមុខ​ដុត​កម្ទេច និង​រុះរើ​ដេប៉ូ​អារ​ឈើ​ខ្នាត​ធំ​នេះ​ទេ ប៉ុន្តែ​ពួកគេ​ឮ​ថា រដ្ឋមន្ត្រី​ក្រសួង​មហាផ្ទៃ លោក ស ខេង ធ្លាប់​ចុះ​ទៅ​ពិនិត្យ​ស្ថានភាព​ព្រៃឈើ​នៅ​តំបន់​នោះ កាលពី​ប៉ុន្មាន​ខែ​មុន៖ «ឈើ​ឆេះ​អស់​រលីង​ហើយ រាប់​រយ​ម៉ែត្រ​គូប ឈើ​ក្នុង​បាត​អាង ទាំង​មូល មិន​មែន​តិច​ទេ។ មុន​ហ្នឹង​គេ​រើ​ចេញ ស ខេង ខែ​មុន​មក​តើ មក​វារី​អគ្គិសនី​សេសាន​ក្រោម​ពីរ»

សកម្មជន​បរិស្ថាន ដែល​ចុះ​សង្កេត​រឿង​នេះ លោក ហេង ស្រស់ ប្រាប់​អាស៊ីសេរី​ថា ក្រុមការងារ​លោក បាន​ព្យាយាម​ចុះ​ទៅ​ពិនិត្យ​ទិដ្ឋភាព​ការបំផ្លាញ​រោងចក្រ​អារ​ឈើ​ខ្នាត​ធំ នៅ​តំបន់​នោះ​ដែរ គឹ​មានការ​រារាំង​ពី​សន្តិសុខ​យាម​នៅ​ច្រក​ចូល​ឃុំ​ស្រែគរ​ថ្មី។ លោក​មន្ទិល​ថា ការ​ដុត​កម្ទេច​គំនរ​ឈើ​ជាច្រើន​ម៉ែត្រ​គួប និង​រ៉ៃ​អារ​ឈើ​ទាំងនោះ ជា​ឆន្ទៈ​អនុវត្ត​ច្បាប់​ព្រៃឈើ ឬក៏​ដើម្បី​បំបាត់​ភស្តុតាង? ខណៈ​ដែល​អាជីវកម្ម​ឈើ​ទាំងនេះ កើតមាន​ភាព​មិន​ប្រក្រតី​ជាច្រើន ទាក់ទិន​ការ​កាប់​បំផ្លាញ ឈើ​ចេញពី​តំបន់​ព្រៃ​អភិរក្ស បន្លំ​ជា​ឈើ​ស្របច្បាប់ បាន​កើតមាន​ច្រើន​ឆ្នាំ​មក​ហើយ៖ «យើង​រីករាយ ក្នុង​ការ​សមត្ថកិច្ច​ធ្វើ​ការ​ត្រឹមត្រូវ ចុះ​ទៅ និង​កម្ទេច​វត្ថុ​ដែល​បង្ក​ឲ្យ​មាន​ការ​បង្ក្រាប​ទីតាំង​អារ​ឈើ​ធំៗ ដូច បាត​អាង​ជា​ដើម វា​ជា​ទីក្រុង​កាប់​ឈើ​ទៅ​ហើយ»

អ្នកនាំពាក្យ​គណៈកម្មការ​ជាតិ ទប់ស្កាត់ និង​បង្ក្រាប​បទល្មើស​ព្រៃឈើ លោក អេង ហ៊ី បដិសេធ​មិន​អធិប្បាយ​រឿង​នេះ លោក​រុញ​ឲ្យ​សួរ​ក្រសួងកសិកម្ម​វិញ៖ «សូម​ឲ្យ​សួរ​ទៅ​ក្រសួង​កសិកម្ម​ផ្ទាល់ ទាក់ទង​ជំនាញ។ ចំពោះ​គណៈកម្មការ​ជាតិ​បាន​បង្ក្រាប​បទ​ល្មើស​ជា​បន្ត​បន្ទាប់ ពាក់ព័ន្ធ​រឿង​ព្រៃ​ឈើ​នេះ »

អាស៊ីសេរី​ពុំ​ទាន់​អាច​​ទាក់ទង​អ្នកនាំពាក្យ​ក្រសួងកសិកម្ម លោក ស្រី វុឌ្ឍី ដើម្បី​សុំ​ការ​អត្ថាធិប្បាយ​ជុំវិញ​រឿង​នេះ​បាន​ទេ នៅ​ថ្ងៃ​ទី៥ ឧសភា។

ក៏​ប៉ុន្តែ​​ពលរដ្ឋ និងក្រុម​កម្មករ​ដែល​ធ្វើការ​ក្នុង​តំបន់​ទំនប់​វារីអគ្គិសនី​សេសាន​ក្រោម​ពីរ​ឲ្យ​ដឹង​ថា ការ​ដុត​កម្ទេច និង​រុះរើ រោងចក្រ​អារ​ឈើ​ខ្នាត​ធំ​នេះ ធ្វើឡើង​ជាង ៣​សប្ដាហ៍​មក​ហើយ​។ ពួកគេ​អះអាង​ថា អាជីវកម្ម​ឈើ​នេះ មាន​ក្រុម​ឈ្មួញ និង​ឧកញ៉ា​មួយ​ចំនួន បាន​យក​លេស​សំអាត​បាត​អាង ប្រមូល​ឈើ​ពី​តំបន់​ឆ្ងាយៗ បន្លំ​ជា​ឈើ​ស្របច្បាប់ កើតមាន​ជាង ៧ឆ្នាំ​មក​ហើយ ដែល​មាន​មន្ត្រី​រដ្ឋបាល​ព្រៃឈើ​ចូល​ដៃជើង។

ទោះ​យ៉ាងណា​ក្ដី មន្ត្រី​ពង្រឹង​សិទ្ធិ​អំណាច​សហគមន៍ នៃ​សមាគម អាដហុក លោក ប៉ែន ប៊ុណ្ណារ៍ យល់​ថា តុលាការ និង​សមត្ថកិច្ច​ជំនាញ ត្រូវ​ស៊ើបអង្កេត​អ្នក​ពាក់ព័ន្ធ​ឧក្រិដ្ឋកម្ម​​ព្រៃ​ឈើ​​នៅ​​តំបន់​​នោះ ឲ្យ​មក​ទទួលខុសត្រូវ​តាមច្បាប់។ លោក​បញ្ជាក់​ថា សមត្ថកិច្ច​ជំនាញ និង​តុលាការ ក៏​ត្រូវ​ស៊ើប​អង្កេត​មន្ត្រី​ជំនាញ រដ្ឋបាល​ព្រៃឈើ​ណា ដែល​ចុះហត្ថលេខា ចេញ​លិខិតអនុញ្ញាត បន្លំ​ឈើ​ខុសច្បាប់​ឲ្យ​ទៅជា​ស្របច្បាប់​នៅ​តំបន់​បាត​អាង​ដែរ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។

ព័ត៌មាន (0)
Share
គេហទំព័រ​ទាំងមូល